« យ៉ាកុប និងគ្រួសាររបស់លោក » ដំណើររឿងព្រះគម្ពីរសញ្ញាចាស់ ( ឆ្នាំ ២០២២ )
« យ៉ាកុប និងគ្រួសាររបស់លោក » ដំណើររឿងព្រះគម្ពីរសញ្ញាចាស់
លោកុប្បត្តិ ២៧–៣៣
យ៉ាកុប និង គ្រួសាររបស់លោក
របៀបដែលព្រះអម្ចាស់រក្សាសេចក្តីសន្យារបស់ទ្រង់
យ៉ាកុប ចាកចេញពីផ្ទះដើម្បីគេចចេញពីបងប្រុស អេសាវរបស់លោកដែលកំពុងខឹង ។ ឪពុករបស់យ៉ាកុប បានផ្តល់ពរជ័យដល់លោកឲ្យរកឃើញ ហើយរៀបការជាមួយស្រ្តីដែលស្រឡាញ់ព្រះអម្ចាស់ ហើយកាន់តាមព្រះបញ្ញត្តិរបស់ទ្រង់ ។
ខណៈពេលដែលយ៉ាកុប កំពុងធ្វើដំណើរ ព្រះអម្ចាស់បានមកជួបលោកក្នុងការនិមិត្តមួយ ។ ទ្រង់បានសន្យាថានឹងគង់នៅជាមួយយ៉ាកុប ជានិច្ច ។ យ៉ាកុប បានសន្យានឹងព្រះអម្ចាស់ថានឹងថ្វាយមួយភាគក្នុងដប់នៃអ្វីៗទាំងអស់ដែលលោកបានទទួល ។
ព្រះអម្ចាស់បានសន្យាយ៉ាកុបថា លោកនឹងមានកូនចៅជាច្រើន ។ តាមរយៈកូនចៅរបស់យ៉ាកុប ក្រុមគ្រួសារទាំងឡាយនៅលើផែនដីនឹងបានទទួលពរជ័យដោយបានស្គាល់ព្រះអង្គសង្រ្គោះ ។ ក្រុមគ្រួសាររបស់យ៉ាកុបនៅក្នុងសម័យបច្ចុប្បន្ន គឺត្រូវបានហៅថាវង្សនៃអ៊ីស្រាអែល ។
លោកុប្បត្តិ ២៨:៣–៤, ១៤; នីហ្វៃទី ១ ១០:១៤
យ៉ាកុប បានធ្វើដំណើរទៅកាន់ដែនដីដែលហៅថា ខារ៉ាន ។ នៅទីនោះលោកបានធ្លាក់ក្នុងអន្លង់ស្នេហ៍ជាមួយស្រ្តីសុចរិតម្នាក់ដែលមានឈ្មោះថា រ៉ាជែល ។
យ៉ាកុប បានយល់ព្រមធ្វើការប្រាំពីរឆ្នាំឲ្យឪពុករបស់នាង ដែលមានឈ្មោះថា ឡាបាន់ ប្រសិនបើ ឡាបាន់ ព្រមឲ្យលោករៀបការជាមួយនឹង រ៉ាជែល ។ ឡាបាន់ ក៏បានយល់ព្រម ។ យ៉ាកុប បានធ្វើការអស់ប្រាំពីរឆ្នាំ ។
ប៉ុន្តែ ឡាបាន់ ចង់ឲ្យ លេអា ដែលជាកូនស្រីច្បងរបស់គាត់រៀបការមុនសិន ។ នៅក្នុងពិធីអាពាហ៌ពិពាហ៌ ឡាបាន់ បានលេងល្បិចជាមួយយ៉ាកុប ហើយបានឲ្យយ៉ាកុប រៀបការជាមួយនឹង លេអា វិញ ។ ប៉ុន្ដែយ៉ាកុបស្រឡាញ់រ៉ាជែល ។ លោកបានសន្យាថានឹងធ្វើការប្រាំពីរឆ្នាំទៀត ប្រសិនបើលោកអាចរៀបការជាមួយនឹងនាង ។ ឡាបាន់ បានយល់ព្រម ហើយក្រុមគ្រួសាររបស់យ៉ាកុប ចាប់ផ្តើមរីកចម្រើន ។
លោកុប្បត្តិ ២៩:២៨–៣៥; ៣០:៣–១៣, ១៧–២៤; យ៉ាកុប ២:២៧–៣០
ឡាបាន់ មិនបានបង់ប្រាក់ឲ្យយ៉ាកុបបានត្រឹមត្រូវនោះទេ ។ ប៉ុន្តែព្រះអម្ចាស់បានប្រទានពរជ័យឲ្យ យ៉ាកុប នូវសត្វជាច្រើន ហើយបានប្រាប់យ៉ាកុប ឲ្យត្រឡប់ទៅផ្ទះវិញ ។
លោកុប្បត្តិ ៣០:៣១, ៤៣; ៣១:១–៧, ១៧–១៨
នៅតាមផ្លូវត្រឡប់ទៅផ្ទះវិញ យ៉ាកុប បានដឹងថា បងប្រុសរបស់លោក អេសាវ និងមនុស្ស ៤០០ នាក់ទៀតកំពុងមកជួបលោក ។
យ៉ាកុប បានគិតថា អេសាវ ប្រហែលជានៅតែខឹងនឹងលោកដដែល ។ យ៉ាកុប បានខ្លាចថាគ្មានសុវត្ថិភាពដល់ក្រុមគ្រួសាររបស់លោក ដូច្នេះលោកបាននាំពួកគេទៅកន្លែងដែលមានសុវត្ថិភាព ហើយបានអធិស្ឋាន ។
យ៉ាកុប បានអធិស្ឋានពេញមួយយប់រហូតដល់ភ្លឺ ។ ព្រះអម្ចាស់បានយាងមកជួបយ៉ាកុប ហើយបានប្រសិទ្ធពរដល់លោក ។ ព្រះអម្ចាស់បានមានបន្ទូលទៅយ៉ាកុបថា លោកនឹងធ្វើជាអ្នកដឹកនាំដ៏អស្ចារ្យលើមនុស្សជាច្រើន ។ ព្រះអម្ចាស់បានប្តូរឈ្មោះរបស់យ៉ាកុប ទៅជាអ៊ីស្រាអែល ។
មិនយូរប៉ុន្មាន អេសាវ និងមនុស្សរបស់គាត់បានរកឃើញយ៉ាកុប និងក្រុមគ្រួសារលោក ។ អេសាវ មិនខឹងនឹងយ៉ាកុបទៀតទេ ។ គាត់បានរត់ទៅជួបយ៉ាកុប ហើយឱបលោក ។ គាត់សប្បាយចិត្តជាខ្លាំងដែលបានឃើញលោក និងក្រុមគ្រួសារលោក ។ យ៉ាកុប ក៏សប្បាយចិត្តដែលបានឃើញ អេសាវ ម្តងទៀតដែរ ។
ព្រះអម្ចាស់បានរក្សាសេចក្តីសន្យារបស់ទ្រង់ចំពោះយ៉ាកុប ពេញមួយជីវិតរបស់លោក ។ យ៉ាកុប បានមកដល់ផ្ទះជាមួយក្រុមគ្រួសារលោក ហើយបានរស់នៅទីនោះ ។ ចាប់ពីពេលនោះមក យ៉ាកុប ត្រូវបានហៅថា អ៊ីស្រាអែល ហើយក្រុមគ្រួសាររបស់លោកត្រូវបានហៅថា សាសន៍អ៊ីស្រាអែល ។ លោកបានបន្តកាន់តាមព្រះបញ្ញត្តិ និងថ្វាយបង្គំព្រះអម្ចាស់ ។