« សុបិនដ៏បំផុសគំនិតរបស់យ៉ូសែប » ដំណើររឿងព្រះគម្ពីរសញ្ញាចាស់ ( ឆ្នាំ ២០២២ )
« សុបិនដ៏បំផុសគំនិតរបស់យ៉ូសែប » ដំណើររឿងព្រះគម្ពីរសញ្ញាចាស់
សុបិនដ៏បំផុសគំនិតរបស់យ៉ូសែប
គ្រួសារមួយពិបាកក្នុងការស្រឡាញ់គ្នាទៅវិញទៅមក
រ៉ាជែល និង យ៉ាកុប បានអធិស្ឋានអស់ជាច្រើនឆ្នាំមកហើយដើម្បីសុំកូនប្រុសម្នាក់ ។ ព្រះអម្ចាស់បានឆ្លើយតបនឹងការអធិស្ឋានរបស់ពួកលោក នៅពេលដែលយ៉ូសែប បានកើតមក ។ យ៉ូសែប គឺជាកូនប្រុសសំណព្វរបស់យ៉ាកុប ហើយលោកបានឲ្យអាវពិសេសមួយទៅយ៉ូសែប ។ កូនប្រុសបងៗ ១០ នាក់ទៀតរបស់យ៉ាកុបបានច្រណែន ។
នៅពេលយ៉ូសែបមានអាយុប្រហែល ១៧ ឆ្នាំ លោកបានមានសុបិនដ៏បំផុសគំនិតមួយថា លោកកំំពុងតែប្រមូលកណ្ដាប់នៅក្នុងស្រែជាមួយនឹងបងប្រុសទាំងឡាយរបស់លោក ។ កណ្ដាប់របស់យ៉ូសែបឈរឡើង ។ ប៉ុន្ដែ កណ្ដាប់របស់ពួកបងប្រុសលោកក្រាបគោរពចំពោះកណ្តាប់របស់យ៉ូសែប ។ នៅពេលយ៉ូសែប បានប្រាប់ដល់ពួកបងប្រុសរបស់លោកអំពីសុបិននេះ នោះពួកគេបានខឹងនឹងលោក ។
ក្រោយមក យ៉ូសែបបានមានសុបិនដ៏បំផុសគំនិតមួយទៀត ។ នៅក្នុងសុបិននោះ ព្រះអាទិត្យ ព្រះចន្ទ និងផ្កាយទាំង ១១ បានក្រាបគោរពដល់លោក ។ យ៉ូសែបបានប្រាប់គ្រួសាររបស់លោកអំពីសុបិននេះ ។ សុបិននេះស្ដាប់ទៅហាក់ដូចជាយ៉ូសែប នឹងគ្រប់គ្រងលើគ្រួសារនេះអញ្ចឹង ។ បងប្រុសទាំងឡាយរបស់យ៉ូសែបរឹតតែខឹងនឹងលោកខ្លាំងជាងមុនទៀត ។ ពួកគេមិនចូលចិត្តសុបិនរបស់លោកទេ ។
នៅថ្ងៃមួយ ពួកបងប្រុសរបស់យ៉ូសែបបានចេញពីផ្ទះទៅឲ្យចំណីចៀមនៅទីឆ្ងាយ ។ យ៉ាកុបបានឲ្យយ៉ូសែបទៅមើលពួកគេ ។
ពួកបងប្រុសមួយចំនួនរបស់យ៉ូសែបចង់សម្លាប់លោកចោល ។ ពួកគេបានយកអាវរបស់យ៉ូសែប ហើយបោះលោកចូលទៅក្នុងអណ្តូងមួយ ។
ខណៈដែលយ៉ូសែបនៅក្នុងអណ្តូង នោះពួកបងប្រុសរបស់លោកបានឃើញអ្នកដំណើរទៅស្រុកអេស៊ីព្ទ ។ ពួកបងប្រុសទាំងនោះបានសម្រេចចិត្តលក់យ៉ូសែប ឲ្យធ្វើជាទាសកររបស់អ្នកធ្វើដំណើរនោះ ក្នុងតម្លៃប្រាក់ ២០ ដួង ។
បន្ទាប់មក ពួកបងប្រុសរបស់យ៉ូសែបបានប្រឡាក់ឈាមសត្វពពែនៅលើអាវរបស់លោក ។ ពួកបងប្រុសទាំងនេះបានទៅឯឪពុករបស់ពួកគេ យ៉ាកុប ហើយបានបង្ហាញអាវនោះដល់លោក ។ ពួកគេបានកុហកយ៉ាកុប ហើយបានប្រាប់លោកថា សត្វព្រៃសាហាវៗបានសម្លាប់យ៉ូសែប ។
យ៉ាកុបបានយំ ព្រោះលោកបានគិតថា យ៉ូសែបបានស្លាប់ហើយ ។
ប៉ុន្ដែ យ៉ូសែបនៅរស់នៅឡើយ ។ លោករស់នៅឆ្ងាយពីផ្ទះនៅឯស្រុកអេស៊ីព្ទជាទាសករគេ ។