« ថ្ងៃទី ១៩–២៥ ខែ ធ្នូ ។ បុណ្យគ្រីស្ទម៉ាស់ ៖ ‹ យើងបានរង់ចាំទ្រង់ ហើយទ្រង់នឹងជួយសង្គ្រោះយើង › » ចូរមកតាមខ្ញុំ—សម្រាប់បុគ្គលម្នាក់ៗ និងក្រុមគ្រួសារ ៖ ព្រះគម្ពីរសញ្ញាចាស់ ឆ្នាំ ២០២២ ( ឆ្នាំ ២០២១ )

« ថ្ងៃទី ១៩–២៥ ខែ ធ្នូ ។ បុណ្យគ្រីស្ទម៉ាស់ » ចូរមកតាមខ្ញុំ—សម្រាប់បុគ្គលម្នាក់ៗ និងក្រុមគ្រួសារ ៖ ឆ្នាំ ២០២២

ដ្បិតមានបុត្រ ១ កើតដល់យើង ដោយ ស៊ីម៉ូន ឌូវី

ថ្ងៃទី ១៩–២៥ ខែ ធ្នូ

បុណ្យគ្រីស្ទម៉ាស់

« យើងបានរង់ចាំទ្រង់ ហើយទ្រង់នឹងជួយសង្គ្រោះយើង »

នារដូវបុណ្យគ្រីស្ទម៉ាស់នេះ សូមពិចារណាពីរបៀបដែលព្រះគម្ពីរសញ្ញាចាស់បានពង្រឹងទីបន្ទាល់របស់បងប្អូនអំពីព្រះយេស៊ូវគ្រីស្ទ នៅពេញមួយឆ្នាំនេះ ។

កត់ត្រាចំណាប់អារម្មណ៍របស់បងប្អូន

ព្រះគម្ពីរសញ្ញាចាស់នាំមកនូវវិញ្ញាណនៃការស្រេកឃ្លាននៃការចូលរួម ។ តាមរបៀបនោះហើយ ដែលព្រះគម្ពីរសញ្ញាចាស់គឺដូចជារដូវបុណ្យគ្រីស្ទម៉ាស់ដែរ ។ ចាប់ផ្តើមជាមួយលោកអ័ដាម និងនាងអេវ៉ា ដែលជាលោកអយ្យកោក្នុងព្រះគម្ពីរសញ្ញាចាស់ ជាព្យាការី ជាកវី និងជាបុគ្គលដែលទន្ទឹងរង់ចាំឲ្យមានថ្ងៃមួយដ៏ល្អប្រសើរជាងមុន ដែលពោរពេញទៅដោយក្តីសង្ឃឹមសម្រាប់ការបន្ត និងការជួយសង្រ្គោះដោយព្រះមែស៊ី ។ ហើយសាសន៍អ៊ីស្រាអែលត្រូវការក្តីសង្ឃឹមនោះជាញឹកញាប់—មិនថាពួកគេស្ថិតក្នុងសេវកភាពនៅស្រុកអេស៊ីព្ទ ឬបាប៊ីឡូន ឬ ត្រូវជាប់ជាឈ្លើយដោយព្រោះតែអំពើបាប ឬការបះបោររបស់ពួកគេនោះទេ ។ ពេលឆ្លងកាត់រឿងទាំងនេះ ពួកព្យាការីបានរំឭកដល់ពួកគេថា ព្រះមែស៊ី ដែលជាអង្គជួយសង្រ្គោះ នឹងយាងមក « ប្រកាសប្រាប់ពីសេចក្តីប្រោសលោះដល់ពួកឈ្លើយ » ( អេសាយ ៦១:១ ) ។

ក្តីសង្ឃឹមនោះបានចាប់ផ្តើមដឹង នៅពេលព្រះយេស៊ូវគ្រីស្ទបានប្រសូតនៅឯបេថ្លេហិម ។ អង្គជួយសង្រ្គោះដ៏មហិមានៃសាសន៍អ៊ីស្រាអែលបានប្រសូតនៅក្នុងក្រោលសត្វ ហើយផ្ទំនៅក្នុងស្នូក ( សូមមើល លូកា ២:៧ ) ។ ប៉ុន្តែទ្រង់មិនមែនត្រឹមតែជាអង្គជួយសង្រ្គោះនៃសាសន៍អ៊ីស្រាអែលពីបុរាណប៉ុណ្ណោះទេ ។ ទ្រង់បានយាងមកដើម្បីជួយសង្រ្គោះបងប្អូន—ដើម្បីរងអស់ទាំងសេចក្តីឈឺចាប់របស់បងប្អូន ដើម្បីផ្ទុកអស់ទាំងសេចក្តីទុក្ខព្រួយរបស់បងប្អូន ដើម្បីត្រូវវាយដំ ដោយព្រោះអំពើទុច្ចរិតរបស់បងប្អូន ដើម្បីឲ្យស្នាមរំពាត់របស់ទ្រង់បានព្យាបាលដល់បងប្អូន ( សូមមើល អេសាយ ៥៣:៤–៥ ) ។ នេះជាដើមទងដែលពិធីបុណ្យគ្រីស្ទម៉ាស់ពោរពេញដោយការចូលរួមដ៏រីករាយ សូម្បីតែនៅជំនាន់នេះក្តី ។ ព្រះមែស៊ីបានយាងមកកាលពី ២,០០០ ឆ្នាំមុន ហើយទ្រង់នៅបន្តយាងមកនៅក្នុងជីវិតរបស់យើង នៅពេលណាដែលយើងស្វែងរកទ្រង់ ។

គំនិតយោបល់សម្រាប់ការសិក្សាព្រះគម្ពីរផ្ទាល់ខ្លួន

ខ្ញុំរីករាយក្នុងព្រះប្រោសលោះរបស់ខ្ញុំ ។

បុណ្យគ្រីស្ទម៉ាស់ត្រូវបានស្គាល់ថាជារដូវកាលដ៏រីករាយមួយ ពីព្រោះតែអំណរដែលព្រះយេស៊ូវគ្រីស្ទបាននាំមកឲ្យពិភពលោកនេះ ។ សូម្បីតែជនដែលពុំបានថ្វាយបង្គំព្រះយេស៊ូវជាបុត្រារបស់ព្រះក្តី ក៏ជាញឹកញាប់អាចទទួលបានអារម្មណ៍នៃសុភមង្គលពីបុណ្យគ្រីស្ទម៉ាស់នេះផងដែរ ។ សូមពិចារណាពីអំណរដែលបងប្អូនទទួលបាន ដោយសារព្រះវរបិតាសួគ៌បានបញ្ជូនព្រះរាជបុត្រារបស់ទ្រង់មក ។

ជាច្រើនសតវត្សរ៍ពីមុនព្រះអង្គសង្រ្គោះបានប្រសូតមក ពួកព្យាការីនៃព្រះគម្ពីរសញ្ញាចាស់ក៏មានអំណរដែរ កាលដែលពួកលោកនិយាយអំពីការយាងមករបស់ព្រះមែស៊ី ។ សូមអានវគ្គបទគម្ពីរដូចតទៅនេះ ហើយសូមគិតអំពីមូលហេតុដែលវគ្គបទគម្ពីរទាំងនេះ មានតម្លៃចំពោះអស់អ្នកដែលទន្ទឹងរង់ចាំដល់បេសកកម្មរបស់ព្រះអង្គសង្រ្គោះ ៖ ទំនុកដំកើង ៣៥:៩; អេសាយ ២៥:៨–៩; ៤៤:២១–២៤; ៥១:១១; សេផានា ៣:១៤–២០; ម៉ូសេ ៥:៥–១១ ។ ហេតុអ្វីវគ្គបទគម្ពីរទាំងនេះមានតម្លៃចំពោះបងប្អូន ?

សូមមើលផងដែរ រ័សុល អិម ណិលសុន « Joy and Spiritual Survival » Ensign ឬ Liahona ខែ វិច្ឆិកា ឆ្នាំ ២០១៦ ទំព័រ ៨១–៨៤ ។

ទីសម្គាល់អាចជួយខ្ញុំឲ្យចងចាំដល់ព្រះយេស៊ូវគ្រីស្ទ ។

ទំនៀមទម្លាប់ជាច្រើនដែលទាក់ទងនឹងបុណ្យគ្រីស្ទម៉ាស់អាចមានអត្ថន័យជាទីសម្គាល់ ដែលចង្អុលបង្ហាញយើងទៅកាន់ព្រះគ្រីស្ទ ។ ការតុបតែងផ្កាយដែលមានរាងផ្សេងៗតំណាងឲ្យផ្កាយដ៏ភ្លឺ ដែលរះនៅរាត្រីនៃការប្រសូតរបស់ព្រះយេស៊ូវ ( សូមមើល ម៉ាថាយ ២:២ ) ។ ក្រុមអ្នកច្រៀងចម្រៀងជូនពរអាចរំឭកយើងពីពួកទេវតា ដែលបានបង្ហាញព្រះកាយដល់ពួកអ្នកគង្វាល ( សូមមើល លូកា ២:១៣–១៤ ) ។ នៅពេលបងប្អូនសិក្សាព្រះគម្ពីរសញ្ញាចាស់នៅឆ្នាំនេះ បងប្អូនប្រហែលជាសង្កេតឃើញថាមានទីសម្គាល់ជាច្រើនពីព្រះអង្គសង្រ្គោះ ។ ទីសម្គាល់មួយចំនួនត្រូវបានរៀបរាប់ដូចខាងក្រោមនេះ ។ សូមពិចារណាធ្វើការសិក្សាខគម្ពីរទាំងនេះ និងកត់ត្រាអ្វីដែលខគម្ពីរទាំងនេះបង្រៀនបងប្អូនអំពីទ្រង់ ។

កូនចៀម ( លោកុប្បត្តិ ២២:៨; និក្ខមនំ ១២:៥; ពេត្រុស ទី១ ១:១៨–២០ ) ។

នំម៉ាន៉ា ( និក្ខមនំ ១៦:៤, ១២–២១, ៣១; ចោទិយកថា ៨:៣; យ៉ូហាន ៦:៣០–៤០ ) ។

ទឹក ( និក្ខមនំ ១៧:១–៦; យេរេមា ២:១៣; អេសេគាល ៤៧:១–១២; យ៉ូហាន ៤:៧–១៤ ) ។

ពស់លង្ហិន ( ជនគណនា ២១:៤–៩; យ៉ូហាន ៣:១៤–១៥ ) ។

ថ្មដា ( សាំយូអែល ទី១ ២:២; សាំយូអែល ទី២ ២២:២–៣; ទំនុកដំកើង ១១៨:២២–២៣; អេសាយ ២៨:១៦; អេភេសូរ ២:២០ ) ។

លំពង់ ( អេសាយ ១១:១–២; យេរេមា ២៣:៥; ៣៣:១៥ ) ។

ពន្លឺ ( ទំនុកដំកើង ២៧:១; អេសាយ ៩:២; ៦០:១៩; មីកា ៧:៨; យ៉ូហាន ៨:១២ ) ។

តើទីសម្គាល់ វគ្គបទគម្ពីរ និងដំណើររឿងអ្វីខ្លះទៀតដែលបងប្អូនបានរកឃើញនៅក្នុងបទគម្ពីរ ដែលថ្លែងទីបន្ទាល់អំពីព្រះយេស៊ូវគ្រីស្ទ ?

សូមមើលផងដែរ នីហ្វៃទី២ ១១:៤; ម៉ូសាយ ៣:១៤–១៥; ម៉ូសេ ៦:៦៣; « គំរូ ឬនិមិត្តរូបទាំងឡាយអំពីព្រះគ្រីស្ទ » នៅក្នុងសេចក្តីណែនាំដល់បទគម្ពីរទាំងឡាយ « ព្រះយេស៊ូវគ្រីស្ទ » នៅលើគេហទំព័រ scriptures.ChurchofJesusChrist.org ។

« ព្រះនាមទ្រង់ថា ព្រះដ៏ជួយគំនិតយ៉ាងអស្ចារ្យ » ។

ព្រះយេស៊ូវគ្រីស្ទត្រូវបានហៅតាមព្រះនាម និងព្រះគោរមងារខុសៗគ្នា ។ តើបងប្អូនរកឃើញព្រះគោរមងារអ្វីខ្លះនៅក្នុងខគម្ពីរដូចខាងក្រោមនេះ ? ទំនុកដំកើង ២៣:១; ៨៣:១៨; អេសាយ ៧:១៤; ៩:៦; ១២:២; ៦៣:១៦; អេម៉ុស ៤:១៣; សាការី ១៤:១៦; ម៉ូសេ ៧:៥៣ ។ តើព្រះគោរមងារអ្វីដែលបងប្អូនអាចគិតដល់ ? បងប្អូនថែមទាំងអាចរីករាយនឹងការរាយព្រះគោរមងាររបស់ព្រះយេស៊ូវគ្រីស្ទ ដែលបងប្អូនរកឃើញនៅក្នុងទំនុកតម្កើងបុណ្យគ្រីស្ទម៉ាស់ផងដែរ ។ តើព្រះគោរមងារនីមួយៗជះឥទ្ធិពលលើរបៀបដែលបងប្អូនគិតអំពីទ្រង់យ៉ាងដូចម្តេច ?

គំនិតយោបល់សម្រាប់ការសិក្សាព្រះគម្ពីរជាគ្រួសារ និងរាត្រីជួបជុំក្នុងគ្រួសារ

ទំនៀមទម្លាប់ពិធីបុណ្យគ្រីស្ទម៉ាស់អាចចង្អុលបង្ហាញទៅព្រះយេស៊ូវគ្រីស្ទ ។ទំនៀមទម្លាប់របស់ក្រុមគ្រួសារសាសន៍អ៊ីស្រាអែល ដូចជា បុណ្យរំលង និងបុណ្យផ្សេងៗទៀត គឺក្នុងគោលបំណងដើម្បីផ្តោតចិត្ត និងគំនិតរបស់ពួកគេលើព្រះអម្ចាស់ ( សូមមើល និក្ខមនំ ១២ ) ។ តើគ្រួសាររបស់បងប្អូនមានទំនៀមទម្លាប់អ្វីខ្លះនៅពេលបុណ្យគ្រីស្ទម៉ាស់ ដែលជួយបងប្អូនឲ្យផ្តោតអារម្មណ៍លើព្រះយេស៊ូវគ្រីស្ទ ? តើទំនៀមទម្លាប់អ្វីដែលបងប្អូនស្គាល់ តាមរយៈពង្សប្រវត្តិរបស់បងប្អូន ? បងប្អូនអាចពិចារណាធ្វើការពិភាក្សាជាគ្រួសារនូវទំនៀមទម្លាប់មួយចំនួនដែលបងប្អូនចង់ចាប់ផ្តើម ។ គំនិតមួយចំនួនអាចរួមមាន ការបម្រើដល់នរណាម្នាក់ដែលទ័លក្រ ( សម្រាប់គំនិតយោបល់នានា សូមមើលនៅលើគេហទំព័រ ComeuntoChrist.org/light-the-world ) ការអញ្ជើញមិត្តភក្តិមកមើលការប្រជុំធម្មនិដ្ឋានពិធីបុណ្យគ្រីស្ទម៉ាស់របស់គណៈប្រធានទីមួយជាមួយបងប្អូន ( នៅលើគេហទំព័រ broadcasts.ChurchofJesusChrist.org ) ការសរសេរបទចម្រៀងបុណ្យគ្រីស្ទម៉ាស់របស់បងប្អូនផ្ទាល់ ឬការស្វែងរកវិធីច្នៃប្រឌិតមួយដើម្បីចែកចាយពីការប្រសូតរបស់ព្រះគ្រីស្ទ ។

« ព្រះរាជកុមារព្រះគ្រីស្ទ ៖ ដំណើររឿងនៃការប្រសូត » ។តើបងប្អូនអាចជួយសមាជិកគ្រួសារឲ្យមានអារម្មណ៍គារវភាព និងអំណរពីការប្រសូតរបស់ព្រះគ្រីស្ទដោយរបៀបណា ? បងប្អូនអាចមើលវីដេអូ « The Christ Child: A Nativity Story » ( នៅលើគេហទំព័រ ChurchofJesusChrist.org ) ឬអានជាមួយគ្នាក្នុង ម៉ាថាយ ១:១៨–២៥; ២:១–១២; លូកា ១:២៦–៣៨; ២:១–២០ ។ សមាជិកគ្រួសារម្នាក់ៗអាចជ្រើសរើសតួអង្គម្នាក់ពីវីដេអូ ឬដំណើររឿងក្នុងព្រះគម្ពីរ ហើយចែកចាយពីអារម្មណ៍របស់បុគ្គលនោះចំពោះព្រះអង្គសង្គ្រោះ ។ សមាជិកគ្រួសារក៏អាចចែកចាយអារម្មណ៍របស់ពួកគេផ្ទាល់អំពីទ្រង់ផងដែរ ។

17:56

ការស្វែងរកព្រះអង្គសង្រ្គោះនៅក្នុងព្រះគម្ពីរសញ្ញាចាស់ ។កាលដែលបងប្អូនរៀបចំខ្លួនសិក្សាអំពីព្រះជន្មរបស់ព្រះយេស៊ូវគ្រីស្ទនៅក្នុងព្រះគម្ពីរសញ្ញាថ្មីនៅឆ្នាំក្រោយ សូមពិចារណារំឭកឡើងវិញជាមួយគ្រួសាររបស់បងប្អូន ពីអ្វីដែលពួកគេបានរៀនអំពីទ្រង់ក្នុងព្រះគម្ពីរសញ្ញាចាស់នៅឆ្នាំនេះ ។ បងប្អូនអាចរំឭកឡើងវិញពីគម្រោងមេរៀននៅក្នុងធនធាននេះ ហើយនិងកំណត់ចំណាំការសិក្សាផ្ទាល់ខ្លួនណាមួយដើម្បីជួយឲ្យបងប្អូនចងចាំពីអ្វីដែលបងប្អូនបានរៀន ។ កុមារតូចៗអាចទទួលអត្ថប្រយោជន៍ពីការមើល ដំណើររឿងព្រះគម្ពីរសញ្ញាចាស់ ឬរូបភាពនៅក្នុងធនធាននេះ ។ តើការព្យាករ ឬដំណើររឿងអ្វីដែលលេចធ្លោចំពោះបងប្អូន ? តើយើងបានរៀនអ្វីអំពីព្រះអង្គសង្រ្គោះ ?

សម្រាប់គំនិតបន្ថែមសម្រាប់ការបង្រៀនដល់កុមារ សូមមើល គម្រោងមេរៀនសប្តាហ៍នេះ នៅក្នុងសៀវភៅ ចូរមកតាមខ្ញុំ—សម្រាប់អង្គការបឋមសិក្សា ។

ចម្រៀងដែលលើកទឹកចិត្តឲ្យប្រើ ៖ « ឱ! ភូមិបេថ្លេហិម ភូមិស្ងួនភ្ញា » ទំនុកតម្កើង ល.រ ១២៩ ។

ការកែលម្អការបង្រៀនរបស់យើង

ស្តាប់សមាជិកគ្រួសាររបស់បងប្អូន ។ « ការស្ដាប់គឺជាទង្វើនៃសេចក្ដីស្រឡាញ់ ។ វាតម្រូវឲ្យយើងយកចិត្តទុកដាក់កាន់តែខ្លាំងចំពោះអ្វីដែលនៅក្នុងដួងចិត្តរបស់អ្នកដទៃ ជាជាងអ្វីដែលនៅក្នុងរបៀបវារៈ ឬគម្រោងមេរៀនរបស់យើងបន្ទាប់ទៀតនោះ ។ … នៅពេលបងប្អូនយកចិត្តទុកដាក់ចំពោះសារលិខិតដែលបាននិយាយ និងមិនបាននិយាយ [ របស់សមាជិកគ្រួសារ ] នោះបងប្អូននឹងកាន់តែយល់អំពីតម្រូវការរបស់ពួកគេ កង្វល់របស់ពួកគេ និងបំណងប្រាថ្នារបស់ពួកគេ ។ ព្រះវិញ្ញាណនឹងជួយបងប្អូនឲ្យដឹងពីរបៀបដើម្បីបង្រៀនពួកគេ » ( សូមមើល ការបង្រៀនតាមរបៀបរបស់ព្រះអង្គសង្គ្រោះ ទំព័រ ៣៤ ) ។

ម៉ារា និងព្រះឱរសយេស៊ូវនៅក្នុងក្រោលសត្វជាមួយពួកអ្នកគង្វាល — ព្រះប្រសូតិកម្ម ដោយ អិន .ស៊ី. វីយ៉េត