« ថ្ងៃទី ៥–១១ ខែ ធ្នូ ។ ហាកាយ; សាការី ១–៣; ៧–១៤ ៖ ‹ បរិសុទ្ធដល់ព្រះយេហូវ៉ា › » ចូរមកតាមខ្ញុំ—សម្រាប់បុគ្គលម្នាក់ៗ និងក្រុមគ្រួសារ ៖ ព្រះគម្ពីរសញ្ញាចាស់ ឆ្នាំ ២០២២ ( ឆ្នាំ ២០២១ )

« ថ្ងៃទី ៥–១១ ខែ ធ្នូ ។ ហាកាយ; សាការី ១–៣; ៧–១៤ » ចូរមកតាមខ្ញុំ—សម្រាប់បុគ្គលម្នាក់ៗ និងក្រុមគ្រួសារ ៖ ឆ្នាំ ២០២២

ព្រះវិហារបរិសុទ្ធ ឡាអ៊ីអេ ហាវ៉ៃ

ថ្ងៃទី ៥–១១ ខែ ធ្នូ

ហាកាយ; សាការី ១–៣; ៧–១៤

« បរិសុទ្ធដល់ព្រះយេហូវ៉ា »

ការអានព្រះគម្ពីរអញ្ជើញឲ្យមានវិវរណៈ ។ សូមបើកចិត្តទទួលយកសារលិខិតដែលព្រះវិញ្ញាណបរិសុទ្ធបើកសម្តែងដល់បងប្អូន នៅពេលបងប្អូនអានគម្ពីរហាកាយ និង សាការី ។

កត់ត្រាចំណាប់អារម្មណ៍របស់បងប្អូន

បន្ទាប់ពីការជាប់ក្នុងសេវកភាពអស់ជាច្រើនទសវត្សរ៍មក សាសន៍អ៊ីស្រាអែលមួយក្រុម ដែលប្រហែលជារួមទាំងព្យាការីហាកាយ និងសាការីដែរ ត្រូវបានគេអនុញ្ញាតឲ្យត្រឡប់ទៅក្រុងយេរូសាឡិមវិញ ។ មនុស្សមួយចំនួននៅក្នុងក្រុមនេះនៅចងចាំពីទិដ្ឋភាពរបស់ក្រុងយេរូសាឡិម មុនពេលដែលក្រុងនេះត្រូវបានបំផ្លាញ ។ សូមគិតអំពីអារម្មណ៍របស់ពួកគេ ពេលពួកគេបានឃើញកម្ទេចថ្មដែលធ្លាប់ជាផ្ទះ កន្លែងគោរពបូជា និងព្រះវិហាររបស់ពួកគេ ។ ចំពោះអស់អ្នកដែលឆ្ងល់ថា តើព្រះវិហារនឹងមានលក្ខណៈដូចជា « ព្រះវិហារនេះតាមសិរីល្អជាន់ដើម » ( ហាកាយ ២:៣ ) ម្ដងទៀតឬទេ នោះព្យាការីហាកាយបានថ្លែងពាក្យលើកទឹកចិត្តរបស់ព្រះអម្ចាស់ ៖ « ព្រះយេហូវ៉ាទ្រង់មានព្រះបន្ទូលថា ចូរឯងរាល់គ្នាមានកម្លាំង ហើយធ្វើការទៅ ដ្បិតយើងនៅជាមួយនឹងឯង … កុំខ្លាចឡើយ » ។ « យើងនឹងបំពេញវិហារនេះ ដោយសិរីល្អ … ហើយយើងនឹងឲ្យមានសេចក្តីសុខសាន្តនៅទីនេះផង » ។ ( ហាកាយ ២:៤–៥, ៧, ៩ ) ។

ប៉ុន្តែវាមិនមែនគ្រាន់តែជាព្រះវិហារបរិសុទ្ធដែលចាំបាច់ត្រូវសង់ឡើងវិញនោះទេ ។ រាស្រ្តរបស់ព្រះត្រូវបានបំផ្លាញខាងវិញ្ញាណតាមរបៀបជាច្រើន ។ ហើយការស្ថាបនារាស្រ្តដ៏បរិសុទ្ធឡើងវិញ គឺត្រូវការលើសពីការកាត់ និងរៀបឥដ្ឋដើម្បីសង់ជញ្ជាំងព្រះវិហារបរិសុទ្ធទៅទៀត ។ សព្វថ្ងៃនេះ ព្រះវិហារបរិសុទ្ធមានចារឹកឃ្លានេះ « បរិសុទ្ធដល់ព្រះយេហូវ៉ា » ហើយពាក្យទាំងនោះមិនគ្រាន់តែអនុវត្តចំពោះអគារនៃព្រះវិហារបរិសុទ្ធប៉ុណ្ណោះទេ ប៉ុន្តែចំពោះរបៀបនៃការរស់នៅផងដែរ ។ ការចារឹកពាក្យទាំងនេះនៅលើ « ចង្ក្រង់សេះ » និង « គ្រប់ទាំងភាជនៈនៅក្រុងយេរូសាឡិម » ( សាការី ១៤:២០–២១ ) មានអត្ថប្រយោជន៍ តែនៅពេលពាក្យទាំងនេះក៏បានឆ្លាក់នៅក្នុងគ្រប់ដួងចិត្តដែរតែប៉ុណ្ណោះ ។ បរិសុទ្ធភាពពិតប្រាកដតម្រូវឲ្យមានព្រះបន្ទូល និងក្រឹត្យវិន័យរបស់ព្រះអម្ចាស់ « តាម » ( សាការី ១:៦ ) នៅក្នុងខ្លួនយើង ដោយការអនុញ្ញាតឲ្យព្រះចេស្តារបស់ទ្រង់ផ្លាស់ប្តូរនិស្ស័យរបស់យើងដើម្បីបានបរិសុទ្ធដូចជាទ្រង់ដែរ ( សូមមើល លេវីវិន័យ ១៩:២ ) ។

សម្រាប់ទិដ្ឋភាពទូទៅស្ដីពីគម្ពីរហាកាយ និងសាការី សូមមើល « ហាកាយ » និង « សាការី » នៅក្នុងសេចក្ដីណែនាំដល់បទគម្ពីរទាំងឡាយ ។

គំនិតយោបល់សម្រាប់ការសិក្សាព្រះគម្ពីរផ្ទាល់ខ្លួន

ហាកាយ ១; ២:១–៩

« ពិចារណាផ្លូវប្រព្រឹត្តរបស់ខ្លួន » ។

មានកិច្ចការសំខាន់ជាច្រើនដើម្បីស្ថាបនាឡើងវិញនៅឯក្រុងយេរូសាឡិម ។ ប៉ុន្តែបន្ទាប់ពីប្រហែលជា ១៥ ឆ្នាំបានកន្លងផុតទៅ ចាប់តាំងពីសាសន៍អ៊ីស្រាអែលបានត្រឡប់មកវិញ ព្រះអម្ចាស់មិនសព្វព្រះទ័យទេ ដែលការសង់ព្រះវិហារបរិសុទ្ធមិនទាន់ជាអាទិភាពនៅឡើយ ( សូមមើល ហាកាយ ១:២–៥; សូមមើលផងដែរ អែសរ៉ា ៤:២៤ ) ។ កាលដែលបងប្អូនអាន ហាកាយ ១; ២:១–៩ សូមពិចារណាសំណួរដូចតទៅនេះ ៖ តើពួកសាសន៍អ៊ីស្រាអែលបានជួបនឹងលទ្ធផលអ្វីខ្លះ ព្រោះតែពួកគេមិនបានសង់ព្រះវិហារបរិសុទ្ធឲ្យហើយ ? តើពរជ័យអ្វីខ្លះដែលព្រះអម្ចាស់បានសន្យាដល់ពួកគេ ប្រសិនបើពួកគេបានបញ្ចប់ការសាងសង់ដំណាក់របស់ព្រះនោះ ? បងប្អូនអាចយកឱកាសនេះដើម្បី « ពិចារណាផ្លូវប្រព្រឹត្តរបស់ខ្លួន »—ដើម្បីគិតពីអាទិភាពរបស់បងប្អូន និងពីរបៀបដែលបងប្អូនអាចសម្របការប្រព្រឹត្តនោះឲ្យដូចតាមព្រះទ័យព្រះអម្ចាស់ ។

សូមមើលផងដែរ គោលលទ្ធិ និង សេចក្ដីសញ្ញា ៩៥; ធើរេន អិម វីនសុន « True Disciples of the Savior » Ensign ឬ Liahona ខែ វិច្ឆិកា ឆ្នាំ ២០១៩ ទំព័រ ៩–១១ ។

សាការី ១–៣; ៧–៨;១៤

ព្រះអម្ចាស់អាចធ្វើឲ្យខ្ញុំបរិសុទ្ធ ។

ស៊ិស្ទើរ ខារ៉ុល អេហ្វ ម៉ាកខន់ឃី បានបង្រៀនថា « សេចក្ដីបរិសុទ្ធគឺជាការជ្រើសរើស ដែលនឹងរក្សាឲ្យមានព្រះវិញ្ញាណបរិសុទ្ធធ្វើជាអ្នកដឹកនាំយើង ។ សេចក្ដីបរិសុទ្ធគឺជាការបោះបង់ចោលទំនោរពីធម្មជាតិរបស់យើង ហើយក្លាយជា ‹ អ្នកបរិសុទ្ធវិញ តាមរយៈដង្វាយធួននៃព្រះគ្រីស្ទដ៏ជាព្រះអម្ចាស់ › [ ម៉ូសាយ ៣:១៩ ] ។ … សេចក្ដីសង្ឃឹមរបស់យើងដើម្បីបានសេចក្ដីបរិសុទ្ធ គឺផ្ដោតទៅលើព្រះគ្រីស្ទ និងក្ដីមេត្តាករុណា និងព្រះគុណរបស់ទ្រង់ » ( The Beauty of Holiness » Ensign ឬ Liahona ខែ ឧសភា ឆ្នាំ ២០១៧ ទំព័រ ៩–១០ ) ។ សូមចងចាំការបង្រៀនទាំងនេះ កាលបងប្អូនអានព្រះបន្ទូលរបស់ព្រះអម្ចាស់ ដែលបានប្រទានឲ្យបងប្អូនតាមរយៈព្យាការីសាការី ដែលជំរុញអ៊ីស្រាអែលឲ្យកាន់តែបរិសុទ្ធ ៖ សាការី ១:១–៦; ៣:១–៧; ៧:៨–១០; ៨:១៦–១៧ ។ សូមកត់ចំណាំរឿងទាំងឡាយដែលព្រះអម្ចាស់បានបង្គាប់ឲ្យអ៊ីស្រាអែលធ្វើ ដើម្បីទ្រង់អាចធ្វើឲ្យពួកគេបានបរិសុទ្ធ ។ តើទ្រង់ជួយឲ្យបងប្អូនបានបរិសុទ្ធតាមរបៀបណា ?

សាការី ២:១០–១១; ៨:១–៨; ១៤:៩–១១, ២០–២១ ពិពណ៌នាអំពីសភាពនៃជីវិតនៅថ្ងៃអនាគត ជាពេលដែលយើងទាំងអស់គ្នានឹងរស់នៅជាមួយព្រះអម្ចាស់ក្នុងស្ថានភាពដ៏បរិសុទ្ធនោះ ។ តើការពិពណ៌នាទាំងនេះអាចមានអត្ថន័យយ៉ាងណាចំពោះអ្នកដែលស្ថាបនាក្រុងយេរូសាឡិមសាឡើងវិញនៅសម័យរបស់សាការី ? តើការពិពណ៌នានោះមានអត្ថន័យយ៉ាងណាចំពោះបងប្អូន ?

ព្រះយេស៊ូវយាងចូលក្រុងយេរូសាឡិមដោយជោគជ័យ — « មើល ស្តេចរបស់នាង ទ្រង់យាងមកឯនាង ទ្រង់ជាអ្នកសុចរិត ហើយមានជ័យជំនះ ទ្រង់ក៏សុភាព ទ្រង់គង់លើសត្វលា គឺជាលាជំទង់ ជាកូនរបស់មេលា » ( សាការី ៩:៩ ) ។ ការយាងចូលដោយជោគជ័យ ដោយ ហារី អាន់ឌើរសុន

សាការី ៩:៩–១១; ១១:១២–១៣; ១២:១០; ១៣:៦–៧; ១៤:១–៩

ព្រះយេស៊ូវគ្រីស្ទគឺជាព្រះមែស៊ីដែលបានសន្យា ។

សំណេរជាច្រើនរបស់សាការីបង្ហាញពីការងារបម្រើរបស់ព្រះយេស៊ូវគ្រីស្ទនៅលើផែនដី និងការយាងមកជាលើកទីពីររបស់ទ្រង់នៅទីបំផុតផងដែរ ។ សូមប្រៀបធៀបការព្យាករដូចតទៅនេះពីសាការី និងវគ្គបទគម្ពីរដែលទាក់ទងគ្នា មកពីព្រះគម្ពីរដទៃទៀត ៖

សាការី ៩:៩–១១ ( សូមមើល ម៉ាថាយ ២១:១–១១; ពេត្រុស ទី១ ៣:១៨–១៩ )
សាការី ១១:១២–១៣ ( សូមមើល ម៉ាថាយ ២៦:១៤–១៦; ២៧:១–៧ )
សាការី ១២:១០ ( សូមមើល យ៉ូហាន ១៩:៣៧; វិវរណៈ ១:៧ )
សាការី ១៣:៦–៧; ១៤:១–៩ ( សូមមើល ម៉ាថាយ ២៦:៣១; គោលលទ្ធិ និង សេចក្តីសញ្ញា ៤៥:៤៧–៥៣ )

តើបងប្អូនបានរៀនអ្វីខ្លះអំពីព្រះអង្គសង្រ្គោះ នៅពេលបងប្អូនសិក្សាវគ្គបទគម្ពីរទាំងនេះ ? ហេតុអ្វីការយល់ពីវគ្គបទគម្ពីរទាំងនេះមានសារៈសំខាន់ចំពោះបងប្អូន ?

សូមមើលផងដែរ សេចក្ដីណែនាំដល់បទគម្ពីរទាំងឡាយ « ព្រះមែស៊ី » ( នៅលើគេហទំព័រ scriptures.ChurchofJesusChrist.org )

គំនិតយោបល់សម្រាប់ការសិក្សាព្រះគម្ពីរជាគ្រួសារ និងរាត្រីជួបជុំក្នុងគ្រួសារ

ហាកាយ ១:២–៧ ។ខគម្ពីរទាំងនេះអាចបំផុសគំនិតសមាជិកគ្រួសាររបស់បងប្អូនឲ្យ « ពិចារណាផ្លូវប្រព្រឹត្តរបស់ខ្លួន » ។ ប្រហែលសមាជិកគ្រួសាររបស់បងប្អូនអាចសម្តែងតាមឃ្លានៅក្នុង ខទី ៦ ។ តើខគម្ពីរនេះបង្រៀនអ្វីខ្លះអំពីការឲ្យតម្លៃរឿងខាងលោកិយជាងរឿងរបស់ព្រះ ? បងប្អូនអាចប្រឹក្សាជាមួយគ្នាអំពីអាទិភាពគ្រួសាររបស់បងប្អូន ។ ការច្រៀងចម្រៀងដូចជាបទ « ខ្ញុំព្យាយាមក្លាយដូចព្រះយេស៊ូវ » ( សៀវភៅចម្រៀងកុមារ ទំព័រ ៤០–៤១ ) អាចជួយគ្រួសាររបស់បងប្អូនឲ្យវាយតម្លៃលើអ្វីដែលបងប្អូនកំពុងធ្វើបានល្អ និងចំណុចដែលបងប្អូនអាចធ្វើការកែលម្អបាន ។

ហាកាយ ២:១–៩ ។ដើម្បីណែនាំពីខគម្ពីរទាំងនេះ បងប្អូនអាចចែកចាយដំណើររឿងនៃព្រះវិហារបរិសុទ្ធ ប្រូវ៉ូ ស៊ីធី សេនធើរ ដែលបានសង់ឡើងវិញពីរោងឧបោសថជាទីស្រឡាញ់ដែលភ្លើងបានឆាបឆេះ ( សូមមើល វីដេអូ « Provo City Center Temple Completed » នៅលើគេហទំព័រ ChurchofJesusChrist.org ) ។ កាលដែលគ្រួសាររបស់បងប្អូនអាន ហាកាយ ២:១–៩ បងប្អូនអាចសូមសមាជិកគ្រួសារឲ្យគិតពីអ្វីមួយនៅក្នុងជីវិតរបស់ពួកគេ ដែលអាចដូចជាការងារសាងសង់ព្រះវិហារបរិសុទ្ធដែលបានបំផ្លាញនោះ ។ តើព្រះអម្ចាស់ស្ថាបនាយើងឡើងវិញ បន្ទាប់ពីយើងបានជួបរឿងសោកនាដកម្ម ឬទុក្ខលំបាកដោយរបៀបណា ?

7:17

សាការី ៣:១–៧ ។កាលបងប្អូនអានខគម្ពីរទាំងនេះ បងប្អូនអាចបង្ហាញសម្លៀកបំពាក់ប្រឡាក់ដល់គ្រួសាររបស់បងប្អូនបាន ។ តើយ៉ូស្វេអាចមានអារម្មណ៍យ៉ាងណា ពេលដែលលោកឈរនៅមុខទេវតាដោយមានសម្លៀកបំពាក់កខ្វក់នោះ ? តើអំពើបាបដូចជាសម្លៀកបំពាក់កខ្វក់យ៉ាងដូចម្តេច ? តើ សាការី ៣:១–៧ បង្រៀនយើងអ្វីខ្លះអំពីការអភ័យទោស ? បន្ទាប់មក បងប្អូនអាចសម្អាតសម្លៀកបំពាក់ជាមួយគ្នា ហើយនិយាយអំពីអំណាចលាងជម្រះនៃដង្វាយធួនរបស់ព្រះអង្គសង្គ្រោះ ។

សាការី ៨:១–៨ ។តើយើងចាប់អារម្មណ៍លើអ្វីខ្លះ អំពីចក្ខុវិស័យរបស់សាការីទាក់ទងនឹងអនាគតនៃក្រុងយេរូសាឡិម ? តើយើងរកឃើញអ្វីនៅទីនោះដែលយើងចង់ឲ្យមាននៅក្នុងសហគមន៍របស់យើងដែរ ? តើយើងអាចយាងព្រះអង្គសង្គ្រោះឲ្យមក « អាស្រ័យនៅកណ្តាល [ យើង ] » យ៉ាងដូចម្ដេច ? ( សូមមើល ហ្គែរី អ៊ី ស្ទីវ៉ែនសុន « Sacred Homes, Sacred Temples » Ensign ឬ Liahona ខែ ឧសភា ឆ្នាំ ២០០៩ ទំព័រ ១០១–៣ ) ។

សម្រាប់គំនិតបន្ថែមសម្រាប់ការបង្រៀនដល់កុមារ សូមមើល គម្រោងមេរៀនសប្តាហ៍នេះ នៅក្នុងសៀវភៅ ចូរមកតាមខ្ញុំ—សម្រាប់អង្គការបឋមសិក្សា ។

ចម្រៀងដែលលើកទឹកចិត្តឲ្យប្រើ ៖ « ខ្ញុំព្យាយាមក្លាយដូចព្រះយេស៊ូវ » សៀវភៅចម្រៀងកុមារ ទំព័រ ៤០–៤១ ។

ការកែលម្អដល់ការសិក្សាផ្ទាល់ខ្លួន

សូមឆ្លៀតឱកាសធ្វើការវាយតម្លៃលើខ្លួនឯង ។ កាលបងប្អូនសិក្សាព្រះគម្ពីរ បងប្អូននឹងទទួលបានការបំផុសគំនិតឲ្យសញ្ជឹងគិតពីការប្តេជ្ញាចិត្តផ្ទាល់ខ្លួនរបស់បងប្អូនចំពោះព្រះវរបិតាសួគ៌ និងព្រះយេស៊ូវគ្រីស្ទជាញឹកញាប់ ។ សូមប្រព្រឹត្តតាមចំណាប់អារម្មណ៍ដែលបងប្អូនទទួលបាន ។

តារាងពេលវេលាបង្ហាញពីរបៀបដែលរោងឧបោសថប្រូវ៉ូ នៅទីក្រុងប្រូវ៉ូ រដ្ឋយូថាហ៍ ស.រ.អា. ត្រូវបានបំផ្លាញដោយភ្លើងឆេះ និងសង់ឡើងវិញជាព្រះវិហារបរិសុទ្ធ ប្រូវ៉ូ ស៊ីធី សេនធើរ