Kuo Fanauʻi Kiate Kitautolu ha Tamasiʻi, tā fakatātaaʻi ʻe Simon Dewey

19–25 Tīsema

Kilisimasí

“Naʻa Tau Tatali Kiate Ia, Pea Te Ne Fakamoʻui ʻa Kitautolu”

Naʻe fakatuʻamelie ʻa e kau palōfita ʻo e Fuakava Motuʻá ʻi he fiefia lahi ki hono ʻaloʻi ʻo e Mīsaiá (vakai, ʻĪsaia 25:9). ʻI hoʻo teuteu ke faiako ʻi he faʻahitaʻu Kilisimasí, fakakaukau ki he founga te ke lava ʻo tokoniʻi ai e fānaú ke maʻu ha fiefia ʻi he ʻaloʻi ʻo e Fakamoʻui ko Sīsū Kalaisí.

Lekooti e Ngaahi Ongo ʻOkú ke Maʻú

Fakaafeʻi e Feʻinasiʻakí

Fakaafeʻi e fānaú ke vahevahe ʻa e meʻa ʻoku nau ʻilo fekauʻaki mo hono ʻaloʻi ʻo Sīsū Kalaisí. ʻI heʻenau fakahā atu ha tokotahá pe ko ha meʻa mei he talanoá, fakaafeʻi kinautolu ke tā ia ʻi he palakipoé. ʻEke ki he fānaú e meʻa ʻoku nau saiʻia ai fekauʻaki mo e talanoa ko ʻení.

Akoʻi e Tokāteliné: Fānau Iiki Angé

ʻOku akoʻi au ʻe he Fuakava Motuʻá fekauʻaki mo Sīsū.

Tokoni ki he fānaú ke nau tokanga taha ki he Fakamoʻui ko Sīsū Kalaisí he ko e ʻuhinga ia ʻoku tau fakafiefiaʻi ai ʻa e Kilisimasí. Te ke lava ʻo fakahoko ʻeni ʻaki hano fakaʻaongaʻi e ngaahi potufolofola mei he Fuakava Motuʻá ʻoku fakamoʻoni kiate Iá.

Ngaahi ʻEkitivitī ʻe Ala Fakahokó

• Fakaʻaliʻali ha fakatātā ʻo hono ʻaloʻi ʻo e Fakamoʻuí (hangē ko e Tohi Fakatātā ʻo e Ongoongoleleí, fika 30, pe ko e taha ʻo e ngaahi fakatātā ʻi he lēsoni ʻo e uike ní ʻi he Haʻu, ʻo Muimui ʻIate Au—Maʻá e Fakafoʻituituí mo e Ngaahi Fāmilí). Lau ʻa e ʻĪsaia 9:6, ʻo ʻoange ki he fānaú takitaha ha taimi ke tuhu ki he pēpē ko Sīsuú ʻi heʻenau fanongo ki he kupuʻi lea “kuo fanauʻi kiate kitautolu [ha] tamasiʻi.” Vahevahe hoʻo fakamoʻoní ne ʻiloʻi ʻe he kau palōfita ʻi he Fuakava Motuʻá ʻe ʻaloʻi ʻa Sīsū.

• Fakaafeʻi e fānaú takitaha ke puʻaki hono hingoá, pea fakamahinoʻi ange makehe mei hotau ngaahi hingoá, ʻe lava ke ui ʻaki kitautolu ha ngaahi hingoa kehe, hangē ko ha tokoua pe tuongaʻane pe kaungāmeʻa. Fakaafeʻi e fānaú ke fakakaukau ki ha ngaahi sīpinga kehe. Lau ki he fānaú ʻa e ʻĪsaia 9:6 pea fakamamafaʻi ange ʻoku ʻuhinga kia Sīsū Kalaisi ʻa e ngaahi huafa: “Fakaofo, Akonaki, Ko e ʻOtua Māfimafi, Ko e Tamai Taʻengata, Ko e Pilinisi ʻo e Melinó.” Tokoni ki he fānaú ke mahino e meʻa ʻoku talamai ʻe he ngaahi hingoá ni fekauʻaki mo Sīsuú.

• ʻOange ki he fānaú takitaha ha laʻipepa ko ha foʻi fetuʻu, pea fakaafeʻi e fānaú ke puke hake ʻenau ngaahi fetuʻú ʻi hoʻo lau e kupuʻi lea ko ʻeni mei he Nōmipa 24:17: “ʻe haʻu ʻa e Fetuʻu meia Sēkope.” Fakaafeʻi e fānaú ke vahevahe ʻa e founga ʻoku tatau ai ʻa Sīsū mo ha fetuʻu ngingila ʻoku maama ki he māmaní hono kotoa. Hivaʻi fakataha ha foʻi hiva fekauʻaki mo e fetuʻu naʻe hā ʻi he taimi ne ʻaloʻi ai ʻa Sīsuú, hangē ko e “Ngaahi Fetuʻu Ne Uló” (Tohi Hiva ʻa e Fānaú, 24) pe “Hiva ʻa e Kau ʻAngeló” (Ngaahi Himí, fika 122).

Ko Sīsū Kalaisi ʻa hoku Fakamoʻuí.

Ko e Kilisimasí ko ha taimi ia ke fakafiefia ʻo ʻikai ngata pē he ʻaloʻi ʻo Sīsuú kae pehē foki ki Heʻene moʻuí mo e misiona ko e Fakamoʻui ʻo e māmaní. Te ke tokoniʻi fēfē nai ʻa e fānaú ke nau ongoʻi fiefia mo houngaʻia ʻi he Fakalelei ʻa Sīsū Kalaisí?

Ngaahi ʻEkitivitī ʻe Ala Fakahokó

• Kole ki he fānaú ke fakakaukau ki ha meʻa ʻoku nau ʻamanaki lelei atu ki ai. Fakamatalaʻi ange ne ʻamanaki lelei e kakai faivelenga ʻi he kuonga ʻo e Fuakava Motuʻá ki he ʻaloʻi ʻo Sīsū Kalaisí. Lau ki he fānaú ʻa e ʻĪsaia 25:9, pea tuku ke nau toutou lea ʻaki e kupuʻi lea “Naʻa tau tatali kiate ia, pea te tau fiefia mo nēkeneka ʻi heʻene fakamoʻuí.” Vahevahe mo kinautolu ʻa e ʻuhinga ʻokú ke fiefia mo nēkeneka ai ʻi hono ʻaloʻi ʻo Kalaisí. Fakaafeʻi ʻa e fānaú ke vahevahe ʻenau ngaahi ongo fekauʻaki mo e Fakamoʻuí.

• Hivaʻi fakataha ha foʻi hiva fekauʻaki mo e ʻaloʻi ʻo Sīsuú, hangē ko e “Naʻe ʻAloʻi Mai ʻa Sīsū Kalaisi” (Tohi Hiva ʻa e Fānaú 26–27) pe “Kau ʻĀngelo Ne Hiva” (Ngaahi Himí, fika 118). Tokoni ki he fānaú ke nau ʻilo e ngaahi kupuʻi lea ʻi he ongo foʻi hiva ko ʻení ʻoku ne akoʻi kitautolu fekauʻaki mo hotau Fakamoʻuí mo e ngaahi tāpuaki ʻoku tau maʻu koeʻuhí ko Ia.

Akoʻi e Tokāteliné: Fānau Lalahi Angé

ʻOku akoʻi au ʻe he Fuakava Motuʻá fekauʻaki mo Sīsū Kalaisi, ko e Mīsaia kuo talaʻofa maí.

ʻOku mahulu hake e mahuʻinga ʻo e Fuakava Motuʻá ʻi ha ngaahi talanoa mo ha ngaahi tohi mālie pē kuo fakatahatahaʻi; he ko hono taumuʻá, ʻoku hangē ko e folofola kotoa pē, ke fakamoʻoni kia Sīsū Kalaisi. Tokoni ki he fānaú ke ako e founga ke ʻilo ai Ia ʻi he Fuakava Motuʻá.

Ngaahi ʻEkitivitī ʻe Ala Fakahokó

• Fakaafeʻi ʻa e fānaú ke hiki ha lisi ʻo e ngaahi huafa mo e hingoa kotoa ʻo Sīsū Kalaisi te nau lava ʻo maʻu ʻi he Mōsese 7:53; Ngaahi Ngaahi Sāmé 23:1; Siope 19:25; ʻĪsaia 7:14; 9:6; 12:2; ʻAmosi 4:13; mo e Sakalaia 14:16. Tuku ke nau ngāue tauhoa kapau ʻoku nau loto ki ai. Fakaafeʻi kinautolu ke fevahevaheʻaki ʻenau ngaahi lisí. Ko e hā ʻoku tau ako fekauʻaki mo e Fakamoʻuí mei he ngaahi huafa mo e hingoa takitaha ko ʻení?

• Fakaʻaliʻali ki he fānaú ha ngaahi meʻa teuteu Kilisimasi ʻe niʻihi (pe fakatātā ʻo ha ngaahi meʻa teuteu), hangē ko ha foʻi fetuʻu, ngaahi maama, pe ko ha meʻaʻofa. ʻEke ki he fānaú e founga ʻoku fakamanatu mai ai kiate kitautolu ʻe he ngaahi meʻa ko ʻení ʻa e Fakamouí. Fakamatalaʻi ange ʻoku faʻa fakaʻaongaʻi ʻe he folofolá ha ngaahi fakataipe ke akoʻi fekauʻaki mo Sīsū Kalaisi. Fakaafeʻi ʻa e fānaú ke kumi ʻi ha veesi folofola ʻe taha pe lahi ange mei he ngaahi potufolofola ko ʻení ha meʻa te ne lava ʻo fakataipe ʻa Sīsū Kalaisi: Sēnesi 22:8; ʻEkesōtosi 17:6; Ngaahi Sāmé 18:2; 27:1 (vakai, lēsoni ʻo e uike ní ʻi he Haʻu, ʻo Muimui ʻIate Au—Maʻá e Fakafoʻituituí mo e Ngaahi Fāmilí ki ha ngaahi sīpinga lahi ange). ʻOku tatau fēfē ʻa Sīsū mo ha lami, vai, foʻi maka, ko ha kolotau pe maama?

• ʻI he fakaʻosiʻosi hono ako ʻo e Fuakava Motuʻá ʻi he taʻu ní, fakaafeʻi e fānaú ke vahevahe ʻa e talanoa pe ngaahi veesi folofola mei he Fuakava Motuʻá ʻoku nau manako taha aí. Ko e hā ʻoku akoʻi mai ʻe he ngaahi talanoa pe ngaahi potufolofola ko ʻení fekauʻaki mo Sīsū Kalaisí? Ko e hā ʻoku tau houngaʻia ai ʻi hono maʻu ʻa e Fuakava Motuʻá?

Ko Sīsū Kalaisi hoku Fakamoʻuí mo e Huhuʻí.

ʻI heʻetau fakafiefiaʻi e ʻaloʻi ʻo Sīsū Kalaisí, te tau lava foki ʻo fiefia ʻi Heʻene moʻuí mo e feilaulau fakaleleí. Te ke fakaʻaongaʻi fēfē e ngaahi potufolofola mei he Fuakava Motuʻá ke tokoni ki he fānaú ke fakatupulaki ʻenau tui ki he Fakamoʻuí mo e Huhuʻí?

Ngaahi ʻEkitivitī ʻe Ala Fakahokó

• Lau fakataha ʻa e ʻĪsaia 7:14; pea fakaafeʻi leva e fānaú ke vahevahe ʻa e meʻa ʻoku nau ʻilo fekauʻaki mo e ʻaloʻi ʻo Kalaisí.  (ChurchofJesusChrist.org) Vahevahe hoʻo fakamoʻoni fekauʻaki mo e Fakamoʻuí, pea fakaafeʻi e fānaú ke fai ʻa e meʻa tatau.

• Ke tokoni ke mahino ange ki he fānaú ʻa e fatongia ʻo Sīsū Kalaisi ko hotau Fakamoʻuí, fakaafeʻi kinautolu ke lau ʻa e ʻĪsaia 25:8–9; 53:3–5; mo e Hōsea 13:14. Ko e hā ʻoku akoʻi mai ʻe he ngaahi veesi folofolá ni fekauʻaki mo e founga ʻoku fakamoʻui ai kitautolu ʻe he ʻEikí? Te tau lava fēfē ʻo “[fiefia] ʻi heʻene fakamoʻuí”? (ʻĪsaia 25:9).

• Hivaʻi fakataha ha foʻi hiva fekauʻaki mo e ʻofa ʻa Sīsū Kalaisi ʻiate kitautolú, hangē ko e “Naʻe ʻAloʻi Mai ʻa Sīsū Kalaisi” (Tohi Hiva ʻa e Fānaú 26–27) pe “ʻOku Fakaofo” (Ngaahi Himí, fika 102). Fakaafeʻi e fānaú ke vahevahe e ngaahi kupuʻi lea ʻoku tokoni ke nau ongoʻi ai e ʻofa ʻa e Fakamoʻuí.

Poupouʻi e Ako ʻi ʻApí

Fakaafeʻi ʻa e fānaú ke vahevahe mo honau fāmilí pe ko ha kaungāmeʻa ha meʻa kuo nau ako fekauʻaki mo Sīsū Kalaisi mei he Fuakava Motuʻá. Poupouʻi kinautolu ke kamata hono ako he uiké ni ʻa e Fuakava Foʻoú.

Ko Hono Fakatupulaki ʻEtau Founga Akoʻí

Fokotuʻu ha ʻātakai ʻokú ne fakaafeʻi e Laumālié. ʻOku lahi e ngaahi founga te ke lava ʻo fakaafeʻi mai ʻaki e Laumālié ki hoʻo kalasí. ʻE lava ke poupou e mūsiká ki he ongoʻi loto-ʻapasiá. ʻE lava ʻe hono fakahaaʻi ʻo e ʻofá mo e fakamoʻoní ʻo fakatupu ha ʻātakai ongo māfana mo fakalaumālie. Fakakaukau ʻi he faʻa lotu ki ha meʻa te ke lava ʻo fakahoko ke fakatupu ai ha ʻātakai fakalaumālie ʻi hoʻo kalasí. (Vakai, Ko e Faiako ʻi he Founga ʻa e Fakamoʻuí,15.)