“ʻOku taʻengata ʻa hono ngaahi ʻaluʻangá” (Hapakuki 3:6). Naʻe ʻi he Kamataʻangá ʻa e Folofolá, tā fakatātaaʻi ʻe Eva Timothy

28 Nōvema–4 Tīsema

Nēhumi; Hapakuki; Sefanaia

“ʻOku taʻengata ʻa hono ngaahi ʻaluʻangá”

ʻE lava ke maʻu ha ivi tākiekina mālohi ki he fānau ʻokú ke akoʻí ʻi hoʻo manako ʻi he folofolá. Tuku ke nau vakai ki he loto-fakafetaʻi ʻokú ke maʻu ki he folofola ʻa e ʻOtuá.

Lekooti e Ngaahi Ongo ʻOkú ke Maʻú

Fakaafeʻi e Feʻinasiʻakí

Fakaafeʻi e fānaú ke taufetongi ʻi he tuʻu ʻo pehē pē ko ha palōfita kinautolu ʻo e Fuakava Motuʻá ʻoku tuʻu ʻi he “fale leʻó” hangē ko Hapakukí (Hapakuki 2:1). Kole ange ke nau fakamatala ki he toenga ʻo e fānaú ha meʻa ʻoku nau ako fekauʻaki mo Sīsū Kalaisi mo ʻEne ongoongoleleí.

Akoʻi e Tokāteliné: Fānau Iiki Angé

Hapakuki 2:3

ʻE fakahoko maʻu pē ʻe he ʻOtuá ʻEne ngaahi talaʻofá.

Naʻe mamahi e palōfita ko Hapakukí ʻi he faiangahala naʻá ne mamata ki ai ʻi he lotolotonga ʻo e kakai Siutá (vakai, Hapakuki 1:2–4). Naʻe fakapapauʻi ange ʻe he ʻEikí ʻe fakahoko ʻEne ngaahi talaʻofá ʻi he taimi pē ʻAʻana (vakai, Hapakuki 2:3).

Ngaahi ʻEkitivitī ʻe Ala Fakahokó

• Vahevahe ha ngaahi sīpinga ʻe niʻihi ʻo ha ngaahi meʻa ʻoku lelei ka ʻi he hili pē haʻatau tatali—hangē ko ha fuaʻiʻakau ʻoku fie maʻu ke motuʻa pe ko ha tou mahoaʻa ʻoku fie maʻu ke taʻo. Ko e hā ne mei hoko kapau ne tau feinga ke kai e fuaʻiʻakaú pe toú kimuʻa ʻoku teʻeki māú? Talanoa fekauʻaki mo e palōfita ko Hapakukí, ʻa ia naʻá ne fie maʻu ke ʻilo e taimi ʻe taʻofi ai ʻe he ʻEikí e kau faiangahala naʻá ne vakai ki ai ʻi hono ʻātakaí. Lau ki he fānaú e tali ʻa e ʻEikí ʻoku maʻu ʻi he Hapakuki 2:3. Fakamahinoʻi ange naʻe fie maʻu ke tatali ʻa Hapakuki ke fakakakato e ngaahi talaʻofa ʻa e ʻEikí, hangē ko ia ʻoku fie maʻu he ngaahi taimi ʻe niʻihi ke tau fakahokó. Vahevahe ha taimi naʻe fie maʻu ai ke ke tatali ki ha tāpuaki.

• Tokoni ki he fānaú ke nau fakakaukau ki ha ngaahi meʻa kuo ʻosi talaʻofa ʻe he ʻOtuá—hangē ko ʻení, ʻe foki mai ʻa Sīsū Kalaisi ki he māmaní pe te tau lava ʻo toe nofo fakataha mo e ʻOtuá. ʻI he sīpinga takitaha, fakaafeʻi e fānaú ke toutou lea ʻaki e kupuʻi lea “Tatali ki ai, koeʻuhí ʻe hoko moʻoni ia.”

Hapakuki 2:14

Te u lava ʻo tokoni ke fakafonu e māmaní ʻaki ha ʻilo kau kia Sīsū Kalaisi.

Naʻe kikiteʻi ʻe Hapakuki ʻe ʻi ai ha ʻaho ʻe ʻilo ai ʻe he māmaní kotoa fekauʻaki mo Sīsū Kalaisi. Kuo kamata ke fakahoko e kikite ko iá ʻi hotau kuongá. Fakakaukau ki he founga te ke lava ai ʻo tokoni ki he fānaú ke nau kau hono fakahoko e kikite ko iá.

Ngaahi ʻEkitivitī ʻe Ala Fakahokó

• Fakaʻaliʻali ha foʻi ngeʻesi hina, pea ʻoange ki he tokotaha takitaha ha kiʻi meʻa siʻisiʻi. Kole ki he tokotaha takitaha ke ne vahevahe ha meʻa naʻe fakahoko pe akoʻi ʻe Sīsū pea faʻo leva e meʻa ne ʻoangé ʻi he loto foʻi hiná. Lau leʻolahi ʻa e Hapakuki 2:14, pea fakamatalaʻi ange te tau lava foki ʻo fakafonu ʻa e māmaní ʻaki ha ʻilo fekauʻaki mo e ʻEikí, ʻo hangē pē ko hono fakafonu ʻe he fānaú e foʻi hiná ʻaki ʻenau ʻilo fekauʻaki mo Iá.

• Fakaʻaliʻali ki he fānaú ha mape ʻo e māmaní (vakai, Ngaahi Mape ʻo e Hisitōlia ʻo e Siasí, fika 7 “Mape ʻo e Māmaní”). Tokoni ke kumi e feituʻu ʻoku nau nofo aí mo e feituʻu ʻoku ngāue ai e kau faifekau ʻoku nau ʻiló. Fakahoko hoʻo fakamoʻoní ʻoku finangalo e Tamai Hēvaní ke ʻilo ʻe he kakai kotoa pē ʻi he funga ʻo e māmaní fekauʻaki mo Sīsū Kalaisi. Te tau tokoni fēfē ke akoʻi e kakai kehé fekauʻaki mo Sīsū? Fakamatala ki he fānaú fekauʻaki mo ha ngaahi meʻa kuó ke mamata ki ai ʻoku nau fakahoko e meʻa ʻoku akoʻi kiate koe fekauʻaki mo Sīsū Kalaisí. Tokoni ke nau fakakaukau ki ha ngaahi meʻa kehe te nau lava ʻo fakahoko.

• Hivaʻi fakataha ha foʻi hiva fekauʻaki mo hono vahevahe ʻo e ongoongoleleí, hangē ko e “ʻOku Ou Fie Hoko Leva ko ha Faifekau” (Tohi Hiva ʻa e Fānaú,90). Ko e hā te tau lava ʻo tala ki he niʻihi kehé fekauʻaki mo Sīsū Kalaisí? Ke maʻu ha ngaahi fakakaukau, vakai ki he Ngaahi Tefito ʻo e Tuí.

Sefanaia 2:3

“Mou kumi ki [he ʻEikí].”

Naʻe akoʻi ʻe Sefanaia ʻoku totonu ke tau kumi ki he ʻEikí lolotonga e ngaahi taimi ʻo e faiangahala lahí, ʻo hangē ko e kuonga fakaʻosi ko ʻení. Fakalaulauloto ki he founga te ke poupouʻi ai e fānaú ke kumi kiate Iá.

Ngaahi ʻEkitivitī ʻe Ala Fakahokó

• Fakaʻaliʻali ha fakatātā ʻo Sīsū, pea lau ki he fānaú ʻa e Sefanaia 2:3. Fakaafeʻi kinautolu ke fakafuo honau nimá ʻo hangē ha ipú ʻo ʻai ki honau matá ke hangē ha matasioʻatá pea fakasio ai ki he fakatātaá ʻi he taimi kotoa pē ʻokú ke puʻaki ai e foʻi lea “kumí.” Fakamatalaʻi ange naʻe fie maʻu ʻe he palōfita ko Sefanaiá ke kumi e kakaí ki he ʻEikí. ʻOku tau kumi fēfē ki he ʻEikí? Te tau lava ʻo maʻu Ia ʻi fē?

• Fakaʻaongaʻi e peesi ʻekitivitī ʻo e uike ní, pe fakakaukau ki ha keimi ʻe taha te ne poupouʻi e fānaú ke kumi ki he ʻEikí. Tā pe hivaʻi fakataha ha foʻi hiva ʻoku felāveʻi mo e tefito ko ʻení, hangē ko e “Fekumi Kei Siʻi Ki he ʻEikí” (Tohi Hiva ʻa e Fānaú,67). Aleaʻi e ngaahi meʻa ʻoku akoʻi mai ʻe he foʻi hivá fekauʻaki mo e founga te tau lava ai ʻo maʻu ʻa Sīsū Kalaisi ʻi heʻetau moʻuí.

Akoʻi e Tokāteliné: Fānau Lalahi Angé

Nehumi 1:7

“ʻOku lelei ʻa [e ʻEikí], ko e hūfanga mālohi ia ʻi he ʻaho ʻo e mamahí.”

ʻOku tau takitaha fehangahangai mo ha ngaahi “ʻaho ʻo e mamahí.” Te ke tokoni fēfē ki he fānaú ke tafoki ki he ʻEikí, “falala kiate ia,” mo fekumi ki ha malu fakalaumālie ʻi he ngaahi ʻaho ʻo e mamahí?

Ngaahi ʻEkitivitī ʻe Ala Fakahokó

• Fakaʻaliʻali ki he fānaú ha fakatātā ʻo ha hūfangaʻanga pe ko ha kolotau. Ko e hā ha ngaahi ʻuhinga ʻe ala fie maʻu ai ʻe he kakaí ha kolotaú? Fakaafeʻi e fānaú ke lau ʻa e Nehumi 1:7 ke ʻilo e meʻa ne pehē ʻe he palōfita ko Nehumí ʻoku hangē ha hūfangaʻanga pe kolotau kiate kitautolú? Ko e hā ʻe lava ke maluʻi kitautolu mei ai ʻe he Fakamoʻuí?

• Fakaafeʻi e fānaú ke tā ha fakatātā ʻo kinautolu mo honau fāmilí ʻi loto ʻi ha hūfangaʻanga pe kolotau. Poupouʻi kinautolu ke tohi ha ngaahi lea takai ʻi he hūfangaʻangá ʻoku nau fakamatalaʻi ha niʻihi ʻo e ngaahi ivi tākiekina kovi ʻi he māmaní. Fakaafeʻi kinautolu ke hiki ha ngaahi lea ʻi loto ʻi he hūfangaʻangá ʻoku nau fakamatalaʻi ʻa Sīsū Kalaisi. Ko e hā ʻokú Ne kole mai ke tau fakahoko ke tau maʻu Hono mālohí mo e maluʻí? (vakai, Tokāteline mo e Ngaahi Fuakava 35:24).

  

  “ʻOku lelei ʻa [e ʻEikí], ko e hūfanga mālohi ia ʻi he ʻaho ʻo e mamahí” (Nehumi 1:7).

Hapakuki 3:17–19

Te u lava ʻo maʻu ʻa e fiefiá ʻia Sīsū Kalaisi, naʻa mo e taimi ʻoku ʻikai lele lelei ai ʻa e ngaahi meʻá.

Naʻe fakamatalaʻi ʻe Hapakuki ha ngaahi faingataʻa ʻe niʻihi ʻe ala hoko ki hono kakaí, kau ai ha ngaahi ʻulu ʻakau pe vaine ne ʻikai hano fua. Naʻá ne pehē leva naʻa mo e taimi ʻe hoko ʻa e ngaahi meʻá ni, “te u [kei] fiefia [pē ʻi he ʻEikí].”

Ngaahi ʻEkitivitī ʻe Ala Fakahokó

• Fakaafeʻi ʻa e fānaú ke nau lau ʻa e Hapakuki 3:17 pea kumi e ngaahi faingataʻa naʻe fakamatalaʻi ʻi he veesi ko ʻení. ʻE ongoʻi fēfē nai ha tokotaha kapau ʻe hoko e ngaahi meʻa ko ʻení? Tokoni ki he fānaú ke nau fakakaukau ki ha ngaahi faingataʻa ʻe malava ke hoko kiate kinautolu. Lau fakataha leva e veesi 18–19 ke ʻilo e meʻa ne pehē ʻe Hapakuki te ne ongoʻi naʻa mo e taimi kapau ʻe hoko ai e ngaahi meʻá ni kiate ia.

• Tokoni ki he fānaú ke kumi ha ngaahi sīpinga kehe ʻo ha kakai ʻi he folofolá ne nau fiefia ʻi he ʻEikí, naʻa mo e ngaahi taimi faingataʻá. ʻE lava ke nau maʻu ha ngaahi sīpinga ʻi he Ngāue 16:19–25; Mōsaia 24:10–15; mo e pōpoaki ʻa Palesiteni Tieta F. ʻUkitofa “Loto Fakafetaʻi ʻi ha Faʻahinga Tūkunga Pē” (Liahona, Mē 2014, 70–77), tautautefito ki he konga “Loto Fakafetaʻi ʻi Hotau Ngaahi Tūkungá.” Ko e hā e ʻuhinga ne lava ai e kakaí ni ʻo fiefia ʻi he ngaahi taimi faingataʻá? ʻE lava fēfē ke tau muimui ʻi heʻenau ngaahi sīpingá?

Sefanaia 3:14–20

ʻE maʻu ʻe kinautolu ʻoku muimui ʻia Sīsū Kalaisí ha fiemālie mo e fiefia.

ʻOku fakamatalaʻi ʻi he Sefanaia 3:14–20 ʻa e ʻaho fakafiefia ʻi he taimi ʻe pule ai ʻa Sīsū Kalaisí, “ko e tuʻi ʻo ʻIsilelí,” ʻi he lotolotonga ʻo Hono kakaí pea mo e “fiefia ʻiate [kitautolu] ʻaki ʻa e hiva” (veesi 15,17).

Ngaahi ʻEkitivitī ʻe Ala Fakahokó

• Lau fakataha ʻa e Sefanaia 3:14. Fakaafeʻi leva e fānaú takitaha ke fili ha foʻi veesi ʻe taha ʻi he Sefanaia 3:15–20 pea ako ia, ʻo kumi ha meʻa ʻe lava ʻo tokoni kiate kitautolu ke tau “fiefia mo nekeneka.” Kole ange ke nau vahevahe ʻa e meʻa ne nau maʻú.

• Tokoni ki he fānaú ke kumi ha ngaahi himi pe hiva ʻa e fānaú ʻe lava ʻo tokoni ke nau “fiefia mo nekeneka [ai] ʻaki [honau] lotó kotoa” (Sefanaia 3:14). Hivaʻi fakataha ha ngaahi hiva ʻe niʻihi, pea poupouʻi e fānaú ke talanoa fekauʻaki mo e fiefia ʻoku nau maʻu ʻi he ongoongolelei ʻo Sīsū Kalaisí.

Poupouʻi e Ako ʻi ʻApí

Kole ki he fānaú ke hiki ha potufolofola ʻoku nau fie vahevahe mo honau fāmilí (pe hiki ia maʻanautolu).

Fakatupulaki ʻEtau Founga Akoʻí

Tokoniʻi e fānaú ke nau ʻiloʻi ʻa e Laumālié. Feinga ke ʻiloʻi e ngaahi taimi ʻe ongoʻi ai ʻe he fānaú e ivi tākiekina ʻo e Laumālié. ʻI heʻene hoko ʻení, tokoni ke mahino kiate kinautolu ʻoku haʻu e ngaahi ongo ko ʻení mei he Laumālie Māʻoniʻoní.