Koe Tohi ae Balofita ko Sefanaia

¶ 1 KOE folofola a Jihova aia nae hoko kia Sefanaia koe foha o Kusi, koe foha o Ketalia, koe foha o Amalia, koe foha o Hesikia, i he gaahi aho o Josaia koe foha o Amoni, koe tu‘i o Juta.

2 Oku behe e Jihova, teu fakaauha aubito ae gaahi mea kotoabe mei he fonua.

3 Teu fakaauha ae tagata moe manu; teu fakaauha ae faga manu oe lagi, moe gaahi ika oe tahi, moe gaahi tūkiaaga moe kakai agahala: bea teu tuuji ae tagata mei he fonua, oku behe e Jihova.

4 Teu mafao atu foki a hoku nima ki Juta, bea ki he kakai kotoabe o Jelusalema; bea teu tuuji mei he botu ni ae toega o Beali, moe higoa o Kima-lime, moe gaahi taulaeiki;

5 Bea mo kinautolu oku hu ki he gaahi mea oe lagi i he tua fale, mo kinautolu oku lotu mo fuakava ia Jihova, bea oku fuakava ia Malikami;

6 Bea mo kinautolu kuo ikai ke kumi kia Jihova, be fehui kiate ia.

7 Ke ke fakalogo be i he ao oe Eiki koe Otua: he oku ofi ae aho o Jihova: he kuo teuteu e Jihova ae feilaulau, kuo ne tala ki he ene kakai.

8 Bea e hoko ia i he aho oe feilaulau a Jihova, teu tautea ae houeiki, moe fānau ae tu‘i, mo kinautolu kotoabe kuo kofu aki ae kofu kehe.

9 I he aho koia foki teu tautea akinautolu kotoabe oku hobo i he lakaaga oe mataba, aia oku fakabito ae fale o ho nau gaahi eiki aki ae fakamalohi moe kākā.

10 Oku behe e Jihova, bea e hoko ia i he aho koia, e ai ae logoaa oe tagi mei he mataba ika, moe tagiloa mei hono ua, moe maumau lahi mei he gaahi mouga.

11 Tagi akimoutolu ae kakai o Maki-tesi, he kuo tuuji ki lalo ae kakai fakatau kotoabe: kuo tuuji akinautolu kotoabe oku fua ae siliva.

12 Bea e hoko i he kuoga koia, teu hakule a Jelusalema aki ae gaahi māma, bea tautea ae kakai oku nau nofo fakafiemalie hifo: aia oku behe i ho nau loto, E ikai fai ha lelei e Jihova, bea e ikai te ne fai ha kovi.

13 Koia e hoko ai ae nau koloa koe vetea, mo ho nau gaahi fale koe fakaauha: te nau laga foki ae gaahi fale, ka e ikai nofo ai; bea te nau to ai ae gaahi goue vaine, ka e ikai inu i hono uaine.

14 Oku ofi ae aho lahi o Jihova, io, oku ofi ia, bea oku fakatootoo mai aubito; oku fakamamahi ae le‘o oe aho o Jihova: e toki tagi kalaga ai ae tagata malohi.

15 Koe aho koia koe aho oe houhau, koe aho oe tuutamaki moe mamahi, koe aho oe maveuveu, moe fakaauha, koe aho oe bouli, moe fakaboubouli, koe aho oe gaahi ao, moe bouli matolu,

16 Koe aho oe mealea, moe kalaga ki he gaahi kolo oku a‘i, bea ki he gaahi fale maoluga.

17 Bea teu omi ae mamahi ki he kakai, ke nau alu o hage koe kakai kui, koeuhi kuo nau agahala kia Jihova: bea e huai ho nau toto o hage koe efu, mo ho nau kakano o hage koe kinohaa.

18 Bea e ikai ke faa fakahaofi akinautolu i he aho oe houhau o Jihova e he e nau siliva, be koe nau koula; ka e keina ae fonua kotoa i he afi o ene fuaa: he te ne fai ke oji vave akinautolu kotoabe oku nofo i he fonua.