Na raivotu nei Liai baleta na vunikau ni bula.

Tadra nei Liai, mai vei Steven Lloyd Neal

13–19 ni Janueri

1 Nifai 8–10

“Lako Mai Ka Kania na Vuanikau”

Ni bera ni ko wilika na vakasama ena ituvatuva oqo, wilika na 1 Nifai 8–10 ka vakasamataka na ibolebole kei na madigi era sotava o ira ko vakavulica tiko. Vola na veika o uqeti tiko kina baleta na ivakavuvuli cava mai na wase oqo mo na vakatabakidua kina ena kalasi.

Vola na Veika o Uqeti Kina

ivakatakilakila ni veiwasei

Sureta na Veiwasei

Na raivotu nei Liai sa vuqa na kena vakayagataki ena gauna oqo. Ni tekivu na kalasi, sa rawa mo sureta na kalasi mera wasea na nodra raikiloma eso ni ra wilika tiko na raivotu oqo. Vakayaloqaqataki ira mera wasea na veitikina digitaki kei na ibalebale kina nodra bula era kunea.

ivakatakilakila ni veivakavulici

Vakavulica na iVunau

1 Nifai 8:10–16

Ni da sotava na loloma ni Kalou, eda sa gadreva meda vukei ira tale eso mera sotava talega.

• Sa ivakarau ni bula meda wasea na veika eda taleitaka vei ira eda lomana, ia eso na gauna e dau dredre meda wasea na kosipeli. Na kena veivosakitaki na raivotu nei Liai ena vukea na kalasi mera raica na madigi eso mera wasea na kosipeli. Sa rawa mo solia ki na dua na lewe ni kalasi e dua na tiki ni vuanikau ka kerei koya me vakauqeti ira na vo ni kalasi mera kania e veigauna na vuanikau oqo. E tautauvata vakacava na lesoni ivakaraitaki oqo ki na veika ea sotava o Liai ena 1 Nifai 8:10–16? Na cava eda sa vulica mai na veika a sotava o Liai mena vukea noda wasea na kosipeli? Me tiki ni veivosaki oqo, sa rawa mo vakaraitaka na vidio “Good Things to Share” (ChurchofJesusChrist.org).

• E vakatavulica o Elder David A. Bednar, “Na vua ni vunikau sa ivakatakarakara ni veivakalougatataki ni Veisorovaki” (“Tadra nei Liai: Tautauri Matua Kina iTitoko,” Ensign se Liaona, Okot. 2011, 34). Sa rawa mo kerea e vica na lewe ni kalasi mera vakananuma tiko mai na 1 Nifai 8:11–16 ka vakasamataka na taro vakaoqo: Meu na vakamacalataka vakacava na kamikamica sa kauta mai ki na noqu bula na Veisorovaki i Jisu Karisito? Au sa sureti ira vakacava eso mera mai tovolea na kena kamikamica? (raica na verse 15). Era sa sureti au vakacava na tamata meu vakasaqara na veivakalougatataki ni Veisorovaki ni iVakabula? Na cava au sa vakauqeti meu cakava niu wilika na 1 Nifai 8:11–16? Sureti ira na lewenikalasi oqo mera wasea na nodra isaunitaro ena gauna ni kalasi, ka sureti ira taucoko mera wasea nodra veivakararamataki ena gauna ni veivosaki.

Na raivotu nei Liai baleta na vunikau ni bula.

Minerva K. Teichert (1888–1976), The House of the World, 1954, iboro ena papa, 36 x 48 na idi. Vale ni Maroroi Cakacakaniliga e Brigham Young University

1 Nifai 8:19–38

Na vosa ni Kalou sa liutaki keda vua na iVakabula ka vukea meda vakila na Nona loloma.

• Dua na sala me tekivu kina na veivosaki baleta na raivotu nei Liai o ya mera sureti e vica na lewe ni kalasi mera droinitaka na raivotu ena papa, ka vakayagataka na 1 Nifai 8:19–38 me idusidusi. Se mo vakaraitaka na iyaloyalo ni raivotu nei Liai ena ituvatuva ni macawa oqo ena Lako Mai, Mo Muri Au—Baleta na Tamata Yadua kei na Matavuvale. Mo qai sureta na lewe ni kalasi yadua mera raica na tikina eso e vakamacalataka na ibalebale ni dua na ivakatakarakara ena droini se iyaloyalo—na ivakamacala ni ibalebale oqo e rawa ni kune ena 1 Nifai 11:4–25, 35–36; 12:16–18; kei na 15:21–33, 36. Ni ra sa wasea na lewe ni kalasi na veika era sa raica, sureta mera veivosakitaka na veika era vakavulica vei keda na ivakatakarakara oqo. Me vakataka, na cava e vakavulica vei keda na valelevu cecere me baleta na dokadoka? Na cava e vakavulica vei keda na itautauri kaukamea me baleta na vosa ni Kalou? Sa rawa mera veivosakitaka na raivotu nei Liai ni a vukea nodra lako mai vei Karisito. Eda sa raici keda vakacava ena raivotu?

• E dua na itukutuku bibi ena raivotu nei Liai o ya na kena bibi na vosa ni Kalou, ni sa vakatakarakarataki tiko mai ena itautauri kaukamea. Me vukea me vakamatatataki na itukutuku oqo, mo wasea na kalasi me va na ilawalawa ka lesia yadua vei ira na ilawalawa mera vulica e va na ilawalawa tamata a raica o Liai, me vaka e vakamacalataki tiko ena “iKuri ni iVurevure” vakakina ena 1 Nifai 8:21–23, 24–28, 30, kei na 31–33. Qai kerei ira mera veiwaseitaka vakai ira na veika era sa vulica rawa. Sa rawa mo solia e vica na miniti ki na kalasi mera tugana na veika era sa uqeti mera cakava me vakadeitaka ni ra sa “taura matua tikoga na itautauri kaukamea” (1 Nifai 8:30).

1 Nifai 10:17–19

Ena vakatakila vei keda na Kalou na dina kevaka eda vakasaqara vagumatua.

• Na kabu butobuto e dau vakalatia na noda sala kei na vosa veicavilaki mai na vale levu cecere o ya ena rawa me dredre kina noda kunea na dina. Ena rawa me veivuke ni da wilika vata na ivakaraitaki nei Nifai ni dau vakasaqara na dina. Sa rawa mo tekivuna na veivosaki ena nomu kerea na kalasi mera raica e so na itukutuku veivakacalai sa vakauta tiko o vuravura. Me vakataka, na vakasama vakavuravura cava a vunauci keda kina o ira na parofita kei na iapositolo ena koniferedi sa oti? Sa rawa mo vola ena papa na ituvatuva yadua ea taura o Nifai me dua na nona ivakadinadina baleta na dina ni raivotu nei tamana (raica na 1 Nifai 10:17–19; 11:1). E rawa vakacava me da muria na nona ivakaraitaki ni da vakasaqara na dina?

ivakatakilakila ni vuli

Vakayaloqaqataka na Vuli e Vale

Ni gadrevi mera uqeti na kalasi mera wilika na 1 Nifai 11–15, sureta mera raica na inaki ni vakatakarakara oqo baleta na tadra nei Liai: na gonelailai o Jisu, na kauveilatai, na tinadra na dautagane, era vakacibi ivalu na lewevuqa, kei na ivola eso.

ivakatakilakila ni ivurevure

iKuri ni iVurevure

Vidio ni iVola i Momani.

Sa rawa mo vakaraitaka e dua na vidio e tukuna tiko na veika a yaco ena wase eso oqo (raica na Vidio ni iVola i Momani era tiko ena ChurchofJesusChrist.org se na app ni Gospel Library).

E va na ilawalawa ni tamata ena tadra nei Liai.

iMatai ni iLawalawa.“Eda vulica ena 1 Nifai 8:21–23 na imatai ni ilawalawa era a gu yani ki liu ka tomana tikoga na ilakolako ena salatu e veimuataki yani ki na vunikau ni bula. Ia, ni ra sa sotava na tamata na kabu ni butobuto, ka sa vakatakarakarataka tiko ‘na veitemaki ni tevoro’ (1 Nifai 12:17), era sa matabuto, sa lako sese, ka ra sa yali. Me kilai tiko ni sega ni vakamacalataki tiko ena veitikina oqo na itautauri kaukamea. O ira era vakawalena se taura vakamamada na vosa ni Kalou era na sega ni taura e dua na kabasi vakalou e dusimaka tiko na sala vua na iVakabula.”

iKarua ni iLawalawa.“Eda wilika ena 1 Nifai 8:24-28 na ikarua ni ilawalawa ni tamata era a rawata na sala qiqo ka rabalailai e veimuataki yani ki na vunikau ni bula. Na ilawalawa oqo ‘ka’ra sa sasaga tiko ga yani ki liu ena kabu ni butobuto, ka kubeta matua tiko ga na itautauri kaukamea me yacova sara ni ra sa lako rawa mai ka mai kania na vua ni kau.’ (tikina e 24). Ia, o ira sa vakaisulu voli ena isulu saulevu ena vale levu cecere era sa vakalialiai ira na ikarua ni ilawalawa ka ra ‘sa madua’ ka ‘lutu tani ki na veisala vakatabui ka ra yali yani’ (tikina e 28). … E dina ga ni tiko na vakabauta, na yalodina kei na vosa ni Kalou, o ira na ikarua ni ilawalawa era a mai yali ga—de rairai beka era wiliwili vagauna walega se vulici se vakasaqaqara ena ivolanikalou.

iKatolu ni iLawalawa.“Eda wilika ena tikina e 30 na ikatolu ni ilawalawa era sa lako yani ‘ka tautauri matua tikoga ena itautauri kaukamea me yacova ni ra sa yaco yani ka kania na vuanikau.’ Na malanivosa bibi ena tikina oqo o ya na ququmi matua tikoga ena itautauri kaukamea. Era a gu tale tikoga ki liu na ikatolu ni ilawalawa ena vakabauta kei na dina; ia, a sega ni dua na ivakaraitaki ni ra sa lako sese, ka lutu tani ki na veisalatu vakatabui, se ra sa yali. E rairai ni ikatolu ni ilawalawa oqo era dau tudei ena wilika ka vulica ka vakasaqara na ivolanikalou. … Oqo na ilawalawa me daru segata me lewena.”

iKava ni iLawalawa.“Na ikava ni ilawalawa era a sega ni vakasaqara na vunikau, ia era a gadreva ga na vale levu cecere me ra sa laki tiko kina vakadua (raica na 1 Nifai 8:31–33).”

(David A. Bednar, “Tadra nei Liai: Tautauri Matua kina iTitoko,” Ensign se Liaona, Okot. 2011, 34–36.)

Vakatorocaketaki Noda Veivakavulici

Vakaraitaka na yalodei mai na nanamaki cecere. Eso na gonevuli era sega ni yalodei ena nodra rawata me vulica vakataki ira na kosipeli. Yalataka ki na lewe ni kalasi ni ra sasagataka mera vuli ga vakai ira, ena vakavulici ira na Yalo Tabu. Sa rawa mo vakamacalataka na sala ena vukea mera tekivu kina. (Raica na Veivakavulici ena iVakarau ni iVakabula, 29–30.)