Era lako tiko na matavuvale nei Liai ena vanua dravuisiga

E Lako Volekata Tiko o Liai na Wasa Damudamu, mai vei Gary Smith

6–12 ni Janueri

1 Nifai 1–7

“Au na Lako ka Kitaka”

Na nomu vakavakarau mo qasenivuli ni Matawilivola ni Sigatabu e tekivu ena nomu vulica vakai iko na ivolanikalou. Vakarorogo matua ka vola na veivakauqeti vakayalo o dau ciqoma . Lako Mai, Mo Muri Au—Baleta na Tamata Yadua kei na Matavuvale ena rawa me tokona na nomu vuli.

Vola na Veika o Uqeti Kina

ivakatakilakila ni veiwasei

Sureta na Veiwasei

E vuqa ena nomu kalasi era sa rairai kila tiko na 1 Nifai 1–7, ia ena veigauna yadua eda wilika na ivolanikalou, eda na vulica na dina e baleta tiko na veika eda sotava sara tikoga. Me tekivu nomuni veivosaki, mo taroga na kalasi na veika era sa vulica se vakananumi kina ni ra vuli tiko ena macawa oqo.

ivakatakilakila ni veivakavulici

Vakavulica na iVunau

1 Nifai 1; 3–6

Era sa ka yaga cecere sara na ivolanikalou.

• E dua na itukutuku kilai ena iVola i Momani o ya na yaga cecere ni vosa ni Kalou. Sa itukutuku vinaka oqo me wasei yani ni ra tekivu vulica na nomu kalasi na iVola i Momani. Mo tekivu ena nomu kerei ira yadua na lewe ni kalasi mera digitaka e dua na wase mai na 1 Nifai 1; 3–6 ka dikeva, me kunea na sala, ea veivakalougatataki kina vakadodonu se vakatikitiki na vosa ni Kalou ki na matavuvale nei Liai. (Ena vinaka vei ira na lewe ni kalasi ni ra cakava na itaviqaravi oqo vakailawalawa lalai.) Sureta eso mera wasea na veika era sa raica. Na cava e vakavulica na itukutuku oqo baleta na bibi ni ivolanikalou?

• Dua na nomu lalawa ni ko qasenivuli o ya mo vakayaloqaqataka na tamata yadua kei na matavuvale mera vulica na kosipeli ena taudaku ni kalasi. Sa rawa mo sureta na kalasi mera dikeva na sala a vulica kina o Liai na peleti parasa (raica na 1 Nifai 5:10–19), mo qai taroga talega vakaoqo: Na cava na itutu nei Liai baleta na ivolanikalou? Na veika yaga cava e raica o koya ni tiko kina? Mera na vakadikeva talega na kalasi na itukutuku nei Elder Richard G. Scott “Na Kaukauwa ni iVolanikalou” (Ensign se Liaona, Nove. 2011, 6–8) se wilika e dua na tiki ni itukutuku oqo ena “iKuri ni iVurevure.” Eda na bulataka vakacava na ivakavuvuli nei Elder Scott ni da vulica na iVola i Momani ena yabaki oqo?

• Sa rawa me lagata na kalasi, e dua na serenilotu e baleta na ivolanikalou, me vakataka na “Niu Qara na iVolatabu” (Serenilotu, naba 169). E rawa ni o qai sureta na lewe ni kalasi mera wasea na kena sa vakalougatataka na nodra bula ni ra vulica vakai ira yadua na ivolanikalou. Mera wasea talega na kena a vakauqeti ira na ivolanikalou mera “lako mai vua … na Kalou … me ra vakabulai” (1 Nifai 6:4).

1 Nifai 2:11–19; 3:28–31

Ena rawa me dua na noda ivakadinadina ke da vakamalumalumutaka na yaloda.

• E kilai o Nifai ni kaukauwa sara nona vakabauta na Turaga, ia ena vukei ira na kalasi mera kila tiko ni a cakacakataka na nona ivakadinadina—me vaka ga ni da cakava taucoko. Sa rawa vei ira na lewe ni kalasi mera raica ena 1 Nifai 2:16–19 na sala a rawata kina o Nifai na nona ivakadinadina. Sa rawa talega mera railesuva na tikina e 11–14 me sarava na vuna a sega ni rawa kina vei Leimami kei Lemueli me dua na nodrau ivakadinadina. Sa gauna vinaka beka oqo mera sureti na kalasi mera wasea na sala era a rawata kina na nodra ivakadinadina.

• Eso na gauna eda dau gadreva sara meda sotava e dua na cakamana meda qai rawata se vaqaqacotaki kina na noda ivakadinadina. Ia rau a sotava o Leimani kei Lemueli e dua na agilosi, ia a yavalati vakalailai ga na nodrau vakabauta. Na cava era vulica rawa na lewe ni kalasi, mai na itukutuku ena 1 Nifai 3:28–31, baleta na veika ena vaqaqacotaka na noda ivakadinadina? (raica talega na 1 Nifai 2:16). Sa rawa mo wasea talega na malanivosa nei Peresitedi Harold B. Lee ena “iKuri ni iVurevure.” Na cava eda rawa ni cakava me kaukauwa tiko ga kina na noda ivakadinadina?

1 Nifai 3–4

Ena vakarautaka na Kalou na sala meda cakava kina na Lomana.

• Na veika e ratou sotava na luvei Liai ena 1 Nifai 3–4 e duatani toka beka, ia e vuqa vei keda eda sa sotava na gauna eda muria kina na loma ni Kalou e dina ga ni vaka me dredre toka. Ni ra wilika na kalasi na 1 Nifai 3–4 ena macawa oqo, na dina cava era sa raica ea votu kina vei ira e dua na ka era a sotava vakai ira? Sa rawa mo kerea na kalasi mera wasea na veitikina era vakavulica na dina oqo, ka sureta mera wasea na veika era sa sotava. E vukei keda vakacava na dina oqo ni sa namaka tiko na Kalou meda cakava na veika eso e vaka me dredre?

• Sa rawa mo wasea na kalasi me tolu na ilawalawa ka lesia na ilawalawa yadua me vulica e dua vei iratou na sasaga me tauri mai kina na peleti parasa mai vei Lepani (raica na 1 Nifai 3:9–21; 1 Nifai 3:22–31; 4:1–4; kei na 1 Nifai 4:5–38). Mo qai sureta na ilawalawa yadua me wasea na ka e vakavulica na sasaga yadua oqo baleta na kena vakayacori na loma ni Turaga. E vakayagataki vakacava na ivakaraitaki oqo ki na noda dui sasaga meda cakava na loma ni Kalou?

E rau kidavaki Nifai kei iratou na tuakana o Liai kei Seraia.

Their Joy Was Full, mai vei Walter Rane

ivakatakilakila ni vuli

Vakayaloqaqataka na Vuli e Vale

Me ra vakauqeti na lewe ni kalasi me ra wilika na 1 Nifai 8–10, e rawa ni o wasea na itukutuku oqo mai vei Peresitedi Dieter F. Uchtdorf: “Ni levu tiko na idre era saga me ra kauti keda tani, eda na raimatua tiko vakacava ki na marau lagilagi sa yalataki tu vei ira na yalodina? Au vakabauta na kena isau ena kune ena nona tadra e dua na parofita, ena udolu na yabaki sa oti. Na yaca ni parofita o Liai, ka volai tiko na nona tadra ena iVola i Momani talei ka totoka” (“Tolu na Marama Veitacini,” Ensign se Liaona, Nove. 2017, 18–19).

ivakatakilakila ni ivurevure

iKuri ni iVurevure

Vidio mai na iVola i Momani.

Raica na vidio e talanoataka na 1 Nifai 1–7 ena Vidio ni iVola i Momani era tiko ena ChurchofJesusChrist.org se ena app ni Gospel Library.

Era tiko ena ivolanikalou na kaukauwa cecere sara.

E vakadinadinataka o Elder Richard G. Scott na yaga cecere ni ivolanikalou:

“Na ivolanikalou sa vaka na pakete ni rarama dau vakararamataka na noda vakasama ka basika kina na veituberi kei na veivakauqeti mai lagi. E rawa ni ra yaco me ra idola ni sala ni veitaratara kei na Tamada mai Lomalagi kei na Luvena Lomani o Jisu Karisito.

“Na ivolanikalou e rawa ni yaco me ra itokani yalodina ka rawa ni da raica ena veivanua kecega kei na veigauna kecega. Era na tu ga ena veigauna era gadrevi kina. Na kedra vakayagataki e vakarautaka e dua na yavu ni dina ka rawa ni vakayadrata na Yalo Tabu. Na kena vulici, vakasamataki vakatitobu, vakasaqarai, ka cavuqaqataki na ivolanikalou e vaka ni da vakatawana tiko e dua na drowa ni faile vata kei ira na itokani, veika yaga, kei na veika dina ka da na rawa ni vakayagataka ena dua ga na gauna e rawa, ena dua ga na vanua e vuravura. …

“E rawa ni yaco me idola ni ivakatakila ka dauveituberi kei na veivakauqeti ni Yalo Tabu na kena nanumi vakatitobu na ivolanikalou. Na ivolanikalou e rawa ni vakamaravutaka e dua na yalo veilecayaki, ka vakaceguya, soli inuinui, ka vakalesui mai na yalodei vua e dua ena nona dau saga me vorata na veibolebole ni bula. E tu kina na kaukauwa levu me veivakabulai ni bolei na lomada ena noda vakabauta tiko na iVakabula. E rawa ni vakatotolotaka na vakabulai ni yago” (“Na Mana ni iVolanikalou,” Ensign se Liaona, Nove. 2011, 6).

E dodonu ki na noda ivakadinadina me vakavoui tiko ena veisiga.

E vakavulica o Peresitedi Harold B. Lee, “Na nomu ivakadinadina ni kua e sa na sega tale ni tiko ni mataka vakavo ga kevaka o cakava kina e dua na ka” (Nodra iVakavuvuli na Peresitedi ni Lotu: Harold B. Lee [2000], 43).

Vakatorocaketaki ni Noda Veivakavulici

Vakayagataka na italanoa kei na ivakaraitaki me vakavulici kina na ivakavuvuli ni kosipeli E vuqa na dina tawamudu ena ivolanikalou era veivakavulici tiko ena veika e sotavi se italanoa era tiko kina. Ni ko vakavakarau mo veivakavulici, vakasamataka na veika o sa sotava me ivakadinadina talega ki na italanoa era tiko ena ivolanikalou kei na ivakavuvuli era vakaraitaka tiko. (Raica na Veivakavulici ena iVakarau ni iVakabula, 22.)