30 ni Tiseba--5 ni Janueri

Tabana ni ivakamacala taumada ni iVola i Momani

“E Dua Tale na iVakadinadina kei Jisu Karisito”

Vulica na tabana ni ulutaga ni iVola i Momani kei na ivakamacala taumada; na nodratou ivakadinadina na Lewe Tolu, na Lewe Walu, kei Parofita Josefa Simici; kei na “iVakamacala Lekaleka baleta na iVola i Momani.” Ni ko sa cakava, vakasaqara na veivakauqeti ni Yalo Tabu ena sala mo vakauqeta kina na nomu kalasi me vakaibalebale cake nodra vulica na iVola i Momani.

Vola na Veika o Uqeti Kina

Sureta na Veiwasei

Mo tekivu, ena nomu sureta e vica mera wasea eso na ka era sa vulica mai na tabana ni ivakamacala taumada ni iVola i Momani a tubu kina na nodra ivakadinadina baleta na ivola tabu oqo.

Vakavulica na iVunau

Tabana ni iulutaga ni i Vola i Momani

Na iVola i Momani ena rawa ni vaqaqacotaka noda vakabauti Jisu Karisito.

• Ni wiliki na tabana ni ulutaga ni iVola i Momani, a vola o Moronai, ena rawa me vakarautaki ira na lewe ni kalasi mera vulica na iVola i Momani ena yabaki oqo. Ena vakarabailevutaka vakacava na nodra vulica na itukutuku e tiko ena tabana ni ulutaga? Sa rawa mo vola e dua se vica na taro ena papa—me vakataka Na cava na vuna me tiko kina na iVola i Momani? se E duatani vakacava na iVola i Momani maivei ira na vo ni ivola?—ka sureta na kalasi mera raica na isaunitaro ni ra dikevalesu vakai ira yadua se vakaitokani na tabana ni ulutaga. Mera qai wasea na nodra nanuma e yaco mai vei ira. Sa rawa mo vakayaloqaqataka talega na kalasi mera veivosakitaka na nodra ituvatuva ni vulica na iVola Momani ena yabaki oqo. Me vakataka, na cava era na vakasaqara? Era na vuli vakacava mai vua na Yalo Tabu ni ra vuli tiko?

• Dua vei ira na inaki bibi ni iVola i Momani e tukuni tiko ena kena tabana ni ulutaga: o ya me vakauqeti ira “na Jiu kei na kai Matanitu Tani ni o Jisu na Karisito.” Sa rawa mo sureta na kalasi mera wasea eso na itukutuku mai na iVola i Momani sa vaqaqacotaka na nodra vakabauti Jisu Karisito (sa rawa talega mera wilika e vica na tikina mai na “iKuri ni iVurevure”). Sa rawa mera wilika na kalasi eso na tikina oqo vei koya e tiko e yasana ka wasea na kena sa veivakauqeti na iVola i Momani ki na nodra ivakadinadina baleta na iVakabula.

iVakamacala taumada ni iVola i Momani.

Sa rawa me vukei keda na iVola i Momani meda “toro voleka vua na Kalou.”

• E vakarautaka na ivakamacala taumada ni iVola i Momani na itukutuku e bibi vei ira na wilika mera kila vinaka kina. Sa rawa mera kalougata na lewe ni kalasi ni ra vakadeuca na ivakamacala taumada ka raica rawa e tolu ki na lima na usutu ena veivukei ni ra wasea vua e dua ena wilika tiko na iVola i Momani ena imatai ni gauna. Mera qai wasea na kalasi na veika era sa kunea rawa. Sa rawa talega mera dramataka na kena vakatakilaitaki na iVolai Momani vua e dua. Ena veivuke talega na vidio eso e tiko ena “iKuri ni iVurevure”

• Eso na lewe ni nomu kalasi era sa sotava na veivakadeitaki ni sa dina na vosa nei Josefa Simici: “Ka na toro voleka cake vua na Kalou e dua na tamata ena nona muria na kena ivakavuvuli [na iVola i Momani], mai na dua tale na iVola.” Sa rawa mo kerea na lewe ni kalasi mera wasea na kena sa vukei ira tiko nodra sa bulataka tiko na dina era sa vulica mai na iVola i Momani mera voleka kina vua na Kalou. Sa rawa mo sureta talega na kalasi mera veiwasei ena tolu na taro oqo nei Peresitedi Russell M. Nelson: “iMatai, ena vakacava beka nomu bula ke sega na iVola i Momani? iKarua, na cava beka o na sega ni kila? Kei na ikatolu, na cava beka ena sega vei iko?” (“Na iVola o Momani: Ena Vakaivei Beka Nomu Bula Kevaka e Sega?” (Ensign se Liaona, Nove. 2017, 61).

• E dua beka ena nomu kalasi a wilika ena iVola i Momani na duidui ni yaca ni ituvatuva ni veivakabulai, me vaka e tukuni tiko ena Lako Mai, Mo Muri Au—Baleta na Tamata Yadua kei na Matavuvale? Ke vakakina, sureti ira me ra wasea na veika era sa vulica.

“Na iVakadinadina ni Lewe Tolu”; “Na iVakadinadina ni Lewe Walu”

Sa rawa meda ivakadinadina taucoko ni iVola i Momani.

• Sa rawa me vaqaqacotaki na nodra ivakadinadina na lewe ni kalasi ni ra vulica na nodratou ivakadinadina na Lewe Tolu kei na Lewe Walu ka na vukea mera vakasamataka titobu na sala mera wasea kina na nodra ivakadinadina oqo. Sa rawa mo kerea e veimama ni kalasi mera wilika na nodratou “iVakadinadina ni Lewe Tolu” ka wilika na ikarua ni veimama na nodratou “iVakadinadina ni Lewe Walu” ka wasea na vakanananu se vakasama era uqeti kina. E duidui vakacava na ivakadinadina e rua oqo? E rau tautauvata vakacava? Na cava eda vulica maivei ira na dauivakadinadina oqo baleta noda wasea yani noda ivakadinadina? Me tekivu na kena veivosakitaki na vuna e bibi kina na iVakadinadina ni Lewe Tolu, sa rawa mo wasea na itukutuku nei Peresitedi Dallin H. Oaks se ivakadinadina nei John Whitmer e tiko ena “iKuri ni iVurevure,” se mo vakaraitaka na vidio “The Testimony of the Three Witnesses” (ChurchofJesusChrist.org).

E ratou sa vakadinadinataka na iVakadinadina Lewe Tolu na iVola i Momani.

“Na iVakadinadina nei Parofita Josefa Simici”

E a iyaya ni cakacaka ena liga ni Kalou o Josefa Simici me kauta mai na iVola i Momani.

• Era sa rairai kila tiko na kalasi na veika a yaco e tukuni tiko ena “iVakadinadina ni Parofita Josefa Simici,” ia sa rawa mo vukei ira mera kune veivakararamataki vou. Me vakataka, nomu rawa ni sureti ira mera vola na usutu ni veika a yaco ena itukutuku nei Josefa Simici. Na cava eda rawa ni tinia mai na ka oqo baleta na bibi ni inaki ni Turaga baleta na iVola i Momani?

• Na serenilotu “Na Agilosi Mai Lagi” (Serenilotu, naba 8) e tukuna tiko na kena tadu mai na iVola i Momani. Ni lagati oti se vakarorogo ki na serenilotu oqo, mera qai raica na kalasi na itukutuku eso mai na “iVakadinadina ni Parofita Josefa Simici” e duavata se vaqaqacotaka na veiqaqana ena serenilotu oqo.

Vakayaloqaqataka na Vuli e Vale

Ni gadrevi mera uqeti na lewe ni kalasi mera wilika na 1 Nifai 1–7, sureta ira mera vakasaqara na vakasama se dina sa vukei ira tiko ena nodra bula nikua—me vakataka, dua na ibolebole ni vuvale se veikacivi ena Lotu.

iKuri ni iVurevure

Na veitikina mai na iVola i Momani e vakadinadinataki Jisu Karisito.

• Mosaia 3: 5–8

• Alama 5:48; 7:10–13

• Ilamani 5:12

• 3 Nifai 9:13–18; 11:6–14

• Moronai 10:32–33

Na vidio eso baleta na iVola i Momani ena ChurchofJesusChrist.org

• “Book of Mormon Introduction”

• “What Is the Book of Mormon? A 60-Second Overview”

• “A Book of Mormon Story”

Me baleta na kena ikuri, raica na Vidio ni iVola i Momani era tiko ena ChurchofJesusChrist.org se ena app ni Gospel Library.

Na kedratou bibi na iVakadinadina Lewe Tolu.

A vakamacalataka o Peresitedi Dallin H. Oaks na vuna e rui veivakauqeti dina na iVakadinadina ni Lewe Tolu:

“Na nodratou iVakadinadina ni Lewe Tolu baleta na iVolai Momani sa tudei tu ena kaukauwa cecere. Sa tu na vuna kei na madigi vei iratou yadua me ratou cakitaka nona ivakadinadina kevaka a ka lasu, se vosatanitaka na itukutuku kevaka me a sega ni dodonu. Me vaka sa kilai tu, ena vuku ga ni duidui se veivuvutaki ena kedra maliwa na iliuliu tale eso ni Lotu, e ratou a tagutuvi mai na Lotu i Jisu Karisito ni Yalododonu Edaidai o iratou yadua na ivakadinadina oqo ni oti e walu na yabaki ni kena tabaki vakaivola na nodratou ivakadinadina. E ratou sa qai dui gole na lewe tolu oqo, ka sa sega tale na gagadre ni kena tokoni na sasaga vakatani. Ia ena iotioti ni nodratou yabaki ni bula—ena loma ni 12 ki na 50 na yabaki ni oti nodratou tagutuvi tani—a sega ni dua vei iratou oqo a gole tani mai na nona ivakadinadina a tabaki vakaivola se kaya e dua na ka me lomatarotarotaki kina na dina ni veika oqo” (“The Witness: Martin Harris,” Ensign, May 1999, 36).

Na ivakadinadina nei John Whitmer.

A kaya vakaoqo o John Whitmer, e dua vei iratou na Lewe Walu na iVakadinadina ni iVola i Momani: “Au se bera mada ni rogoca e dua vei iratou na tolu se walu na ivakadinadina oqo me bau cakitaka na ivakadinadina e ratou a cavuta. … Sa rogovaki yani na yacai keitou ki na veimatanitu kecega, dui vosavosa kei na kawatamata ni sa yaco oqo me ivakatakila mai vua na Kalou. Sa na qai kauta mai na ilesilesi ni Kalou me vaka na ivakaro era sa tiko kina” (ena Noel B. Reynolds, ed., Book of Mormon Authorship Revisited: The Evidence for Ancient Origins [1997], 55–56).

Vakatorocaketaki Noda Veivakavulici

Vakasaqara na veika e uqeti iko. Mo kua ni raica na ituvatuva oqo ni ra sa idusidusi mo muria, vakayagataki ira mera ivurevure ni vakasama se vakauqeti iko mo vakananuma titobu na nodra gagadre o vakavulica.