Lehi duke parë te Liahona

Lehi dhe Liahona, nga Joseph Brickey

27 Janar – 2 Shkurt

1 Nefi 16–22

“Unë do të Përgatis Udhën para Jush”

Teksa lexoni 1 Nefin 16–22, mendoni se si shembulli i Nefit për përballjen me sfidat mund të jetë i dobishëm për njerëzit në klasën tuaj.

Shënojini Mbresat Tuaja

ikona e të treguarit

Ftojini të Tregojnë

Nefi e pa vlerën e përshtatjes së shkrimeve të shenjta për veten e tij dhe popullin e vet (shih 1 Nefi 19:23). Merreni parasysh t’i ftoni anëtarët e klasës që të tregojnë parimet që mësuan nga rrëfimi i udhëtimit të Nefit drejt tokës së premtuar, të cilat lidhen me vetë jetën e tyre.

ikona e mësimdhënies

Jepeni Mësim Doktrinën

1 Nefi 16:10–16, 23–31; 18:10–13, 20–22

Perëndia përdor mjete të vogla për të përmbushur gjëra të mëdha.

• A mund të mendoni ju ose dikush në klasën tuaj për diçka të vogël që mund të përdoret për të bërë të ndodhë diçka të madhe? (Shih 1 Nefi 16:29.) Ju mund t’i ftoni anëtarët e klasës të diskutojnë atë që mësojnë rreth këtij parimi pas leximit të këtyre shkrimeve të shenjta individualisht ose si grup: 1 Nefi 16:25–31; Alma 37:3–8; dhe Doktrina e Besëlidhje 64:33; 123:12–17. Si ka përdorur Perëndia mjete të vogla për të përmbushur gjëra të mëdha në jetën tonë?

• Klasa juaj mund të përfitojë nga diskutimi mbi mënyrën se si Ati Qiellor i drejton shtigjet tona. Si fillim ju mund t’i kërkoni klasës të diskutojë parimet që e bënë Liahonën të funksiononte (shih 1 Nefi 16:10–16, 23–31; 18:10–13, 20–22; shih edhe Alma 37:38–47). Si mund të konsiderohen këto parime “mjete të thjeshta”? Anëtarët e klasës mund të renditin në tabelë gjëra që Perëndia i ka siguruar për të na udhërrëfyer (shih “Burime Shtesë” për ide). Çfarë veprimesh të vogla mund të ndërmarrim për të marrë udhërrëfim nga Perëndia?

Lehi duke përdorur Liahonën

Nëse Jeni të Përgatitur, Ju s’do të Frikësoheni, nga Clark Kelley Price

1 Nefi 16:18–32; 17:7–16; 18:1–4

Kur i zbatojmë urdhërimet, Perëndia do të na ndihmojë t’i përballojmë sfidat.

• Anëtarët e klasës suaj mund të jenë duke u përballur me detyra dhe sfida që duken të pamundura. Si mund ta përdorni përvojën e Nefit me vetë detyrat e tij të pamundura në dukje – ushqimin e familjes së tij në vendin e shkretë dhe ndërtimin e një anijeje – për t’i ndihmuar ata? Ndoshta anëtarët e klasës mund të lexojnë 1 Nefin 16:18–32; 17:7–16 dhe 18:1–4, duke kërkuar parime që mund t’i ndihmojnë kur përballen me një vështirësi sfiduese (për shembull, 1 Nefi 16:24–26 na mëson se lutja dhe përulësia na lejojnë të marrim frymëzim dhe drejtim nga Perëndia). Mund ta filloni duke u dhënë atyre një shembull të një parimi që e gjetët në këto vargje. Teksa tregojnë atë që gjetën, ata gjithashtu mund të tregojnë përvoja vetjake që lidhen me parimin.

1 Nefi 16:18–32; 17:7–22

Besimi çon drejt veprimit.

• Përvoja e Lehit dhe familjes së tij në vendin e shkretë ilustron fuqinë e besimit dhe pasojat e mosbesimit. Për t’i ndihmuar anëtarët e klasës që t’i zbulojnë këto të vërteta, ju mund t’i shkruani këto pyetje në tabelë: Si veproi Nefi mbi bazën e besimit të vet? Si u bekua ai për pasojë? Cilat ishin pasojat e mosbesimit të Lamanit dhe Lemuelit? Ftojini anëtarët e klasës që në grupe të kërkojnë përgjigje për këto pyetje te 1 Nefi 16:18–32 ose 17:7–22 dhe të tregojnë atë që gjejnë.

1 Nefi 19:22–24

Ne mund t’i përshtatim shkrimet e shenjta për veten tonë.

• Për t’i ndihmuar anëtarët e klasës të mësojnë se si t’i përshtatin shkrimet e shenjta për veten e tyre, ata mund të lexojnë shembuj të mënyrës se si e bëri Nefi këtë. Për shembull, te 1 Nefi 4:1–3 dhe 17:23–32, 41–45, cilat parime dha mësim Nefi duke i përshtatur shkrimet e shenjta me gjendjen e familjes së tij? Tregimi nga Plaku Robert D. Hejls te pjesa “Burime Shtesë” ilustron mënyrën se si mund të na bekojë përshtatja e shkrimeve të shenjta për veten tonë. Merreni parasysh t’i ftoni anëtarët e klasës të përcaktojnë sfida që po i hasin ata ose pjesëtarë të familjes së tyre dhe më pas gjeni rrëfime nga shkrimet e shenjta që mund t’u japin ide dhe ndihmë për ato situata. Sipas vargjeve te 1 Nefi 19:22–24, si mund të na bekojë përshtatja e shkrimeve të shenjta për veten tonë?

• Diskutimi për vargjet te 1 Nefi 19:22–24 mund të jetë një mundësi e madhe për anëtarët e klasës që të tregojnë se si ata i “përshtat[in] … shkrimet e shenjta” për veten dhe familjet e tyre, si edhe bekimet që i kanë marrë ngaqë e bënë këtë gjë. Merreni parasysh t’i renditni në tabelë idetë e anëtarëve të klasës rreth mënyrës se si t’i përshtatin shkrimet e shenjta për veten e tyre (për disa sugjerime, shih listën te pjesa “Burime Shtesë”). Në një orë të ardhshme mësimore, ju mund t’i ftoni anëtarët e klasës të tregojnë përvoja kur ata i përdorën idetë në listë.

1 Nefi 20–21

Zoti do ta mbledhë shtëpinë e Izraelit në ditët e fundit.

• Për t’i nxitur anëtarët e klasës që të tregojnë mësime domethënëse që i gjetën te 1 Nefi 20–21, merreni parasysh të shkruani tituj si këta në tabelë: Fëmijët e Izraelit, Familja e Lehit dhe Njerëzit në Kohën Tonë. Jepuni kohë të shqyrtojnë kapitujt te 1 Nefi 20–21 dhe renditni nën secilin titull mënyrën se si gjejnë zbatim profecitë e Isaias për këto grupe.

ikona e të mësuarit

Nxiteni të Mësuarit në Shtëpi

Për t’i frymëzuar anëtarët e klasës që të lexojnë te 2 Nefi 1–5, ftojini të mendojnë rreth asaj që do t’u thoshin familjeve të tyre nëse koha e tyre në tokë ishte e shkurtër. Vini në dukje se kapitujt e parë të 2 Nefit përmbajnë mesazhin e fundit që Lehi i dha familjes së vet.

ikona e burimeve

Burime Shtesë

Materiale Filmike nga Libri i Mormonit.

Gjeni materiale filmike që përshkruajnë ngjarje nga 1 Nefi 16–22 në koleksionin e Materialeve Filmike të Librit të Mormonit te ChurchofJesusChrist.org ose programin kompjuterik Gospel Library [Biblioteka e Ungjillit].

“Liahonat” Tona.

Plaku Dejvid A. Bednar na mësoi: “Fryma e Shenjtë vepron në jetën tonë pikërisht ashtu si Liahona vepronte për Lehin dhe familjen e tij, sipas besimit, zellit dhe vëmendjes sonë” (“Që të Mund të Kemi Gjithmonë me Vete Shpirtin e Tij”, Ensign ose Liahona, maj 2006, f. 31 [Konferenca e Përgjithshme, prill 2006, f. 51]).

Në konferencën e përgjithshme të tetorit 2005 Plaku Louëll M. Snou, i Të Shtatëdhjetëve, tha: “Vetë kjo konferencë e përgjithshme është një Liahonë bashkëkohore, një kohë dhe një vend që të marrim udhëzim dhe drejtim të frymëzuar që na çon përpara” (“Busulla e Zotit”, Ensign ose Liahona, nëntor 2005, f. 97 [Konferenca e Përgjithshme, tetor 2005, f. 134]).

Presidenti Tomas S. Monson dha mësim: “I njëjti Zot që siguroi një Liahona për Lehin, siguron për ju dhe për mua sot një dhuratë të rrallë dhe të çmuar që të na japë drejtim në jetën tonë. … Dhuratës së cilës i drejtohem, njihet si bekimi juaj patriarkal” (Thomas S. Monson, “Your Patriarchal Blessing: A Liahona of Light”, Ensign, nëntor 1986, f. 65).

Përshtatja e shkrimeve të shenjta për veten tonë.

Plaku Robert D. Hejls dha mësim:

“Shumë vite më parë po i mësoja birit tonë të vogël rreth jetës dhe përvojave të vëllait të Jaredit. Edhe pse historia ishte shumë interesante, ai nuk po kushtonte vëmendje. Atëherë e pyeta se çfarë domethënie kishte historia për atë vetë. Ka shumë rëndësi kur ne i pyesim fëmijët tanë: ‘Ç’domethënie ka ajo për ty?’ Ai tha: ‘E di, nuk është dhe aq e ndryshme nga ajo që bëri Jozef Smithi në korije, kur u lut e mori përgjigje’.

I thashë: ‘Ti ke të njëjtën moshë me Jozefin. A mendon se një lutje si e tija do të ishte e dobishme për ty?’ Papritur ne nuk po flisnim më për një histori të shumë kohëve më parë në një tokë shumë të largët. Po flisnim për birin tonë – për jetën e tij, nevojat e tij dhe mënyrën se si lutja mund ta ndihmonte atë.

Si prindër ne kemi përgjegjësinë që t’i ndihmojmë fëmijët tanë t’i ‘përshtat[in] të gjitha shkrimet e shenjta [në të vërtetë, çdo pjesë të ungjillit të Jezu Krishtit] për ne [dhe për fëmijët tanë] … për përfitimin dhe mësimin [e familjeve tona]’” (“With All the Feeling of a Tender Parent: A Message of Hope to Families”, Ensign ose Liahona, maj 2004, f. 90).

Sugjerime për përshtatjen e shkrimeve të shenjta.

• Mendoni për ngjarje ose rrethana në kohën tonë që janë të ngjashme me ato në shkrimet e shenjta që po lexoni.

• Kërkoni se çfarë dinë, mësojnë ose bëjnë njerëzit në shkrimet e shenjta që mund t’ju ndihmojnë me një problem ose pyetje të tanishme vetjake.

• Përcaktoni parime nga ajo histori që mund t’ju ndihmojnë në vetë rrethanat tuaja.