Lehi ʼe te Liahona, nā Joseph Brickey

27 nō Tēnuare–2 nō Fepuare

1 Nephi 16–22

« E ha’amaita’i au i tō ’outou ’ē’a i mua ia ’outou »

ʼA taiʼo ai ʼoutou i te 1 Nephi 16–22, ʼa feruri e nāhea te hiʼoraʼa o Nephi i te faʼarururaʼa i te mau tāmataraʼa e tauturu i tā ʼoutou mau pīahi.

Pāpa’i i te mau mana’o e tae mai

Fa’a’ite i te mana’o

’Ua ʼite Nephi i te faufaʼa rahi ʼia faʼaau i te mau pāpaʼiraʼa moʼa iāna iho ʼe tōna nūnaʼa (hiʼo 1 Nephi 19:23). ʼA feruri e ani i te mau pīahi ’ia faʼaʼite mai i te mau parau tumu tā rātou i ʼapo mai i roto i te ʼāʼamu o te tere o Nephi i te fenua i parauhia ʼo te tūʼati i tō rātou iho oraraʼa.

Ha’api’i i te ha’api’ira’a tumu

1 Nephi 16:10–16, 23–31 ; 18:10–13, 20–22

E faʼaʼohipa te Atua i te mau rāveʼa iti nō te faʼatupu i te mau mea rarahi.

• E nehenehe ānei ia ʼoutou ʼaore rā hō’ē pīahi e feruri i te tahi mea iti ’o te faʼaʼohipahia nō te faʼatupu i te tahi mea rarahi ? (hiʼo 1 Nephi 16:29). E ani i te mau pīahi ’ia tuatāpapa e aha tā rātou i haʼapiʼi mai nō niʼa i teie parau tumu i muri aʼe i te taiʼo-tātaʼitahi-raʼa ʼaore rā nā roto i te mau pupu i teie mau pāpaʼiraʼa moʼa : 1 Nephi 16:25–31 ; Alama 37:3–8 ; ’e Te Parau Haʼapiʼiraʼa ’e te mau Parau Fafau 64:33 ; 123:12–17. Nāhea tō te Atua faʼaʼohiparaʼa i te mau rāveʼa iti nō te faʼatupu i te mau mea rarahi i roto i tō tātou oraraʼa ?

• E fāna’o tā ʼoutou mau pīahi i te ’āparauraʼa e nāhea te Metua i te Ao ra i te arataʼi i tō tātou mau haereʼa. Nō te haʼamata, e ani i tā ʼoutou mau pīahi ’ia tuatāpapa i te mau parau tumu i tere ai te Liahona (hiʼo 1 Nephi 16:10–16, 23–31 ; 18:10–13, 20–22 ; hiʼo atoʼa Alama 37:38–47). Nāhea teie mau parau tumu i faʼarirohia ai ʼei mau « rāveʼa haʼihaʼi » ? E nehenehe te mau pīahi e pāpaʼi i niʼa i te tāpura’a ’ere’ere te mau mea tā te Atua i hōroʼa nō te arataʼi ia tātou (hiʼo « Te tahi atu ā mau rāveʼa tauturu » nō te mau manaʼo). E aha te mau ʼohipa haʼihaʼi tā tātou e rave nō te fāriʼi i te arataʼiraʼa a te Atua ?

Mai te mea ʼua ineine ʼoutou eʼita ʼoutou e mātaʼu, nā Clark Kelley Price

1 Nephi 16:18–32 ; 17:7–16 ; 18:1–4

ʼIa haʼapaʼo anaʼe tātou i te mau faʼaueraʼa, e tauturu te Atua ia tātou ’ia faʼaruru i te mau tāmataraʼa.

• E faʼaruru paha tā ʼoutou mau pīahi i te mau ʼohipa ʼe te mau tāmataraʼa e ʼore e maraʼa ia rātou. Nāhea ʼoutou ʼia faʼaʼohipa i te ʼohipa i tupu ia Nephi ’e tāna iho mau ʼohipa fifi—te faʼaʼamuraʼa i tōna ʼutuāfare i roto i te medebara ʼe te hāmaniraʼa i te hōʼē pahī—nō te tauturu ia rātou ? Penei a’e e nehenehe te mau pīahi e taiʼo i te 1 Nephi 16:18–32 ; 17:7–16 ; ʼe 18:1–4, ma te ʼimi i te mau parau tumu o te tauturu ia rātou ’ia faʼaruru anaʼe rātou i te hōʼē fifi rahi (ʼei hiʼoraʼa, tē haʼapiʼi nei te 1 Nephi 16:24–26 ē, e faʼatiʼa te pure ʼe te ha’ehaʼa ia tātou ’ia fāriʼi i te faʼaururaʼa ʼe te arataʼiraʼa nō ō mai i te Atua ra). E nehenehe ʼoutou e haʼamata ma te hōroʼa ia rātou i te hōʼē hiʼoraʼa nō te hōʼē parau tumu tā ʼoutou i ʼite i roto i teie mau ʼīrava. ʼA faʼaʼite mai ai rātou i te mea tā rātou i ʼite, e nehenehe atoʼa rātou e faʼaʼite mai i te ʼohipa i tupu ia rātou iho.

1 Nephi 16:18–32 ; 17:7–22

E arataʼi te faʼaroʼo i te ʼohipara’a.

• Tē faʼahōhoʼa nei te mau ʼohipa i tupu ia Lehi ʼe tōna ʼutuāfare i roto i te medebara i te mana o te faʼaroʼo ʼe te mau hotu o te tiʼaturi-ʼore-raʼa. Nō te tauturu i te mau pīahi ’ia ʼite i teie mau parau mau, e pāpaʼi i niʼa i te tāpura ’ere’ere teie mau uiraʼa : Nāhea tō Nephi haʼaraʼa i niʼa i tōna faʼaroʼo ? Nāhea ʼoia i te haʼamaitaʼiraʼahia i te pae hopeʼa ? E aha te mau hotu o te tiʼaturi-ʼore-raʼa o Lamana ʼe o Lemuela ? Ani i te mau pīahi ʼia ʼimi ’ei mau pupu i te mau pāhonoraʼa i teie mau uiraʼa i roto i te 1 Nephi 16:18–32 ’aore rā 17:7–22 ʼe ’ia faʼaʼite mai i te mea tā rātou i ʼite.

1 Nephi 19:22–24

E nehenehe tātou e fa’aau i te mau pāpa’ira’a mo’a ia tātou iho.

• Nō te tauturu i te mau pīahi ʼia haʼapiʼi mai nāhea ʼia faʼaau i te mau pāpaʼiraʼa moʼa ia rātou iho, e nehenehe rātou e taiʼo i te mau hiʼoraʼa e nāhea Nephi i te raveraʼa i te reira. ʼEi hiʼoraʼa, i roto i te 1 Nephi 4:1–3 ʼe 17:23–32, 41–45, e aha te mau parau tumu tā Nephi i haʼapiʼi nā roto i te faʼaauraʼa i te mau pāpaʼiraʼa moʼa i te huru o tōna iho ʼutuāfare ? Tē faʼahōhoʼa nei te ʼāʼamu a Elder Robert D. Hales i roto « Te tahi atu ā mau rāveʼa tauturu » e nāhea te faʼaauraʼa i te mau pāpaʼiraʼa moʼa i ni’a ia tātou iho e haʼamaitaʼi ia tātou. E feruri i te ani i te mau pīahi ʼia faʼaʼite mai i te mau tāmataraʼa tā rātou e faʼaruru ra ’aore rā te mau melo ’o tō rātou ʼutuāfare, ʼia ʼimi i muri iho i te mau ʼāʼamu i roto i te mau pāpaʼiraʼa moʼa o te hōroa ia rātou te mau manaʼo ’e te tauturu nō taua mau huru fifi ra. Mai te au te 1 Nephi 19:22–24, nāhea te faʼaauraʼa i te mau pāpaʼiraʼa moʼa ia tātou iho e haʼamaitaʼi ai ia tātou ?

• E riro te tau’aparaura’a i te 1 Nephi 19:22–24 ʼei taime faʼahiahia nā te mau pīahi ʼia faʼaʼite mai e nāhea tō rātou « faʼaauraʼa i te mau pāpaʼiraʼa moʼa » ia rātou iho ʼe tō rātou ʼutuāfare, ’e ’oia ato’a te mau haʼamaitaʼiraʼa tā rātou i fāriʼi nā roto i te raveraʼa i te reira. Feruri i te pāpaʼi i niʼa i te tāpura ’ere’ere te mau manaʼo o te mau pīahi nō niʼa i te huru o tō rātou faʼaauraʼa i te mau pāpaʼiraʼa mo’a ia rātou iho (nō te tahi atu mau manaʼo, hiʼo i te tāpura i roto « Te tahi atu ā mau rāveʼa tauturu »). I roto i te hōʼē haʼapiʼiraʼa i muri nei, e nehenehe ʼoutou e ani i te mau pīahi ʼia faʼaʼite mai i te mau ʼohipa i tupu ’a faʼaʼohipa ai rātou i te mau manaʼo i niʼa i te tāpura.

1 Nephi 20–21

E haʼaputuputu te Fatu i te ʼutuāfare o ’Īserā’ela i te mau mahana hopeʼa nei.

• Nō te faʼaitoito i te mau pīahi ’ia faʼaʼite mai i te mau haʼapiʼiraʼa faufaʼa rahi tei ʼitehia mai e rātou i roto i te 1 Nephi 20–21, ʼa feruri i te pāpaʼi i te mau upoʼo parau mai teie i niʼa i te tāpura ’ere’ere : Mau tamariʼi o ’Īserā’ela, ʼUtuāfare a Lehi, ʼe Te mau taʼata i tō tātou nei tau. Hōroʼa te taime ia rātou nō te taiʼo faʼahou i te 1 Nephi 20–21 ʼe ʼia pāpaʼi i raro aʼe i te upoʼo parau tātaʼitahi, nāhea te mau tohuraʼa a Isaia e tano ai i teie mau pupu.

Faʼaitoito i te haʼapiʼiraʼa mai i te fare

Nō te faʼauru i te mau pīahi ʼia taiʼo i te 2 Nephi 1–5, ani ia rātou ’ia feruri i te mea tā rātou e parau atu i tō rātou ʼutuāfare mai te mea ʼua poto tō rātou taime i niʼa i te fenua nei. ʼA faʼaʼite ē tē vai nei i roto i te mau pene mātāmua o te 2 Nephi te poroʼi hopeʼa tā Lehi i hōroʼa i tōna ʼutuāfare.

Te tahi atu ā mau mātēria

Mau video nō te Buka a Moromona.

’Imi i te mau video e faʼaʼite mai i te mau ʼohipa i tupu i roto te 1 Nephi 16-22 i roto i te ha’aputura’a video nō te Buka a Moromona i niʼa i te ChurchofJesusChrist.org ʼaore rā te Faʼanahoraʼa Vairaʼa Buka ʼEvanelia.

Tā tātou « Liahona ».

ʼUa haʼapiʼi Elder David A. Bednar ē : « E haʼa te Vārua Maitaʼi i roto i tō tātou oraraʼa mai tā te Liahona i rave nō Lehi ʼe nō tōna ʼutuāfare, ’ia au i tō tātou faʼaroʼo ʼe tō tātou itoito ʼe tō tātou haʼapa’o » (« ’Ia vai noa tōna Vārua i roto ia tātou e a muri noa atu  », Ensign ʼaore Liahona, Mē 2006, 31).

I roto i te ʼāmuiraʼa rahi nō te ʼāvaʼe ʼĀtopa 2005, ʼua parau Elder Lowell M. Snow nō te Hitu ʼAhuru : « E liahona teie ʼāmuiraʼa rahi nō teie nei ’anotau, e taime ʼe e vāhi nō te fāriʼiraʼa i te arata’iraʼa ʼe te ʼē’a faʼauruhia nō te faʼaruperupe ia tātou » (« Te liahona a te Fatu », Ensign ʼaore rā Liahona, Novema 2005, 97).

ʼUa haʼapiʼi te peresideni Thomas S. Monson : « Hōʼē ā Fatu tei hōroʼa i te hōʼē liahona nā Lehi, tē hōroʼa mai nei ʼoia nā ʼoutou ʼe nāʼu i te hōʼē taoʼa varavara ʼe te faufaʼa rahi nō te arataʼi i tō tātou oraraʼa… Te taoʼa tāʼu e faʼahiti nei o tō ʼoutou ïa haʼamaitaʼiraʼa patereareha » (Thomas S. Monson, « Tō ʼoutou haʼamaitaʼiraʼa patereareha : E liahona nō te māramarama », Ensign, Novema 1986, 65).

Faʼaauraʼa i te mau pāpaʼiraʼa moʼa ia tātou iho.

ʼUa haʼapiʼi ʼo Elder Robert D. Hales :

« Tau matahiti i māʼiri aʼe nei tē haʼapiʼi ra vau i tāʼu tamaiti nō niʼa i te oraraʼa ʼe te mea o tā te taeaʼe a Iareda i rave. Noa atu te nehenehe o te ʼāʼamu, ʼaita ʼoia i ʼanaʼanatae. I reira ʼua ani atu vau e aha te auraʼa o teie ʼāʼamu nōna iho. E mea faufaʼa roa nō tā tātou mau tamariʼi ʼia ui tātou ia rātou, e aha te auraʼa o te reira nō ʼoe ?’ Nā ō mai nei ʼoia, ‘ʼua ʼite ʼoe, ʼaita i taʼa ʼē atu i tā Iosepha Semita i rave i roto i te uru rāʼau i tōna pureraʼa ʼe tōna fāriʼiraʼa i te hōʼē pāhonoraʼa.’

« Nā ō atu ra vau, ‘mai ia Iosepha atoʼa ʼoe te paʼari. ʼIa manaʼo ʼoe e riro ānei te hōʼē pure mai teie te huru i te tauturu ia ʼoe ?’ I reira, ʼaita māua i tāuʼaparau faʼahou nō te hōʼē ʼāʼamu tahito i roto i te hōʼē fenua ātea. ʼUa tāuʼaparau māua nō tā maua tamaiti—nō tōna oraraʼa, tāna mau tītauraʼa, ʼe te faʼanahonahoraʼa nō te pure ’o te riro ʼei tauturu nōna.

« ’Ei mau metua, e hōpoiʼa nā tātou ʼia tauturu i tā tātou mau tamariʼi ʼia au i te mau pāpaʼiraʼa moʼa [ʼoia mau, te mau tufaʼa atoʼa o te ʼevanelia a Iesu Mesia] i roto ia tātou [ʼe i roto i tā tātou mau tamariʼi]… [ʼei] maitaʼi ʼe ʼei haʼapiʼiraʼa [nō tō tātou ʼutuāfare]’ » (« Nā roto i te taʼatoʼaraʼa o te feruriraʼa mai roto mai i te hōʼē metua tāne : E hōʼē poroʼi nō te tiʼaturiraʼa nā te mau ʼutuāfare atoʼa », Ensign ʼ’aore rā Liahona, Mē 2004, 90).

Mau manaʼo nō te faʼaauraʼa i te mau pāpaʼiraʼa moʼa

• ʼA feruri i te mau ʼohipa i tupu ʼaore rā te mau taime i roto i tō tātou nei tau ’o tei riro mai taua mau ʼohipa ra i tupu i roto i te mau pāpaʼiraʼa moʼa tā ʼoutou e taiʼo nei.

• ʼA ’imi i te mea tā te mau taʼata i ʼite, i haʼapiʼi mai, ʼaore rā i rave i roto i te mau pāpaʼiraʼa moʼa o te nehenehe e tauturu ia ʼoutou i roto i tō ʼoutou iho fifi ʼaore rā uiraʼa.

• ʼA ʼimi i te mau parau tumu i roto i taua ʼāʼamu ra o te nehenehe e tauturu ia ʼoutou i roto i tō ʼoutou oraraʼa.