17–23 nō Fepuare

2 Nephi 11–25

« Tē ʼoaʼoa nei tātou i te Mesia »

Taʼa ʼē noa atu i te faʼaauraʼa ia 2 Nephi 11–25 ia ʼoutou iho, ʼa feruri e nāhea ʼoutou e tauturu i tā ʼoutou mau pīahi ʼia faʼaau i teie mau pene ia rātou iho (hiʼo 2 Nephi 11:8). Pāpaʼi i te mau manaʼo tā te Vārua e faʼauru mai ia ʼoutou.

Pāpa’i i te mau mau mana’o e tae mai

Fa’a’ite mai i te mana’o

Hou ʼa haʼamata ai te ’āparaura’a i te mau tuhaʼa tāʼa ʼē i roto i te 2 Nephi 11–25, e riro paha ’ei tautururaʼa ʼia ani i te mau pīahi ʼia feruri ē, e hoa tō rātou e fifi nei ’ia ’ite mai i te tahi mea faufaʼa rahi ʼaore rā fa’auruhia i roto i te mau parau a Isaia. E aha te mau ʼīrava tā rātou e faʼaʼite atu i teie nei hoa ?

Ha’api’i i te ha’api’ira’a tumu

2 Nephi 11–24

ʼUa fa’a’ite pāpū Isaia nō Iesu Mesia.

• E mea ʼōhie aʼe ’ia taʼa i te mau tohuraʼa a Isaia ’ia ʼite anaʼe tātou nō te aha rātou i pāpaʼihia ai. Nō te haʼamata i te hōʼē ’āparaura’a i te mau tohuraʼa a Isaia i roto i te 2 Nephi, e mea maita’i e ani i te mau pīahi ’ia māʼimi i roto i te pene 11 ʼe ʼia tāpura i te mau tumu e rave rahi i faʼahiti rahi ai Nephi ia Isaia. E nehenehe atoʼa rātou e faʼaʼite mai i te mau tuhaʼa tā rātou i ʼite i roto i tā rātou iho taiʼoraʼa ʼaore rā te taiʼoraʼa ʼutuāfare nō te 2 Nephi 12–24 ’o tā rātou i manaʼo e tupu taua mau tumu ra. Nāhea te hāro’aro’ara’a i te mau tumu a Nephi e tauturu ai i te mau pīahi ’ia ʼapo rahi mai i te mau pāpaʼiraʼa a Isaia ? Faʼaitoito ia rātou ʼia haʼamanaʼo noa i teie mau tumu ’a tuatāpapa ai rātou i te mau parau a Isaia i roto i te piha haʼapiʼiraʼa.

• Nō te mea hoʼi ʼua faʼaʼohipa rahi Isaia i te parau parabole, e mea ʼōhie roa ’ia tāu’a ʼore i tōna ʼiteraʼa pāpū pūai nō Iesu Mesia. Teie hō’ē ʼohiparaʼa e tauturu i tā ʼoutou mau pīahi ʼia tūtonu i niʼa i teie ʼiteraʼa pāpū. E faʼaineine e rave rahi mau ʼapi parau ma te mau faʼahororaʼa pāpaʼiraʼa moʼa tei pāpaʼihia nō te reira nō roto mai i te 2 Nephi 12–24 ’o tē haʼapiʼi nei nō niʼa i te Faʼaora (ʼei hiʼoraʼa, 2 Nephi 13:13 ; 14:4–6 ; 15:1–7 ; 16:1–7 ; 17:14 ; 18:14–15 ; 19:6–7 ; 21:1–5 ; 22:2). E mā’iti te pīahi tātaʼitahi hōʼē o te mau ʼapi parau, ʼia tuatāpapa i te mau ʼīrava tei pāpaʼihia i niʼa iho, ʼe ʼia pāpaʼi i niʼa i te ʼapi parau te mea tāna i haʼapiʼi mai nō niʼa ia Iesu Mesia. I muri iho e taui haere te mau pīahi i tā rātou mau ʼapi parau e te tahi ʼe e pāpaʼi i te tahi atu ā mau manaʼo ʼaore rā mai te ʼite tā rātou i ʼapo mai nō niʼa i te Faʼaora nā roto mai i taua ā mau ʼīrava ra. E hōroʼa ’outou i muri iho i te mau pīahi te taime nō te faʼaʼite mai i te mea tā rātou i haʼapiʼi mai i roto ia Isaia ʼe i te tahi ʼe te tahi tei faʼahōhonu atu ā i tō rātou māuruuru nō Iesu Mesia.

• Tē tāpura nei te tohuraʼa i roto i te 2 Nephi 19:6 e rave rahi mau iʼoa o Iesu Mesia. ʼA feruri i te ani i te tahi pīahi ʼia tāpura i te reira i niʼa i te ʼiri pāpaʼiraʼa ʼe e ani i te mau pīahi ’ia ’āparau nō te aha teie mau iʼoa tātaʼitahi i riro ai ʼei faʼaʼiteraʼa tano nō te Faʼaora. Nāhea tō te Mesia rave-fa’aoti-ra’a i teie mau ti’ara’a i roto i tō tātou orara’a ? Nō te fa’arahi atu ā te ʼite nō niʼa i te tahi o teie mau iʼoa, e mea maitaʼi ’ia hiʼo i te mau pāpaʼiraʼa moʼa i roto i te mau faʼahororaʼa nō te 2 Nephi 19:6.

2 Nephi 12:2–5 ; 21:10–12 ; 22

I te mau mahana hopeʼa nei, e haʼaputuputuhia te nūnaʼa o te Atua ʼe e fanaʼo rātou i te hau.

• ’Ua tano ihoa te tahi mau tuhaʼa nō te mau tohuraʼa a Isaia nō tātou, nō te mea tē faʼaʼite nei te reira i te mau huru ʼohipa a te Atua i te mau mahana hopeʼa nei. ʼEi hiʼoraʼa, e hiʼo ’outou i te 2 Nephi 21:10–12, e faʼaʼite ra i te hōʼē « reva » (tiʼaraʼa ʼaore rā reva) o te hutihia nō te haʼaputuputu i te nūnaʼa o te Atua. Nāhea tātou i te ʼiteraʼa i te Fatu i te haʼaputuputu-vārua-raʼa i tōna nūnaʼa ? Penei aʼe e paraparau mai te tahi mau pīahi i te mea i tura’i ai ia rātou ’ia haʼaputuputu ʼaore rā ’ia ʼāmui atu i te nūnaʼa o te Atua i roto i te ʼĒkālesia. E ’oa’oa atoʼa rātou i te hāmani i tā rātou iho mau reva ’o te tāpura ʼaore rā ’o te faʼahōhoʼa i te tahi o te mau parau mau o te ʼevanelia ’o tā rātou i manaʼo tā te mau taʼata e « ʼimi nei » ʼe ’o te tauturu i te « haʼaputuputu » ʼe ’ia « ʼāmui hōʼē » (mau ʼīrava 10 ’e 12) i te mau tamariʼi a te Atua i tō tātou nei tau. Nāhea tātou e tauturu ai i te haʼaputuputuraʼa ?

• Te tahi atu rāveʼa nō te ’āparau i teie haʼapiʼiraʼa tumu ʼo tē pāpaʼira’a ïa i teie mau tumu parau i niʼa i te ʼiri pāpaʼiraʼa : Haʼapurararaʼa o Iseraela, Haʼaputuputuraʼa o Iseraela, ʼe Mau tohuraʼa nō niʼa i te Mesia. E fa’ata’a ’outou i te mau pene i roto i te 2 Nephi 12–24 nō te mau pupu pīahi ʼe e ani ia rātou ’ia ʼimi i te mau ʼīrava ’o te haʼapiʼi nei i teie mau mea ʼe e pāpaʼi i teie mau ʼīrava i raro aʼe i te upoʼo parau tiʼa i niʼa i te ʼiri pāpaʼiraʼa. E aha te mau poroʼi a teie mau ʼīrava nō tātou ? (E riro paha e tautururaʼa ’ia parau atu i te mau pīahi ē e tauturu Te Parau Haʼapiʼiraʼa ʼe te Mau Parau Fafau 113:1–6 ia rātou ’ia māramarama i te 2 Nephi 21:1–5, 10).

• E ha’apūai te mau hīmene mai te « E te mau nūnaʼa ē » (Te mau Hīmene, n° 4) ʼaore rā « O te Fatu ra tōʼu māramarama » (Te mau Hīmene, n° 43), ’o tei fa’atumuhia i niʼa i te tahi tuhaʼa o te mau tohuraʼa i roto i te 2 Nephi 12:2–5 ʼe 2 Nephi 22, i te mau poroʼi ʼe te vārua o te mau parau a Isaia.

2 Nephi 14:4–6

E riro tō tātou mau ʼutuāfare ʼe tō tātou mau « ʼāmuiraʼa » nō Ziona ʼei mau vāhi pārurura’a ʼe ’ei ha’apūra’a.

• I roto i te 2 Nephi 14:4–6 ʼua tohu Isaia nō ni’a i te pārururaʼa ʼe te hau ’o tā te feiā parau-tiʼa e ʼoaʼoa i muri aʼe i tō te Fatu « horoiraʼa » ʼe « tāmāraʼa » i tā rātou mau hara. Noa atu ā tē faʼata’a mai nei teie mau ʼīrava i te mau huru e vai mai i te Mileniuma, e tauturu te reira i te mau pīahi ʼa ʼimi ai rātou i te pārururaʼa vārua i rōpū i te ’ohipa ʼino o te mau mahana hopeʼa nei. Ani ia rātou ’ia feruri ʼe ʼia ’āparau e aha te auraʼa ʼo te « hōʼē ata ʼe te au auahi » ʼe te « hōʼē auahi ura » i niʼa i tō rātou « tiʼahapa » ʼe mau « ʼāmuiraʼa » (’īrava 5 ; hi’o ato’a Exodo 13:21–22). E aha te tahi mau mea e faʼaauhia i te ahu, te vero, ʼe te ua tei faʼahitihia i roto i te ’īrava 6? Nāhea tātou e ’ite ai i te vāhi ha’apura’a ? (hi’o ato’a PH&PF 115:6). Penei a’e e hōro’a mai te mau pīahi i te mau rāveʼa nō te haʼapāpū ē ʼua riro tō tātou mau ʼutuāfare ʼe tā tātou mau ʼāmuiraʼa a te ʼĒkālesia ʼei mau vāhi nō te pārururaʼa vārua.

2 Nephi 25:19–29

« Te ʼēʼa tiʼa ’o te faʼaroʼo ïa i te Mesia ».

• E nehenehe tā te mau pīahi e tūʼati i te hinaʼaro o Nephi « ʼia haʼapiʼi atu i tā tātou mau tamariʼi, ʼe tō tātou atoʼa mau taeaʼe, i te faʼaroʼo i te Mesia ». Nāhea tō Nephi « haʼa-ʼitoito-raʼa » nō te faʼaoti i teie fā ? (2 Nephi 25:23). Penei aʼe e mea maita’i i te mau pīahi ʼia ’imi i roto i te 2 Nephi 25:19–29 i te mau parau mau nō niʼa i te Faʼaora ʼe tāna ʼevanelia ’o tā Nephi i hinaʼaro i tōna nūnaʼa ’ia ʼite. I muri iho e fa’a’ite mai rātou i te mea tā rātou i rave nō te haʼapiʼi i teie mau parau mau i tō rātou ʼutuāfare ʼaore rā tō rātou mau hoa. ʼEi hiʼoraʼa, nāhea tō rātou haʼapiʼiraʼa i te parau mau ē, « nō roto i te aroha e ora ai tātou, hope noa atu tō tātou itoito atoʼa » ? (E hōro’a mai te fa’ahitira’a parau a te peresideni Dieter F. Uchtdorf i roto i « Te tahi atu mau mātēria tauturu » i te tahi ʼite nō niʼa i teie parau mau). Nāhea tō rātou tautururaʼa ia vetahi ʼē ʼia « ʼoaʼoa i te Mesia » ?

Faʼaitoito i te haʼapiʼiraʼa mai i te fare

E ’ana’anatae te mau pīahi ’ia ʼite ē e tauturu te 2 Nephi 26–30 ia rātou ʼia pāhono atu i te mau taʼata e parau ra ē, « ʼaita mātou e hinaʼaro i te Buka a Moromona ».

Te tahi atu mau mātēria tauturu

« ʼUa fānau mai hoʼi te hōʼē tama nā tātou ».

Nō te tauturu i tā ʼoutou tāu’ara’a parau nō niʼa i te 2 Nephi 19:6, e mātaʼitaʼi ʼaore rā e faʼaroʼo i te pupu hīmene a te Fare Menemene ʼia hīmene i te « For unto Us a Child Is Born » (ChurchofJesusChrist.org).

« Nā roto i te aroha e ora ai tātou, hope noa atu tō tātou itoito atoʼa ».

Nō niʼa i te mau parau a Nephi i roto i te 2 Nephi 25:23, ’ua parau te peresideni Dieter F. Uchtdorf :

« Tē uiui nei tō’u mana’o ē, ʼaita ānei tātou e hape nei i te tahi taime, i te tātarara’a o te parau ra « hope noa atu tō tātou itoito ato’a ». E ti’a ia tātou ’ia ’ite ē, ʼaita tē parau ra « hope noa atu » i ’aifāito i te parau ra, « nō te ».

« ʼAita tātou e faʼaorahia ʼnō teʼ mau mea atoʼa tā tātou e nehenehe e rave. ʼUa rave ānei hōʼē o tātou i te mau mea atoʼa tā tātou e nehenehe e rave ? E tīa’i ānei te Atua ʼia hope roa te mau tautoʼoraʼa atoʼa i te ravehia e tātou nā mua a’e ʼoia ’a tomo mai ai i roto i tō tātou oraraʼa nā roto i tōna aroha faʼaora ? …

« ʼUa pāpū iāʼu ē ʼua ʼite Nephi ē e faʼatiʼa te aroha o te Faʼaora ʼe e nehenehe tātou e haʼavī i te hara [hiʼo 2 Nephi 4:19–35 ; Alama 34:31]. Nō reira Nephi i itoito ai i te tāparu i tāna mau tamari’i ʼe te mau taea’e « ʼia faʼaroʼo i te Mesia ʼe ʼia haʼamaitaʼi hoʻi i te Atuaʼ [2 Nephi 25:23].

« ’E ʼia hi’o tātou, tera ïa te ʼohipa tā tātou e nehenehe e rave ! ʼE tera ïatā tātou ʼohipa i te tāhuti nei! » ( « Te hōro’a o te aroha mau », Ensign ʼaore rā Liahona, Mē 2015, 110).

Ha’amaita’ira’a i tā ’tātou ha’api’ira’a

Ui i te mau uira’a o te tītau i te ’itera’a pāpū. « E nehenehe te uira’a i te mau uira’a ’o te fa’aitoito i te mau pīahi ’ia fa’a’ite i tō rātou ’itera’a pāpū nō ni’a i te mau parau tumu e ha’api’ihia ra, e riro ’ei rāve’a pūai nō te tītau manihini i te Vārua… E tupu tō rātou mau ’itera’a pāpū i te rahi—’e te mau ’itera’a pāpū o vetahi ’ē i roto i te piha ha’api’ira’a—’a fa’a’ite ai te Vārua i te parau mau » (Ha’api’ira’a mai tā te Faʼaora, 32).