Adamu ʼe Eva, nā Douglas Fryer

3–9 nō Fepuare

2 Nephi 1–5

« Pārahi ihora mātou ma te ʼoaʼoa »

E haʼamata i tā ʼoutou faʼaineineraʼa vārua nā roto i te taiʼoraʼa i te 2 Nephi 1–5 ʼe te pāpaʼiraʼa i te mau manaʼo e tae mai. E rave rahi atu ā mau parau tumu i roto i teie mau pene e ʼore e noaʼa ia ʼoutou te taime nō te tāu’aparau i roto noa i te hōʼē haʼapiʼiraʼa, nō reira ʼa peʼe i te Vārua i roto i tā ʼoutou faʼaineineraʼa ʼe ʼa haʼapaʼo maitaʼi i te mau manaʼo e hōroʼahia mai e te mau pīahi nō te tauturu ia ʼoutou ’ia faʼaoti e aha te mau parau tumu e tūtonu atu ʼe nāhea i te arataʼi i te ’āparauraʼa.

Pāpa’i i te mau mana’o e tae mai

Fa’a’ite mai i te mana’o

E mea pāpū e ʼua tāpaʼo tā ʼoutou mau pīahi ʼaore rā ʼua pāpaʼi i te hōʼē parau nō niʼa i te hōʼē aʼe ʼīrava i roto i te 2 Nephi 1-5. Nō te haʼamata i te haʼapiʼiraʼa, e ani i te mau pīahi ʼia faʼaʼite mai i te mau ʼīrava tei riro ’ei mea faufaʼa rahi nō rātou. ʼA ani i te mau pīahi ia haʼapoto mai i te hōʼē haʼapiʼiraʼa tumu tā rātou i ʼapo mai i roto i te mau ʼīrava tei faʼaʼitehia mai.

Ha’api’i i te ha’api’ira’a tumu

2 Nephi 2:11–30

E tiʼamāraʼa tō tātou ʼia rave i tei au i tō tātou iho hinaʼaro.

• Pinepine roa te taʼata i te faʼaʼohipa i tō rātou tiʼamāraʼa nō te faʼatupu i te māuiui rahi ia vetahi ʼē. Nō te aha i faufaʼa rahi roa ai te tiʼamāraʼa nā tō tātou Metua i te Ao ra ? Penei aʼe e nehenehe tā ʼoutou e pāpaʼi i teie uiraʼa i niʼa i te tāpura ’ere’ere, ʼe i te mau pīahi ʼia māʼimi i te mau pāhonoraʼa i roto i te 2 Nephi 2:11–30 ʼe ʼia pāpaʼi i tā rātou mau pāhonoraʼa i niʼa i te tāpura ’ere’ere. Nāhea te ’enemi e tāmata ai i te vāvāhi i tō tātou tiʼamāraʼa ? Nāhea te Faʼaora e tauturu ai ia tātou ’ia « mā’iti te tiʼamā ʼe te ora mure ʼore » ? (2 Nephi 2:27). ʼA feruri e hīmene ʼāmui i te hōʼē hīmene nō niʼa i te tiʼamāraʼa, mai « ’Ua ti’amā te ta’ata » (Te mau Hīmene, no. 145), ʼe e ani i te mau pīahi ʼia tuʼu i niʼa i tā rātou tāpura te tahi atu mau manaʼo i roaʼa mai ia rātou nā roto mai i te hīmene.

• I roto i te fa’anahora’a nō teie hepetoma o te Mai pe’e mai—nō te ta’ata hō’ē ’e te ’utuāfare ’a ’ite mai e maha nā tumu faufaʼa rahi e noaʼa ai te tiʼamāraʼa. Teie te hōʼē rāveʼa nō te’ume mai i te mea tā te mau pīahi i haʼapiʼi i te fare : ʼPāpaʼi i nā tumu faufa’a rahi e maha i niʼa i te tāpura ’ere’ere. Ani i muri iho i te mau pīahi ’ia faʼaʼite mai i te mau faʼahitiraʼa parau nō roto mai i te 2 Nephi 2 ’o tē haʼapiʼi nei nō te aha e mea faufaʼa rahi teie mau tumu nō te roaʼa tō tātou ti’ara’a hanahana.

2 Nephi 2:15–29

E tuhaʼa faufaʼa rahi te hiʼaraʼa ʼe te tāraʼehara a Iesu Mesia nō te ʼōpuaraʼa a te Metua i te Ao ra.

• E rave rahi mau keresetiano e tiʼaturi nei ē ʼua riro te hiʼaraʼa ’ei ati ʼe ʼua rave Eva i te hōʼē hape ’ino roa. Tē haʼamāramarama mai nei teie mau ʼīrava i roto i te 2 Nephi 2 i te mau parau mau nō niʼa ia Adamu ʼe Eva, ʼe tē faʼaʼite pāpū nei te reira ē ʼua faʼaora Iesu Mesia ia tātou i te hiʼaraʼa. Hōʼē rāveʼa nō te tāu’aparau i teie mau manaʼo ’o te aniraʼa i te mau pīahi ʼia māʼimi i roto i te 2 Nephi 2:15–25 ʼe ʼia hāmani i te hōʼē tāpura nō te mau parau mau tā rātou i haʼapiʼi mai nō niʼa i te ʼohipa i tupu i roto i te ō i Edene. E aha te tahi atu mau ʼiteraʼa tā rātou i ʼite i roto i te faʼahitiraʼa parau a te peresideni Dallin H. Oaks i roto i « Te tahi atu ā mau rāveʼa tauturu » ? Nāhea tō Iesu Mesia faʼaoraraʼa ia tātou i te hiʼaraʼa ? (hiʼo 2 Nephi 2:6–8, 26–29).

• I muri aʼe i te raveraʼa i te hōʼē ʼohipa fa’a’oa’oara’a mai tei ravehia nā mua atu, ’a pia atu e rave rahi mau uiraʼa mai teie i muri nei ʼe e ani i te mau pīahi ’ia faʼaʼite mai i tō rātou mau manaʼo :

  • Nāhea te mau haʼapiʼiraʼa a Lehi i roto i teie mau ʼīrava e faʼatītīʼaifaro ai i te tahi mau manaʼo hape mātauhia nō niʼa i te hiʼaraʼa ?

  • Nāhea te hiʼaraʼa i riro ai ʼei hōʼē haʼamaitaʼiraʼa ?

  • Nāhea te hāro’aro’ara’a i te hiʼaraʼa e tauturu ai ia tātou ’ia taʼa maitaʼi aʼe i tō tātou hinaʼaro ia Iesu Mesia ʼe tāna tāraʼehara ?

  • E aha te hōʼē tumu e māuruuru ai ʼoutou nō te māʼitiraʼa a Adamu ʼe Eva i roto i te ō i Edene ?

  • Nāhea tā ʼoutou māʼitiraʼa ʼia haere mai i niʼa i te fenua nei i au ai i te māʼitiraʼa a Adamu ʼe a Eva nō te ʼamu i te hotu o te tumu rāʼau nō te ʼite i te maitaʼi ʼe te ’ino ?

  • E aha te tumu nō te oraraʼa ? Nō te aha i tītauhia ai te hiʼaraʼa nō te faʼatupu i teie fā ?

2 Nephi 4:15–35

E nehenehe tā tātou e fāriu ti’a i te Atua i roto i tō tātou paruparu.

• E ’āfa’i mai te mau pāpaʼiraʼa a Nephi i roto i te 2 Nephi 4:15–35 ia tātou te tiʼaturi ʼe te tāmāhanahana ’ia paremo anaʼe tātou i roto i tā tātou mau ʼaroraʼa ʼe mau paruparu. Penei a’e e mea maita’i i te mau pīahi ʼia taiʼo faʼahou i teie mau ʼīrava nā te pea ʼe ʼia ʼite mai i te mau tuhaʼa ’o tā rātou e faʼaʼohipa nō te tāmāhanahana i te tahi taʼata tei teimaha i tōna mau ʼati. I muri iho e faʼaʼite mai te pea tāta’itahi i te reira mau tuha’a i te mau pīahi. Penei a’e e hina’aro te tahi pīahi e faʼaʼite mai i te hōʼē ʼohipa i tupu ’a ʼite ai ʼoia i te tāmāhanahanaraʼa nā roto i te fāriuraʼa i te Atua, mai tā Nephi i rave.

• Te tahi atu rāveʼa nō te taiʼo faʼahou i te 2 Nephi 4 ’o te aniraʼa nā mua roa i te tahi mau pīahi ’ia haere ineine mai nō te faʼaʼite i te mau ʼīrava ʼe te mau pereota i roto i teie pene tei riro ʼei mea faufaʼa nō rātou. Ani ia rātou ’ia faʼaʼite mai i te mea tā rātou e rave ’ia taʼahoa anaʼe rātou i tō rātou mau paruparu. E fa’arahi te hōʼē hīmene nō niʼa i te tāmāhanahanaraʼa ʼe te tiʼaturiraʼa, mai te « I hea vau e fāriʼi ai te hau ? » (Te mau Hīmene, n° 62), i teie tāu’ara’a parau. ʼEi hiʼoraʼa, ’ia fa’a’ite mai te mau pīahi e nāhea te hīmene i te haʼapūaira’a i te hiʼoraʼa o Nephi ’ia tiʼaturi i te Fatu i te mau taime ʼaravī.

2 Nephi 5

E ʼitehia te ʼoaʼoa i roto i te oraraʼa i te ʼevanelia.

• Noa atu te mau tāmataraʼa tā Nephi ʼe tōna nūnaʼa i faʼaruru, ʼua nehenehe ia rātou ʼia haʼamau i te hōʼē tōtaiete tei niuhia i niʼa i te mau parau tumu tei arataʼi atu i te ʼoaʼoa. E aha te mau parau tumu tā te mau pīahi i ʼite i roto i tā rātou tuatāpaparaʼa i te 2 Nephi 5 tei faʼatupu i te ʼoaʼoa tā te ’āti Nephi i ʼite ? E hōroʼa i te hōʼē ʼapi parau i te mau pīahi ʼe e ani ia rātou ’ia māʼimi i roto i te 2 Nephi 5 i te mau parau tumu ’o te arataʼi atu i te ʼoaʼoa ʼe ʼia pāpāʼi i te reira. Nāhea te mau rāveʼa a tō te ao e rave nei nō te ʼimi i te ʼoaʼoa i taʼa ʼē ai i te mea tā tātou i ʼite mai i roto i te 2 Nephi 5 ? E aha te mau fā tā te mau pīahi i haʼamau nō te faʼaʼohipa i te hōʼē o teie mau parau tumu ?

Faʼaitoito i te haʼapiʼiraʼa mai i te fare.

E parau i te mau pīahi ē tē vai nei i roto i te 2 Nephi 6–10 te hōʼē o te mau ʼaoraʼa maitaʼi roa aʼe nō niʼa i te tāraʼehara a Iesu Mesia i roto i te mau pāpaʼiraʼa moʼa atoʼa. E nehenehe ʼoutou e faʼaʼite i te hōʼē ʼīrava tā ʼoutou i ʼite i roto i teie mau pene ’o tei faʼaʼanaʼanatae ia ʼoutou ʼia taiʼo i te reira.

Te tahi atu ā mau mātēria

E tuhaʼa te hi’araa nō te ʼōpuaraa a te Atua.

ʼUa haʼapiʼi Elder Dallin H. Oaks ē :

« I tō Adamu ʼe Eva fāriʼiraʼa i te faʼaueraʼa mātāmua, tei roto ïa rāua i te hōʼē faʼaearaʼa taime poto, e ʼere faʼahou i roto i te ao vārua e mau tino tāhuti rā tei ʼore ā i raro aʼe i te pohe ʼe tei ʼore ā i nehenehe i te fānau. Eʼita e nehenehe ia rāua e faʼatupu i te faʼaueraʼa mātāmua a te Metua ma te ʼore e ʼōfati i te ʼāua i rotopū i te ʼoaʼoa o te ō i Edene ʼe te mau tāmataraʼa riʼariʼa ʼe te mau rāveʼa faʼahiahia o te oraraʼa tāhuti nei…

« … ʼUa haʼamāramarama te peropheta Lehi ē ’āhiri ʼaita Adamu i hara, ʼaore atoʼa ʼoia i hiʼa’ (2 Ne. 2:22), e vai noa ïa ʼoia i roto i te hōʼē ā vairaʼa i hāmanihia ai ʼoia.

« … ʼUa ʼōpuahia te hiʼaraʼa, tē parau ra Lehi, nō te mea ‘ʼua ravehia te mau mea atoʼa i te paʼari nōna , nō tei ʼite i te mau mea atoʼa’ (2 Ne. 2:24).

« O Eva tei ʼōfati mātāmua i te mau ʼōtiʼa nō Edene nō te haʼamata i te mau tītauraʼa nō te oraraʼa tāhuti nei. Tāna raveraʼa, noa atu e aha te natura, ’o te hōʼē ïa hara ʼo te hōʼē rā tītauraʼa hanahana ʼe te mure ʼore nō te ʼīriti i te ʼūputa e tae atu i te ora mure ʼore. ʼUa faʼaʼite Adamu i tōna paʼari ma te rave atoʼa i te reira ʼohipa. E nō reira Eva ʼe Adamu i hiʼa ai ʼia vai te mau taʼata’ (2 Ne. 2:25).

« Te faʼahapa nei te tahi mau keresetiano ia Eva nō tāna ’ohipa i rave, ma te faʼaoti ē ʼua haʼaparuparuhia ʼoia ʼe tāna mau tamāhine nā te reira ʼohipa. ʼAita te feiā moʼa i te mau mahana hopeʼa nei ! Ma te haʼamāramaramahia e te heheuraʼa, te faʼahanahana nei tātou i te ʼohipa tā Eva i rave ʼe te faʼatura nei tātou i tōna paʼari ʼe tōna itoito i roto i teie tuhaʼa faufaʼa rahi tei piʼihia te hiʼaraʼa… 

« Tē faʼaʼite nei te heheuraʼa ʼāpī ē ʼua taʼa i tō tātou mau metua mātāmua i te tītauraʼa nō te hiʼaraʼa. ʼUa parau Adamu, ‘’ia haʼamaitaʼihia te iʼoa o te Atua, i te mea nō tōʼu ʼōfatiraʼa i te ture, ʼua ʼaraʼara tōʼu mata, ’e i roto i teie oraraʼa e roaʼa mai iāʼu te ʼoaʼoa, ʼe i roto i te iʼo nei e ʼite faʼahou ai au i te Atua’ (Mose 5:10) » (« Te ʼōpuaraʼa rahi nō te ʼoaʼoa », Ensign, Novema 1993, 72–73).

Ha’amaita’ira’a i tā tātou ha’api’ira’a

ʼA toro atu i te rima i te mau pīahi e ’ore e tae mai nei. E ʼere te haʼapiʼiraʼa i te arataʼi-noa-raʼa i te hōʼē tāu’ara’a parau i te sābati; e faʼaʼohipahia rā te aupururaʼa nā roto i te here ʼe te haʼamaitaʼiraʼa ia vetahi ʼē e te ʼevanelia. Penei aʼe e nehenehe tā ʼoutou e manaʼo i te tahi taʼata tei ʼore e tae mai nei ʼe ʼa hōroʼa atu iāna i te hōʼē aniraʼa ’ia haʼa i roto i te hōʼē haʼapiʼiraʼa i mua nei. (Hi’o Ha’api’ira’a mai tā te Fa’aora,8-9