Tē pure nei Iesu i Gesetemane

’Eiaha tō’u hina’aro, ’ia ti’a rā tō ’oe hina’aro, nā Harry Anderson.

10–16 nō Fepuare.

2 Nephi 6–10

« ’Auē te rahi o te rāve’a o tō tātou Atua ! »

Te hōʼē rāveʼa maitaʼi nō te faʼaineine ia ʼoutou ʼia haʼapiʼi ’o te taiʼoraʼa i te 2 Nephi 6–10 nō ʼoutou iho. Pāpa’i i te mau faʼaʼiteraʼa pae vārua tā ʼoutou i fāriʼi, ʼe ʼa faʼaʼohipa i teie arataʼiraʼa nō te ʼite mai i te tahi atu mau ʼite ʼe mau manaʼo nō te haʼapiʼi.

Pāpa’i i te mau mana’o e tae mai

ītona ’apora’a ha’api’ira’a

Fa’a’ite mai i te mana’o

ʼUa haʼapiʼi Iakoba i tōna nūnaʼa ē e tiʼa i te mau haʼapiʼiraʼa a Isaia ’ia « faʼaauhia ia ʼoutou » (2 Nephi 6:5). E nehenehe ʼoutou e haʼamata ma te ani i te mau pīahi ʼia faʼaʼite mai i te hōʼē o te mau haʼapiʼiraʼa a Iakoba i roto i te 2 Nephi 6–10 tā rātou i manaʼo e faʼaau ra i tō rātou oraraʼa. E fa’ata’a ia rātou nō te aha rātou i ʼite ai i te faufaʼa rahi o taua haʼapiʼiraʼa ra.

ītona ha’api’ira’a

Ha’api’i i te ha’api’ira’a tumu

2 Nephi 6–8

E aroha te Fatu i tōna nūnaʼa ʼe e faʼatupu i tāna mau fafauraʼa.

• Nō te tauturu ’ia māramarama i te mau poroʼi i roto i te 2 Nephi 6–8, e riro ʼei tautururaʼa nō tā ʼoutou piha haʼapiʼiraʼa ʼia hāmani i te hōʼē tārena nō te mau ʼohipa i tupu tei faʼaʼitehiai roto i te 2 Nephi 6:8–15. E aha tā teie mau ʼohipa e parau mai nei nō niʼa i te Fatu ʼe tōna mau ’āehuehu nō tōna nūnaʼa ? (hiʼo atoʼa i te 2 Nephi 7:1–3; 8:3). E hinaʼaro paha ʼoutou e haʼamāramarama ē ʼei melo nō te ʼĒkālesia, e nūnaʼa fafauhia tātou nā te Atua i teie mahana, ʼe tē haʼaputuputuhia ra tātou mai roto mai i te ao e tae atu i roto i te vāhi pāruruhia o te ʼevanelia. E aha te mau poroʼi a teiei mau pene nā tātou i teienei ?

2 Nephi 9

Nā roto i tāna tāra’ehara, ʼua faʼaora Iesu Mesia i te mau taʼata atoʼa i te pohe pae tino ʼe te pae vārua.

• Hōʼē rāveʼa nō te faʼahōhonu i tō tātou māuruuru nō te tāraʼehara a Iesu Mesia ’o te feruriraʼa ïa e aha te tupu mai ia tātou ʼāhani ’aita e tāra’ehara. ’Ia feruri hōhonu te mau pīahi i teie mau mea ʼa tuatāpapa ai rātou i te 2 Nephi 9. E ani i te mau pīahi ’ia haʼamata ma te tuatāpaparaʼa i te mau ʼīrava 4–9 ʼe ’ia tāpa’o i muri iho i niʼa i te tāpura ’ere’ere i te mea e tupu ʼāhani ’aita te tāra’ehara a te Mesia. Mai te au i te mau ʼīrava 10–14, nāhea te Faʼaora i te faʼaoraraʼa ia tātou i teie ’ati pohe ? E tauturu te poroʼi a Elder Jeffrey R. Holland i roto i « Te tahi atu ā mau mātēria » i tā ʼoutou mau pīahi ʼia taʼa i tō tātou hinaʼaroʼo nō te tāraʼehara a Iesu Mesia. E haʼamātaʼitaʼi ato’a i te video tei haʼamauhia i niʼa i tāna poroʼi—« I reira te parau ti’a, te here ’e te aroha e fārerei ai » (ChurchofJesusChrist.org). E fa’a’ite mai te mau pīahi i te mau huru manaʼo e ti’a ai, tā te poroʼi a Elder Holland i faʼauru ia rātou nō niʼa i te Faʼaora.

• Ani i te mau pīahi ’ia feruri, nāhea rātou ’ia fa’ata’a i te tāraʼehara a Iesu Mesia i te tahi taʼata tei ʼore i ʼite e aha te reira ʼe nō te aha e mea tītauhia te reira. E tauturu te mau parau mau tei ʼitehia i roto i te 2 Nephi 9 i te mau pīahi ’ia fa’aineine nō taua ’āparaura’a ra. Penei a’e e nehenehe rātou e māʼimi i roto i te mau ʼīrava 4–12, nāhea te tāra’ehara a te Faʼaora e haʼavī ai i te pohe pae tino ʼe pae vārua. Ia au i te mau mea tā tātou i ʼapo mai i roto i teie mau pāpaʼiraʼa moʼa, nō te aha te tusia a te Faʼaora i piʼihia ai « hōʼē tāra’ehara mure ʼore » ? (2 Nephi 9:7).

• Nō tōna māere rahi i te rāve’a o te ora a te Atua i parau ai Iakoba « ʼauē te rahi » ʼe « ʼauē te hanahana » ʼa faʼata’a ai ʼoia i te ʼōpuaraʼa. Nō te tauturu i te mau pīahi ’ia māramarama i teie mau ’āehuehu nō niʼa i te Faʼaora ʼe tāna tāra’ehara, ʼa feruri i te ani ia rātou ʼia māʼimi i roto i te 2 Nephi 9 i te mau faʼahitiraʼa parau māere a Iakoba (e ʼitehia te rahiraʼa o te reira i roto i te mau ’īrava 8–20). E aha tā teie mau ʼīrava e haʼapiʼi nei nō ni’a i te Atua ’e tāna ʼōpuaraʼa ? E aha te mau ʼohipa i tupu tei tauturu ia tātou ʼia ʼite i te mea tā Iakoba i ʼite nō niʼa i te ʼōpuaraʼa a te Atua nō tāna mau tamariʼi ? E nehenehe atoʼa tā ʼoutou e hīmene i te hōʼē hīmene nō niʼa i te hanahana o te Atua, mai « Tōʼu Faʼaora, tōʼu Atua ! » (Te mau Hīmene, n° 42), nō te haʼapūai i teie tāuʼaraʼa parau.

2 Nephi 9:27–54

E nehenehe tātou e haere mai i te Mesia ra ʼe ʼia fāriʼi i te mau haʼamaitaʼiraʼa hanahana a tāna tāra’ehara.

• E ha’amata ʼoutou i te hōʼē ’āparaura’a nō niʼa i te mau haʼapiʼiraʼa a Iakoba i roto i teie mau ʼīrava ma te ani i te mau pīahi ’ia feruri, e nāhea rātou e ani i te tahi taʼata ʼia tātarahapa ʼe ʼia haere mai i te Mesia ra. Nāhea tō Iakoba raveraʼa i te reira i roto i te 2 Nephi 9:50–53 ? E aha te mau haʼamaitaʼiraʼa tāna i parau e tae mai i roto i tō tātou oraraʼa ’ia fāriʼi anaʼe tātou i teie mau aniraʼa ?

• I roto i te 2 Nephi 9, ʼua faʼaʼohipa Iakoba e piti pereota pūai ʼe te taʼa ʼē : « te rāveʼa aroha a Tei Hāmani » ʼe « taua rāveʼa haʼavare a te mea ’ino ra » (2 Nephi 9:6, 28). Nō te tauturu i te mau pīahi ʼia ʼite i teie taʼa-ʼē-raʼa, e pāpaʼi hōho’a i te hōʼē ʼēʼa i niʼa i te ʼiri pāpaʼiraʼa ʼe ʼia tāpaʼo i te reira Te ʼōpuaraʼa a te Metua i te Ao ra. Ani i te mau pīahi ’ia māʼimi i roto i te 2 Nephi 9:27–52, i te aʼo tā Iakoba i hōroʼa nō te tauturu ia tātou ʼia peʼe i te ʼōpuaraʼa a te Metua i te Ao ra. Ani ia rātou ʼia pāpaʼi i te mea tā rātou i ʼite i piha’i iho i te ʼēʼa. E aha tā Iakoba i haʼapiʼi nō niʼa i te mau rāveʼa e faʼaātea ʼē ai Sātane ia tātou i te ʼōpuaraʼa a tō tātou Metua i te Ao ra ? E aha tā tātou i ʼapo mai nā roto i teie mau ʼīrava nō niʼa i te vāhi e arataʼi ai te peʼeraʼa i te ʼōpuaraʼa a te Metua i te Ao ra ia tātou ʼe i hea te peʼeraʼa ia Sātane e arata’i atu ia tātou ? (hiʼo 2 Nephi 9:9, 18). Mai te au i teie mau ʼīrava, e aha tā tātou e rave nō te peʼe māite i te ʼōpuaraʼa a tō tātou Metua i te Ao ra ?

• I roto i te 2 Nephi 9:28–38, ʼua faʼaara mai Iakoba i te mau huru ʼe te mau peu e rave rahi e tāpe’a nei ia tātou ʼia peʼe i te ʼōpuaraʼa a te Atua nō tātou. ʼA feruri i te ani i te mau pīahi ’ia ʼimi i te reira. E aha ʼo teie mau huru ʼe mau peu e ʼite-rahi-hia nei i teie mahana ? E aha te faʼariro nei ia rātou ʼei mea ataata ? E aha tā tātou e haʼapiʼi mai i roto i te 2 Nephi 9:50–53 e nāhea i te ʼape i teie mau ati ?

ītona ha’api’ira’a mai

Faʼaitoito i te haʼapiʼiraʼa mai i te fare

Nō te tauturu i te mau pīahi ’ia pāpū i te taiʼoraʼa i teie mau parau a Isaia tei faʼahitihia e Nephi i roto i te 2 Nephi 11–24, e nehenehe tā ʼoutou e tātara ē, ʼua tuʼu Nephi i teie mau parau nō te haʼapūai i te faʼaroʼo ia Iesu Mesia o tōna nūnaʼa. Ani i te mau pīahi ʼia faʼariro i te taiʼoraʼa nō te hepetoma i muri nei ʼei rāveʼa nō te pātu i tō rātou iho faʼaroʼo iāna.

ītona mātēria

Te tahi atu ā mau mātēria

Tō tātou hinaʼaro i te hōʼē Faʼaora

ʼUa faʼatiʼa ʼo Elder Jeffrey R. Holland i te ʼāʼamu o te hōʼē taʼata paʼuma mouʼa tei tārere ataata noa i te hiti o te hōʼē mouʼa topa tārere, ʼaore e mauiha’a nō te tāpeʼa iāna ’ia ʼore e topa e pohe atu ai. I te taime ’a haʼamata ai tōna rima i te heʼe nā niʼa i te vāhi oneone o te hiti mouʼa tārere, ʼua ʼite aʼera ʼoia i te rima o tōna teina i te haruraʼa mai i tōna rima ʼe te hutiraʼa iāna i te vāhi pāpū. ʼUa faʼaau Elder Holland i te ʼohipa tei tupu o teie taʼata paʼuma mouʼa i tō tātou huru i roto i teie ao hiʼa :

« ʼUa vai mau na te hōʼē tāne o Adamu ʼe te hōʼē vahine o Eva tei hi’a mau i Edene ’e te mau utu’a atoʼa i ʼapitihia atu i taua hi’araʼa ra… Nō te mea hoʻi ē, ʼua fānauhia mai tātou i roto i taua ao hi’a ra ʼe nō te mea atoʼa ho’i e ʼōfati atoʼa tātou i te mau ture a te Atua, e fāriʼi atoʼa tātou i te mau faʼautu’araʼa tā Adamu ’e o Eva i fāriʼi.

ʼAuē ïa ʼohipa pe’ape’a ē ! Tē fa’aātea ʼē nei te tā’āto’araʼa o te nūnaʼa taʼata i te Atua―te mau tāne, te mau vahine ʼe te mau tamariʼi atoʼa o te nūnaʼa taʼata, ma te tāpiri atu i te pohe tāmau i te pae tino, ʼe te ahoaho i te pae vārua. ’O terā ānei te oraraʼa ? ’O teie ānei te hōpeʼaraʼa o te oraraʼa taʼata ? E tārere noa ānei tātou i ni’a i te tahi poro mou’a to’eto’e o te hōʼē ao tāu’a ʼore, ma te ʼimi i te tahi mea nō te tāpe’a atu i ni’a iho―’aore ho’i hōʼē a’e mea maori rā te fāfāraʼa i te one e heʼe ra i tō tātou rima, ʼaore e mea nō te faʼaora ia tātou, ʼaore e tao’a nō te tāpe’a atu i ni’a iho ? …

Mea māramarama maitaʼi ʼe te mure ʼore te pāhonoraʼa i taua mau uiraʼa ra : Eʼita roa ïa ! E faʼatupu taua tāraʼehara ra i te upoʼotiʻaraʼa i ni’a i te pohe o te tino, ’o te hōro’a i te ti’afaʼahouraʼa i te mau taʼata atoʼa tei ora ʼe aore rā ’o tei fānauhia mai i roto i teie nei ao. Aua’e rā, nā roto i te aroha, e hōro’a atoʼa mai te reira i te faʼaʼoreraʼa i te mau hara a te taʼata tāta’itahi mai ia Adamu mai ā e tae noa atu i te hōpeʼa nō teie nei ao, mai te au rā i te tātarahaparaʼa ʼe te haʼapa’oraʼa i te mau faʼaueraʼa a te Atua ». (« I reira te parau ti’a, te here ’e te aroha e fārerei ai », Ensign ʼaore rā Liahona, Mē 2015, 105–6).

Ha’amaita’ira’a i tā tātou ha’api’ira’a

Fa’a’ite pinepine i tō ’outou ’itera’a pāpū. E fa’aurura’a pūai tō ’outou ’itera’a pāpū ’ōhie ’e te hōhonu i ni’a i te feiā tā ’outou e ha’api’i ra. ’Aita e tītauhia ’ia pūai ’aore rā i te roa roa te reira. ʼA feruri i te faʼaʼite i tō ʼoutou iho ʼiteraʼa pāpū nō niʼa i te Faʼaora ’a tuatāpapa ai ʼoutou i te 2 Nephi 9.