« 24 nō Fepuare–1 nō Mati. 2 Nephi 26-30 : ’E ravera’a ’ūmerehia ’e te māerehia,’ » Mai, peʼe mai—nō te Ha’api’ira’a Sābati : Buka a Moromona 2020 (2020)
« 24 nō Fepuare–1 nō Mati. 2 Nephi 26-30 », Mai, peʼe mai—nō te Ha’api’ira’a Sābati : Buka a Moromona 2020
E arataʼi ʼoia ia ʼoe ma te rima, nā Sandra Rast
24 nō Fepuare–1 nō Mati.
2 Nephi 26–30
« E ravera’a ’ūmerehia ’e te māerehia »
Haʼamanaʼo ē ’ua riro i te ’utuāfare ’ei pū nō te ’āpora’a mai i te ’evanelia e ti’a ai. E nehenehe tā ʼoutou iho ʼe tā te ʼutuāfare tuatāpararaʼa i te 2 Nephi 26–30 e riro ʼei niu nō tā ʼoutou faʼaineineraʼa nō te haʼapiʼi. Faʼanaho i te mau rāveʼa nō te patu, nō te haʼapūai, ʼe nō te faʼaitoito i te tuatāpaparaʼa a te taʼata iho ʼe a te ʼutuāfare i te mau ta’ata i roto i tā ʼoutou piha haʼapiʼiraʼa.
Pāpa’i i te mau mau mana’o e tae mai
Fa’a’ite mai i te mana’o
I te ʼōmuaraʼa o te haʼapiʼiraʼa, e hōroʼa i te mau pīahi te hōʼē taime nō te faʼaʼite mai i te tahi mea tā rātou i ʼite ʼei mea faufaʼa rahi i roto i te 2 Nephi 26–30 ʼa tuatāpapa ai rātou i te fare. ʼEi hiʼoraʼa, e ani ia rātou ʼia faʼaʼite poto noa mai i te hōʼē ʼīrava tei tauturu ia rātou ʼia māramarama i tō tātou nei tau ʼe te mau fifi tā tātou e faʼaruru nei.
Ha’api’i i te ha’api’ira’a tumu
Te mau mea atoʼa tā te Fatu e rave nei ’ua tura’ihia nā tōna aroha ia tātou.
-
Mai te mea ʼua faʼauruhia ʼoutou ’ia ’āparau i te mau haʼapiʼiraʼa a Nephi nō niʼa i te aroha o te Fatu, e tāmata ’outou i teie : I muri aʼe i te taiʼo-ʼāmui-raʼa i te 2 Nephi 26:24, ani i te mau pīahi ’ia tāpura mai i te mau mea tā Iesu Mesia i rave nō rātou tei turaʼihia e te aroha. Nāhea ’oia e « ʼume i te taʼata atoʼa iāna ra » ? E aha te mea i faʼauru ia tātou ʼia rave ʼei pāhonoraʼa i tāna mau faʼaʼiteraʼa nō te aroha ?
-
ʼUa riro te mau aniraʼa manihini a te Fatu i roto i te 2 Nephi 26:24–28, 33 ’ei tāpaʼo faʼaʼite pūai nō tōna aroha. Hōʼē rāveʼa tā tātou e rave nō te tauturu i te mau pīahi ’ia ʼite i teie mau aniraʼa manihini ’o te aniraʼa ia rātou ʼia haʼapoto mai i te poroʼi a te Fatu i roto i teie mau ʼīrava i roto i te hōʼē noa pereota. Penei a’e e hinaʼaro te tahi mau pīahi e fa’a’ite mai i tā rātou mau haʼapotoraʼa. Nāhea teie mau ʼīrava e turaʼi ai i te rāveʼa e ani ia vetahi ʼē ’ia haere mai i te Mesia ra ? Faʼaitoito i te mau pīahi ʼia pāpa’i i te tahi o tō rātou mau manaʼo ʼe mau ʼāehuehu. Nō te tauturu ’ia ani i te Vārua, ʼa feruri e haʼuti i te hōʼē haruharuraʼa o te hōʼē hīmene nō niʼa i te aroha o te Faʼaora, mai te « Haere mai ia Iesu » (Te mau Hīmene, n° 56), ʼa feruri noa ai te mau pīahi.
2 Nephi 27 ; 29 ; 30:3–8
E mea faufaʼa roa te Buka a Moromona nō te ʼohipa a te Atua i te mau mahana hopeʼa nei.
-
E hinaʼaro paha tā ʼoutou mau pīahi i te tahi tauturu ʼia hāro’aro’a i te tohuraʼa i roto i te 2 Nephi 27 nō niʼa i te hōʼē buka tei piahia ʼe te hōʼē taʼata ʼite. E tauturu ato’a te ʼāʼamu i roto i « Te tahi atu ā mau mātēria ». E manuia ānei te haʼapiʼiraʼa i roto i tā ʼoutou piha haʼapiʼiraʼa ʼahani e haʼuti teata taʼata ora mai te tahi mau pīahi i te mau ʼohipa i tupu tei faʼaʼitehia i roto i teie ʼāʼamu ʼe i roto i te 2 Nephi 27:15–22 ? Nō te aha i faʼaʼitehia ai ia Nephi teie mau ʼohipa e rave rahi mau matahiti nā mua atu ? E aha tā te tohu a Nephi e haʼapiʼi nei ia tātou nō niʼa i te faufaʼa rahi o te Buka a Moromona ? Faʼaitoito i te mau pīahi ’ia faʼaʼite i te tahi ʼe te tahi e nāhea te roaʼaraʼa ia rātou tō rātou iho ʼiteraʼa pāpū nō te Buka a Moromona.
-
Tē vai ra ānei te hōʼē pīahi tei ani manihini i te hō’ē taʼata ʼia taiʼo i te Buka a Moromona ’o tāna e nehenehe e faʼaʼite mai ? E aha te tahi mau tumu e ʼore ai te hō’ē taʼata e fāriʼi i te hōʼē aniraʼa manihini ’ia taiʼo i te Buka a Moromona ? Tei roto te pāhonoraʼa a te Fatu nō te hōʼē o taua tumu rā i te 2 Nephi 29:6–11. E ani i te mau pīahi ʼia taiʼo i teie mau ʼīrava ʼe ʼia haʼuti teata taʼata ora mai e nāhea rātou ʼia pāhono ma te here i te hō’ē taʼata ’o te parau mai e ʼere te Buka a Moromona i te mea hinaʼarohia. E aha te tahi atu mau manaʼo o te mau pīahi nō niʼa i te huru e nehenehe ai rātou e tauturu ia vetahi ʼē ʼia « ʼite ē te [Buka a Moromona] e hōʼē ïa haʼamaitaʼiraʼa nō ō mai i te rima o te Atua » ? (2 Nephi 30:6).
Tē tūtava nei Sātane i te haʼavare.
-
Tē parau nei te faʼanahoraʼa nō teie hepetoma i roto i te Mai, peʼe mai—nō te taʼata hō’ē ʼe te ʼutuāfare ʼia ʼimi i te mau haʼavare a Sātane tei faʼaʼitehia i roto i te 2 Nephi 28. Penei a’e e nehenehe te mau pīahi e faʼaʼite mai i te mea tā rātou i ʼite, ʼaore rā e hi’o ’oi’oi mai rātou i te 2 Nephi 28 i roto i te piha haʼapiʼiraʼa ʼe ʼia tāpura i te mau haʼavare a Sātane tā rātou e ʼite mai. E riro atoʼa ’ei tauturu ’ia vaiiho ia rātou ʼia haʼa ma te mau pupu naʼinaʼi nō te ʼimi i te mau pāpaʼiraʼa moʼa ʼo te pātoʼi nei i teie mau haʼavareraʼa (mai te mea e hinaʼaro rātou i te tauturu, e faʼaʼite atu i te mau manaʼo i roto i « Te tahi atu ā mau mātēria »). I muri iho e parau mai te mau pupu te tahi ʼe te tahi i te mea tei ʼitehia e rātou ʼe ʼia ’āparau e nāhea rātou ʼia ʼite i « te mau haʼapiʼiraʼa haʼavare ʼe te faufaʼa ʼore ʼe te maʼamaʼa » a te ʼenemi (2 Nephi 28:9).
Faʼaitoito i te haʼapiʼiraʼa mai i te fare
E fa’auruhia te mau pīahi ʼia taʼio i te 2 Nephi 31–33 mai te mea ʼua ʼite rātou ē tei roto i teie mau pene te mau parau hopeʼa a Nephi i te tāpa’ora’ahia, tae noa atu te hōʼē o te mau faʼaʼiteraʼa rahi ʼe te ʼōhie roa nō te haʼapiʼiraʼa tumu a te Mesia.
Te tahi atu ā mau mātēria
« ’Ei reira te taʼata ʼite i te taiʼo parau ra e parau ai ē, ʼaore e tiʼa iāʼu ʼia taiʼo » (2 Nephi 27:18).
I te ʼāvaʼe Fepuare 1828, ʼua tere atu, o Martin Harris, te hōʼē hoa nō Iosepha Semita, « i te pae hiti’a o te rā nō te haere atu i te ʼoire nō New York ma te hōʼē hōhoʼa o te tahi mau pāpaʼiraʼa i niʼa i te mau ʼapi [auro] nō te faʼaʼite i te mau ʼaivānaʼa. ʼUa hinaʼaro paha ʼoia i te tahi atu ā haʼapāpūraʼa ē e mea mau te mau pāpāʼa parau, ʼaore rā ʼua manaʼo ʼoia e tauturu te hōʼē ʼiteraʼa pāpū ia rātou ʼia ’aitārahu mai i te moni nō te pia i te ʼīritiraʼa. Noa atu ra e aha te tumu, ʼua onoono ʼoia ʼe ʼua faʼauru te Fatu iāna ’ia rave i teie tere.
« I taua taime ra, ʼaita i rahi te ʼite o Iosepha ʼe o Martin nō niʼa i te reo o te mau pāpāʼa parau. ʼUa ʼite noa rāua i te mea tā te melahi Moroni i parau ia Iosepha : E buka tahito nō Amerika. Nō reira, ʼaita Martin i ʼimi i te hōʼē ʼaivānaʼa tei ʼite i te reo ʼAiphiti (ʼua ʼite Iosepha i muri mai ē ʼua piʼihia te reo i roto i te mau pāpāʼa parau e reo ʼAiphiti faʼaʼāpīhiaʼ), ʼua fārerei rā Martin e rave rahi mau ʼaivānaʼa tei ʼanaʼanatae i te mau mea tahito, te mau mea tahito ihoa ra nō Amerika.
« … [I roto i te mau ʼaivānaʼa tā Martin i fārerei atu] o Charles Anthon, te hōʼē ʼorometua haʼapiʼi ʼāpī nō te tarame ʼe te reo i te fare haʼapiʼiraʼa teitei nō Columbia. ʼUa haʼaputuputu na Anthon i te mau ʼāʼamu ʼe te mau a’oraʼa a te mau Initia Marite nō te pia ʼe tōna hinaʼaro rahi e hiʼopo’a i te parau tā Martin i ʼāfaʼi atu iāna.
« ʼUa parau Martin ē ʼua parau Anthon e mea mau te mau pāpaʼiraʼa e tae roa i te taime ʼua ʼite mai ʼoia e nāhea te roaʼaraʼa teie mau parau ia Iosepha Semita. ʼUa parau ʼoia ia Martin ʼia ʼāfaʼi mai te mau pāpāʼa parau iāna ra. ʼUa pātoʼi Martin, ʼe ’ua pāhono atu Anthon, ma te parau i te hōʼē ʼīrava i roto ia Isaia, eʼita e nehenehe iāʼu ’ia taiʼo i te hōʼē buka tei piahia.ʼ Noa atu ē ʼua huna Anthon i muri mai i te mau mea i tupu i roto i te ʼāʼamu a Martin nō niʼa i tā rāua fārereiraʼa, ʼua ʼite tātou i teie : ʼUa hoʼi mai Martin i tōna mau tere i te mau ʼaivānaʼa i te pae hiti’a o te rā ma te pāpū maitaʼi ē ʼua piʼihia Iosepha Semita e te Atua ʼe e mea tahito mau te mau pāpāʼa parau ʼe te mau pāpaʼiraʼa. ʼUa faʼariro ʼoia ʼe Iosepha i te fārereiraʼa ia Anthon ʼei hōʼē tupuraʼa o te tohu a Isaia (tei faʼahiti-atoʼa-hia i roto i te Buka a Moromona) nō te ‘hōʼē buka tei piahia, tei tuʼuhia atu i te taʼata ʼite i te taiʼo i te parau ra, ’a nā ō atu ai, ʼa taiʼo na ʼoe i tera ra buka; tē parau mai ra ʼoia, e aha e tiʼa ʼia taiʼo, tei piahia’ [Isaia 29:11 ; hiʼo atoʼa 2 Nephi 27:15–18] » (« The Contributions of Martin Harris », Revelations in Context [2016], 3–4, history.ChurchofJesusChrist.org).
Tē pātoʼi nei te mau pāpaʼiraʼa moʼa i te mau haʼavare a Sātane.
|
Ha’api’ira’a tumu hape |
Haʼapiʼiraʼa tumu mau |
|---|---|
|
« I teie nei mahana, e ʼere ʼoia i te Atua o te temeio; ʼua oti ē na hoʼi te raveraʼa i tāna ʼohipa » (2 Nephi 28:6). | |
|
« E faʼatiʼa… te Atua i te raveraʼa i te hara iti » (2 Nephi 28:8). | |
|
« E maitaʼi tō Ziona » (2 Nephi 28:21). | |
|
« ʼAita vau e diabolo, ʼaita roa hoʼi e diabolo » (2 Nephi 28:22). |
2 Nephi 2:17 ; Te Parau Haʼapiʼiraʼa ʼe te Mau Parau Fafau 76:25–27 |
|
« ʼAore e parau toʼe tei ʼore i ʼitehia e mātou ra, ʼua navaʼi hoʼi te reira ra ia mātou » (2 Nephi 28:29). |
Ha’amata’ira’a i tā tātou ha’api’ira’a
’Eiaha e mata’u i te muhu ’ore. « E tītau te mau uira’a maita’i i te taime nō te pāhono. E tītau te reira i te ferurira’a, te ’imira’a ’e te fa’aurura’a. E nehenehe te taime nō te tīa’i i te mau pāhonora’a e riro ’ei taime mo’a nō te feruri-māite-ra’a. ’Eiaha e topa i roto i te fa’aoti-’oi’oi-ra’a i te reira ma te pāhono i tā ’outou iho uira’a ’aore rā ma te tu’u atu i te tahi atu mea » (Ha’api’ira’a mai tā te Fa’aora, 31).