Te ’ārētōria o te tumu ʼōlive, nā Brad Teare

16–22 nō Māti.

Iakoba 5–7

Tē ’ohipa nei te Fatu ’e tātou

Haʼamata i tā ʼoutou faʼaineineraʼa nō te ha’api’i nā roto i te taiʼoraʼa i te Jacob 5–7 ʼoutou iho ʼe tō ʼoutou ʼutuāfare. E aha tā ʼoutou i haʼapiʼi mai ʼe te fana’o rahi nō te feiā tā ʼoutou e haʼapiʼi ra ? E hōro’a teie arata’ira’a ia ’outou i te tahi atu mau mana’o.

Pāpa’i i te mau mana’o e tae mai

Faʼaʼite mai i te manaʼo

E aha tā te mau pīahi i ʼite i roto i te Iakoba 5–7 tei faʼauru ia rātou « ʼia ʼohipa i roto i te ō vine » i reira rātou e ora ai ? Iakoba 5:15).

Ha’api’i i te ha’api’ira’a tumu

Iakoba 5

Tē ani nei te Fatu i tāna mau tāvini ʼia ʼohipa e ʼōna i roto i tāna ʼō vine.

• Nō te mea hoʼi e mea roa ʼe e mea fifi riʼi te ’ārētōria nō te mau tumu ’ōlive, e hinaʼaro paha ʼoutou e haʼa ʼāmui nō te hāmani i te hōʼē hiʼoraʼa poto nō te parabole. ʼEi hiʼoraʼa, e nehenehe ʼoutou e pāpaʼi hōho’a i te mau tufaʼa faufaʼa rahi o te ’ārētōria i niʼa i te tāpura ’ere’ere ʼaore rā e hāmani i te hōʼē tālena nō te mau ʼohipa i tupu (nō te hōʼē hiʼoraʼa, hiʼo i te nīno’a ’iti i te hopeʼa o teie arataʼiraʼa). E e ʼāmui atu te mau pīahi i te mau faʼahororaʼa o te mau pāpaʼiraʼa moʼa ʼaore rā te mau faʼaʼiteraʼa i niʼa i te hōhoʼa ʼe ʼia tāu’aparau i te auraʼa o te tahi mau taipe, mai te mau tumu ʼōlive mau ʼe te ʼōviri, te Fatu o te ʼō vine, te tāvini, ʼe te māʼa hotu maitaʼi ʼe te ʼino. Hi’o faʼahou i roto i teie tāu’ara’a parau i te mau ʼīrava 61–75, ’o te fa’ata’a nei i te ʼohipa a te Fatu i tō tātou ’anotau. Nāhea tātou e tāvini ai i roto i te ō vine a te Fatu ? Nāhea teie mau ʼīrava e tūʼati ai i te ʼohipa tā tātou e rave nei ?

• E hōro’a mai te mau parau « Te Fatu o te ’ō vine » i te tāmāhanahana nō te mau metua o te mau tamariʼi tei hahi ʼē. ʼEi hiʼoraʼa, e aha tā Iakoba 5:41, 46–47 e parau nei nō niʼa i te huru o tō tātou Metua i te Ao ra i niʼa i tāna mau tamariʼi tei hahi ʼē ? Nāhea ’oia e tāmata i te faʼaora ia rātou ? (hiʼo i te mau ʼīrava 61–75)

• Tē haʼapiʼi nei te Iakoba 5:61–75 ē e ʼohipa te Fatu i piha’i iho i tāna mau tāvini i roto i tāna ’ō vine. E nehenehe te mau pīahi e taiʼo i teie mau ʼīrava mā te mau pupu naʼinaʼi ʼe ʼia tauʼaparau i te mau ’itera’a ē ’o tē faʼaʼite ra ia rātou ē tē ʼohipa nei te Fatu ʼe tāna mau tāvini nō te faʼahaere i tāna ʼohipa i mua. E aha atu ā te mau ʼite tā te mau pīahi e ʼāmui mai nā roto mai i te poroʼi a te peresideni Henry B. Eyring « Tē arata’i nei te Fatu i tāna ’Ēkālesia » ? (Ensign ʼaore rā Liahona, Novema 2017, 81–84).

  

  E nehenehe tātou e ʼohipa ʼe te « Fatu o te ’ō vine » i ō nei i niʼa i te fenua.

Iakoba 6:3-13

E haʼamanaʼo te Fatu i tōna nūnaʼa ma te here ʼe te aroha.

• Tē ani nei te Mai, peʼe mai—nō te taʼata hō’ē ʼe te ʼutuāfare ia tātou ʼia imi i roto i te Iakoba 6:3–5 te mau poroʼi tā Iakoba e hinaʼaro i te haʼapūai ʼe ʼia ʼitea i muri iho i taua mau poroʼi ra i roto i te ’ārētōria o te mau tumu ʼōlive (hiʼo Iakoba 5). Penei a’e e fanaʼo te mau pīahi ’ia faʼaroʼo i te mau pīahi tei rave i teie ʼohiparaʼa ʼaore rā i te raveraʼa i teie ʼohiparaʼa ʼei piha haʼapiʼiraʼa. E tāpura rātou i niʼa i te ʼtāpura ’ere’ere te mau parau mau o te ʼevanelia tā rātou i ʼite mai i roto i te Iakoba 6. I muri iho, i raro aʼe i te parau mau tāta’itahi, e tāpura rātou i te mau ʼīrava nō roto mai i te ’ārētōria i roto te Iakoba 5 ’o te faʼaʼite nei i taua poroʼi ra. Nāhea te mau pīahi e ʼite ai i teie ā mau poroʼi tei faʼahōhoʼahia i roto i tō rātou iho oraraʼa ?

• Hōʼē auraʼa nō te tāʼo ʼati atu, ʼo te ʼāpitiraʼa atu ïa i te tahi mea ma te pāpū, ma te piri roa ʼe ma te aueue ʼore. E hinaʼaro paha ʼoutou e faʼaʼite i teie tātararaʼa i tā ʼoutou mau pīahi ʼe e ani e aha te mau manaʼo tā te reira i hōroʼa ia rātou nō niʼa ia Iakoba 6:5.

Iakoba 7:1-23

E tiʼa pūai atu tātou ʼia tāmata anaʼe vetahi ʼē i tō tātou faʼaroʼo.

• ʼUa faʼaruru te rahiraʼa o tātou i te pātoʼiraʼa nō tō tātou faʼaroʼo mai tā Iaboka i faʼaruru ʼa fārerei ai ʼoia ia Serema. Hōʼē rāveʼa nō te tauturu i te mau pīahi ʼia faʼaineine nō taua huru pātoʼiraʼa ra ʼo te ʼimiraʼa i roto i te Iakoba 7:1–23 te mau parau tumu tei tauturu ia Iakoba ʼia tiʼa pūai noa. E aha te tahi mau hiʼoraʼa nō te tiʼa pūairaʼa i roto i tō tātou faʼaroʼo tā tātou e nehenehe e faʼaʼite—mai roto mai i te mau pāpaʼiraʼa moʼa, tō tātou ʼāʼamu ʼutuāfare, ʼaore rā tō tātou iho oraraʼa ? Penei a’e tē vai ra te mau poroʼi a te feiā faʼatere o te ʼĒkālesia tei tauturu ia tātou ʼa tūtava ai vetahi ʼē i te faʼaʼāueue i tō tātou faʼaroʼo (hiʼo, ʼei hiʼoraʼa, Quentin L. Cook, « Itoito i roto i te ’itera’a pāpū nō Iesu », Ensign ʼaore rā Liahona, Novema 2016, 40–43). Faʼaitoito i te mau pīahi ʼia faʼaʼite mai i te mau poroʼi tā rātou i ʼite e tauturu rahi.

• I tō Iakoba faʼarururaʼa ia Serema, ʼua tiʼaturi Serema e faʼaʼāueue ’oia i te faʼaroʼo o Iakoba, ʼaita rā te faʼaroʼo o Iakoba i ʼāueue (hiʼo Iakoba 7:5). E ʼoaʼoa paha te mau pīahi i te haʼuti taʼata ora i te ’āparaura’a i rotopū ia Iakoba ʼe Serema, ma te faʼaʼohipa i te Iakoba 7:1–23 ʼei arataʼi. E aha tā tātou e ha’api’i mai nā roto mai i teie mau ’īrava nō ni’a i te mau raveraʼa ʼe te mau haʼapiʼiraʼa a te feiā e pātoʼi i te ʼohipa a te Atua ? E aha tā tātou i ’apo mai nā roto mai ia Iakoba, e nāhea ʼia fa’arahi atu ā te ʼāueue ʼore i roto i tō tātou faʼaroʼo ?

Iakoba 7:24-25

E nehenehe tātou e tiʼaturi i te Atua.

• ʼUa ora te mau ʼāti Nephi i raro aʼe i te ʼaroraʼa tāmau a te mau ʼāti Lamana. Noa atu ’aita tātou e faʼaruru nei i te ha’amata’ura’a i te mau mahana atoʼa nō te hōʼē tamaʼi pae tino, e aha ïa te mau ʼati pae vārua tā tātou e faʼaruru nei ? E aha tā tātou e ʼapo mai i te pāhonoraʼa a te mau ʼāti Nephi i roto i tō rātou huru oraraʼa, mai tei faʼata’ahia i roto i te Iakoba 7:24–25 ? E hinaʼaro paha ʼoutou e hīmene ʼaore rā e taiʼo ʼe e tāu’aparau i muri iho i te mau hīmene purera’a tei faʼaʼohipa i te mau tamaʼi ʼei parabole, mai te « E faehau faʼaroʼo » ʼaore rā « Hiʼo mai ! i te nuʼu » (Te mau Hīmene, n° 151, 154).

Faʼaitoito i te haʼapiʼiraʼa mai i te fare

Nō te faʼaitoito i te mau pīahi ʼia taiʼo i te buka a Enoa, ʼa parau ia rātou ē e ha’api’i te reira ia rātou nāhea i te haʼamaitaʼi atu ā i tā rātou mau pure.

Ha’amaita’ira’a i tā tātou ha’api’ira’a

Fa’atumu i tā ’outou ha’api’ira’a i ni’a i te ha’api’ira’a tumu. ’Ia pāpū ē te fa’atumu nei tā ’outou mau tau’ara’a parau i ni’a i te ha’api’ira’a tumu i roto i te mau pāpa’ira’a mo’a. E nehenehe ʼoutou e rave i te reira ma te ani i te mau pīahi ’ia taiʼo i te mau pāpaʼiraʼa moʼa ’e ʼia faʼaʼite mai i muri iho i te mau parau mau tā rātou i ʼite, ’oia ato’a tō rātou mau ’itera’a i te oraraʼa i teie mau parau mau. (Hi’o Ha’api’ira’a mai tā te Fa’aora, 20–21.)