« 23-29 nō Māti. Enosa–Te mau Parau a Moromona : Tē rave nei ’oia i roto iā’u nō te rave mai te au i tōna hina’aro », Mai, peʼe mai—nō te Haʼapiʼiraʼa Sābati : Buka a Moromona 2020 (2020)
« 23-29 nō Māti. Enosa–Te mau Parau a Moromona », Mai, peʼe mai—nō te Ha’api’ira’a Sābati : 2020
Iakoba ʼe Enosa, nā Scott Snow
23-29 nō Māti.
Enosa–Te mau Parau a Moromona
Tē rave nei ’oia i roto iā’u nō te rave mai te au i tōna hina’aro
Faʼaineine i te haʼapiʼi nā roto i te taiʼoraʼa i te Enosa–Te mau Parau a Moromona ʼe te hāmaniraʼa i te hōʼē fa’anahora’a ha’api’ira’a (hiʼo Ha’api’ira’a mai tā te Fa’aora, 19). E nehenehe atoʼa te mau manaʼo ʼe te mau haʼapiʼiraʼa tumu i roto i teie arataʼiraʼa e tauturu ’ia hōroʼa mai i te mau manaʼo ia ʼoutou
Pāpa’i i te mau mana’o
Fa’a’ite mai i te mana’o
Nō te hōroʼa i te taime i te mau pīahi ’ia faʼaʼite mai i te mea tā rātou i haʼapiʼi mai i te fare, e vāhi ’outou ia rātou nā te mau pupu ʼe ʼia faʼataʼa i te pupu tātaʼitahi ʼia taiʼo hōʼē o te mau pene i roto i te Enosa–Te mau Parau a Moromona. Ani ia rātou ’ia fa’a’ite mai i te mau ʼīrava o te reira pene ’o tā rātou e mana’o ra e tāu’aparau te piha haʼapiʼiraʼa e ti’a ai. tāpura i teie mau ʼīrava i niʼa i te tāpura ’ere’ere, ʼe e māʼiti i te tahi noa nō te tāu’aparau.
Ha’api’i i te ha’api’ira’a tumu
E fāriʼi tātou i te faʼaʼoreraʼa i tā tātou mau hara ʼa faʼaʼohipa ai tātou i te faʼaroʼo ia Iesu Mesia.
-
Teie te tahi mau uiraʼa tā ʼoutou e nehenehe e ui i te mau pīahi ʼia feruri ʼe ʼia tāu’aparau, ’a tuatāpapa ai ʼoutou i te Enosa 1:1–17 : E aha tā ʼoutou i haʼapiʼi mai nā roto mai i te ʼohipa i tupu ia Enosa nō te fāriʼiraʼa i te faʼaʼoreraʼa i tā tātou mau hara ? Nāhea tō Enosa faʼaʼiteraʼa i tōna faʼaroʼo ia Iesu Mesia ? Nāhea teie ’itera’a i te tauiraʼa ia Enosa ʼe nāhea tōna hiʼoraʼa iāna iho ʼe ia vetahi ʼē ?
E pāhonohia tā tātou mau pure hōhonu.
-
Nō te tauturu i te mau pīahi ’ia faʼahōhonu i tō rātou ʼite nō niʼa i te pure, e nehenehe ʼoutou e vāhi ia rātou nā te pupu naʼinaʼi ʼe e ani i te pupu tātaʼitahi ’ia tuatāpapa hōʼē o teie mau tufaʼa i muri nei i roto i te Enosa 1: mauʼīrava 2–8, 9–11, ʼaore rā 12–17. E ani i muri iho i te pupu tātaʼitahi ʼia haʼapiʼi i te toeʼa o te mau pīahi i te tahi ’ohipa tā rātou i haʼapiʼi mai nō niʼa i te pure i roto i tā rātou mau ʼīrava i faʼataʼahia. ʼEi hiʼoraʼa, e ani ia rātou ʼia faʼaʼite mai i te mau ta’o ʼe te mau pereota e fa’ata’a nei, nāhea tō Enosa pureraʼa.
-
Taʼa ʼē noa atu i te ’apora’a mai e nāhea Enosa i te purera’a, e ha’api’i rahi ato’a mai tātou i te mea tā Enosa i pure. Penei a’e e ’itehia mai i te mau pīahi nō vai ʼe e aha te mea i pure ai Enosa i rotoi te Enosa 1:4–17. Mai te au i teie mau ʼīrava, nō te aha Enosa i hinaʼaro ai e pure nō vetahi ʼē ? E aha te tahi mau parau mau nō niʼa i te pure tā tātou i haʼapiʼi mai nā roto mai ia Enosa ?
Mai te mea e haʼapaʼo tātou i te mau faʼaueraʼa, e manuia tātou.
-
ʼUa pāpaʼi Iaroma ʼe te tahi atu mau taʼata nō Omoni nō te nūnaʼa ʼāti Nephi, e tano atoʼa rā tā rātou mau poroʼi i te mau taʼata tātaʼitahi. E aha tā tātou i haʼapiʼi mai nā roto mai i te mau buka a Iaroma ʼe Omoni, e nāhea te parau-tiʼa e arataʼi ai i te manuiaraʼa ? (ʼEi hiʼoraʼa, hiʼo Iaroma 1:7–12 ʼe Omoni 1:5–7, 12–18). E riro paha ’ei tautururaʼa nō te mau pīahi ʼia faʼata’a i te auraʼa nō te tāʼo manuiaraʼa ma te faʼaʼohipa i te hōʼē faʼatoro parau ʼe te mau pāpaʼiraʼa moʼa (ʼei hiʼoraʼa, hiʼo Alama 37:13 ; 48:15). Nāhea te tātararaʼa a tō te ao ’ia fa’aauhia i te tātararaʼa a te Fatu ? Nāhea te Fatu i te tauturu i tōna nūnaʼa ʼia manuia ?
-
Mai te mau peropheta ʼāti Nephi i haʼa itoito nō te haʼapiʼi i te mau faʼaueraʼa i te nūnaʼa, tē haʼapiʼi atoʼa nei tō tātou mau peropheta nō te mau mahana hopeʼa nei ia tātou i te mau faʼaueraʼa. I muri aʼe i te taiʼoraʼa i te Iaroma 1:9–12, e nehenehe te mau pīahi e tāu’aparau i te mau haʼapiʼiraʼa a te feiā faʼatere o te ʼĒkālesia i hōroʼa iho nei, tei faʼauru ia rātou ’ia haʼapaʼo i te mau faʼaueraʼa. E riro ’ei tautururaʼa nō te mau pīahi ʼia taiʼo faʼahou i te mau poroʼi nō te ʼāmuiraʼa i tupu iho nei i roto i te mau veʼa a te ʼĒkālesia ʼaore rā i niʼa i te faʼanahoraʼa Vairaʼa Buka ʼEvanelia. ʼAore rā ʼia taiʼo faʼahou rātou i te mau ture tei tāu’aparauhia i roto i te Nō te Pūai o te Feiā ’Āpī. Mai te mea e hinaʼarohia, e hiʼo atu i te tāpura o te mau poroʼi i roto i « Te tahi atu ā mau mātēria ». Nāhea te haʼapaʼoraʼa i te mau faʼaueraʼa e tauturu ai ia tātou ʼia « manuia » i roto i tō tātou oraraʼa ?
ʼUa ʼāfaʼi mai te Fatu e rave rahi mau nūnaʼa i te fenua i parauhia ra.
-
Tei roto te Buka a Moromona te hōʼē ʼāʼamu fifi ri’i, ʼe penei a’e e mea fifi te peʼeraʼa i te mau huru pupu taʼata tā te buka e faʼaʼite ra. Hōʼē rāveʼa nō te ’apo mai nō niʼa i te nūnaʼa tātaʼitahi i roto i te Buka a Moromona ’o te hāmaniraʼa ïa i te hōʼē tāpura i niʼa i te tāpura ’ere’ere ʼe e ani i te mau pīahi ’ia faʼaʼī i te reira i te haʼamāramaramaraʼa nō niʼa i te pupu tātaʼitahi (mai te mau ʼāti Nephi, te mau ʼāti Lamana, ʼe te nūnaʼa nō Zarahemela). ʼEi hiʼoraʼa, ’ia tu’uhia teie mau upoʼo parau i niʼa i te tāpura : Iʼoa o te pupu, Ahea ʼe nāhea tō rātou tāpaeraʼa, ʼe E aha tei tupu ia rātou. E tāu’aparau ʼāmui nō te aha e mea faufaʼa ʼia māramarama i te mau mea tā ʼoutou i haʼapiʼi mai nō niʼa i te pupu tātaʼitahi. E tauturu teie mau tāʼo i roto i te Fa’ahorora’a Pāpaʼiraʼa Moʼa (ChurchofJesusChrist.org) : « Korianetumera », « ’āti Iareda », « ’āti Lamana », « Muleka », « ’āti Nephi », ’e « Zarahemela ».
E ʼohipa te Atua nā roto atu ia tātou mai te mea e peʼe tātou i tāna arataʼiraʼa.
-
ʼEi tuhaʼa nō te tāu’aparau i Te mau Parau a Moromona, e ani i te hōʼē pīahi ’ia haere ineine mai nō te faʼaʼite mai, nō te aha Moromona i faʼauruhia ai ʼia tuʼu i te mau pāpaʼa parau naʼinaʼi (1 Nephi–Omoni) i roto i te Buka a Moromona. E fa’aineine teie pīahi nā roto i te taiʼoraʼa i Te mau Parau a Moromona ʼe te tahi atu mau mātēria, mai Te Parau Haʼapiʼiraʼa ʼe te mau Parau Fafau 10:8–19, 39–45 ; te arataʼiraʼa nō tei hepetoma i roto i te Mai, peʼe mai—nō te ta’ata hō’ē ʼe te ʼutuāfare; ʼe te pene 5 o Te Feiā Moʼa, buka 1. E faʼaitoito i te mau pīahi ’ia tuʼu i te mau ’ohipa faufaʼa rahi nō niʼa i te moʼeraʼa o nā 116 ʼapi pāpaʼi-rima-hia o te Buka a Moromona ʼe nō te aha i hinaʼarohia ai te mau pāpaʼa parau naʼinaʼi nō te mono i te mau ʼapi tei moʼe. E aha te mau parau mau tā te mau pīahi i ’apo mai nā roto mai i te reira, e nāhea te Fatu i te ’ohipara’a nā roto atu i te taʼata ? E aha tā te mau pīahi i ʼite i roto i Te mau Parau a Moromona 1:1–8 tei faʼauru ia rātou ʼia peʼe i te arataʼiraʼa a te Atua noa atu ’aita i noaʼa ia rātou ʼia ʼite hope roa i te mau tumu ?
Hōho’aTe putura’a Moromona i te mau ʼapi auroTe putura’a Moromona i te mau ʼapi auro, nā Jorge Cocco
-
ʼUa haʼamaitaʼi Moromona e rave rahi milioni oraraʼa nō te mea ʼua peʼe ʼoia i te mau muhumuhu a te Vārua nō te mau pāpaʼa parau naʼinaʼi (hiʼo Te mau Parau a Moromona 1:7). E feruri i te mau rāveʼa e tauturu ai ’outou i tā ʼoutou mau pīahi ’ia hāro’aro’a ē e nehenehe atoʼa rātou e haʼamaitaʼi ia vetahi ʼē ʼa ’imi ai rātou ʼia riro ʼei mau mauihaʼa i roto i te rima o te Atua ʼe ʼia peʼe i te mau muhumuhu a te Vārua Maitaʼi. Nāhea tō te Atua ʼohiparaʼa nā roto ia Moromona ? E aha tā te mau pīahi i ʼite i tō te Fatu ʼohiparaʼa nā roto atu ia rātou ʼaore rā ia vetahi ʼē ’a faʼaroʼo ai rātou i te Vārua ʼe a ’imi ai rātou i te rave i te hinaʼaro o te Atua ? E hōroʼa mai te ʼāʼamu nō te peresideni Thomas S. Monson i roto i « Te tahi atu ā mau mātēria » i te hōʼē hōhoʼa ’o te tauturu i te mau pīahi ʼia feruri i te mau hiʼoraʼa nō roto mai i tō rātou iho oraraʼa.
Faʼaitoito i te haʼapiʼiraʼa mai i te fare
Nō te mea ē, tē fātata mai ra te ʼāmuiraʼa rahi ʼe te Pāta i te mau hepetoma i muri nei, e faʼaitoito i te mau pīahi ʼia faʼaroʼo i te mau poroʼi i roto i te reira te mau melo nō te Peresideniraʼa Mātāmua ʼe te Pupu nō te Tino ’Ahuru Ma Piti ’āpōsetolo e faʼaʼite ai i tō rātou ʼite tāʼa ʼē nō Iesu Mesia
Te tahi atu ā mau mātēria
Mau video nō te Buka a Moromona nō niʼa ia Enosa.
’Imi i te mau video e faʼata’a mai i te mau ʼāʼamu nō roto mai i te buka a Enosa i roto i te ha’aputura’a video nō te Buka a Moromona i niʼa i te ChurchofJesusChrist.org ʼaore rā te faʼanahoraʼa Vairaʼa Buka ʼEvanelia.
Mau poroʼi o te ʼāmuiraʼa rahi nō niʼa i te haʼapaʼoraʼa i te mau faʼaueraʼa.
-
Thomas S. Monson, « ’A ha’apa’o i te mau fa’auera’a », Ensign ʼaore rā Liahona, Novema 2015, 83–85
-
Dieter F. Uchtdorf, « Te orara’a i te ’evanelia mā te ’oa’oa », Ensign ʼaore rā Liahona, Novema 2014, 120–23
-
Dallin H. Oaks, « ’Eiaha ʼei mau Atua ʼē atu », Ensign ʼaore rā Liahona, Novema 2013, 72–75
« Aroha rima atu i te mau tamariʼi atoʼa ».
ʼA tāvini ai te peresideniThomas S. Monson ʼei hōʼē melo nō te Pupu nō te Tino ʼAhuru ma Piti ʼāpōsetolo, ʼua paraparau ʼoia i te hōʼē rururaʼa a te mau tamariʼi Paraimere i roto i te hōʼē ʼoire iti nō Samoa. I muri aʼe, ʼua faʼauruhia ʼoia ’ia aroha tātaʼitahi i nā 247 tamariʼi tei tae mai. ’Ārea rā, ʼua ʼite aʼera ʼoia ē eʼita e navaʼi tōna taime ; ʼua tāmata ʼoia e feruri, e faʼaātea atu i rāpae’au nō te aroha i te mau tamariʼi, ʼaita rā i manuia.
I te pae hope’a, ʼua fāriu atu ʼoia i te ʼorometua haʼapiʼi o te mau tamariʼi ma te parau ē, « e hinaʼaro rahi tōʼu i te aroha rima i te tamāroa ʼe te tamāhine tātaʼitahi. E nehenehe ānei ? »
ʼUa ʼata te ʼorometua haʼapiʼi ʼe ʼua parau i te mau tamariʼi nā roto i te reo Samoa. ʼUa pāhono ʼanaʼanatae mai rātou ma te piʼo i tō rātou upoʼo. I reira tō te ʼorometua haʼapiʼi parauraʼa ia Elder Monson ē i tōna faʼaroʼoraʼa ē e tere mai te hōʼē o te mau ʼāpōsetolo i Samoa, ʼua fafau ʼoia i te mau tamariʼi ē mai te mea e pure rātou ma tō rātou ʼāʼau atoʼa ʼe e faʼaroʼo tō rātou, e haere mai Elder Monson i tō rātou ʼoire iti ʼe e faʼauruhia ʼoia e te Vārua Maitaʼi ’ia aroha rima atu i te mau tamariʼi atoʼa (hiʼo Thomas S. Monson, « Friend to Friend: Talofa Lava », Friend, Mē 1972, 12–13).