Tē haʼapiʼi ra Iesu i tāna mau pipi, nā Justin Kunz

2–8 nō Māti

2 Nephi 31–33

« Terā te ʼēʼa mau »

ʼA tuatāpapa ai ʼoutou i te 2 Nephi 31–33, ʼa haʼamanaʼo i tā ʼoutou mau pīahi ʼe ʼa feruri e aha te mau ’itera’a tā rātou i fāri’i nō niʼa i te mau parau mau tā Nephi i haʼapiʼi. Nāheaʼoutou i te ani ia rātou ʼia haʼapiʼi atu i te tahi ʼe te tahi i te mea tā rātou i ’apo mai ʼe te mana’o nō niʼa i teie mau haʼapiʼiraʼa tumu ?

Pāpa’i i te mau mana’o e tae mai

Fa’a’ite mai i te mana’o

ʼUa fāriʼi ānei te hōʼē o tā ʼoutou mau pīahi i te hō’ē ’itera’a faufaʼa rahi i teie hepetoma nō niʼa i te hōʼē o te mau manaʼo tauturu e tuatāpapa i roto i te Mai, peʼe mai—nō te taʼata hō’ē ʼe te ʼutuāfare ? Hōroʼa i te mau pīahi i te taime nō te faʼaʼite mai i tō rātou mau ’itera’a.

Ha’api’i i te ha’api’ira’a tumu

2 Nephi 31–32

Iesu Mesia ʼe tāna haʼapiʼiraʼa tumu ʼo te rāveʼa anaʼe e tae atu i te ora mure ʼore.

• Penei a’e e fanaʼo tā ʼoutou mau pīahi ’ia ʼite, nāhea te faʼaroʼo, te tātarahaparaʼa, te bāpetizoraʼa, te hōroʼaraʼa i te Vārua Maitaʼi, ʼe te tāpeʼaraʼa e tae roa i te hopeʼa e tūʼati ai te tahi ʼe te tahi ʼe i te tāra’ehara a Iesu Mesia. Nō te rave i te reira, e pāpaʼi hōho’a ’outou i te hōʼē ʼēʼa i niʼa i te ʼiri pāpaʼiraʼa ʼe e ani i te mau pīahi ʼia pāpaʼi nā niʼa i te ʼēʼa te tahi o te mau parau tumu e ʼitehia i roto i te 2 Nephi 31. E mā’iti te pīahi tātaʼitahi i te hōʼē o teie mau parau tumu ʼe e ʼimi i roto i te 2 Nephi 31–32 i te mea tā Nephi i haʼapiʼi nō niʼa i te reira parau tumu. I muri iho e fa’a’ite mai rātou i te tahi ʼe te tahi i te mea tā rātou i ʼite ʼe ʼia ’āparau nāhea te reira i tauturu ai ia rātou ʼia taʼa maitaʼi aʼe i te mau parau tumu. Nāhea te orara’a i teie mau parau tumu e ʼāfaʼi mai ai i te mau haʼamaitaʼiraʼa o te tāra’ehara a Iesu Mesia i roto i tō rātou oraraʼa ?

• Nāhea ʼoutou e haʼamata i te hōʼē tauʼaraʼa parau nō niʼa i te faʼaʼiteraʼa ʼōhie ʼe te māramarama a Nephi nō te « ʼēʼa » e tae atu i te fa’aorara’a ? (2 Nephi 31:21). Penei a’e e ani ’outou i te mau pīahi e aha tā rātou e parau mai te peu e 60 tetoni noa tō rātou nō te fa’ata’a e aha te tiʼa i te hōʼē taʼata ʼia rave nō te fāriʼi i te fa’aorara’a. I muri iho ’ia tai’o ’oi’oi te mau pīahi i te 2 Nephi 31–32, nō te ʼimi i te mau faʼahitiraʼa parau e nehenehe e tauturu. E aha tā tātou e ha’api’i mai i roto i teie mau pene nō ni’a i te ti’ara’a mau o te Faʼaoro i roto i tō tātou faʼaoraraʼa ? E nehenehe te mau faʼahitiraʼa parau i roto i « Te tahi atu ā mau mātēria » e tauturu i teie tāu’aparaura’a.

• I te tahi mau taime, tē ʼite nei tātou i te mau parau tumu o te ʼevanelia ʼei mea pāpū ʼe taʼa ʼē, terā rā te ti’ara’a mau ʼua tūʼatiʼa rātou. Nō te tauturu i te mau pīahi ʼia ʼite, nāhea te mau parau tumu i roto i te 2 Nephi 31 i tūʼati ai, e ani i te mau pīahi tātaʼitahi ʼaore rā ma te mau pupu naʼinaʼi, ʼia taiʼo i te mau ʼīrava 4–21 ʼe ʼia hāmani i te hōʼē nīno’a iti o te faʼaʼite ra nāhea te faʼaroʼo i te Mesia, te tātarahapa, te bāpetizo, te hōroʼaraʼa i te Vārua Maitaʼi, ʼe te tāpe’ara’a e tae roa i te hopeʼa e niu ai i niʼa te tahi ʼe te tahi, e tūʼati ai te tahi ʼe te tahi, ʼe e nā reira noa atu. E faʼaitoito ia rātou ʼia ʼimi i te mau rāveʼa ʼāpī. ʼA faʼaʼite mai ai rātou i tā rātou nīno’a, e ani ia rātou ʼia faʼaʼite mai e aha tā rātou i ’apo mai nō niʼa i teie mau parau tumu. Nāhea tātou ’ia faʼariro i te reira mau parau tumuʼ ei tuhaʼa nō tō tātou oraraʼa i te mau mahana atoʼa ?

2 Nephi 31:15–20

« O te ta’ata rā e mau pāpū e tae noa atu i te hope’a ra, e ora ïa ».

• ʼUa māramarama ānei te mau pīahi i te auraʼa ’ia mau pāpū e tae noa atu i te hope’a ? Teie te hōʼē ʼohiparaʼa e nehenehe e tauturu. Pāpaʼi i niʼa i te ʼiri pāpaʼiraʼa Nāhea vau e ʼite ai ē, te mau pāpū nei au e tae noa atu i te hope’a ? I muri iho e ani i te mau pīahi ʼia ʼimi 2 Nephi 31:15–20 ’ia ’ite mai te mau pāhonoraʼa i teie uiraʼa. Ani i te mau pīahi ʼia pāpaʼi i niʼa i te ʼiri pāpaʼiraʼa te mau parau ʼaore rā mau pereota tano tā rātou i ’ite mai . Nō te aha e tuha’a faufa’a rahi nō te haʼapiʼiraʼa tumu a te Mesia, te mau-pāpū-ra’a e tae noa atu i te hopeʼa ? E nehenehe ato’a tā ʼoutou e faʼaʼite i te faʼahitiraʼa parau a Elder Dieter F. Uchtdorf i roto i « Te tahi atu ā mau mātēria » ʼaore rā te faʼahitiraʼa parau nō niʼa i te mau-pāpū-ra’a e tae noa atu i te hope’a i te ’api 6 nō te buka ʼIa Poro Haere i Tā’u Nei ’Evanelia.

• ʼUa ʼite ānei te mau pīahi i te hō’ē taʼata tei riro ʼei hiʼoraʼa nō te mau-pāpū-ra’a e tae noa atu i te hopeʼa ? E aha te mea tei tauturu i teie taʼata ʼia « haere tiʼa atu i mua i te tiʼa-māite-raʼa i te Mesia » ? (īrava 20). ʼA feruri e fa’ati’a i te mau ʼāʼamu o te tahi mau taʼata tei faʼahitihia i roto i te mau pāpaʼiraʼa moʼa tei mau pāpū e tae noa atu i te hope’a.

2 Nephi 32:1–6

E faʼaʼite mai te Vārua Maitaʼi ia tātou i te mea tā tātou e rave e ti’a ai.

• I roto i te 2 Nephi 32, ʼua aʼo Nephi nō te hōʼe fifi tāna i ʼite i roto i tōna nūnaʼa i te faʼaʼohiparaʼa i te haʼapiʼiraʼa tumu a te Mesia. E ani i te mau pīahi ’ia ʼimi i teie fifi i roto i te 2 Nephi 32:1 ʼe ʼia taiʼo i muri iho i te pāhonoraʼa a Nephi i roto i te 2 Nephi 32:2–6. Nāhea te mau pīahi e parau nā roto i tā rātou iho mau parau i te mea tā Nephi i haʼapiʼi ? E aha te mau ’itera’a tā te mau pīahi i fāri’i ’a faʼaʼite ai te Vārua Maitaʼi ʼaore rā te mau parau a te Mesia i te mea tā rātou e rave e tiʼa ai ?

2 Nephi 33

Tē mūraro nei te Buka a Moromona ia tātou ʼia vai te fa’aro’o i te Mesia.

• ʼUa tiʼaturi Nephi ē e mūraro tāna mau parau ia tātou ʼia « rave i te maitaʼi ra [ʼe] ʼia [vai te] faʼaroʼo i te [Mesia] » (2 Nephi 33:4). E aha te mau tuhaʼa ʼaore rā mau ʼāʼamu nō roto mai i te 1 ’e 2 Nephi tei mūraro ia tātou ʼia rave i te maitaʼi ʼe ʼia vai te faʼaoro i te Mesia ? ʼA feruri e ʼimi i te tahi mau hīmene ’ia hīmene tā ʼoutou mau pīahi ʼaore rā ’ia faʼaroʼo ’o te ha’apūai i teie mau poro’i, mai te « Tiʼaturi au i te Mesia » ʼaore rā « Ai-je fais du bien ? » Te mau Hīmene,nūmera 66, 223).

Faʼaitoito i te ha’api’ira’a mai i te fare

Hōʼē rāveʼa nō te faʼauru i te mau pīahi ʼia taiʼo i te Iakoba 1–4 i teie hepetoma i muri nei ʼo te fa’ata’ara’a ïa ē i roto i teie mau pene e ’ite mai rātou i te mau faʼaararaʼa a Iakoba nō niʼa e piti hara e purara pāpū nei i tō tātou ’anotau.

Te tahi atu ā mau mātēria

Te haʼapiʼiraʼa tumu a te Mesia.

ʼUa haʼapiʼi Elder Jeffrey R. Holland e : « Tē tūtonu nei te ‘haʼapiʼiraʼa tumu a te Mesia’ mai tei haʼapiʼihia e Nephi i roto i tāna aʼoraʼa faʼahiahia i niʼa i te faʼaroʼo i te Fatu ia Iesu Mesia, te tātarahaparaʼa, te bāpetizora’a utuhi, te fāriʼiraʼa i te hōroʼaraʼa a te Vārua Maitaʼi ʼe te tāpeʼa-māite-raʼa e tae noa atu i te hopeʼa. I roto i teie aʼoraʼa, ʼaita te reira e tāmata nei i te pūʼoi i te tāʼātoʼaraʼa o te ʼōpuaraʼa nō te faʼaoraraʼa, te mau viretu atoʼa nō te hōʼē oraraʼa keresetiano, ʼaore rā te mau ʼutuʼa e tīaʼi nei ia tātou i roto i te mau tuhaʼa taʼa ʼē nō te hanahana o te raʼi. ʼAita te reira e faʼahiti nei i roto i teie aʼoraʼa i te mau tōroʼa nō te autahuʼaraʼa, te mau ʼōroʼa nō te hiero, ʼaore rā e rave rahi atu ā mau haʼapiʼiraʼa tumu mau. E mea faufaʼa rahi teie mau mea atoʼa, mai tei faʼaʼohipahia rā i roto i te Buka a Moromona, e mea ʼōhie ʼe te tiʼa te ‘haʼapiʼiraʼa tumu a te Mesiaʼ. E tūtonu te reira i niʼa i te mau parau tumu mātāmua o te ʼevanelia, tei roto te hōʼē parau faʼaitoitoraʼa ʼia mau pāpū, ʼia tāmau noa, ʼe ʼia haere i mua. ʼOia mau, tei roto te māramarama ʼe te ʼōhie o ‘te haʼapiʼiraʼa tumu a te Mesia’ e ʼitehia ai tōna pūai » (Christ and the New Covenant : The Messianic Message of the Book of Mormon [1997], 49–50).

ʼUa parau Elder D. Todd Christofferson: « Tē ani nei au i te mau taʼata atoʼa …ʼia tītau nā roto i te pure ʼe te tuatāpaparaʼa i te mau pāpa’iraʼa mo’a i taua ʼiteraʼa ra o te huru hanahana o Iesu Mesia, tāna tāraʼehara ʼe tōna tiʼafaʼahouraʼa. E fāriʼi i tāna haʼapiʼiraʼa tumu nā roto i te tātarahaparaʼa, te bāpetizoraʼa, te fāri’iraʼa i te hōro’a o te Vārua Maitaʼi, e i muri iho, i roto i tō ʼoutou oraraʼa tāʼātoʼa, ʼia peʼe i te mau ture ʼe te mau fafauraʼa o te ʼevanelia a Iesu Mesia ». (« Te haʼapiʼiraʼa tumu a te Mesia », Ensign ʼaore rā Liahona, Mē 2012, 89).

Mau pāpū e tae noa atu i te hope’a.

’Ua ha’amāramarama mai ’o Elder Dieter F. Uchtdorf ē :

« I tō’u ʼāpīraʼa, te auraʼa nō te ‘mau pāpū e tae noa atu i te hope’aʼ o tōʼu ïa tāmata-pūai-raʼa ʼia vai ara noa vau e tae noa atu i te hopeʼa o tā mātou mau pureraʼa. I muri iho ’ei taure’are’a… ʼua faʼatū‘ati au i te reira i te aroha o tō’u vai ʼāpīraʼa i te mau tautoʼoraʼa o tō mātou mau feiā melo paʼari ʼia vai noa e tae noa atu i te hopeʼa o tō rātou oraraʼa …

« …E ʼere te mau-pāpū-ra’a e tae noa atu i te hopeʼa i te fāriʼi-noa-raʼa i te mau huru fifi o te oraraʼa e ʼaore rā ʼte tāmau-noa-ra’a i roto i te mau fifi.ʼ E haʼapa’oraʼa faʼaroʼo ʼohipa tā tātou, te tautururaʼa i te mau tamariʼi a te Atua i ni’a i te ʼē‘a tītī’aifaro ʼe te piriha’o nō te faʼatupu i te tāʼāto’araʼa o tō rātou ʼaravihi i roto i teie oraraʼa ’e nō te ho‘i i mua iāna i te hōʼē mahana. Nā roto i teie huru hi’oraʼa, e mea faʼahiahia ʼe e mea hanahana te mau-pāpū-ra’a e tae noa atu i te hopeʼa e ʼere rā i te mea hepohepo ʼe te pōuri. E haʼapa’oraʼa faʼaroʼo ʼoaʼoa teie, e haʼapa’oraʼa nō te ti’aturiraʼa, nō te pūai, ’e nō te faʼaoraraʼa …

« Tē tītau nei te mau-pāpū-ra’a e tae noa atu i te hopeʼa, i ʼte tāmau-māite-raʼa i te parau maitaʼi’ (Roma 2:7), te tūtavaraʼa i te haʼapaʼo i te mau faʼaueraʼa (hiʼo 2 Nephi 31:10), ʼe te raveraʼa i te mau ʼohipa parau-tiʼa (hiʼo PH&PF 59:23) » « ʼAita ānei tātou i tano i te ʼoaʼoaraʼa ? » Ensign ʼaore rā Liahona, Novema 2007, 20).

Ha’amaita’ira’a i tā tātou ha’api’ira’a

E ha’api’i ’āmui tātou. ʼEi ʼorometua haʼapiʼi, eʼita tātou e hōroʼa noa i te haʼamāramaramaraʼa—e haʼapiʼi atoʼa mai ʼoutou ʼe te toeʼa o tā ʼoutou mau pīahi. Faʼaʼite atu ia rātou e aha tā ʼoutou e rave nei nō te haʼapiʼi mai nā roto mai i te mau pāpaʼiraʼa moʼa.