« 9–15 nō Māti. Iakoba 1–4 : « ʼIa au ʼoutou i te Atua nā roto i te tāraʼehara a te Mesia’ », Mai, peʼe mai—nō te Ha’api’ira’a Sābati : Buka a Moromona 2020 (2020)
« 9–15 nō Māti. Iakoba 1–4 », Mai, pe’e mai—nō te Ha’api’ira’a Sābati : 2020
Fa’a’orera’a hara,nā Greg K. Olsen
9–15 nō Māti
Iakoba 1–4
ʼIa au ʼoutou i te Atua nā roto i te tāraʼehara a te Mesia
Tei roto i te Iakoba 1–4 e rave rahi mau haʼapiʼiraʼa e tano i tō tātou ’anotau. ʼA taiʼo ai ʼoutou i teie mau pene, ʼa feruri nāhea ʼoutou e tauturu i tā ʼoutou mau pīahi ʼia ora i te haʼapiʼiraʼa tumu tā Iakoba i haʼapiʼi.
Pāpa’i i te mau mana’o e tae mai
Fa’a’ite mai i te mana’o
Nō te tauturu i te mau pīahi ’ia faʼaʼite mai i te mau manaʼo nō roto mai ia Iakoba 1–4, e ʼōpere atu i te mau ʼapi parau ʼe e ani i te mau pīahi ʼia pāpaʼi i te hōʼē fa’ahorora’a pāpaʼiraʼa moʼa nō roto mai i teie mau pene e mea faufa’a nō rātou. E tuʼu i te mau ʼapi parau i roto i te hōʼē fa’ariʼi, e huti i te tahi, ʼe e ani i te mau pīahi tei pāpaʼi i te mau fa’ahorora’a pāpaʼiraʼa moʼa ʼia faʼaʼite mai i tō rātou manaʼo.
Ha’api’i i te ha’api’ira’a tumu
Iakoba 1:6–8, 15–19 ; 2:1–11 ; 4:18
E haʼa itoito te feiā faʼatere parau-tiʼa nō te maitaʼi o te mau vārua.
-
E haʼamata i te hōʼē tāu’aparaura’a nō niʼa i te mau ’ohipa itoito a Iakoba i rotopū i tōna nūnaʼa ma te ani i te mau pīahi ’ia faʼaʼite mai i te mau ’itera’a ’a haʼamaitaʼihia ai rātou nā roto i te tāviniraʼa a te hōʼē taʼata faʼatere o te ʼĒkālesia. ʼAore rā ʼa feruri i te ani i te hōʼē taʼata faʼatere o te fenua iho—te mea tahito ʼaore rā i teienei—’ia paraparau mai i te hōʼē taime ʼua faʼauruhia ʼoia ’ia tāvini i te hō’ē taʼata. E ’imi te mau pīahi i te mau parau ʼe te mau pereota i roto i te Iakoba 1:6–8, 15–19 ; 2:1–11 ; ʼe 4:18 ’o te tauturu ia tātou ʼia māramarama i te manaʼo o Iakoba nō niʼa i tōna piʼiraʼa ʼe te nūnaʼa tāna e tāvini ra. Nāhea tō tātou ’itera’a i tō tātou feiā faʼatere i te ha’amaita’ira’a i tō rātou piʼiraʼa ? E aha tā teie mau ʼīrava e parau nei nō te huru e pāturu ai tātou i tō tātou feiā faʼatere ?
Mai ia Iakoba, tē « rave itoito nei te feiā faʼatere o te ʼĒkālesia i te ʼohipa i [tō rātou] tōroʼa i mua i te Fatu ».
ʼIa ʼape tātou i te teʼoteʼo ʼe ʼia tauturu i te feiā i roto i te fifi e ti’a ai.
-
E mau faʼaararaʼa pūai tā te Fatu i te mau ’āti Nephi nō niʼa i te teʼoteʼo. Nō te tauturu i te haʼamata i te hōʼē tāu’ara’a parau nō teie tumu parau, e fārerei nā mua roa i te tahi mau pīahi ʼe ʼia ani atu ia rātou ʼia ʼimi i te mau rāveʼa e faʼatiani ai te ʼenemi i te here nō te mau taoʼa i roto i tō tātou ao i teie mahana. Ani ia rātou i muri iho ʼia faʼaʼite mai i roto i te piha haʼapiʼiraʼa e aha tā rātou i ʼite. ’Ia ha’a te mau pīahi tāta’i piti nō te taiʼo i te Iakoba 2:12–21 ʼe ʼia ʼimi e aha tā te Fatu i haʼapiʼi e nāhea tātou ’ia hi’o i te mau taoʼa mātēria. I muri iho, e hāmani rātou ʼe e faʼaʼite i te hōʼē hōhoʼa pia e faʼatiani i taua parau tumu ra. Hōroʼa i te mau pīahi i te taime nō te feruri tātaʼitahi e aha tā rātou e rave nō te faʼaʼohipa i te mea tā rātou i ’āpo mai i roto i te poroʼi a Iakoba.
-
E nehenehe te mau pīahi e taiʼo faʼahou i te Iakoba 2:12–21 ʼe e pāpaʼi i tā rātou iho mau uiraʼa nō te tuʼu atu i roto i te tāpura a Elder Perry. E aha tā te faʼahitiraʼa parau a Elder Perry i roto i « Te tahi atu mau mātēria tauturu» e hōroʼa mai i tō tātou hāro’aro’ara’a i te mau haʼapiʼiraʼa a Iakoba ?
E ʼoaʼoa te Fatu i te tai’ata ’ore.
-
ʼUa haʼapiʼi mai o Elder David A. Bednar ē tē ora nei tātou « i roto i te hōʼē ao e vahavaha rahi nei i te huru mo’a o te fānauraʼa, ʼe o te faʼaiti nei i te faufaʼa o te ora o te taʼata » (« Te ti’aturi nei mātou ē, e mea ti’a i te taʼata ʼia ora ma te viʼiviʼi ʼore », Ensign ʼaore rā Liahona, Mē 2013, 41–44). Nāhea ʼoutou i te tauturu i tā ʼoutou mau pīahi ʼia faʼaʼohipa i te Iakoba 2:23–35 nō te pātoʼi i te mau poroʼi a tō te ao nō niʼa i te tai’ata ’ore ? Hōʼē rāveʼa ’o te pāpaʼiraʼa i niʼa i te tāpura ’ere’ere E aha te manaʼo o te Fatu nō niʼa i te tai’ata ’ore ? ʼe e ani i te mau pīahi ’ia ʼimi i te mau pāhonoraʼa i teie uiraʼa. E ’imi te tahi o rātou i roto i te Iakoba 2:23–35, ʼe te tahi i te ʼaoraʼa a Elder Bednar tei faʼahitihia i niʼa atu. E tāpura tātou i niʼa i te tāpura ’ere’ere te mau pāhonoraʼa tā rātou i ʼite mai. Nō te tāu’aparau i te mau ture ʼe te mau haʼamaitaʼiraʼa tei ʼapitihia ’e te oraraʼa i te ture nō te viʼiviʼi ʼore, e nehenehe ʼoutou e taiʼo faʼahou te « Viʼiviʼi ʼOre » (Nō te Pūai o te Feiā ʼĀpī, 35–37) ʼaore rā e haʼamātaʼitaʼi i te hōʼē o te mau video tei tāpurahia i roto i « Te tahi atu mau mātēria tauturu ». E aha ïa te mau haʼamaitaʼiraʼa nō te oraraʼa i te hōʼē oraraʼa taiʼata ʼore ?
ʼUa faʼaroʼo te mau ’āti Nephi ia Iesu Mesia.
-
ʼUa hinaʼaro Iakoba ʼia ʼite tātou ē noa atu ʼua ora ʼoia ʼe tōna nūnaʼa e rave rahi hānere matahiti hou te oraraʼa tāhuti o te Faʼaora, ʼua ʼite rātou i tōna parau ʼe ʼua hiʼo rātou iāna nō te fa’aorara’a. Mai te au i te Iakoba 4:4–5, nō te aha te mau ’āti Nephi i ha’apa’o ai i te ture a Mose ? E aha tā tātou e vai nei i tō tātou ’anotau ’o tē toro nei i tō tātou vārua i te Faʼaora ? E aha te mau taipe ʼaore rā te mau fa’aaura’a tā Iakoba i faʼaʼohipa nō te haʼapiʼi nō niʼa ia Iesu Mesia ? (hi’o ato’a Genese 22:1–13).
E nehenehe au e ʼape i te pōuri vārua ma te tūtonu atu i niʼa i te Faʼaora.
-
ʼUa haere ānei te hōʼē pīahi ʼaita i maoro a’enei e hiʼopoʼa i tōna mata ? Mai te mea ’ē, e ani ’outou i teie taʼata ’ia faʼaʼite mai, nāhea te taote i te hiʼopoʼaraʼa i tōna mata ? E ’ia fa’a’ite mai te mau pīahi e aha te auraʼa i tō rātou manaʼo ’ia matapō i te pae vārua. Nāhea te pōuri vārua e fa’afāito ai i te pōuri pae tino ? Ani i te mau pīahi ʼia hōroʼa mai i te mau rāveʼa e nehenehe tātou e ʼite ʼua matapō tātou i te pae vārua ? E nehenehe atoʼa rātou e taiʼo faʼahou i te Iakoba 4:8–18 ʼe e fa’a’ite mai i te tahi mau mea e ti’a ia tātou e rave nō te faʼarahi i tō tātou ʼaravihi ’ia « ʼite » i te mau ’ohipa pae vārua.
-
ʼUa faʼataʼa mai o Elder Quentin L. Cook e maha rāveʼa e nehenehe te taʼata e hiʼo « i terā atu pae o te tāpaʼo » i tō tātou ’anotau (hiʼo i « Te tahi atu mau mātēria tauturu »). E aha tā tāna mau parau i tu’u fa’ahou mai nō tō tātou hāro’aro’ara’a i te Iakoba 4:13–15 ? E aha te aura’a ʼia hiʼo i terā atu pae o te tāpaʼo ? Nāhea tātou ʼia ʼape i te hiʼoraʼa i terā atu pae o te tāpaʼo ?
Faʼaitoito i te ha’api’ira’a mai i te fare.
Nō te faʼauru i te mau pīahi ʼia taiʼo i te Jacob 5–7, e parau ia rātou ē e ʼite mai rātou i te pāhonoraʼa i te uiraʼa i roto i te Iakoba 4:17 ʼa taiʼo ai rātou ma te pure i nā pene e toru i mua.
Te tahi atu mau mātēria tauturu
Tō tātou huru i mua i te tao’a rahi
Fa’ahorora’a nō te Iakoba 2:13–19, ʼua haʼapiʼi Elder L. Tom Perry ē : E ti’a ia tātou ’ia fa’aro’o māite i te a’o a Iakoba. ʼIa taiʼo tātou i teie pāpaʼiraʼa moʼa mai te mea ra ʼua pāpaʼi-taʼa-ʼē-hia te reira nō tātou i teie mau mahana, nō te mea te reira ihoa. E tūra’i tāna mau parau ia tātou ʼia ui i te mau uiraʼa hōhonu nō niʼa ia tātou iho. ʼUa nahonaho ānei te mau mea i roto i tō tātou iho oraraʼa ? Tē hōroʼa ra ānei tātou nā mua roa i tō tātou taime nō te mau mea mure ʼore ? E hiʼoraʼa ātea mure ʼore ānei tō tātou ? ʼAore rā ʼua hiʼa tātou i roto i te herepata ’o tē hōro’a nā mua roa i te taime i roto i te mau mea o teie nei ao ’e te haʼamoʼeraʼa i te Fatu ? » » (« Tāhōʼēhia i te Pāturaʼa i te Bāsileia o te Atua », Ensign, Mē 1987, 34).
Mau video nō niʼa i te viʼiviʼi ʼore (ChurchofJesusChrist.org)
-
« ʼUa māʼiti au ʼia vai mā noa »
-
« Te vi’ivi’i ’ore : E aha ïa te mau ’ōti’a ? »
-
« Ture nō te vi’ivi’i ’ore »
Te hiʼoraʼa i terā atu pae o te tāpaʼo
ʼUa haʼapiʼi mai o Elder Quentin L. Cook e nāhea e nehenehe ai ia tātou ’ia hiʼo atu « i terā atu pae o te tāpaʼo » :
« Te monoraʼa i te mau parau mau o te ʼevanelia i te mau haʼapiʼiraʼa a te taʼata »
« E au ra e tē hepohepo nei te tahi mau taʼata nō te ʼōhie o te poroʼi a te Faʼaora. Tē hinaʼaro nei rātou e ʼāmui atu te fifi ʼe tae noa atu i te pōuri i te parau mau nō te faʼariro i te reira ʼei tāmataraʼa i te pae feruriraʼa ʼaore rā ’ia riro ’ei mea hau atu i te tūʼatiraʼa atu i te mau peu a te mau fare haʼapiʼiraʼa… Te hiʼo nei tātou i terā atu pae o te tāpaʼo, ’ia pātoʼi anaʼe tātou i te fāriʼi i te mau parau mau ʼōhie o te ʼevanelia mai te au i tō rātou huru mau ».
« ʼAnaʼanatae rahi i roto i te ʼevanelia »
« Tē hiʼo nei tātou i terā atu pae o te tāpaʼo ’ia faʼateitei anaʼe tātou i te hōʼē parau tumu, noa atu tōna faufaʼa rahi, i te hōʼē fāito teitei o te faʼaiti i tō tātou haʼapaʼoraʼa i te tahi atu mau parau tumu faufaʼa rahi atoʼa ʼaore rā ’ia rave anaʼe tātou i te hōʼē tiʼaraʼa ’o te pātoʼi i te mau haʼapiʼiraʼa a te mau taeaʼe faʼatere ».
« Mau ʼohipa ʼaito ʼei monoraʼa i te haʼapaʼoraʼa i te mau mahana atoʼa »
« Tē parau hua nei te tahi mau melo ē e itoito rahi rātou ma te ʼanaʼanatae mai te mea e piʼiraʼa rahi tō rātou, eʼita rā rātou e faʼariro i te hāhaereraʼa ʼutuāfare ʼaore rā te hāhaereraʼa a te mau tuahine [tei piʼihia i teie nei te aupururaʼa] mai te tahi ʼohipa parau-tiʼa ʼaore rā e mea faʼahiahia nō tā rātou tautoʼoraʼa tāmau ».
« Faʼateiteiraʼa i te mau ture i niʼa aʼe i te haʼapiʼiraʼa tumu »
« Te feiā tei itoito i te haʼapaʼo i te mau ture ma te ’ore e haʼapaʼo i te haʼapiʼiraʼa tumu ’e te parau tumu e oʼiʼoi ïa rātou i te hiʼo atu i terā atu pae o te tāpaʼo » (« Te hiʼoraʼa i terā atu pae o te tāpaʼo », Ensign ʼaore rā Liahona, Māti 2003, 42–44).