O Le a Ia Taitai Oe i lou Lima, saunia e Sandra Rast

24 Fepuari–1 Mati

2 Nifae 26–30

“O se Galuega Taua ma le Ofoofogia”

Manatua o le aiga e tatau ona avea ma nofoaga autu o le aoaoina o le talalelei. O au lava suesuega ma suesuega faaleaiga o le 2 Nifae 26–30 e tatau ona avea ma faavae o lau tapenaga e aoao atu. Fuafua ni auala e atiina ae ai, lagolagoina, ma faamalosiauina ai suesuega faaletagata lava ia ma faaleaiga a tagata o lau vasega.

Tusifaamaumau Ou Lagona Uunai

Valaaulia le Fefaasoaai

I le amataga o le lesona, tuu atu i tagata o le vasega se avanoa e faasoa mai ai se mea mai le 2 Nifae 26–30 na taua ia i latou a o latou suesueina i le fale. Mo se faataitaiga, e mafai ona e valaaulia i latou e faamatala faapuupuu mai se fuaiupu na fesoasoani ia i latou e malamalama ai i o tatou aso ma luitau o tatou feagai.

Aoao atu le Aoaoga Faavae

2 Nifae 26:24–28, 33

O mea uma lava e faia e le Alii e faaosofia i Lona alofa mo i tatou.

• Afai e musuia oe e talanoaina aoaoga a Nifae e uiga i le alofa o le Alii, e mafai ona e taumafai i le mea lea: A uma ona faitau faatasi le 2 Nifae 26:24 valaaulia tagata o le vasega e fai ni lisi o mea na faia e Iesu Keriso mo i latou na musuia i le alofa. E faapefea ona Ia “aumaia tagata uma ia te ia”? O le a le mea ua musuia i tatou e faia e tali atu ai i Ana faailoaga o le alofa?

• O valaaulia a le Alii i le 2 Nifae 26:24–28, 33 o molimau mamana o Lona alofa. O se tasi auala e mafai ona fesoasoani i tagata o le vasega ia iloa nei valaaulia o le fai atu i ai e aotele le savali a le Alii i nei fuaiupu i se fuaiupu e tasi. Atonu e naunau ni nai tagata o le vasega e faasoa mai a latou aotelega. E mafai faapefea e nei fuaiupu ona faatosinaina le ala tatou te valaaulia ai isi e o mai ia Keriso? Fautuaina le vasega e tusifaamaumau nisi o o latou mafaufauga ma lagona. Ina ia fesoasoani e valaaulia le Agaga, mafaufau e ta se lipine o se viiga e uiga i le alofa o le Faaola, e pei o le “O Mai ia Iesu” (Viiga, nu. 65), a o mafaufau loloto i ai tagata o le vasega.

2 Nifae 27; 29; 30:3–8

O le Tusi a Mamona e taua i le galuega a le Atua i aso e gata ai.

• Atonu e manaomia e tagata i lau vasega sina fesoasoani laitiiti e malamalama ai i le valoaga o i le 2 Nifae 27 e uiga i se tusi ua faamauina ma se tagata ua aoaoina. O le tala faasolopito o lo o i le “Punaoa Faaopoopo” e mafai foi ona fesoasoani. Mata e aoga mo lau vasega pe afai e faatino faapuupuu mai e ni nai tagata o le vasega ia mea na tutupu o loo faamatala mai i lenei tala i le 2 Nifae 27:15--22? Aisea na muai faaali atu ai ia Nifae nei mea i le tele naua o tausaga? O a mea ua aoao mai ia i tatou i le valoaga a Nifae e uiga i le taua o le Tusi a Mamona? Fautuaina tagata o le vasega e fefaasoaai le tasi ma le isi pe na faapefea ona maua a latou lava molimau o le Tusi a Mamona.

• Pe i ai se tasi i lau vasega na iai se aafiaga ina ua valaaulia se tasi e faitau le Tusi a Mamona, e mafai ona latou faasoa maia? O a ni nai mafuaaga atonu e le taliaina ai e se tasi se valaaulia e faitau le Tusi a Mamona? O le tali a le Alii i se tasi o na mafuaaga o loo maua i le 2 Nifae 29:6–11. E mafai ona e fai i le vasega e faitau fuaiupu nei ona faatino lea i taga pe mafai faapefea ona latou tali atu ma le alofa i se tasi e fai mai e le tatau ona i ai le Tusi a Mamona. O a nisi manatu o loo i ai i tagata o le vasega e uiga i auala e mafai ona latou fesoasoani ai i isi ia “iloa o [le Tusi a Mamona] o se faamanuiaga ia i latou mai le aao o le Atua”? (2 Nifae 30:6).

2 Nifae 28

E saili Satani e faasese.

• O le otootoga o lenei vaiaso i le Sau, Mulimuli Mai ia te A’u—Mo Tagata Taitoatasi ma Aiga o loo fautuaina ai e saili ia pepelo a Satani o loo faamatala mai i le 2 Nifae 28. Atonu e mafai e tagata o le vasega ona faasoa mai mea sa latou mauaina, pe e mafai foi ona latou faitau faavavevave i le 2 Nifae 28 i le vasega ma lisi mai pepelo a Satani latou te mauaina. E mafai foi ona fesoasoani le tuu atu o i latou e galulue i ni vaega toalaiti e sue ia mau e faamaonia ai le sese o nei taufaasese (afai latou te manaomia se fesoasoani, e mafai ona e faasoa atu i ai fautuaga o i le “Punaoa Faaopoopo”). Ona mafai lea e vaega ona fefaasoaai o le tasi ma le isi mea sa latou mauaina ma talanoaina pe mafai faapefea ona latou iloa “mataupu faavae sese ma le aoga ma valea” a le fili (2 Nifae 28:9).

Fautuaina le Aoaoina i le Aiga

Atonu e musuia tagata o le vasega e faitau le 2 Nifae 31–33 pe afai latou te iloa o nei mataupu o loo aofia ai toe upu na tusifaamaumauina e Nifae, e aofia ai se tasi e aupito faigofie ae sili ona maioio o faamatalaga o le mataupu po o le aoaoga faavae a Keriso.

Punaoa Faaopoopo

“Ona fai mai lea o lē ua aoaoina: E lē mafai ona ou faitauina” (2 Nifae 27:18).

Ia Fepuari 1828, o Matini Harisi, se uo a Iosefa Samita, na alu i sana “malaga i sasae i le Aai o Niu Ioka ma se faaliliuga o nisi o mataitusi o papatusi [auro] e faaali atu i sikola po o le au atamamai. Atonu na manao o ia i se faamautinoaga faaopoopo faapea e moni a’ia’i ia papatusi, pe atonu foi sa ia te ia se mafaufau o le a fesoasoani se molimau ia i la’ua e nono mai ai se tupe e lolomi ai le faaliliuga. I lea mea, sa ia finau ai pea na uunaia o ia e le Alii e alu i lea malaga.

“O le taimi lea, sa lei tele se silafia o Iosefa po o Matini e uiga i le gagana sa i ai i papatusi. Sa laua iloa na o mea lava sa ta’u atu e le agelu o Moronae ia Iosefa: o se talafaamaumau o Amerika anamua. O le mea lea, nai lo le sailia o se sikola e i ai se poto i le faa-Aikupito (sa aoaoina mulimuli ane e Iosefa e faapea o le gagana sa i ai i papatusi sa faaigoaina o le ‘Faa-Aikupito toefaafou’), sa asiasia e Matini ni sikola e fiafia i aso anamua, aemaise o mea faaanamua a Amerika.

“… [O sikola sa asiasi i ai Matini sa i ai ma] Salesa Anetone, o se polofesa talavou o le kalama ma gagana i le Kolisi o Kolumipia. Sa aoina e Anetone ia tala o tagatanuu Amerika [Initia Amerika] ma lauga mo le lolomiina ma sa naunau e iloilo le pepa o faamatalaga na avatu ia te ia e Matini.

“Sa ta’ua e Matini faapea na tautino atu lava e Anetone le moni a’ia’i o mataitusi seia oo ina ia aoaoina le ala na maua mai ai e Iosefa Samita. Sa ia fautuaina Matini e avatu papatusi ia te ia. Sa musu Matini, ma sa tali atu Anetone, ma toefaaupu atu ai se fuaiupu o i le Isaia, ‘E le mafai ona ou faitauina se tusi faamauina.’ E ui ina sa faafitia e Anetone mulimuli ane ia auiliiliga o le tala a Matini i le la feiloaiga, ua tatou iloa le mea lenei: Na aluese mai Matini mai ana asiasiga i sikola i sasae ua faatalitonuina atili nai lo se isi lava taimi sa valaauina Iosefa Samita e le Atua ma o papatusi ma mataitusi e mai anamua. Na la vaavaai atu ma Iosefa i le asiasiga ia Anetone o se faataunuuga o le valoaga a Isaia (o loo ta’ua foi i le Tusi a Mamona lava ia) e uiga i ‘se tusi ua faamauina, ua avatua i le ua iloa faitau, ua faapea atu, Se’i faitau mai ia lenei tusi: a ua fai mai o ia, Ou te le mafai; aua ua faamaufaailogaina” [Isaia 29:11; tagai foi 2 Nifae 27:15–18]” (“The Contributions of Martin Harris,” Revelations in Context [2016], 3–4, history.ChurchofJesusChrist.org).

O mau o loo faamaonia ai le taufaasese a Satani

Aoaoga faavae sese	Aoaoga faavae moni
“O aso nei ua le o ia o se Atua o vavega; ua uma ona faia e ia o lana galuega” (2 Nifae 28:6).	Moronae 7:35--37
“O le a tauamiotonuina e … [le Atua] le faia o se agasala itiiti” (2 Nifae 28:8).	Mataupu Faavae ma Feagaiga 1:31
“Ua lelei mea uma i Siona” (2 Nifae 28:21).	Mataupu Faavae ma Feagaiga 68:31; 82:14
“E le o au o se tiapolo, ona e leai se tiapolo” (2 Nifae 28:22).	2 Nifae2:17; Mataupu Faavae ma Feagaiga 76:25–27
“Matou te le manaomia ni isi afioga a le Atua, ona ua lava ua matou maua” (2 Nifae 28--29).	2 Nifae 28:30; Mataupu Faavae o le Faatuatua 1:9

Faaleleia o Lo Tatou Aoao Atu

Aua le fefe i le leai o se tali. “O fesili lelei e umi se taimi e tali ai. E manaomia ai le mafaufau loloto, suesuega, ma musumusuga. O le taimi e te faaaluina e faatalitali ai mo ni tali i se fesili e mafai ona avea ma se taimi paia o le mafaufau loloto. Aloese mai le faaosoosoga e vave faamaea lea taimi e ala i le taliina e oe o lau lava fesili po o le se’e atu i se isi mataupu” (Aoao Atu i le Ala a le Faaola, 31).