Talafaatusa i le Laau Olive, saunia e Brad Teare

16--22 Mati

Iakopo 5–7

Ua Galue Faatasi le Alii ma i Tatou.

Amata lau tapenapenaga e aoao atu i le faitauina o le Iakopo 5–7 e oe lava ia ma faatasi ma lou aiga. O le a se mea ua e aoaoina o le a sili ona aoga mo i latou e te faiaoga ai? E mafai e lenei otootoga ona e maua ai manatu faaopoopo.

Tusi faamaumau Ou Lagona Uunai

Valaaulia le Fefaasoaai

O a mea na maua e tagata o le vasega i le Iakopo 5–7 na musuia ai i latou e “galulue i le tovine” i le mea o latou nonofo ai? (Iakopo 5:15).

Aoao atu le Aoaoga Faavae

Iakopo 5

Ua valaaulia e le Alii Ana auauna e galulue faatasi ma Ia i Lona tovine.

• Ona o le talafaatusa i laau olive e umi ma e fai si lavelave, atonu e te manao e galulue faatasi o se vasega e fatuina se vaaiga aoao puupuu o le talafaatusa. Mo se faataitaiga, e mafai ona e tusia ata o elemene autu o le talafaatusa i luga o le laupapa pe fatuina foi se faasologa o taimi o mea na tutupu (mo se faataitaiga, tagai i le atatusi o i le faaiuga o lenei otootoga). E mafai e tagata o le vasega ona faaopoopo mau faasino po o faamatalaga i le atatusi ma talanoaina po o a uiga o nisi o faatusa, e pei o laau o le olive fanua ma le olive vao, o le Alii o le tovine, le auauna, ma fua lelei ma fua leaga. I le taimi o lea talanoaga, iloilo ia fuaiupu 61--75, lea e faamatala mai ai le galuega a le Alii i o tatou aso. O faapefea ona tatou auauna i le tovine a le Alii? E faapefea ona fesootai nei fuaiupu i le galuega o loo tatou faia?

• O upu o le “Alii o le tovine” e mafai ona maua ai le mafanafana mo matua o fanau faalogogata. Mo se faataitaiga, o le a le mea o fautua mai e le Iakopo 5:41, 46–47 e uiga i lagona o lo tatou Tama o i le Lagi e uiga i Ana fanau o e se ese? O faapefea ona Ia taumafai e laveai mai i latou? (tagai fuaiupu 61--75).

• Iakopo 5:61--75 o loo aoao mai ai faapea e galue faatasi le Alii ma Ana auauna i Lona tovine. E mafai e tagata o le vasega ona faitauina nei fuaiupu i ni vaega toalaiti ma talanoaina aafiaga ua faaalia mai ia i latou faapea o loo galue le Alii faatasi ma Ana auauna e tulei i luma Lana galuega. O a ni malamalamaaga faaopoopo e mafai e tagata o le vasega ona faaopoopo i ai mai le savali a Peresitene Henry B. Eyring “O Loo Taitai e le Alii Lana Ekalesia”? (Ensign po o le Liahona, Nov. 2015, 81–84).

  

  E mafai ona tatou galulue faatasi ma le “Alii o le tovine” iinei i le lalolagi.

Iakopo 6:3--13

E manatua e le Alii Lona nuu i le alofa ma le alofamutimutivale.

• Sau, Mulimuli Mai ia te Au—Mo Tagata Taitoatasi ma Aiga ua valaaulia i tatou e sailiili i le Iakopo 6:3–5 mo savali sa manao Iakopo e faamamafa ona sue ai lea o savali o i le talafaatusa i laau olive (tagai Iakopo 5). Atonu o le a aoga i tagata o le vasega le faalogo atu ia i latou o e sa faia lenei gaoioiga pe mai le faia o lenei gaoioiga o se vasega. E mafai ona latou lisiina i luga o le laupapa ia upumoni latou te maua i le Iakopo 6. Ona mafai lea ona latou lisiina fuaiupu mai le talafaatusa i le Iakopo 5 i lalo o upumoni taitasi, e fesootai i lena savali. O faapefea e tagata o le vasega ona vaai i nei lava savali o faapupulaina i o latou lava olaga?

• O se tasi uiga o le upu pipiimau o le tumau mausali i se mea, latalata, ma le le maluelue. Atonu e te manao e faasoa atu lea faauigaga i lau vasega ma fesili po o a ni malamalamaaga o aumai ai e uiga i le Iakopo 6:5.

Iakopo 7:1–23

E mafai ona tatou tutu malolosi pe a luitauina e isi lo tatou faatuatua.

• O le toatele o i tatou ua oo i ni mea faafeagai ma lo tatou faatuatua e pei ona sa feagai ma Iakopo ina ua la fetaiai ma Serema. O se tasi auala e fesoasoani ai i tagata o le vasega e sauniuni mo na mea faafeagai o le tuu atu latou te sailiili i le Iakopo 7:1--23 mo mataupu faavae sa fesoasoani ia Iakopo e tu malosi ai. O a isi faataitaiga o le tutu malosi i lo tatou faatuatua e mafai ona tatou faasoa atu—mai tusitusiga paia, o tatou talafaasolopito o aiga, po o o tatou lava olaga? Atonu o i ai savali mai taitai o le Ekalesia ua fesoasoani ia i tatou pea saili isi e luluina i tatou mai lo tatou faatuatua (tagai, mo se faataitaiga, Quentin L. Cook, “Totoa i le Molimau ia Iesu,” Ensign po o le Liahona, Nov. 2016, 40–43). Fautuaina tagata o le vasega e faasoa mai savali ua latou iloa e aoga.

• Ina ua faafetaia’ia Iakopo e Serema, sa faamoemoe Serema e lulu Iakopo mai lona faatuatua, ae peitai sa lei maluelue le faatuatua o Iakopo (tagai Iakopo 7:5). E ono fiafia tagata o le vasega e faatino mai le felafolafoaiga i le va o Iakopo ma Serema, e faaaoga ai le Iakopo 7: 1--23 e fai ma faamatalaga. O a ni mea tatou te aoao mai i nei fuaiupu e uiga i auala ma aoaoga a i latou o e tetee i le galuega a le Atua? O a mea ua tatou aoao mai ia Iakopo e uiga i le ala e atili ai ona tatou le maluelue i lo tatou faatuatua?

Iakopo 7:24–25

E mafai ona tatou faalagolago i le Atua.

• Sa ola sa Nifae i lalo o le faamata’u faifai pea o osofaiga mai ia sa Lamana. E ui atonu tatou te le feagai i aso taitasi ma le taufaamata’u faaletino o taua, o a tulaga matautia faaleagaga tatou te fetaia’i? O le a se mea ua tatou aoao mai le tali atu a sa Nifae i o latou tulaga, o loo faamatala mai i le Iakopo 7:24–25? Atonu e te manao e usu pe faitau ona talanoaina lea o viiga faale-Ekalesia o loo faaaoga ai taua o se upu faatusatusa, e pei o le “Savali i Luma, le ‘Autau Kerisiano” po o le “Faauta! Le Autau Tupu” (Viiga, nu. 153, 158).

Fautuaina le Aoaoina i le Aiga

Ina ia uunaia tagata o le vasega e faitau le tusi o Enosa, ta’u atu i ai e mafai ona aoao ai i latou i le ala e atili ‘anoa ai a latou tatalo.

Faaleleia o Lo Tatou Aoao Atu

Faatotonugalemu lou aoao atu i le aoaoga faavae. Ia mautinoa e taulai le talanoaga a le vasega i le aoaoga faavae autu i mau. E mafai ona e faia lenei mea i le fai i tagata o le vasega e faitau ia mau ona faasoa mai lea o upumoni latou te maua, faapea foi o latou aafiaga i le ola ai i na upumoni. (Tagai Aoao Atu i le Ala a le Faaola, 20–21.)