Iakopo ma Enosa, saunia e Scott Snow

23--29 Mati

Enosa–Upu a Mamona

E Galue o Ia ia te Au e Faia Lona Finagalo

Sauniuni e aoao atu e ala i le faitauina o le Enosa–Upu a Mamona ma fatu se fuafuaga faafaiaoga (tagai Aoao Atu i le Ala a le Faaola, 19). E mafai foi ona fesoasoani ia fautuaga ma aoaoga faavae o i lenei otootoga e te maua ai manatu.

Tusi faamaumau Ou Lagona Uunai

Valaaulia le Fefaasoaai

Ina ia avatu i tagata o le vasega ia avanoa e faasoa mai ai mea o loo latou aoaoina i le fale, e mafai ona e vaevaeina i latou i ni vaega ma tofi atu i vaega taitasi e faitau se tasi o mataupu nei mai le Enosa–Upu a Mamona. Fai i ai e fautua mai ni fuaiupu mai lena mataupu ua latou manatu e tatau ona talanoaina e le vasega. Lisi fuaiupu nei i le laupapa, ma filifili ni nai fuaiupu e talanoaina.

Aoao atu le Aoaoga Faavae

Enosa 1:1–17

E mafai ona tatou maua le faamagaloga o a tatou agasala pe a tatou faaaoga le faatuatua ia Iesu Keriso.

• O ni nai fesili nei e mafai ona e valaaulia tagata o le vasega e mafaufau loloto i ai ma talanoaina a o e suesueina le Enosa 1:1--17: O le a se mea tatou te aoao mai aafiaga o Enosa e uiga i le mauaina o se faamagaloga o a tatou agasala? Na faapefea ona faaalia e Enosa lona faatuatua ia Iesu Keriso? Na faapefea ona aafia Enosa i lenei mea ma na faapefea foi ona ia vaai ifo ia te ia lava ma isi?

Enosa 1:4–17

O le a tali mai a tatou tatalo mai le loto.

• Ina ia fesoasoani i tagata o le vasega ia loloto lo latou malamalama e uiga i le tatalo, e mafai ona e vaevaeina i latou i ni vaega toalaiti ma valaauina vaega taitasi e suesue se tasi o fuaitau nei mai le Enosa 1: fuaiupu 2–8, 9–11, po o le 12–17. Ona fai atu lea i vaega taitasi e aoao mai i le vaega o totoe o le vasega se mea sa latou aoaoina e uiga i le tatalo mai a latou fuaiupu na atofa atu i ai. Mo se faataitaiga, e mafai ona e valaaulia i latou e faasoa mai ni upu ma ni fasifuaitau o faamatala ai pe na faapefea ona tatalo Enosa.

• E le gata i le aoao pe na faapefea ona tatalo Enosa, ae e mafai foi ona tele mea tatou te aoaoina mai mea na tatalo ai Enosa. Atonu e mafai e tagata o le vasega ona faailoa mai po o ai ma po o le a foi na tatalo ai Enosa i le Enosa 1:4--17. E tusa ai ma nei fuaiupu, aisea na manao ai Enosa e tatalo mo isi? O a isi upumoni e uiga i le tatalo ua tatou aoao mai ia Enosa?

Iaroma–Ominae

Afai tatou te tausia poloaiga, o le a tatou manuia.

• O Iaroma ma tusitala o le Ominae na tusi e uiga i le malo o sa Nifae, ae o a latou savali e faatatau foi i tagata taitoatasi. O le a se mea ua tatou aoao mai i tusi a Iaroma ma Ominae e uiga i le ala e taitai atu ai le amiotonu i le manuia? (mo se faataitaiga, tagai Iaroma 1:7–12 ma le Ominae 1:5–7, 12–18). E mafai ona fesoasoani mo tagata o le vasega le faauigaina o le manuia e faaaoga ai se lomifefiloi ma tusitusiga paia (mo se faataitaiga, tagai Alema 37:13; 48:15). O faapefea le faauigaga a le lalolagi pe a faatusatusa i le faauigaga a le Alii? O faapefea ona fesoasoani le Alii i Lona nuu ia manuia?

• E faapei lava ona sa galulue ma le filiga perofeta sa Nifae e aoao atu ia poloaiga i le nuu, o loo aoao foi i tatou e perofeta o aso e gata ai e uiga i poloaiga. A uma ona faitau le Iaroma 1:9--12, e mafai e tagata o le vasega ona talanoaina ia aoaoga lata mai a taitai o le Ekalesia ua musuia ai i latou e tausi ia poloaiga. E mafai ona aoga mo tagata o le vasega ona toe iloilo ia savali aupito o le konafesi talu ai nei i mekasini a le Ekalesia po o le Gospel Library app. Pe e mafai foi ona latou toe iloiloina tulaga faatonuina o loo talanoaina i le Mo Le Malosi o le Autalavou. Afai e manaomia, e mafai ona e tagai i le lisi o savali o i le “Punaoa Faaopoopo.” E fesoasoani faapefea le usitai i poloaiga ia i tatou e “manuia” ai i o tatou olaga?

Ominae

Sa aumaia e le Alii tagata e toatele i le nuu folafolaina.

• O le Tusi a Mamona o loo i ai se talafaasolopito faigata, ma o le mulimulita’ia o vaega eseese o tagata o loo faamatalaina e mafai ona faigata. O se tasi auala e mafai ona aoao ai e uiga i tagata taitasi i le Tusi a Mamona o le fatuina o se siata i luga o le laupapa ma valaaulia le vasega e faatumu i faamatalaga e uiga i vaega taitasi o tagata (e pei o sa Nifae, sa Lamana, ma le nuu o Saraemila). Mo se faataitaiga, e mafai ona i ai faaulutala nei i le siata: Igoa o le vaega, O anafea ae pe na faapefea foi ona latou taunuu, ma le O le a le mea na tupu ia i latou. Talanoaina faatasi pe aisea e aoga ai le malamalama i mea e te aoaoina e uiga i vaega taitasi. E mafai ona fesoasoani faaupuga nei o i le Taiala i Tusitusiga Paia (ChurchofJesusChrist.org) : “Korianetuma,” “Sa Iareto,” “Sa Lamana,” “Moleka,” “Sa Nifae,” ma “Saraemila.”

Upu a Mamona 1:1–8

O le a galue le Atua e ala ia i tatou pe afai tatou te mulimuli i Lana taitaiga.

• I le avea ai o se vaega o le talanoaina o le Upu a Mamona, e mafai ona e valaaulia se tagata o le vasega e sau sauniuni e faasoa mai le mafuaaga na musuia ai Mamona e faaaofia ia papatusi laiti (1 Nifae--Ominae) i le Tusi a Mamona. E mafai e le tagata o le vasega ona sauniuni e ala i le faitauina o Upu a Mamona ma isi punaoa, e pei o le Mataupu Faavae ma Feagaiga 10:8–19, 39–45; otootoga o lenei vaiaso i le Sau, Mulimuli Mai ia te Au---Mo Tagata Taitoatasi ma Aiga; ma le mataupu 5 o le Au Paia, voluma 1. Fautuaina le tagata o le vasega e faaaofia ai faamatalaga taua e uiga i le leiloloa o itulau e 116 o pepa tusitusia o le Tusi a Mamona ma le mafuaaga na manaomia ai ona suia ia itulau na leiloloa e papatusi laiti. O a ni upumoni e aoao mai e tagata o le vasega mai lenei mea e uiga i le auala e galue ai le Alii e ala i le tagata? O a mea ua maua e tagata o le vasega i le Upu a Mamona 1:1--8 e musuia ai i latou e mulimuli i le taitaiga mai le Atua tusa lava pe le o i ai so latou malamalama atoatoa i mafuaaga?

  

  O Mamona o Loo Tuufaatasia Papatusi, saunia e Jorge Cocco

• Sa faamanuiaina e Mamona le faitau miliona o ola ona sa ia mulimuli i uunaiga a le Agaga e uiga i papatusi laiti (tagai Upu a Mamona 1:7). Mafaufau i auala e mafai ona e fesoasoani ai i tagata o lau vasega ia malamalama faapea e mafai foi ona latou faamanuiaina isi a o latou saili ia avea ma meafaigaluega i aao o le Atua ma mulimuli i uunaiga a le Agaga Paia. Na faapefea ona galue le Atua e ala ia Mamona? O a ni mea ua vaaia e tagata o le vasega o faia e le Alii e ala ia i latou a o latou uai atu i le Agaga ma saili e faia le finagalo o le Atua? O le tala e uiga ia Peresitene Thomas S. Monson i le “Punaoa Faaopoopo” ua aumaia ai se faataitaiga e mafai foi ona fesoasoani i tagata o le vasega e mafaufau i faataitaiga mai o latou lava olaga.

Fautuaina le Aoaoina i le Aiga

Talu ai o le a oo mai le konafesi aoao ma le Eseta i nai vaiaso o loma nei, fautuaina tagata o le vasega e faalogologo mo savali e faasoa mai ai e uso o le Au Peresitene Sili ma le Korama a Aposetolo e Toasefululua a latou molimau faapitoa ia Iesu Keriso.

Punaoa Faaopoopo

Vitio o le Tusi a Mamona e uiga ia Enosa.

Sue vitio o loo faaalia ai tala mai le tusi a Enosa i le aofaga Vitio o le Tusi a Mamona i luga o le ChurchofJesusChrist.org po o le Gospel Library app.

Savali o le konafesi aoao e uiga i le tausiga o poloaiga

• Thomas S. Monson, “Tausi i Poloaiga,” Ensign po o le Liahona, Nov. 2015, 83–85

• Dieter F. Uchtdorf, “Ola Fiafia i le Talalelei,” Ensign po o le Liahona, Nov. 2014, 120-23

• Dallin H Oaks, “Leai Ni Atua Ese,” Ensign po o le Liahona, Nov. 2013, 72–75

“Lululima ma tamaiti taitasi uma.”

A o avea Peresitene Thomas S. Monson o se tasi o le Korama a Aposetolo e Toasefululua, sa ia saunoa ai i se faapotopotoga a tamaiti o le Aoga Maualalo i se nuu i Samoa. Ina ua maea, sa uunaia o ia e faafeiloai patino atu i tamaiti taitoatasi e 247 sa i ai. Peitai, sa ia iloa o le a le lava le taimi; sa ia taumafai e aveese le manatu e faafeiloai tamaiti mai lona mafaufau ae sa le mafai.

Na iu ina ia faliu atu i le faiaoga o tamaiti ma faapea atu, “Ou te manao lava e lululima ma tamaiti ma teineiti taitasi. Faamata e mafai?

Sa soisoi le faiaoga ma talanoa faa-Samoa atu i tamaiti. Sa luelue mai ma le naunautai o latou ulu e tali mai ai. Ona ta’u atu lea e le faiaoga ia Elder Monson ina ua ia faalogo o le a malaga mai se tasi o Aposetolo i Samoa, sa ia folafola atu i tamaiti afai o le a latou tatalo ma le loto faamaoni ma ia faatuatua, o le a asiasi atu Elder Monson i lo latou nuu ma o le a musuia e le Agaga Paia e lululima ma tamaiti taitasi uma. (tagai Thomas S. Monson, “Friend to Friend: Talofa Lava,” Friend, Me 1972, 12–13).