« ថ្ងៃទី ១៨–២៤ ខែ ឧសភា ។ ម៉ូសាយ ២៥–២៨ ៖ ‹ ពួកគេត្រូវបានហៅថា រាស្ត្រនៃព្រះ › » ចូរមកតាមខ្ញុំ—សម្រាប់សាលាថ្ងៃអាទិត្យ ៖ ព្រះគម្ពីរមរមន ឆ្នាំ ២០២០ ( ឆ្នាំ ២០២០ )

« ថ្ងៃទី ១៨–២៤ ខែ ឧសភា ។ ម៉ូសាយ ២៥–២៨ » ចូរមកតាមខ្ញុំ—សម្រាប់សាលាថ្ងៃអាទិត្យ ៖ ឆ្នាំ ២០២០

ការប្រែចិត្តជឿរបស់អាលម៉ាជាកូនដោយ ហ្គារី អិល ខេប

ថ្ងៃទី ១៨–២៤ ខែ ឧសភា

ម៉ូសាយ ២៥–២៨

« ពួកគេត្រូវបានហៅថា រាស្ត្រនៃព្រះ »

វិធីដ៏ល្អបំផុតដើម្បីរៀបចំខ្លួនបង្រៀនអំពី ម៉ូសាយ ២៥–២៨ គឺត្រូវអានជំពូកទាំងនេះ ហើយរស់នៅតាមគោលការណ៍ដែលពួកគេបង្រៀន ។ នៅពេលអ្នកធ្វើកិច្ចការនេះ ព្រះវិញ្ញាណអាចបំផុសគំនិតអ្នកដើម្បីបង្រៀនអ្វីដែលនឹងមានសារៈសំខាន់បំផុតសម្រាប់សិស្សរបស់អ្នក ។

កត់ត្រាចំណាប់អារម្មណ៍របស់អ្នក

អញ្ជើញឲ្យចែកចាយ

សិស្សខ្លះប្រហែលជាលំបាកដើម្បីមានការសិក្សាព្រះគម្ពីរផ្ទាល់ខ្លួន និងជាគ្រួសារជាទៀងទាត់ ។ តើបទពិសោធន៍របស់សិស្សផ្សេងទៀតនឹងជួយដែរឬទេ ? ប្រហែលជាអ្នកអាចចាប់ផ្ដើមថ្នាក់របស់អ្នកដោយការអញ្ជើញសិស្សឲ្យចែកចាយអ្វីមួយដែលពួកគេបានធ្វើនៅក្នុងការសិក្សាផ្ទាល់ខ្លួនរបស់ពួកគេ ឬជាគ្រួសារដែលមានដំណើរការយ៉ាងល្អ ។

បង្រៀនគោលលទ្ធិ

ម៉ូសាយ ២៦:១៥–៣១; ២៧:២៣–៣៧

ព្រះអភ័យទោសដោយឥតរើសមុខដល់អស់អ្នកដែលប្រែចិត្ត ។

ការប្រែចិត្ត និងការអភ័យទោសគឺជាប្រធានបទដែលបានសរសេរនៅក្នុងជំពូកទាំងនេះ ។ អ្នកអាចរុករកប្រធានបទទាំងនេះដោយសរសេរពាក្យ ការប្រែចិត្ត និង ការអភ័យទោស នៅលើក្ដារខៀន ហើយសុំឲ្យសិស្សសរសេរនៅក្រោមពាក្យទាំងនេះនូវអ្វីដែលពួកគេគិតឃើញ នៅពេលពួកគេគិតពីពាក្យទាំងនេះ ។ បន្ទាប់មក ពួកគេអាចស្រាវជ្រាវ ម៉ូសាយ ២៦:២២–២៤, ២៩–៣១ និង ២៧:២៣–៣៧ រកពាក្យ និងឃ្លាដែលបង្រៀនពួកគេអំពីការប្រែចិត្ត និងការអភ័យទោស ។ សិស្សអាចបន្ថែមពាក្យ និងឃ្លាទាំងនេះទៅក្នុងបញ្ជីនៅលើក្ដារខៀន ។ តើព្រះមានព្រះទ័យបែបណាចំពោះជនដែលប្រែចិត្ត ហើយស្វែងរកការអភ័យទោស ?
មនុស្សខ្លះអាចនឹងងឿងឆ្ងល់ថា តើការប្រែចិត្តរបស់ពួកគេមានភាពគ្រប់គ្រាន់ដើម្បីឲ្យព្រះអភ័យទោសដល់ពួកគេដែរឬទេ ។ ដើម្បីជួយសិស្សរបស់អ្នកណាម្នាក់ដែលអាចមានអារម្មណ៍បែបនោះ អ្នកអាចអញ្ជើញសិស្សឲ្យនឹកស្រមៃថា ពួកគេគឺជាអាលម៉ាជាឪពុក ហើយថាសមាជិកម្នាក់ក្នុងសាសនាចក្រនៅសារ៉ាហិមឡាបានសួរពួកគេពីរបៀបទទួលបានការអភ័យទោសពីអំពើបាបរបស់គាត់ ( ប្រហែលជាអ្នកអាចសម្ដែងពីសាច់រឿងនេះ ) ។ តើអាលម៉ាបានរៀនអ្វីខ្លះមកពីព្រះអម្ចាស់នៅក្នុង ម៉ូសាយ ២៦:១៥–៣១ ដែលអាចជួយដល់សមាជិកសាសនាចក្ររូបនេះ ? ( សូមមើលផងដែរ មរ៉ូណៃ ៦:៨, គ. និង ស. ៥៨:៤២–៤៣ ) ។ សេចក្ដីថ្លែងការណ៍នេះមកពីប្រធាន ហិនរី ប៊ី អាវរិង ក៏អាចជួយផងដែរ ៖ « ប្រសិនបើបងប្អូនបានទទួលអារម្មណ៍ពីព្រះវិញ្ញាណបរិសុទ្ធនៅថ្ងៃនេះ បងប្អូនអាចចាត់ទុកវាជាភស្តុតាងថា ដង្វាយធួនកំពុងដំណើរការនៅក្នុងជីវិតរបស់បងប្អូនហើយ » ( « Gifts of the Spirit for Hard Times » Ensign ខែ មិថុនា ឆ្នាំ ២០០៧ ទំព័រ ២៣ ) ។

ម៉ូសាយ ២៧:៨–២៤

ព្រះស្ដាប់ឮការអធិស្ឋានរបស់យើង ហើយនឹងឆ្លើយតបស្របតាមព្រះទ័យរបស់ទ្រង់ ។

យើងភាគច្រើនអាចយល់ពីអារម្មណ៍របស់អាលម៉ាជាឪពុក ដែលកូនរបស់គាត់ « កំពុងតែចេញទៅបះបោរទាស់នឹងព្រះ » ( ម៉ូសាយ ២៧:១១ ) ។ ប្រហែលជាសិស្សអាចពិភាក្សាពីរបៀបដែលពួកគេអាចប្រើដំណើររឿងនៅក្នុង ម៉ូសាយ ២៧:៨–២៤ ដើម្បីផ្ដល់សេចក្ដីសង្ឃឹមដល់មនុស្សម្នាក់ដែលមានសមាជិកគ្រួសារម្នាក់ដែលដើរវង្វេងផ្លូវ ។ ដោយយល់ដឹងថា យើងពុំអាចទាមទារឲ្យមានអព្ភូតហេតុមួយ ឬបំពានលើសិទ្ធិជ្រើសរើសរបស់មនុស្សម្នាក់បាន តើយើងអាចអធិស្ឋានទូលសូមអ្វីខ្លះដែលសមរម្យ នៅពេលមនុស្សជាទីស្រឡាញ់ម្នាក់ដើរវង្វេងផ្លូវ ? ( សូមមើលផងដែរ អាលម៉ា ៦:៦ ) ។

ម៉ូសាយ ២៧:៨–២៨:៤

បុរសស្ត្រីគ្រប់រូបត្រូវតែកើតជាថ្មី ។

នេះគឺជាសំណួរមួយចំនួនដែលអាចជួយសិស្សឲ្យរៀនអំពីការកើតជាថ្មី ៖ តើការកើតជាថ្មីខាងវិញ្ញាណមានន័យដូចម្ដេច ? ( សូមមើល សេចក្ដីណែនាំដល់បទគម្ពីរទាំងឡាយ « ប្រែចិត្តជឿ » ) ។ នៅពេលយើងកើតជាថ្មីខាងវិញ្ញាណ តើយើងខិតខំធ្វើចំពោះមនុស្សដទៃយ៉ាងដូចម្ដេច ? ដើម្បីជួយសិស្សឆ្លើយសំណួរទាំងនេះ អ្នកអាចអញ្ជើញសិស្សឲ្យស្រាវជ្រាវ ម៉ូសាយ ២៧:២២–២៨:៤ រកសញ្ញាដែលអាលម៉ា និងពួកបុត្រារបស់ម៉ូសាយបានកើតជាថ្មីខាងវិញ្ញាណ ។
មនុស្សគ្រប់គ្នាមានដំណើរឿងនៃការប្រែចិត្តជឿមួយ ដូចជាអាលម៉ាបានពោថា « មនុស្សលោក ទាំងអស់ … ត្រូវតែកើតម្ដងទៀត » ( ម៉ូសាយ ២៧:២៥ អក្សរទ្រេតបានបន្ថែម ) ។ ប្រហែលជាសិស្សពីរបីនាក់អាចចែកចាយពីរបៀបដែលពួកគេបានប្រែចិត្តជឿចំពោះដំណឹងល្អរបស់ព្រះយេស៊ូវគ្រីស្ទ—មិនថាតាមរយៈព្រឹត្តិការណ៍ខាងវិញ្ញាណដ៏មានអនុភាពនៅក្នុងជីវិតរបស់ពួកគេ ឬបន្តិចម្ដងៗនោះទេ ពេលខ្លះ វាជាដំណើរការដែលតូចពេក ដែលអាចស្គាល់បានតែនៅក្នុងការយល់ដឹងក្រោយពីមានបទពិសោធន៍ប៉ុណ្ណោះនោះឡើយ ។ អ្នកក៏អាចទុកពេលឲ្យសិស្សកត់ត្រាបទពិសោធន៍របស់ពួកគេផងដែរ ។ ( ប្រសិនបើគ្មានពេលធ្វើកិច្ចការនេះនៅក្នុងថ្នាក់ទេ អ្នកអាចណែនាំឲ្យពួកគេធ្វើវានៅឯគេហដ្ឋាន ) ។ ដើម្បីគូសបញ្ជាក់ថា ការប្រែចិត្តជឿរបស់យើងគួរតែមានជាបន្តបន្ទាប់ នោះអ្នកអាចឲ្យយោបល់ថា សិស្សត្រូវពិនិត្យមើលឡើងវិញជាញឹកញាប់ពីអ្វីដែលពួកគេបានសរសេរ ហើយបន្ថែមនូវបទពិសោធន៍ថ្មី ។
អាលម៉ា និងមនុស្សផ្សេងទៀតនៅក្នុងបទគម្ពីរបានប្រើពាក្យប្រៀបធៀបពីការកើតជាថ្មី ដើម្បីពិពណ៌នានូវការផ្លាស់ប្ដូរដែលដំណឹងល្អរបស់ព្រះយេស៊ូវគ្រីស្ទនាំមកកាន់ជីវិតរបស់យើង ។ អែលឌើរ ដេវីឌ អេ បែដណា បានប្រៀបធៀបការផ្លាស់ប្ដូរនេះទៅនឹងត្រសក់មួយផ្លែដែលក្លាយទៅជាត្រសក់ជ្រក់ ( សូមមើល « ធនធានបន្ថែមទាំងឡាយ » ) ។ ដើម្បីជួយសិស្សឲ្យពិចារណាអ្វីដែលការប្រៀបធៀបទាំងនេះបង្រៀនអំពីការប្រែចិត្តជឿ អ្នកអាចយកត្រសក់ និងត្រសក់ជ្រក់មួយផ្លែមកថ្នាក់ ។ ឬអ្នកអាចអញ្ជើញមនុស្សម្នាក់ឲ្យយកកូនតូចមកថ្នាក់ ហើយពិភាក្សាពីហេតុផលដែលការផ្ដល់កំណើតគឺជារឿងប្រៀបប្រដូចមួយដ៏ល្អសម្រាប់អ្វីដែលបានកើតឡើងចំពោះអាលម៉ា និងពួកបុត្រារបស់ម៉ូសាយ ។ ( សូមមើល ម៉ូសាយ ២៧:២៣–២៨:៧ ) ។

អាលម៉ាជាកូនត្រូវបានគេសែងទៅផ្ទះរបស់ឪពុកគាត់ — ឪពុករបស់គាត់បានរីករាយ ដោយ វ៉លធើរ រ៉េន

លើកទឹកចិត្តឲ្យមានការរៀនសូត្រនៅឯគេហដ្ឋាន

ដើម្បីបំផុសគំនិតសិស្សឲ្យអាន ម៉ូសាយ ២៩–អាលម៉ា ៤ នៅសប្ដាហ៍ក្រោយ អ្នកអាចប្រាប់ពួកគេថា នៅក្នុងជំពូកទាំងនេះ ប្រជាជនរបស់នីហ្វៃបានបង្ហាញពីអារម្មណ៍ទៅកាន់រដ្ឋាភិបាលរបស់ពួកគេ ។ តើយើងអាចរៀនអ្វីខ្លះមកពីបទពិសោធន៍របស់ពួកគេ នៅពេលយើងព្យាយាមជះឥទ្ធិពលល្អដល់សហគមន៍របស់យើង ?

ធនធានបន្ថែមទាំងឡាយ

ដំណើរការពេញមួយជីវិត ។

អែលឌើរ ឌី ថត គ្រីស្តូហ្វឺសិន បានបង្រៀនថា « ការកើតជាថ្មី គឺពុំដូចជាការកើតខាងរូបកាយទេ វាគឺជាដំណើរការមួយ មិនមែនជាព្រឹត្តិការណ៍មួយនោះទេ ។ ហើយការចូលរួមក្នុងដំណើរការនោះ គឺជាគោលបំណងដ៏សំខាន់នៃជីវិតរមែងស្លាប់ » ( « Born Again »Ensign ឬ Liahonaខែ ឧសភា ឆ្នាំ ២០០៨ ទំព័រ ៧៨ ) ។

ការប្រែចិត្តជឿ និង ត្រសក់ជ្រក់ ។

អែលឌើរ ដេវីឌ អេ បែដណា បានចែកចាយរឿងប្រៀបប្រដូចដូចតទៅនេះ ដើម្បីប្រៀបធៀបការកើតជាថ្មីខាងវិញ្ញាណទៅនឹងការធ្វើត្រសក់ជ្រក់ ៖

« ត្រសក់ជ្រក់មួយគឺជាផ្លែត្រសក់ដែលគេយកទៅត្រាំស្របតាមគ្រឿងផ្សំជាក់លាក់មួយ និងជំហានជាច្រើន ។ ជំហានទីមួយនៅក្នុងដំណើរការនៃការធ្វើឲ្យផ្លែត្រសក់ក្លាយជាទៅត្រសក់ជ្រក់គឺ ការរៀបចំ និង ការលៀងសម្អាត ។ …

« ជំហានបន្ទាប់នៅក្នុងដំណើរការនៃការផ្លាស់ប្ដូរគឺ ការដាក់ចូលទឹក និង ការត្រាំ ត្រសក់នោះក្នុងទឹកអំបិលមួយរយៈ ។… ត្រសក់អាចក្លាយជាត្រសក់ជ្រក់ ដរាបណាវាត្រូវបានដាក់ចូលទឹកឲ្យលិចទាំងស្រុងទៅក្នុងទឹកអំបិលសម្រាប់រយៈពេលមួយ ។ ដំណើរការព្យាបាលនេះបានផ្លាស់ប្ដូរលំដាប់នៃសមាសភាពនៃត្រសក់ ហើយបង្កើតរូបរាងស្អាត និងរស់ជាតិឆ្ងាញ់ដល់ត្រសក់ជ្រក់ ។ ការប្រោះទឹកម្ដងម្កាល ឬការជ្រលក់ទៅក្នុងទឹកអំបិលពុំអាចបង្កើតការប្រែរូបរាងដ៏ចាំបាច់នោះទេ ។ ផ្ទុយទៅវិញ ការត្រាំឲ្យលិចទាំងស្រុងគឺតម្រូវឲ្យមាន ដើម្បីការផ្លាស់ប្ដូរដែលចង់បានកើតឡើង ។

« ជំហានចុងក្រោយនៅក្នុងដំណើរការនេះតម្រូវឲ្យមានការបិទភ្ជាប់នៃត្រសក់ជ្រក់នោះនៅក្នុងក្រឡដែលបានចំហុយ ហើយសម្អាត ។ ត្រសក់ជ្រក់ត្រូវដាក់នៅក្នុងក្រឡដែលមានទឹកអំបិលក្ដៅ ហើយត្រូវទុកពេលដំណើរការក្នុងក្រឡអំបិលនោះ ។ អ្វីដែលមិនស្អាតត្រូវបានសម្អាតចេញពីត្រសក់ជ្រក់នោះ និងដប ដើម្បីឲ្យផលិតផលសម្រេចអាចត្រូវការការពារ ហើយរក្សាទុក ។ …

« ដូចជាត្រសក់មួយផ្លែត្រូវរៀបចំ ហើយសម្អាតពីមុនវាអាចប្ដូរទៅជាត្រសក់ជ្រក់ដែរ ដូច្នេះបងប្អូន និងខ្ញុំអាចរៀបចំខ្លួនជាមួយនឹង ‹ ព្រះបន្ទូលនៃសេចក្តីជំនឿ និងសេចក្តីបង្រៀនដ៏ល្អ › ( ធីម៉ូថេទី ១ ៤:៦ ) ហើយបានស្អាតតាមរយៈពិធីបរិសុទ្ធ និងសេចក្ដីសញ្ញាទាំងឡាយដែលធ្វើឡើងដោយសិទ្ធិអំណាចនៃបព្វជិតភាពអើរ៉ុន ។ …

« ដូចជាត្រសក់មួយផ្លែត្រូវបានប្រែរូបរាងទៅជាត្រសក់ជ្រក់ កាលវាត្រូវបានដាក់ចូលទឹក ហើយត្រាំជាមួយនឹងទឹកអំបិលដែរ នោះបងប្អូន និងខ្ញុំបានកើតជាថ្មី នៅពេលយើងត្រូវបានស្រូបយកដោយ និងនៅក្នុងដំណឹងល្អរបស់ព្រះយេស៊ូវគ្រីស្ទ ។ … ដំណាក់កាលនៃដំណើរការផ្លាស់ប្ដូរនេះត្រូវការពេលវេលា ការតស៊ូ និងការអត់ធ្មត់ ។ …

« … នីតិវិធីលាងសម្អាតដោយទឹកក្ដៅនោះជួយឲ្យត្រសក់ជ្រក់ទទួលបានការការពារ និងអាចរក្សាទុកក្នុងរយៈពេលយ៉ាងយូរ ។ តាមវិធីស្រដៀងគ្នានេះដែរ យើងបន្តក្លាយជាបរិសុទ្ធ ហើយស្អាតស្អំ នៅពេលបងប្អូន និងខ្ញុំត្រូវបានលាងសម្អាតនៅក្នុងព្រះលោហិតនៃកូនចៀម បានកើតជាថ្មីម្ដងទៀត ព្រមទាំងទទួលពិធីបរិសុទ្ធ ហើយគោរពចំពោះសេចក្ដីសញ្ញាដែលបានធ្វើឡើងដោយសិទ្ធិអំណាចនៃបព្វជិតភាពមិលគីស្សាដែក » ( « Ye Must Be Born Again »Ensign ឬ Liahona ខែ ឧសភា ឆ្នាំ ២០០៧ ទំព័រ ១៩–២១ ) ។

ការកែលម្អការបង្រៀនរបស់យើង

រៀបចំដោយគិតអំពីមនុស្ស ។ « នៅពេលអ្នករៀបចំ ចូរឲ្យការយល់របស់អ្នកអំពីមនុស្សដែលអ្នកបង្រៀនដឹកនាំផែនការរបស់អ្នក ។ … គ្រូបង្រៀនដែលមានលក្ខណៈដូចជាព្រះគ្រីស្ទ គឺពុំតាំងចិត្តទៅលើរបៀប ឬវិធីសាស្ត្របង្រៀនជាក់លាក់មួយនោះទេ ពួកគេតាំងចិត្តដើម្បីជួយមនុស្សឲ្យស្ថាបនាសេចក្ដីជំនឿទៅលើព្រះយេស៊ូវគ្រីស្ទ ហើយប្រែក្លាយកាន់តែដូចជាទ្រង់ » ( ការបង្រៀនតាមរបៀបរបស់ព្រះអង្គសង្គ្រោះ ទំព័រ ៧ ) ។