« ថ្ងៃទី ៤–១០ ខែ ឧសភា ។ ម៉ូសាយ ១១–១៧ ៖ ‹ ពន្លឺមួយ … ដែលពុំអាចធ្វើឲ្យងងឹតបានឡើយ › » ចូរមកតាមខ្ញុំ—សម្រាប់សាលាថ្ងៃអាទិត្យ ៖ ព្រះគម្ពីរមរមន ឆ្នាំ ២០២០ ( ឆ្នាំ ២០២០ )

« ថ្ងៃទី ៤–១០ ខែ ឧសភា ។ ម៉ូសាយ ១១–១៧ » ចូរមកតាមខ្ញុំ—សម្រាប់សាលាថ្ងៃអាទិត្យ ៖ ឆ្នាំ ២០២០

អ័ប៊ីណាដៃនៅពីមុខស្ដេចណូអេ ដោយ អាន់ឌ្រូ បូស្លី

ថ្ងៃទី ៤–១០ ខែ ឧសភា

ម៉ូសាយ ១១–១៧

« ពន្លឺមួយ … ដែលពុំអាចធ្វើឲ្យងងឹតបានឡើយ »

សូមពិចារណាគំរូរបស់អ័ប៊ីណាដៃអំពីការបង្រៀនដំណឹងល្អ ។ តើអ្នករកឃើញអ្វីខ្លះនៅក្នុង ម៉ូសេ ១១–១៧ ដែលអាចជួយអ្នកក្លាយជាគ្រូបង្រៀនដ៏ប្រពៃ ?

កត់ត្រាចំណាប់អារម្មណ៍របស់អ្នក

អញ្ជើញឲ្យចែកចាយ

ដើម្បីអនុញ្ញាតឲ្យសិស្សចែកចាយអ្វីមួយដែលពួកគេបានរៀននៅក្នុងការសិក្សាព្រះគម្ពីររបស់ពួកគេផ្ទាល់ ឬជាគ្រួសារ អ្នកអាចអញ្ជើញពួកគេឲ្យបំពេញប្រយោគដូចតទៅនេះ ៖ ប្រសិនបើខ្ញុំត្រូវជ្រើសរើសខគម្ពីរមួយចេញពី ម៉ូសាយ ១១–១៧ ដើម្បីចែកចាយនឹងមនុស្សដែលខ្ញុំស្រឡាញ់វាគឺ ។

បង្រៀនគោលលទ្ធិ

ម៉ូសាយ ១១–១៣; ១៧

យើងអាចឈរការពារសេចក្ដីពិត សូម្បីតែពេលយើងឈរតែម្នាក់ឯងក្ដី ។

ទោះបីជាវាមិនទំនងថា សិស្សរបស់អ្នកនឹងត្រូវបានគេគម្រាមកំហែងដល់សេចក្ដីស្លាប់ដោយសារទីបន្ទាល់របស់ពួកគេក្ដី ក៏ពួកគេអាចនឹងប្រឈមការផ្ទុយចំពោះសេចក្ដីជំនឿរបស់ពួកគេដែរ ។ ប្រហែលជាពួកគេអាចស្វែងរកព្រឹត្តិការណ៍ ឬវគ្គនានានៅក្នុង ម៉ូសាយ ១១–១៣ និង ១៧ ដែលផ្ដល់ភាពក្លាហានបន្ថែមទៀតដល់ពួកគេដើម្បីឈរការពារសេចក្ដីពិត ។ តើអ្វីទៅដែលបានផ្ដល់ភាពក្លាហានដល់អ័ប៊ីណាដៃ និងអាលម៉ាដើម្បីមានភាពម៉ឺងម៉ាត់ ? តើយើងអាចកាន់តែមានភាពរឹងមាំ និងម៉ឺងម៉ាត់នៅក្នុងការការពារសេចក្ដីពិតតាមរបៀបណា ? ពាក្យដកស្រង់នៅក្នុង « ធនធានបន្ថែមទាំងឡាយ » ប្រហែលជាអាចផ្ដល់គំនិតមួយចំនួន ។
ដើម្បីជួយសិស្សឲ្យរៀនមកពីគំរូផ្សេងទៀតស្ដីពីការការពារសេចក្ដីពិតយ៉ាងក្លាហាន អ្នកអាចសរសេរឃ្លាថា មនុស្សដែលបានឈរការពារសេចក្ដីពិត នៅលើក្ដារខៀន ។ អ្នកអាចចាប់ផ្ដើមជាមួយនឹងការពិភាក្សាអំពីអ័ប៊ីណាដៃ ដោយអញ្ជើញសិស្សឲ្យចែកចាយរឿងមួយចំនួនដែលបានធ្វើឲ្យពួកគេចាប់អារម្មណ៍ចំពោះអ័ប៊ីណាដៃ នៅពេលពួកគេអានអំពីគាត់នៅសប្ដាហ៍នេះ ។ បន្ទាប់មក ពួកគេអាចប្រាប់ឈ្មោះបុរស និងស្ត្រីផ្សេងទៀត—ក្នុងបទគម្ពីរ ក្រុមគ្រួសារពួកគេ ឬបទពិសោធន៍ផ្ទាល់ខ្លួន—ដែលពួកគេមានអារម្មណ៍ថា គឺជាគំរូនៃការឈរការពារសេចក្ដីពិត ។ តើយើងមានការបំផុសគំនិតឲ្យធ្វើអ្វីខ្លះ ដោយសារតែគំរូទាំងនេះ ?

ម៉ូសាយ ១២:១៩–៣៧

នៅពេលយើងសិក្សាបន្ទូលរបស់ព្រះ យើងចាំបាច់ត្រូវធ្វើឲ្យដួងចិត្តរបស់យើងបានយល់ ។

នៅពេលពួកគេបានសិក្សា ម៉ូសាយ ១២:១៩–៣៧ នៅសប្ដាហ៍នេះ សិស្សប្រហែលជាមានការយល់ដឹងអំពីអត្ថន័យនៃការអនុវត្តដួងចិត្តរបស់ពួកគេចំពោះការយល់ដឹងអំពីបន្ទូលរបស់ព្រះ ។ សូមពិចារណាសុំឲ្យពួកគេពីរបីនាក់ចែកចាយគំនិតរបស់ពួកគេ ។ ឬប្រហែលជាអ្នកអាចប្រើពេលខ្លះនៅក្នុងថ្នាក់ដើម្បីស្រាវជ្រាវខគម្ពីរទាំងនេះរួមគ្នា ហើយពិភាក្សាអ្វីដែលវាផ្ដល់យោបល់អំពីរបៀបធ្វើឲ្យការសិក្សាដំណឹងល្អកាន់តែមានអត្ថន័យ ។ ឧទាហរណ៍ ហេតុអ្វីទាំងការយល់ដឹងអំពីក្រឹត្យវិន័យរបស់ព្រះ ហើយ « កាន់តាមវា » មានសារៈសំខាន់ ? ( ម៉ូសាយ ១២:២៩ ) ។
តើសិស្សរបស់អ្នកអាចរៀនអ្វីខ្លះតាមរយៈភាពខុសគ្នារវាងឥរិយាបថ និងការប្រព្រឹត្តរបស់ពួកសង្ឃរបស់ណូអេជាមួយនឹងវិធីសាស្ត្រដែលយើងគួរយកមកអនុវត្តចំពោះការសិក្សាដំណឹងល្អរបស់យើង ? សូមអញ្ជើញពួកគេឲ្យអាន ម៉ូសាយ ១២:១៩–៣៧ ដោយរកមើលពាក្យរិះគន់ដែលអ័ប៊ីណាដៃបានលើកឡើងអំពីពួកសង្ឃរបស់ណូអេ ។ តើអ័ប៊ីណាដៃអាចនឹងនិយាយអ្វីខ្លះអំពីការសិក្សាដំណឹងល្អរបស់យើងនៅសព្វថ្ងៃនេះ ? សូមឲ្យសិស្សចែកចាយអ្វីដែលពួកគេធ្វើ ដែលវាជួយពួកគេឲ្យអនុវត្តដួងចិត្តរបស់ពួកគេចំពោះការយល់ដឹង ហើយបន្ថែមអត្ថន័យកាន់តែច្រើនទៅកាន់ការរៀនសូត្រដំណឹងល្អរបស់ពួកគេ ។

ការសិក្សាដំណឹងល្អដ៏មានប្រសិទ្ធភាពទាក់ទងនឹងការធ្វើឲ្យដួងចិត្តរបស់យើងបានយល់ ។

ម៉ូសាយ ១៣:២៨–១៥:១១

សេចក្ដីសង្គ្រោះកើតមានតាមរយៈព្រះយេស៊ូវគ្រីស្ទ និង ដង្វាយធួនរបស់ទ្រង់ ។

ដើម្បីធ្វើឲ្យពួកអ្នកស្ដាប់ដែលចេះតែសង្ស័យពីការយាងមករបស់ព្រះមែស៊ីបានជឿ នោះអ័ប៊ីណាដៃបានដកស្រង់ការព្យាករដ៏រំជួលចិត្តមួយមកពីអេសាយ ( សូមមើល ម៉ូសាយ ១៤ ) ។ មានវិធីមួយចំនួនដែលសិស្សអាចពិនិត្យមើលជំពូកនេះឡើងវិញ ។ ពួកគេអាចអានម្ដងពីរបីខគម្ពីរ ហើយពិភាក្សាអំពីវា ឬអ្នកអាចបំបែកសមាជិកក្នុងថ្នាក់ជាក្រុមពិភាក្សាតូចៗ ដើម្បីពិភាក្សាអំពីខគម្ពីរដ៏មានន័យនានា រួមបញ្ចូលទាំងលេខយោងផងដែរ ដើម្បីរុករកការយល់ដឹងបន្ថែមទៀត ។ សូមលើកទឹកចិត្តពួកគេឲ្យចែកចាយអ្វីដែលពួកគេបានរៀនអំពីព្រះអង្គសង្គ្រោះនៅក្នុងជំពូកនេះ ។
តើសិស្សរបស់អ្នកយល់អំពីអត្ថន័យនៃឃ្លាថា ព្រះយេស៊ូវគ្រីស្ទ « បានបំពេញការទាមទារទាំងឡាយនៃសេចក្តីយុត្តិធម៌ » ដែរឬទេ ? ( ម៉ូសាយ ១៥:៩ ) ។ ដើម្បីជួយពួកគេទទួលបានការយល់ដឹងដ៏ប្រសើរមួយ អ្នកអាចចាប់ផ្ដើមដោយអានរួមគ្នានូវ « សេចក្ដីយុត្តិធម៌ » និង « មេត្តាករុណា, សេចក្ដីមេត្តាករុណា » នៅក្នុងសេចក្ដីណែនាំដល់បទគម្ពីរទាំងឡាយ ។ ប្រហែលជាសិស្សម្នាក់អាចស្ម័គ្រចិត្តសរសេរនិយមន័យខ្លីមួយអំពីពាក្យនីមួយៗនៅលើក្ដារខៀន ។ បន្ទាប់មក ពួកគេអាចអាន ម៉ូសាយ ១៥:១–៩ រួមគ្នា ។ តើព្រះយេស៊ូវគ្រីស្ទបានបំពេញការទាមទារទាំងឡាយនៃសេចក្ដីយុត្តិធម៌តាមរបៀបណា ? តើទ្រង់ប្រទានសេចក្ដីមេត្តាករុណារបស់ទ្រង់ចំពោះយើងតាមរបៀបណា ? វីដេអូដែលបានណែនាំនៅក្នុង « ធនធានបន្ថែមទាំងឡាយ » ប្រើដំណើររឿង និងរឿងប្រៀបប្រដូចដើម្បីពិពណ៌នាអំពីសេចក្ដីមេត្តាករុណារបស់ព្រះអង្គសង្គ្រោះ ការមើលវីដេអូទាំងនេះមួយអាចជួយសិស្សឲ្យគិតពីរឿងប្រៀបប្រដូចផ្សេងទៀតដែលបង្ហាញពីរបៀបដែលព្រះយេស៊ូវគ្រីស្ទបានបំពេញការទាមទារនៃសេចក្ដីយុត្តិធម៌ ។

ម៉ូសាយ ១១; ១២:៣៣–៣៧; ១៣:១១–២៦

បទបញ្ញត្តិទាំងឡាយគួរតែត្រូវបានឆ្លាក់ទុកនៅក្នុងដួងចិត្តរបស់យើង ។

អ្នកអាចជួយសិស្សឲ្យយល់អំពីសារៈសំខាន់នៃការមានបទបញ្ញត្តិ « ឆ្លាក់ទុកនៅក្នុងដួងចិត្ត [ របស់យើង ] » ដោយសួរពួកគេអំពីអត្ថន័យនៃឃ្លានេះ ។ បន្ទាប់មក សូមអញ្ជើញពួកគេឲ្យរកមើលភាពខុសគ្នាអំពីបទបញ្ញត្តិដែលអ័ប៊ីណាដៃបានបង្រៀននៅក្នុង ម៉ូសាយ ១២:៣៣–៣៧ និង ១៣:១១–២៦ ជាមួយនឹងអំពើបាបដែលស្ដេចណូអេ និងរាស្ត្ររបស់ទ្រង់បានប្រព្រឹត្ត ( សូមមើល ម៉ូសាយ ១១:១–៧, ១៤–១៥ ) ។ តើការមានបទបញ្ញត្តិ « ឆ្លាក់ទុកនៅក្នុងដួងចិត្ត [ របស់យើង ] » ខុសពីការគ្រាន់តែស្គាល់វាតាមរបៀបណា ? ( ម៉ូសាយ ១៣:១១ ) ។ តើយើងស្គាល់ថា បទបញ្ញត្តិទាំងនោះបានឆ្លាក់ទុកនៅក្នុងដួងចិត្តរបស់យើងតាមរបៀបណា ? តើយើងអាចចែកចាយគំរូអ្វីខ្លះ ?

លើកទឹកចិត្តឲ្យមានការរៀនសូត្រនៅឯគេហដ្ឋាន

តើសិស្សធ្លាប់ទទួលអារម្មណ៍ដូចជាអ័ប៊ីណាដៃធ្លាប់មានដែរឬទេ—ថាការខិតខំរបស់ពួកគេដើម្បីចែកចាយដំណឹងល្អគឺឥតប្រយោជន៍នោះ ? សូមប្រាប់ពួកគេថា នៅក្នុងម៉ូសាយ ១៨–២៦ពួកគេនឹងអានអំពីផលផ្លៃដ៏បរិបូរណ៌នៃការខិតខំរបស់អ័ប៊ីណាដៃ ។

ធនធានបន្ថែមទាំងឡាយ

ការបង្រៀនរបស់ព្យាការីអំពីការឈរការពារសេចក្ដីពិត ។

ប្រធាន រ័សុល អិម ណិលសុន បានបង្រៀនថា « សិស្សពិតរបស់ព្រះយេស៊ូវគ្រីស្ទស្ម័គ្រចិត្តក្រោកឈរឡើង បញ្ចេញមតិ ហើយខុសពីមនុស្សនៃលោកិយ ។ … គ្មានអ្វីដែលងាយស្រួល ឬស្វ័យប្រវត្តិអំពីការក្លាយជាពួកសិស្សដ៏មានអានុភាពដូច្នេះបានទេ ។ ការផ្ដោតរបស់យើងត្រូវតែផ្អែកយ៉ាងរឹងមាំទៅលើព្រះអង្គសង្គ្រោះ និងដំណឹងល្អរបស់ទ្រង់ ។ វាតម្រូវឲ្យមានការខិតខំខាងសតិអារម្មណ៍យ៉ាងខ្លាំងដើម្បីមើលទៅទ្រង់គ្រប់គំនិត ។ ប៉ុន្តែនៅពេលដែលយើងធ្វើវាបាន នោះភាពសង្ស័យ និងការភ័យខ្លាចរបស់យើងនឹងរលត់បាត់អស់ » ( « Drawing the Power of Jesus Christ into Our Lives » Ensign ឬ Liahona ខែ ឧសភា ឆ្នាំ២០១៧ ទំព័រ ៤០–៤១ ) ។

ប្រធាន ថូម៉ាស អេស ម៉នសុន បានមានប្រសាសន៍ថា «ចូរយើងមានភាពក្លាហានឡើង ហើយប្រុងជំហរឈរសម្រាប់អ្វីដែលយើងជឿ ហើយបើយើងត្រូវឈរតែឯងនៅក្នុងដំណើរការនោះ ក៏យើងធ្វើដូច្នោះដោយក្លាហានដែរ ដោយយើងត្រូវបានពង្រឹងដោយចំណេះដឹងថា ភាពពិតគឺយើងមិននៅតែឯងនោះទេ ពេលយើងឈរជាមួយនឹងព្រះវរបិតារបស់យើងដែលគង់នៅស្ថានសួគ៌នោះ » ( « Dare to Stand Alone » Ensign ឬ Liahona ខែ វិច្ឆិកា ឆ្នាំ ២០១១ ទំព័រ ៦៧ ) ។

ប្រធាន ហ្គរដុន ប៊ី ហ៊ិងគ្លី បានបង្រៀនថា « ប៉ុលបានសរសេរទៅធីម៉ូថេថា ‹ ព្រះទ្រង់មិនបានប្រទានឲ្យយើងមានវិញ្ញាណ ដែលតែងតែខ្លាចឡើយ គឺឲ្យមានវិញ្ញាណដ៏មានអំណាច សេចក្តីស្រឡាញ់ និងប្រាជ្ញានឹងធឹងវិញ ។ ដូច្នេះ មិនត្រូវឲ្យអ្នកមានសេចក្តីខ្មាស ចំពោះការធ្វើបន្ទាល់ពីព្រះអម្ចាស់នៃយើង › ( ធីម៉ូថេទី ២ ១:៧–៨ ) ។ ខ្ញុំសូមប្រាថ្នាឲ្យសមាជិកនៃសាសនាចក្រនេះគ្រប់រូបដាក់ពាក្យទាំងនោះនៅត្រង់កន្លែងដែលគាត់អាចមើលឃើញវារាល់ព្រឹក នៅពេលគាត់ចាប់ផ្ដើមថ្ងៃរបស់គាត់ ។ វានឹងផ្ដល់ភាពក្លាហានដល់យើងដើម្បីនិយាយ វានឹងផ្ដល់សេចក្ដីជំនឿដល់យើងដើម្បីព្យាយាម វានឹងពង្រឹងការជឿជាក់របស់យើងចំពោះព្រះអម្ចាស់ ព្រះយេស៊ូវគ្រីស្ទ » ( Teachings of Presidents of the Church: Gordon B. Hinckley [ ឆ្នាំ ២០១៦ ] ទំព័រ ៣៣៨ ) ។

វីដេអូអំពីភាពយុត្តិធម៌ និងព្រះគុណនៅលើគេហទំព័រ ChurchofJesusChrist.org ។

« Handel’s Messiah: Debtor’s Prison »
« The Mediator »
« Where Justice, Love, and Mercy Meet »