« 8–14 nō Tiunu. Alama 8–12 : E haere mai Iesu Mesia nō te fa’aora i tōna ra mau ta’ata », Mai, peʼe mai—nō te Haʼapiʼiraʼa Sābati : Buka a Moromona 2020 (2020)
« 8–14 nō Tiunu. Alama 8–12 », Mai, peʼe mai—nō te Haʼapiʼiraʼa Sābati: 2020
Ha’api’ira’a i te ha’api’ira’a tumu, nā Michael T. Malm
8–14 nō Tiunu
Alama 8–12
E haere mai Iesu Mesia nō te fa’aora i tōna ra mau ta’ata
E haʼamata i tā ʼoutou faʼaineineraʼa nō te haʼapiʼi nā roto i te taiʼoraʼa i te Alama 8–12. I muri iho e hi’o faʼahou i teie arataʼiraʼa nō te tahi atu ā mau manaʼo ’o te faʼaitoito i te mau pīahi ʼia faʼaʼite mai e aha tā rātou i haʼapiʼi mai i roto i tā rātou tuatāpaparaʼa.
Pāpa’i i te mau mana’o e tae mai
Fa’a’ite mai i te mana’o
Hōroʼa i te tahi nau minuti i te mau pīahi ʼia feruri i niʼa i tā rātou iho ʼaore rā tā te ʼutuāfare tuatāpapara’a pāpa’ira’a mo’a i teie hepetoma. Nāhea tā rātou tuatāpaparaʼa i faʼahuru ʼē ai te mau māʼitiraʼa tā rātou i rave i roto i te hepetoma ? Ani i te tahi mau pīahi ’ia fa’a’ite mai i tō rātou mau mana’o.
Ha’api’i i te ha’api’ira’a tumu
E tītau tā tātou mau tautoʼoraʼa ’ia faʼaʼite i te ʼevanelia i te ha’ara’a itoito ’e te faʼaʼoromaʼi.
-
E rave rahi taʼata e ’ite nei ē e mea fifi ʼia faʼaʼite i te ʼevanelia—mai te mea ihoa rā ē e pātoʼihia mai rātou, mai ia Alama. E tauturu te hiʼoraʼa o Alama ia rātou ʼia tiʼāturi i te Atua ʼe ʼia ʼimi i te itoito nō te tāmau noa i te faʼaʼite i tō rātou ʼiteraʼa pāpū ia vetahi ʼē. E feruri i teie mau uiraʼa nō te tāu’aparau : E aha tā tātou i haʼapiʼi mai nā roto mai i te poroʼi a te melahi ia Alama i roto i te Alama 8:15 ? E aha te huru o Alama i mua i te poroʼi, e ʼitehia i roto i te Alama 8:14-32, e faʼauru ia tātou ʼia tāmau noa i te faʼaʼite i te ʼevanelia ʼia faʼaruru anaʼe tātou i te pātoʼiraʼa ? E aha te aʼo tā tātou e hōroʼa atu i te hō’ē taʼata tei tāmata i te faʼaʼite i te ʼevanelia e ʼua pātoʼihia mai ? E tauturu te aʼo a Elder Jeffrey R. Holland i roto i « Te tahi atu mau mātēria tauturu » i teie ’āparaura’a.
-
Tē faʼaʼite nei te ʼāʼamu o Alama ʼe o Amuleka i te faufaʼa rahi o te mau tautoʼoraʼa a te mau melo nō te ʼohipa misiōnare. E aha tā te mau pīahi i ʼapo mai nā roto mai i te Alama 8:19–30 nō niʼa i te auraʼa i rotopū i te mau melo ʼe te mau misiōnare rave tāmau ? (hi’o ato’a Alama 10:1–12).
Hōho’ae piti ʼutuāfare e fārerei raE riro te faʼaʼiteraʼa i te ʼevanelia i te mau taʼata tā tātou e here ʼei ʼohipa ʼoaʼoa.
E haʼavā te Atua i tāna mau tamariʼi mai te au i tō rātou māramarama ʼe tō rātou ʼite.
-
Tē vai nei te hōʼē faʼaararaʼa pūai i roto i teie mau ʼīrava nā te mau melo atoʼa o te ʼĒkālesia—ʼia fāriʼi anaʼe tātou i te māramarama ʼe te ʼite, ʼua tītauhia ia tātou ʼia faʼaherehere i te reira, ʼia faʼaʼāmu i te reira ʼe ʼia faʼaʼohipa i te reira nō te haʼamaitaʼi ia vetahi ʼē. Nō te tauturu i te mau pīahi ʼia hiʼopoʼa i teie tītauraʼa, e ani ia rātou ʼia taiʼo i te mau haʼapiʼiraʼa a Alama i roto i te Alama 9:18-30 ʼe ʼia faʼaʼite i te mau poroʼi i ʼitehia mai e rātou nō niʼa i tā rātou hōpoiʼa nō te mea tā rātou i ʼite. Nō te aha e vai mai te hōʼē faʼahaparaʼa rahi ’ia hara anaʼe tātou i te māramarama rahi aʼe ? Hōroʼa te taime i te mau pīahi ʼia feruri e aha tā rātou e rave nō te riro ’ei ta’ata haʼapaʼo hau atu i te māramarama ʼe te ʼite tā rātou i fāriʼi. E parau atu ’ia rātou e taiʼo i Te Parau Ha’api’ira’a ’e te mau Parau Fafau 50:24 ʼa feruri noa ai.
Te fa’anahora’a a te Metua i te Ao ra ’o te hō’ē ïa fa’anahora’a nō te faʼaoraraʼa.
-
E haʼamata i te hōʼē tāu’ara’a parau nō teie haʼapiʼira’a tumu ma te aniraʼa i te hōʼē pīahi ’ia pāpaʼi hōhoʼa i te hō’ē nīnoa ’iti o te faʼanahoraʼa nō te faʼaoraraʼa i niʼa i te tāpura ’ere’ere. E vāhi i muri iho i te mau tuhaʼa o te Alama 11–12 i rotopū i te mau pīahi ʼe e ani ia rātou ʼia hi’o mai i te mau parau mau ’o tā rātou e tuʼū atu i niʼa i te nīnoa ’iti. ʼEi hiʼoraʼa, e fa’aora te faʼanahoraʼa a te Atua ia tātou i te aha ? (hi’o Alama 11:38–45). Nāhea te ’itera’a i teie mau parau mau nō ni’a i te faʼanahoraʼa nō te faʼaoraraʼa e haʼamaitaʼi ai i tō tātou oraraʼa ?
-
Nō te tauturu i te mau pīahi ʼia faʼaʼite mai e aha tā te Alama 11–12 e haʼapiʼi nei ia rātou nō niʼa i te faʼanahoraʼa nō te faʼaoraraʼa, e pāpa’i i teie mau upoʼo parau i niʼa i te tāpura ’ere’ere : Te hiʼaraʼa, Te faʼaorara’a, Te tātarahaparaʼa, Te Pohe, Te tiʼafaʼahouraʼa, ʼe Te haʼavāraʼa. E mā’iti te mau pīahi i te hōʼē o teie mau parau tumu ʼe ʼia ’imi i roto i te Alama 11–12 i te mau parau mau tā rātou i ’apo mai nō niʼa i te reira. Ani i te mau pīahi ʼia pāpaʼi i te mau parau mau tā rātou i ʼite mai, ma te hōʼē faʼahororaʼa pāpaʼiraʼa moʼa, i raro aʼe i te upoʼo parau tano i niʼa i te tāpura ’ere’ere. E tāu’aparau ʼei piha haʼapiʼiraʼa, nāhea te ʼiteraʼa i teie mau parau mau e fa’ahuru ’ē ai i tō tātou oraraʼa ʼe te mau faʼaotiraʼa tā tātou e rave.
-
E fana’o tā ʼoutou mau pīahi, nā roto mai i te hōʼē tāu’ara’a parau tei faʼatumuhia i niʼa i te Alama 12:31–32, i reira tō Alama haʼapiʼiraʼa ē i muri mai i te hiʼaraʼa, ʼua hōroʼa te Atua ia Adamu ʼe ia Eva i te mau faʼaueraʼa—terā rā i muri noa mai i te haʼapiʼiraʼahia rāua i tāna faʼanahoraʼa. Nāhea te ʼiteraʼa i te faʼanahoraʼa e faʼahuru ʼē ai i tō tātou hiʼoraʼa ʼaore rā tō tātou manaʼo nō niʼa i te mau faʼaueraʼa ? Penei aʼe e nehenehe ʼoutou e paraparau nō niʼa i te tahi mau faʼaueraʼa taʼa ʼē ; ʼei hiʼoraʼa, nāhea te ʼiteraʼa i te faʼanahoraʼa a te Atua e tauturu ai ia tātou ʼia haʼamoʼa i te mahana sābati ʼaore rā ’ia haʼapaʼo i te ture nō te viʼiviʼi ʼore ?
-
E mau uiraʼa paha tā te tahi mau pīahi nō niʼa i te Alama 11:26–39, i reira tō Amuleka parauraʼa ē tē vai nei hōʼē anaʼe Atua. Tē haʼamāramarama mai nei teie mau pāpaʼiraʼa moʼa i muri nei, nāhea te mau melo nō te Toru Tahi i riro ai « ʼei hōʼē Atua » ’a riro noa ai rātou e mau taʼata taʼa ʼē : Ioane 17:20–23 ; 2 Nephi 31:21 ; ʼe 3 Nephi 19:29. E tauturu atoʼa teie faʼahitiraʼa parau a Elder Jeffrey R. Holland : « Tē ti’aturi nei tātou e ʼua hōʼē rātou i roto i te mau tuhaʼa faufaʼa rahi ʼe te mure ʼoreeiaha rā ʼia ti’aturi ē e toru Rātou taʼata i roto i te hōʼē tino taʼata » (« Hōʼē anaʼe Atua mau ra ’e o Iesu Mesia tāna i tono mai », Ensign ʼaore rā Liahona, Novema 2007, 40).
Mai te mea eʼita tātou e faʼaʼetaʼeta i tō tātou ʼāʼau, e fāri’i tātou i te parau a te Atua.
-
Hōʼē o te mau poroʼi tā Alama ʼe Amuleka i haʼapiʼi e rave rahi taime, nāhea te huru o tō tātou ʼāʼau e faʼahuru ʼē ai i te rahiraʼa parau mau tā tātou e fāriʼi nō ’ō mai i te Fatu ra. Nō te tauturu i te mau pīahi ’ia ʼite i te parau mau nō teie parau tumu, e ani ia rātou ʼia taiʼo i te Alama 12:9–14 nā te pea ʼaore rā nā te mau pupu naʼinaʼi ʼe ʼia tāu’aparau i te mau hope’a nō te hōʼē ʼāʼau ʼetaʼeta. (E ani atoʼa ia rātou ʼia taiʼo i te Alama 8:9–11 ; 9:5, 30–31 ; ʼe 10:6, 25). E aha te aura’a te parau ’ia fāri’i i te hō’ē ’ā’au marū (hiʼo Ieremia 24:7 ; Alama 16:16 ; Helamana 3:35). Nāhea te hōʼē ʼāʼau marū e tauturu ai ia tātou ʼia taʼa maitaʼi aʼe i te parau a te Atua ?
-
ʼUa haʼapiʼi Alama ē ’ia faʼaʼetaʼeta anaʼe tātou i tō tātou ʼāʼau, e fāriʼi tātou i « te tuhaʼa iti aʼe » o te parau a te Atua (Alama 12:10). Penei aʼe e fa’a’ite mai te mau pīahi i te mau ’itera’a nō roto mai i te mau pāpaʼiraʼa moʼa ’o te faʼahōhoʼa i teie parau tumu. Nāhea te Fatu e tāmarū ai i tō tātou ʼāʼau ’ia tāmau ā tātou i te haʼapiʼi mai nā roto mai iāna e ti’a ai ? E aha tō tātou iho mau ’itera’a tā tātou e nehenehe e faʼaʼite atu ?
-
Nō te tauturu i te mau pīahi ʼia taʼa maita’i i te auraʼa ’ia vai mai te hōʼē ʼāʼau marū, e faʼaʼite atu i te tahi o te mau hiʼoraʼa tei tāpurahia i roto i « Te tahi atu mau mātēria tauturu ».
Faʼaitoito i te haʼapiʼiraʼa mai i te fare.
Nō te faʼauru i te mau pīahi ʼia taiʼo i te Alama 13–16 i teie hepetoma, e parau atu ia rātou ē e ʼite rātou, e nāhea te mau parau a Alama i te tupura’a i roto i te oraraʼa o Zeezeroma ʼe te nūnaʼa o Amoniha.
Te tahi atu mau mātēria tauturu
ʼA tiʼa itoito mai.
ʼUa hōroʼa Elder Jeffrey R. Holland i te faʼaitoitoraʼa i muri nei i te feiā tei hāmani-ʼino-hia nō te faʼaʼiteraʼa ʼaore rā nō te pārururaʼa i te ʼevanelia :
« E mai te mea ʼaita ā ʼoutou i ʼite atu ra, ʼua tītauhia ʼoutou ʼia pāruru i tō ʼoutou faʼaroʼo ʼaore rā penei a’e ʼia faʼaʼoroma’i i te tahi hāmani-ʼino-raʼa i te hōʼē mahana, nō te mea noa e melo ʼoutou nō te ʼĒkālesia a Iesu Mesia i te Feiā Mo’a i te mau Mahana Hopeʼa nei. E tītauhia ia outou, i taua taime ra, te itoito ’e te peu maita’i.
« … E ui paha ʼoutou e mea hoʼona ānei ʼia rave i te hōʼē ti’araʼa morare itoito i te fare haʼapiʼiraʼa tuarua ʼaore rā, ʼia haere i te misiōni ʼe ʼia haʼavahavahahia tō ʼoutou mau ti’aturiraʼa tā ʼoutou i here maitaʼi ʼaore rā, ʼia aro atu i te hōʼē sōtaiete o te haʼavahavaha ra, i te tahi mau taime, i te hōʼē oraraʼa faʼaroʼo itoito. ’Ē, e hoʼonahia te reira …
« E te mau hoa, tō’u mau hoa ʼāpī ihoa ra, ʼa faʼaitoito. E nehenehe tā te aroha mau o te Mesia ’o te tahe mai nā roto mai i te parau-ti’a e taui i te ao nei …
« ’Ia vai pūai ʼoutou. ʼA ora itoito i te ʼevanelia noa atu ʼaita roa vetahi nā piha’i iho ia ʼoutou e ora ra. ʼA pāruru i tō ʼoutou mau ti’aturiraʼa ma te maitaʼi ʼe te aroha, ʼa pāruru rā i te reira ». (« Te hoʼo—ʼe te mau haʼamaitaʼiraʼa—nō te ti’araʼa pipi », Ensign ʼaore rā Liahona, Mē 2014, 6–9).
ʼUa tāmarūhia tō rātou ʼāʼau.
Tē hōroʼa mai nei teie mau a’oraʼa i roto i te ʼāmuiraʼa rahi i muri nei i te mau hiʼoraʼa o te mau taʼata ʼua tāmarūhia tō rātou ʼāʼau e te Fatu :
-
Te ’ā’amu o te ’utuāfare Hatfield i roto i te parau poro’i a te peresideni Russell M. Nelson « Te ho’o o te mana autahu’ara’a » (Ensign ’aore rā Liahona, Mē 2016, 66–67).
-
Te ’ā’amu o Harold Gallacher i roto i te parau poro’i a te peresideni Thomas S. Monson « Te piʼiraʼa moʼa nō te tāviniraʼa », Ensign ʼaore rā Liahona, Mē 2005, 55).
-
Te ʼāʼamu o Davida i roto i te parau poro’i a te peresideni Dieter F. Uchtdorf « Ha’api’i mai nā roto mai ia Alama ’e ’o Amuleka », Ensign ʼaore rā Liahona, Novema 2016, 73–74.
Ha’amaita’ira’a i tā tātou ha’api’ira’a
Hi’o nā roto i te mata o te Atua. ’A tūtava i te hi’o i tā ’outou mau pīahi mai tā te Atua e hi’o ra ia rātou, ’e e fa’a’ite mai te Vārua ia ’outou i tō rātou faufa’a ’e tō rātou ’aravihi hanahana. ’A nā reira ai ’outou, e arata’ihia ’outou i roto i tā ’outou mau tauto’ora’a nō te tauturu ia rātou (hi’o Ha’api’ira’a mai tā te Fa’aora, 6).