“Tuun 29–Turai 5. Aramwa 23-29: A bon ‘Aki Manga Tannako,’” Nakomai, Iriirai—Ibukin te Reirei n Tabati: Ana Boki Moomon 2020 (2020)
“Tuun 29–Turai 5. Aramwa 23–29,” Nakomai, Iriirai—Ibukin te Reirei n Tabati: 2020
Aentaai‑Nibwaai‑Riaai a Tauni Aia Bwai ni Buaka, iroun Jody Livingston
Tuun 29–Turai 5
Aramwa 23–29
A Bon “Aki Manga Tannako”
Ngkai ko wareka Aramwa 23–29, uringa bwa am konaa ni buokiia tabeman n reiakini koaua inanon te mwakoro aei, e na riai n iai te bwai ae ko a tia n rinanona ae iai nanona iaon taian koaua.
Korea Am Namakin
Kaungaa te Tibwatibwa
Ko kona ni kaoiia kaain te kiraati bwa a na korei iaon te burakibooti taian kibu ake a taraa n rangi ni kakawaki n aia tai n kamatebwai ibon irouia ke n aia utu. Kabanea tabeua te miniti ni kaoiia tabeman ni maroroakina te koaua are a reiakinna man taian kibu ake a korei.
Reirei te Reirei
Rairakira nakon Iesu Kristo ao Ana euangkerio e bitii maiura.
-
Ibukina bwa ngaira ni kabane ana reirei Iesu Kristo, ti bane ni kekeiaki ni karikirakea rairakira. Karakinaia Aentaai‑Nibwaai‑Riaai tao e na kaungaia te koraki ake ko reireiniia n aia kekeiaki ni karaoa aei. Ko konaa ni moanna man korean te titiraki iaon te burakibooti n aron aikai: Tera nanon ae ko rairaki? ke Baikara bitaiki inanon maiuia aomata ngkana a tia n rairaki? A konaa kaain te kiraati n norii kaeka inanon taian kibu aikai: Aramwa 23:6–7, 17–18; 24:17–19; 25:15–16; ao 27:26–30. A kona naba n tibwauai nonoori man kiibu tabeua ake a tia ni wareki n Aramwa 23–25 ao 27. A konaa naba kaain te kiraati ni kunei kaekaan titiraki aikai ake a na ibuobuoki man ana marooro Unimwaane David A. Bednar “Converted unto the Lord” (Ensign ke Riaona, Nobembwa. 2012, 106–9; taraa naba “Bwaai n Ibuobuoki Riki Tabeua”). Baikara bitaki ake a karaoi Aentaai‑Nibwaai‑Riaai mai imwiin rairakiia? E kangaa aia katooto n anganiira te unga n nano ni kanenea rairakira nakon Iesu Kristo ao Ana euangkerio?
-
Ko na kangaa ni kaunga nanoia kaain te kiraati bwa a na katikui aia katei aika a kairua ao n rairinanoia ao ni motikia bwa a na aki manga karaoi buure riki, n aron are a karaoia Aentaai‑Nibwaai‑Riaai? Iangoia ni manga rinanoa Aramwa 23:5–7 ni kabane. Baikara katei aika a raraoi are e buokiira iai te euangkerio ni karikirakei? Ana tera’ “aia bwai ni buaka … ni kakaitara” Reimwanaite ae e tei ibukina n ara bong? Ti na kangaa n “taunii ni kananoi iantano”? (Aramwa 24:17). Kaoiia kaain te kiraati n iangoia bwa baikara katei aika kairua ke bwaai ni buaka ni kakaitara ae a riai ni katikui bwa aonga ni maiuakina te euangkerio ni kabwaninna riki.
Rinanon Ana Mwakuri ni Kamaiu Iesu Kristo, e konaa ni kabwaraaki ara bure ngkana ti rairi nanora.
-
Ngkana ko namakina te tamnei bwa kaain te kiraati a na marooro iaon te rairannano, te rongorongo iaoia Aentaai‑Nibwaai‑Riaai n Aramwa 24 bon te katooto ae tamaroa ni kabonganaaki. Ko konaa ni katannakoia ibon irouia kaain te kiraati ma te kibu bwa a na warekia man Aramwa 24:7–16 ao n tuangiia bwa a na korei iaon te burakibooti bwai ake a reiakin man kiibu aikai iaon te rairannano. A konaa ngkane ni kakae inanon koroboki aika tabu n nori tabeua nonoori iaon te rairannano: Itaia 53:5–6; 2 Nibwaai 2:6–8; ao Motiaea 5:2.
Te euangkerio e uota te kimwareirei.
-
Inanon Aramwa 23–29, te taeka ae “kimwareirei” e kaoti 24 te tai, are e a karikia te mwakoro aio bwa te tabo ae tamaroa n reiakina bwa ti na kangaa ni maiuakina te euangkerio—ao n tibwauaia—e uota te kimwareirei. Ko konaa ni kamaenakoa kaain te kiraati ianon kurubu ao tuangiia kurubu nako bwa a na rinanoi tabeua kiibu, ni kakaea bwa tera bukina ngkai Amon, ao natin Motiaea mwaane, ao Aramwa a kukurei: Aramwa 24:13–15; 26:12–22; ao 29:1–17. A kona kaain te kiraati ni korei ni karinani iaon te burakibooti bwaai ake a kunei. Tera ae ti reiakinna man kiibu aikai bwa e kangaa te euangkerio ni uota nakoira te kimwareirei?
-
E reirei Beretitenti Russell M. Nelson: “Ngkana e kaineti maiura iaon ana babaire ni kamaiu te Atua … ao Iesu Kristo ao Ana Euangkerio, ti kona n namakina te kimwareirei n aki tabe ma te bwai ae riki—ke akea ae riki—inanon maiura. Te kimwareirei e roko mai Irouna ao te kimwareirei bon Ibukina. Bon ngaia oin te kimwareirei” (“Joy and Spiritual Survival,” Ensign ke Riaona, Nob. 2016, 82). Tao a na konaa kaain te kiraati n tibwaua te bwai are a rinanona are e a tia ni buokiia ni kamataataa te koaua n ana taeka Beretitenti Nelson.
-
Aramwa ao Amon a kunea te kimwareirei ae korakora man tibwaan te euangkerio. Ko konaa ni kaoiia kaain te kiraati n kakaea ni kiibu n Aramwa 26 ao 29 ae na konaa ni kaunga nanon te kairake bwa e na nako ni mition—ke ni kaungaia tabeman bwa a na tibwaua te euangkerio ma tabeman. Iangoia ni anganiia tabeua te miniti kaain te kiraati ni bairei bwaai tabeua ake a konaa ni karaoia n tibwaua te euangkerio. Kaoiia bwa a na karaoa nanon aia babaire, ao n tain aia kiraati aika a na roko kaungaia bwa a na taekina aron aia kekeiaki.
-
Ngke e buokiia tabeman Aramwa bwa a na rairi nanoia, e kauringaki n ana akoi te Uea (taraa Aramwa 29:10–13). Ko konaa ni anganiia kaain te kiraati tabeua te tai bwa a na kamatebwaia kiibu aikai ao ni korei baike e uringi Aramwa. Tera ae e kauringiira n ana akoi te Atua? Ti kangaa n tia n noora ana akoi te Atua inanon maiura?
Ti konaa ni riki bwa bwaai ni mwakuri ngaira ni bain te Atua.
-
Ni buokiia kaain te kiraati ni kakaea bwa tera ae e nanonaki n riki bwa “bwaai ni mwakuri ngaira ni bain te Atua” (Aramwa 26:3), ko konaa ni kaotii aekakin nako bwaai ni karao bwai ke bwaai ni mwakuri. Ko konaa naba ni kaoiia kaain te kiraati bwa a na uoti tabeua bwaai ni mwakuri ake a kakabonganai. A kangaa bwaai ni mwakuri aikai ni manena? Ti kangaa n riki bwa kangaa bwaai ni mwakuri n ana mwakuri te Atua? Ko konaa ni kaoiia kaain te kiraati ni kaoti kawai ake Amon ao raona ni mitinare a riki iai bwa bwaai ni mwakuri ngaiia ni bain te Atua (taraa, ibukin te katooto, Aramwa 26:1–5; 11–12). Baikara ara noonori aika ti karekei man Reirei ao Berita aika Tabu 4 ibukin te riki bwa bwaai ni mwakuri i Baina? A kona naba kaain te kiraati n tibwaua te bwai are a tia n rinanona ngke a namakina te kimwareirei are e roko irouia ngke a riki bwa bwaai ni mwakuri ngaiia ni bain te Atua.
Kaungaa te Kamatebwai n te Mweenga
Angiin iango ake a kaairua are e kairia ni kabwakaia natin te Atua n taai aikai bon aekakin naba ake n ana tai Aramwa. Tuangiia kaain te kiraati bwa n Aramwa 30–31 a na nooria bwa e kangaa Aramwa ao tabeman ni kaeka nakon taian reirei aika a kaairua aikai.
Bwaai n Ibuobuoki Riki Tabeua
Rairaki nakon te Uea.
Unimwaane David A. Bednar e reirei:
“Boton raoi ana euangkerio Iesu Kristo e ikotaki ma bwaai aika a kakawaki ao te bitaki ae matoa inanon maiura e bon riki mai mwin Ana Mwakuri ni Kamaiu te Tia Kamaiu. Te rairaki ni koaua e uota te bitaki n ana koaua temanna, nanona ao maiuna ni kariaia ao ni boraoi ma nanon te Atua (taraa Mwakuri 3:19, 3 Nibwaai 9:20) ao ni ikotaki ma te anganano ni koaua n riki bwa ana reirei Kristo.”
Imwiin taekinan Aramwa 23:6–8, Unimwaane Bednar e reitia ni kabwarabwaraa:
“Uoua bwaai aika a kabwarabwaraaki ni kiibu aikai: (1) te atatai n te koaua, are e konaa n nanonaki bwa te koaua ae reke iroum, ao (2) te rairaki nakon te Uea, are ni mataatau te rairaki nakon te Tia Kamaiu ao Ana euangkerio. Ngaia are, te korakora ni botakin te koaua ao te rairaki nakon te Uea e karekea te matoatoa ao n aki kona ni kamwaingaki ao e katauraoa te kamanoaki n te maiu n tamnei.
“A bon “Aki Manga Tannako ao anga nako ‘te bwai ni buaka ake a kakaitara iai, n te aro are aki manga buaka ni kaitara te Atua.’ Ni kararoai ‘bwaai ni buaka ni kakaitara’ ake a mamate nanora iai n aron te tinanikubeka, te kamoamoa, te aki ongeaba e kainnanoa riki nakon ae tii kakoauaana ao ataakina. Namakinan te eti ao ae kaairua, te nanorinano, te rairannano, ao te tatauraoi n anganano a roko imwain kitanan ara bwai ni buaka ni kakaitara. Tao ngkoe ao ngai iai iroura ngkai ara bwai ni buaka ni kakaitara are e tukiira n rairaki ni koaua nakon te Uea? Ngkana iai, ti riai n rairananora ngkai.
“Ko na ataia bwa Reimwanaite a aki rairaki irouia mitinare ake a reireiniia ke n tamaroan taian buroukuraem n te Ekaretia. A bon aki naba rairaki n aron aroaroia aia tia kairiiri ke ni kateimatoa katein abaia ke aia katei aia bakatibu. A rairaki nakon te Uea—n Nakoina ngkai bon te Tia Kamaiu ao nakon Kaueaakina ao ana reirei—a bon aki manga tannako” (“Converted unto the Lord,” Ensign ke Riaona, Nobembwa 2012, 107–9).
Kanakoraoan Ara Anga reirei
Ukerii kairiiri mai irouia am mataniwi. “Am taani kairiiri n te nakoanibonga ao ni bootaki nako a tangiria ni buokiko bwa ko na tokanikai. Karekei aia taeka n reirei ngkai ko kataia ni katamaroako bwa te tia reirei ao ngkai ko iangoi kainnanoia te koraki ake ko reireiniia” (Reirei n ana Kawai te Tia Kamaiu., 5).