“Tuun 22-28. Aramwa 17–22: ‘N na Karaoi Ngkami bwa Bwaai ni Mwakuri i nanon Baiu,’” Nakomai, Iriirai—Ibukin te Reirei n Tabati: Ana Boki Moomon 2020 (2020)
“Tuun 22-28. Aramwa 17–22,” Nakomai, Iriirai—Ibukin te Reirei n Tabati: 2020
Amon ao te Uea ae Ramonaai, iroun Scott M. Snow
Tuun 22-28
Aramwa 17–22
“N na Karaoi Ngkami bwa Bwaai ni Mwakuri i nanon Baiu”
Imwain ae ko kona ni buokiia tabeman ni kunei koaua ake inanon booki aika tabu, ko riai ni kunei koaua i bon ibukim. Wareka Aramwa 17–22 ma kaain am kiraati n ami iango.
Korei Am Namakin
Kaungaa te Tibwatibwa
Anganiia aia tai kaain te kiraati bwa a na tibwaua te bwai ae a reiakinna n aia kamatebwai i bon irouia ao n te utu, ko kona ni kaoiia bwa a na rinea te aomata are e kabwarabwaraaki n Aramwa 17–22 ao ni kamota te taeka n aron ane e oti imwiina: “E reireinai Abiti ” ke “e reireinai Ramonaai .”
Reirei te Reirei
E kakorakoraaki ara onimaki ngkai ti nanomatoa n ukeuke n ataa te koaua.
-
A bae n tia kaain te kiraati n ongo n te tai ae mwaiti kakawakin bebeten katein te euangkerio. Aramwa 17:1–4 e kona ni buokiia n taraa korakoran mwiin katei aikai ake a kona n riki nakon maiuia. Ko kona ni butiia iteran te kiraati bwa a na kakaei kiibu aikai bwa tera ae a karaoia natin Motiaea ao are te iterana ni kakaea mwiin te bwai are a karaoia. Tera mwiina ae e na riki man karaoan bwaai aikai inanon maiura?
-
Ibukin te marooro ae nano riki iaon tabeua katei ake a kakorakoraia natin Motiaea mwaane, ko kona ni korea iaon te burakibooti Ukoukori Koroboki aika Tabu, te Tataro, ao te Aki Mamatam. Ngkanne a kona kaain te kiraati ni kakaei booki aika tabu ake a reireia taekan kakabwaia ake a roko man kamatebwaian booki aika tabu, te tataro, ao te aki mamatam (te Topical Guide ke Guide to the Scriptures a kona n rangi n ibuobuoki). A kona ni korea iaon te burakibooti bwaai ake a kunei ao n taibwauai imarenaia bwa a na kanga ni kanakoraoa aia kamatebwai ni booki aika tabu, te tataro, te aki mamatam n te anga are a na kona ni kaaniaki riki ma te Atua.
Ara tangira a kona ni buokaki iai aomata ibukin butimwaean te euangkerio.
-
A mwaiti kawai n tibwaua te euangkerio, ao angiina ni kabane a korakora riki ngkana e kamwakuraki te tangira. Tao a kona kaain te kiraati ni kinai kiibu n Aramwa 17–18 are e kaotia bwa e kanga ni kaungaaki nanon Amon man ana tangira n tibwaua te euangkerio. Tera koaua tabeua ibukin tibwauaakin te euangkerio ae ti reiakinna man ana katooto? A kona kaain te kiraati ni tibwauai taneiai ma te tangira ae koaua nakon kamarauan nanon temanna ao ni kariaia teuanne ke neienne ni butimwaea rongorongon te euangkerio. Te rongorongo mairoun Beretitenti Dallin H. Oaks inanon “Bwaai n Ibuouoki Riki Tabeua” e kona naba ni buokiia kaain te aro ni kaotaia ni kakawakin ao n ataia bwa ara konabwai a kateaki iaon te tangira.
Amon e Kamanoia ana Nanai ni Man te Uea, iroun Minerva K. Teichert
Te anga reirei ao kamatebwaian te euangkerio ae nakoraoi e kona ni karika te bitaki n nano.
-
N te tai are Amon ma Aaron a karekea ana onimaki te Uea ae Ramonaai ma ana karo, a kona ni buokiia n oota ni kakawakin koauan te euangkerio. Tao e na ibuobuoki ngkana kaain te kiraati a korei rinanin koaua ake a reireinaki iai Ramonaai iroun Amon (taraa Aramwa 18:24–39) ao kabootaua ma rinanin koaua ake e reireinaki iai ana karo Ramonaai iroun Aaron (taraa Aramwa 22:1–16). A kona iteran te kiraati ni mwakuri iaon rinanin te koaua teuana ao te kiraati are te iterana iaon are teuana. Bukin tera ataakin koaua aikai a tia ni kaira Ramonaai ao ana karo ni kakoaua ao n onimakina te Tama are i Karawa ao Natina, Iesu Kristo?
-
Rongorongon Aaron ao Amon n reireina te Uea ae Ramonaai ao ana karo a katauraoa te tai ni marooroakina te kamatebwai ao te anga reirei ae nakoraoi n te euangkerio. Tera aron te kamatebwai aika a kunei kaain te kiraati? (taraa, te katooto, Aramwa 18:24–28 ao Aramwa 22:7–13). Tera aron te kamatebwai aika a kunei n ana banna ni katooto te Uea Ramonaai ao tamana? (taraa, te katooto, Aramwa 18:25–31; 22:17–18).
-
N reiakinna bwa e kanga reirein te euangkerio n uaana nakon maiura, kaain te kiraati a kona n kakaea Aramwa 18:40–41; 20:1–15; ao Aramwa 22:15–18, 25–27 ni kakaea bukina bwa e kanga ana namakin te Uea ae Ramonaai ao ana karo ao aia mwakuri tii mwiin ootaia ao rairakia nakon te euangkerio. E kanga koaua aikai ni buokiira n nakon Kristo? Tera ae ti kona ni karaoia ni bon buokiira ao ara utu ake ti tangiriia n oota ao ni maiuakin koaua aikai?
E kona ara koaua n iai korakoran mwiina iaoia tabeman.
-
N tain aia kamatebwai ae onoti iaon Aramwa 19–22, a na bae kaain te kiraati n iangoa mwiin ana koaua temanna are e na kona n rootii maiuia tabeman. Kaungaiia bwa a na tibwauai baike a tia n reiakin. Tera rongorongo ake a taekinaki n Aramwa 19–22 ibukin oin ara konabwai n tibwaua te euangkerio? Ana karaki Beretitenti Gordon B. Hinckley inanon “Bwaai n Ibuobuoki Riki Tabeua” e kona ni buokia ni kamataata te iango aei.
-
Tera tabeua taetae ni kabootau ake ko kona n tibwauai ni kaotia bwa tera ae e na kona n riki ngkana ti tibwaua ara koaua ma tabeman? Katooto aika a kona ni karaoaki bon atiibu aika a uarereke are a karika te nao ae uarereke inanon te nei, ke te iiti ae e buoka ni karika te burawa. Imwiin rinanoakin tabeua katooto aikai ibukiia aomata n tibwauai aia koaua inanon Aramwa 19–22, a kona kaain te kiraati n tibwauaia bwa a kanga n rootaki man aia koaua tabeman.
Kaungaa te Kamatebwai n te Mweenga
Ko na bae n titirakiniia kaain te kiraati ngkana a tia n rangi ni miimi bwa e kanga n nene ao n teimatoa rairakiia. N Aramwa 23–29, a na wareka rongorongoia kurubu n aomata ake a butimwaea te euangkerio ao “aki manga tannako” (Aramwa 23:6).
Bwaai n Ibuobuoki Riki Tabeua
Tibwaua te euangkerio n te tangira.
Beretitenti Dallin H. Oaks e tibwaua te reirei ae e rangi n kakawaki are e reiakinna man te taneiai are reke irouna ngke te ataeinimwaane ngaia:
“I mwiokoaki bwa N na kawara te membwa ae aki bati ni kakaonimaki, te bwakuaku ae nakoraoi arona ae e a ikawai riki nakoiu n te ririki. Ngkana I tanrikaaki n tarai au mwakuri, I kunea bwa bon iai teutana tabeaiangau ibukin te mwaane ae I kawaria aio. I karaoa aio ngkai bwa ai bon tabeu, ma nanou n ribootina 100 te batienti iaon au reirei n te mweenga. N te tairiki teuana, ni kaniia banen te namwakaina, I tareboon ngkana ti kona n roko ni kawaria Ngai ma toau. Ana kaeka are e bwainingareai iai e reiakinai te reirei ae aki kona ni mwanuokinaki.
“‘Kam aki, I taku bwa I aki tangiri ngkami bwa kam na roko n te tairiki aio,’ e taku. “I a kua. I a tia ni karin oneau ni matu. Ae I a wareware ngkai, ao I aki tangiria ni kan katabetabeaki n te aro bwa ko aonga n ribooti 100 te batienti karaoan am reirei n te mweenga n te namwakaina aei.’ E teimatoa n tiku te kaeka anne inanou ibukina I ataia ae e namakina arou n aki kaunganano man tiorebeke.
“Au kantaninga bwa akea te aomata ae ti kawaria ma ara kakao ae e na ongora rongorongon te euangkerio ae e a tia ni kaokaki n namakinna ae ti karaoia bwa iai bukina nakon kaotan ara tangira ae koaua ibukiia ma karimoaakin moa nanora ni kan tibwaua te bwai ae ti ataia bwa e kakawaki” (“Sharing the Gospel,” Ensign, Nob. 2001, 8).
Uaan ara mwakuri e aki ataaki n angin te tai.
Beretitenti Gordon B. Hinckley e karakina rongorongon te mitinare are e ribooti nakon ana beretitenti n te mition ni banean ana mwakuri ni mitinare. E taku te mitinare:
“Bon akea te bwai ae I karekea man uaan au mwakuri. I a tia ni kabanebuaka au tai ao ana mwane tamau. E taonaba te tai anne. … I bwabetitoa tii temanna te aomata n au uoua n ririki are I mena iai ikekei. Bon te ataeinimwaane ae 12 ana ririki ni maiu ae e maeka n te tabo ae mwanono i Tennessee.”
E baireia te beretitenti n te mition bwa e na kakaea rongorongon te ataeinimwaane are e bwabetitoia te mitinare aio. E a ikawai, e a tia ni mare, ao e mwaing nako Idaho. A tia ni mitinare natina, ao natiia a tia n nako naba ni mitinare. E mwananga te beretitenti n te mition nako Idaho ao n titirakiniia kaain te aro rongorongon te utu arei ibukin aia mition. E taku imwiina, “I kunea bwa, mai imwiin bwabetitoakin te ataeinimwaane ae e mena n te tabo ae mwanono i Tennessee iroun te mitinare are e taku bwa e kabwaka, e riaon riki 1,100 aomata ake a tia n rairaki nakon te Ekaretia” (Teachings of Gordon B. Hinckley [1997], 360–61).
Kanakoraoan Ara Anga reirei
Kaokoroa aia tai taan kamatebwai bwa a na tibwatibwa. “Ngkana a tia taan kamatebwai n tibwauai bwaai aika a tia ni kamatebwai, a aki tii namakina te Tamnei ao ni kakorakorai aia koaua, ma a kaungaiia naba kaain te kiraati tabeman ni kunei koaua i bon ibukiia. Kaokoroa aia tai ataein te reirei n tibwatibwa ni katoa reirei—inanon tabeua keiti, ko na bae ni kunea bwa marooro aikai bon te reirei” (Reirei n ana Kawai te Tia Kamaiu, 30).