“Tuun 15–21. Aramwa 13–16: Riin inanon Ana Rau te Uea,’” Nakomai, Iriirai—Ibukin te Reirei n Tabati: Ana Boki Moomon 2020 (2020)
“Tuun 15–21. Aramwa 13–16,” Nakomai, Iriirai—Ibukin te Reirei n Tabati: 2020
Kamataata ibukin Aramwa ao Amureki ni kainaomataakiia man te karabuuti, iroun Andrew Bosley
Tuun 15-21
Aramwa 13–16
“Aramwa 13–16: “Riin inanon Ana Rau te Uea”
Te rairaiki ae akea tokina e kainnanoa riki ae mwaiti nakon te reirei ae anainano n te Reirei n Tabati tetaina n te wiiki. Kaungaia kain te kiraati bwa a na kakaei aia taneiai n te tamnei ni kabwanina te wiiki.
Korea Am Namakin
Kaungaa te Tibwatibwa
Tera ae e na kaungai nanoia kain te kiraati n tibwauai aia taneiai ibon imarenaia ma kamatebwaian ao maiuakinan te euangkerio? Tao ko kona ni kaoiia bwa a na tibwaua aia atatai are a kunea n Aramwa 13–16 are a miimi iai ke are a tuai man iangoia mai imwaina. Ngkai a tibwatibwa, titirakiniia bwa e kanga aia namakin n te atatai ae boou aei ni karaoa te bitaki inanon maiuia.
Reirei te Reirei
Otenanti n te nakoanibonga a buokiia natin te Atua ni karekea kaboan maiura rinanon Iesu Kristo.
-
Tabeman kain am kiraati a na bae n iai te bwai ae a na kunea are e kakorakora aia kakaitau ibukin te nakoanibonga ngkai a kamatebwaia Aamwa 13. Kaoiia bwa a na tibwauai bwaai ake a reiakin. Kam kona naba ni kaai ni wareki kiibu 2 ao 16 ao n titiraki n aron “E kanga te nakoanibonga ao ana otenanti ni buokiko ‘n taraa natin te [Atua] ibukin kaboan maiura’?” Ngkana e na ibuobuoki, a kona ni kuneaki rinanin otenanti inanon Te Koaua nakon te Onimaki, 109–10.
Otenanti n te Nakoanibonga a buokiira n taraa Iesu Kristo ibukin kaboan maiura.
-
Angiina aomata i Amonia bon taan iriira Neoa, are e reiakin iango aika a kewe ibukin aia mwakuri ibonga. Ni buokiia kain te kiraati n reiakina taekan oin rikin te nakoanibonga ae koaua, ko kona ni butiia bwa a na kaokoroa ana nonoori Neoa bwa tera ae a na riai ni karaoia taian ibonga (taraa Aramwa 1:3–6) ma are e reiakinna Aramwa (taraa Aramwa 13:1–12). Tera kawai ae ti te arona iai ana reirei Neoa nakon ana nonoori te aonaaba ibukin te mwaaka ao te aro ni kairiiri? A kanga ni kaokoro ana reirei Aramwa?
-
Warekan Aramwa 13:1–19 e na kaira te marooro ibukin “te katauraoi man moan tein te aonaba” ibukin katabeara n ana mwakuri te Uea. Tera ae taekinaki n Aramwa 13:3 ibukin te anga are ti riai n tarai ke ni karaoi katabeaki aikai? (taraa naba RB 138:56).
E kaoiira te Uea bwa ti na rin inanon ana rau.
-
E reirei Aramwa bwa te nakoanibonga e buokiira “n rin n ana rau te Uea” (Aramwa 13:16). Ni waakina te marooro ibukin te iango aio, ko kona ni butiia kain te kiraati bwa a na wareka Aramwa 13:6, 12–13, 16, ao 29 ao n tibwauaia bwa tera ae reiakinaki ni kiibu aikai ibukin “ana rau te Uea.” A kona naba ni kinai kateia aomata ake a “rin n ana rau te Uea.” Tera ae ti kona ni karaoia n rinanon ana rau te Uea inanon maiura n rabwata?
N taai ni kataaki ao inanon kabuanibwai, ti riai n onimakina te Uea.
-
Aramwa 14 e kona n riki bwa te tibwanga ni marooroakinna bwa ti na kanga ni kaeka ma te kakaonimaki ngkana ngaira ke ara utu aika a tangiraki a kaaitara ma te bwainikirinaki ke te kataaki e ngae ngke ti kataia ni karaoa ae tamaroa. Ko na bae ni waaki nako ni kaoiia kain am kiraati n iangoia bwa aongkoa are ngaiia taan koro rongorongo ao a ribooti iaon te bwai ae riki n Aramwa 14. Tera aekakin titiraki ake a na titirakiniia iai Aramwa ke Amureki ibukin te bwai ae riki? N aron te katooto, “Bukin tera ngkai e kariaia te Uea bwa ko na korakai ma aomata aika raoiroi?” ke “Tera am taeka n reirei nakoia naake a rinanon kataaki aika a kaangaanga?” Ni kaineti ma ae ti ataia man Aramwa 14, a kanga Aramwa ao Amureki ni kaekai titiraki aikai?
-
Angiina mai ibuakora a kona ni karakina aekakin naba te anga are e namakinna Amureki ngke e kakoaua korakaia ana aomata Amonia aika a kakaonimaki: ngaira “naba [ti] maraki” (Aramwa 14:10), ao ai tera ngke iai te bae ti kona ni karaoia ibukina. Tera ae ti reiakinna man te bwai are e taekinna Aramwa n te kaangaanga aio? (taraa Aramwa:14:8–13). Ko kona n tibwaua ana taeka Beretitenti Spencer W. Kimball inanon “Bwaai n Ibuobuoki Riki Tabeua.” Tao kain te kiraati a kona ni kakimotota oin ana rongorongo Beretitenti Kimball n oin aia taeka.
N riki bwa ana reirei e kainnanoa te anganano.
-
Te kabwarabwara n te wiiki aio inanon Nakomai, Iriirai—Ibukiia Aomata n Tatabemaniia ao Utu a iangoia ni karinani baike e anga nako Amureki ao tera ae karekei ngke e mwanea te euangkerio. Tao a kona n anganano kain te kiraati n tibwauai rinanin bwaai ake a karaoi, ke a kona ni karaoi rinanin bwaai aikai n te kiraaati. Koroboki aika tabu aikai a kona n ibuobuoki: Aramwa 10:4–5; 15:16, 18; 16:13–15; ao 34:8. Bukin tera ngkai e tauraoi Amureki ni karaoi anganano aikai? Bukin tera ngkai ti tauraoi ni karaoia? Ti na kanga n iriira ana katooto Aramwa, are e “kakorakora [Amureki] inanon te Uea”?
A moanna ni kakoroaki bukin aia taeka burabeti.
-
Aramwa 16 e anga te katooto ibukin temanna are e onimakina te burabeti ao aomata ake a aki. Ni buokiia kain te kiraati n reiakinaki man katooto aikai, ko kona ni korea iaon te burakibooti uoua atuun te rongorongo: Tioram ao Aomata ae kain Amonia. A kona kain te kiraati ni wareka Aramwa 16:1–10 ao ni korei iaan atuun rongorongo akanne taeka ao kibuntaeka ake a kabwarabwarai anuaia aomata aikai nakon ana taeka te burabeti ae Aramwa. Tera ae ti karaoia ni kaotia nakon te Tama are i Karawa bwa iai ara onimaki n aia taeka burabeti aika maiu?
Kaungaa te Kamatebwai n te Mweenga
Iangoia n titirakiniia kain te kiraati ngkana a tia n iangoia bwa a na kona n nakoraoi riki n tibwauaan te euangkerio. Warekan Aramwa 17–22 e kona ni kaungaiia ma aia iango ni buokiia ni kakoroa nanon te kouru aio.
Bwaai n Ibuobuoki Riki Tabeua
Te Atua e aki tuuka te kabuanibwai n taainako.
Beretitenti Spencer W. Kimball n te taina ao e taetae iaon kabuanibwai aika a mwaiti aika a kaangaanga kabwarabwaraia ake a riki n te aonaaba:
“E kona te Uea n tuuki kabuanibwai aikai? Te kaeka bon, Eng. Te Uea e bon mwaaka, ma mwaakana ni kabane n tautaekani maiura, e katoki marakira, e tuuki kabuanibwai ni kabane, … e [kamanoira naba] man te mate, ngkana e kona. Ma e bon aki. …
“Ngkana a kamaiuaki ni kabane ake a aoraki ake ti tataro ibukiia, ngkana a kamanoaki ni kabane aikaa raoiroi ao a kamaunaaki aik a buakaka, ana burokuraem ni kabane te Tama a na kamaunaaki ao ana reirei te euangkerio, te inaomata n rinerine, a na bane n toki. Akea te aomata ae e na aki maiu man te onimaki. …
“… Ngkana ti na kaina mataroan te nanokawaki ao te rawawata, ti na bae ni kairiia raoraora ao taan boutokaira. E kona te korakai ni karaoia aomata aika a itiaki bwa a na taotaonaki n nano, n teimatoa n taotaonaki n nano n te tai ae maan, ao n rangin konabwai ni kairiko i bon iroum. …
“… I kakaitau bwa rinanon te nakoanibonga I aki kona ni kamarurungiia aoraki ni kabane. N na bae ni kamaiuia aomata ake a riai ni mate. N na bae ni katoki korakaia aomata ake a korakai. I maaku bwa N na bae ni katoka ana kantaninga te Atua.
“Akea tian korakorau, ao e ngae ngke iai tian au nonoori ao au atatai, N na bae ni kamaiua Abinataai man te ai ae urarake ngke e buee n te boua, ao ni karaoan aei I bae n aki kaikoakia. E mate n tiringaki ibukin ana koaua ao kanuangan matena e karekea te—karietataaki.
“N na bae ni kona ni kamanoa Bauro ni kaaitarai karawawataakina ngke arona bwa e aki tiatianaki korakorau. N te koaua N na bae ni kona ni kamaiua man ‘te bwai ni kateketeke are inanon irikona.’ [2 I-Korinto 12:7.] Ao ni karaoan anne N na bae ni kanakobuaka ana burokuraem te Uea. …
“I maaku bwa ngke I a kaman mena n te Karabuuti ae Carthage n Tuun 27, 1844, N na bae n tuuka kanoan te katii are e rinnako n rabwatan te Burabeti [Iotebwa Timiti] ao te Tamanuea ae [Hyrum Smith]. N na bae n tia ni kamauiia man te karawawataaki ao te korakai, ma a bua ao a mate n tiringaki ao ni kanuanganaki. …
“Ma te korakora ae aki kona n tuukaki, n te koaua N na bae ni kan kamanoa Kristo man korakaina i Ketetemwane, taetaebuakaakina, mwaen atuuna ae kateketeke, kammarakana n te boowi, ikoakin rabwatana. N na bae ni karaoa ikoakina ao ni kamaoa, n anganna te ran ae mwaitoro ma tiaki te beneka. N na bae n tia ni kamaiua man te karawawataaki ao te mate, ao ni kabuaa nakon te aonaaba ana anga karea ni kamaiu. …
“Ni kaitarai kabuanibwai aika a teretere ti riai n onimakina te Atua, n ataia bwa n aki tabe ma tianakin ara nonoori e bon aki kona n tuukaki ana kantaninga” (Teachings of Presidents of the Church: Spencer W. Kimball [2006], 14–17, 20).
Kanakoraoan Ara Anga reirei
Kaungaa te nanomatoa ni kamatebwai. “Ngkana ko katauraoi n anga reirei, n oneamwiin te iango, ‘Tera ae N na karaoia n anga reirei?’ titirakiniko i bon iroum, ‘Tera ae a na karaoia kain te kiraati n reiakinaki?’” (Reirei n ana Kawai te Tia Kamaiu, 29).