1 Ao e koro bukina bwa n aia katebwi ma teuana n ririki n tautaeka taan moti iaoia ana aomata Nibwaai, ni kanimauan bongin te kauoua n namwakaina, ao e a bon tia ni mwaiti te rau n te aba are Taraemera, ao bon akea bubuaka ke itabaraara i nanon ririki tabeua, ni karokoa te kanimaua ni bong ni kauouan namwakainan te katebwi ma teuana n ririki, are e bon keakinaki iai taekan te buaka ni kabuta te aba.

2 Bwa nooria, aia tanga ni buaka Reimwanaite a bon roko man te itera are e rereua, nakon tian te aba, nakon naba te kaawa are Amonia, ma ni waaki n tiringia aomata man urua te kaawa.

3 Ao ngkai e koro bukina bwa, i mwaain ae Nibwaite a kona ni kateirakea aia taanga ni buaka ae tau ni kakioia nako man te aba, a bon tiringia kaain te kaawa are Amonia, ao tabeman riki kaain rarikin te tia are i Noa, ao a kairia tabemwaang bwa bure nako nanon te rereua.

4 Ao ngkai e koro bukina bwa Nibwaite a bon tangiria ni kaokia naake a bon kairaki nako bwa bure nako nanon te rereua.

5 Mangaia ae, teuare e a bon tia n rineaki bwa mataniwia aia tanga ni buaka Nibwaite, (ao arana bon Tioram, ao bon iai natina mwaane uoman, Riaai ao Aa)—ngkai Tioram ao natina ake mwaane ake uoman, a bon ataia bwa Aramwa bon te ibonga ae rietata i aon te ekaretia, ao a bon tia n ongo bwa iai tamnein te taeka ni burabeti irouna, mangaia are a kawaria ma n tangiria ni kan ataia mai irouna bwa e kariaia te Uea bwa a na riai n nakon te rereua ni kaakaia tariia, ake a bon tia n uotaki nako bwa bure irouia Reimwanaite.

6 Ao e koro bukina bwa Aramwa e ukora mai iroun te Uea taekan te bwai arei. Ao Aramwa e oki rikaaki man taku nakoia: Nooria, Reimwanaite a na bon rinanon te karaanga are Tiitan i meangin te rereua, ma ieta n raroa ma tian te aba are Maentaai. Ao nooria, kam na kaitibo ikekei, i maeaon te karaanga are Tiitan, ao ikanne are te Uea e na kainaomataia tarimi ake anaaki bwa bure irouia Reimwanaite.

7 Ao e koro bukina bwa Tioram ma natina a rinanon te karaanga are Tiitan, ma aia taanga ni buaka, ao a mwananga nako n riaon tian Maentaai nakon te rereua are i Meang, are e mena i mainikun te karanga are Tiron.

8 Ao a roko iaoia aia taanga ni buaka Reimwanaite, ao Reimwanaite a maenako ao a kaokaki nakon te rereua; ao a anaia tariia ake a uotaki bwa bure irouia Reimwanaite, ao bon akea temanna mai irouia ae bua mai i buakoia ake a uotaki bwa bure. Ao a uotaki irouia tariia bwa a na bwaini oin abaia.

9 Ao ikai are e a toki iai aia katebwi ma teuana n tautaeka taan moti, Reimwanaite a kakioaki man te aba, ao kaain Amonia a tiringaki; eng, ni kabane aomata ake Amonaite a tiringaki, ao aia kaawa naba are e korakora, are a taku bwa te Atua e aki kona ni kamauna, ibukin korakorana.

10 Ma nooria, i nanon teuana te bong ao e a tiku n akea kaaina; ao rabwataia maate a raebitiaki irouia kamea ma maanin te rereua aika a kakang.

11 Ma e ngae n anne, i mwin boong aika a mwaiti ao a ibetaotao rabwataia maate iaon te aba ao e mmani rabunaia. Ao ngkai e a bon rang korakora te boi n te aro are aomata aki nako n taua te aba are Amonia i nanon ririki aika a mwaiti. Ao e aranaki bwa Uruakin Neooa; bwa titebo aia waaki ma Neooa, naake a tiringaki ao abaia e tiku n aki kainaki.

12 Ao Reimwanaite aki manga oki ni buaka ma Nibwaite ni karokoa aia katebwi ma aua n ririki n tautaeka taan moti iaoia ana aomata Nibwaai. Ao ikai are a tiku Nibwaite i nanon teniua te ririki n rau iaon te aba.

13 Ao Aramwa ma Amureki a mwananga n taetaekina te rairannano nakoia aomata n aia tembora, ao n aia tabo aika a tabu, ao n aia auti n nebo, are a kateaki n aron aia waaki Iutaia.

14 Ao nakoia ake a mwaiti ake a kan ongo aia taeka, a bon tibwaua ana taeka te Atua nakoia, n aki kakaokoroia aomata, n taainako.

15 Ao ngaia are a waaki Aramwa ma Amureki, n ikotaki ma ake a mwaiti ake a tia n rineaki ibukin te mwakuri, n tataekina te taeka ni kabuta te aba. Ao katean te ekaretia e kabuta te aba, n taabo nako i buakoia aomata ake Nibwaite.

16 Ao akea ae kaokoroaki i buakoia; te Uea e karuoa Tamneina iaon te aba ni kabuta ni katauraoa aia iango natia aomata, ke ni katauraoa nanoia ni butimwaea te taeka are e riai n reireiaki i buakoia n tain okina.

17 Bwa aonga n aki matoatoa ni kaitara te taeka, bwa aonga n aki kakewea, ma ni kamaunaki, bwa aonga ni butimwaea te taeka ma te kimwareirei, ma n riki bwa te mwanga are e kanimwaki nakon te mwanga ni koaua, bwa aonga n rin n ana rau te Uea ae Atuaia.

18 Ao ngkanne ibonga ake a mwananga i buakoia aomata a bon kabwarabwara ni kaaitarai kewe ni kabane, mwaamwanaki n te aba, te bakantang, te kaiangatoa, te kairiribai, taetae ni kamatauninga, te kimoa, te iraa, te urubwai, te tiriaomata, karaoan te wenenibure, ma aekan nako te kaibwabwaru, n takaruaea bwa a riai n akea baikai—

19 N tau bwai ni kabane ake a kaan roko; eng, n taua rokon natin te Atua, marakina ao matena, ao mangautiia naba maate.

20 Ao a mwaiti aomata ake a ukora te tabo are e na roko iai natin te Atua; ao a reireinaki bwa e na kaoti nakoia i mwin mangautina; ao aio are a ongoraeakinna aomata ma te kimwareirei ae korakora ao te kukurei.

21 Ao ngkanne i mwin katean te ekaretia ni kabuta te aba—i mwin tokanikaia iaon te riaboro, ana taeka te Atua e taekinaki n akea kamangaoana ni kabuta te aba, ao te Uea e karuoa ana kakabwaia iaoia aomata—ao ikai are e a toki iai aia katebwi ma aua n ririki n tautaeka taan moti iaoia ana aomata Nibwaai.