“Turai 20–26. Aramwa 36–38: ‘Taraa te Atua ma ni Maiu,’” Nakomai, Iriirai—Ibukin te Reirei n Tabati: Ana Boki Moomon 2020 (2020)
“Turai 20–26. Aramwa 36-38,” Nakomai, Iriirai—Ibukin te Reirei n Tabati: 2020
Kamataataan te tamnei iroun Joshua Dennis
Turai 20–26
Aramwa 36–38
“Taraa te Atua ma ni Maiu”
Ngkai ko katauraoi n anga reirei, uringnga bwa taraan ae iai aia taneiai ae uaana kaain te kiraati ae a karekea n Aramwa 36–38. Tera ae ko kona ni karaoia ni kateitei iaon taneiai akanne?
Korei Am Namakin
Kaoa te Tibwatibwa
Teuana te kawai ni kaungaia kaain te kiraati n tibwauai bwaai ake a reiakin ni koroboki aika tabu bon bwenauaan te kiraati inanon teniua te kurubu te mwakoro man Aramwa 36–38. Kaoiia kurubu n tatabemaniia bwa a na kakaei ao n tibwaua te kibu ae kaunganano man aia mwakoro.
Reirei te Reirei
Ti kona ni bungiaki iroun te Atua ngkana ti nanorinano ao n rairi nanora.
-
Tabeman kaain am kiraati a na bon mimi bwa e aera ngkai a aki karekea kukurein te nano n rairaiki n aron ana taneiai Aramwa. E na buokiia ngkana ko tibwaua te bwai are e reireia Unimwaane David A. Bednar: “Bwa angiina ibuakora, te rairaiki bon te waaki ae e reitinako ao tiaki ti tetaina are e riki man te taneiai ae mwaakoroiroi ke kukurein te nano” (“Rairaki nakon te Uea,” Ensign ke Riaona, Nobembwa. 2012, 107–8). E ngae ngke tabeua bwaai ibukin rairakin Aramwa e aki taneiai te aba iai, ana taneiai e reiakin reirei ake ti bane ni kainnanoi bwa ti na maiuakin n rairakira ae e reitinako. Ko kona ni kaoiia kaain te kiraati bwa a na kakaea Aramwa 36 ni kakaei reirei aikai ao ni korei ni karinani iaon te burakibooti. Tera riki ae a tia ni buokiira ni kakorakora rairakira nakon ana euangkerio Iesu Kristo?
-
Aramwa e kabongana te kibuntaeka ae “bungiaki iroun te Atua” ni kabwarabwara rairakina. Ni buokiia kaain te kiraati n oota n te iango aei, ko kona ni kaoiia bwa a na wareka kiibu akana imwina ni kaka temanna ke n ikatoatoa, n taraia bwa tera nanon ae bungiaki iroun te Atua: 1 Ioane 4:7; Motiaea 5:7; 27:25–26; ao Aramwa 5:14; 22:15. Butiia kaain te kiraati bwa a na tibwauai bwaai ake a tia n reiakin. Ngkanne a kona ni kakaea Aramwa 36, ni kakaea reken te titiraki aei. E kangaa aia namakin aomata ao ni mwakuri ngkana a bungiaki iroun te Atua? Ni buokiia kaain te kiraati n iangoia bwa a kangaa ni bungiaki iroun te Atua, ko kona n tibwaua ana taeka Beretitenti Ezra Taft Benson are e kuneaki inanon “Bwaai n Ibuobuoki Riki Tabeua.”
A kawakinaki koroboki aika tabu “bwa iai bukina ae kakannato are a kawakinaki iai.”
-
Tao kamatebwaian ana taeka Aramwa ngkai e anga rekooti aika a tabu nakon natina te mwaane ae Ereman e kona ni buokiia kaain te kiraaati n tibwauaia bwa a na kangaa n namakina mwaakan koroboki aika tabu inanon maiuia. Kaungaiia bwa a na rinanoa Aramwa 37 ni kakaei rongorongo are e anga Aramwa nakon Ereman ibukin koroboki aika tabu (taraa riki kiibu 1–19 ao 43–47). Ti na kangaa ni kaotia bwa koroboki aika tabu a tabu nakoira? Ti na kangaa, n aron Aramwa, n reireiniia aika a tangiraki iroura bwa a na “kawakin bwaai aika a tabu”? (Aramwa 37:2). A kangaa koroboki aika a tabu “ni kaota mwaakan te [Atua]” nakoira? (Aramwa 37:14).
-
Teuana te kawai n reiakina taekan te kakabwaia man warekan koroboki aika tabu bwa ti na kamatebwaia te bwai are e taekinna Aramwa n Aramwa 37 n taekan rekooti aika tabu tabeua bwaai are e onimakina iai Ereman. Ko kona ni karinani iaon te burakibooti bwaai aika tabu: ana bwaatua Nibwaai ao te bwaatua buraati (Aramwa 37:2–20), ana ka uabwi ma-aua ni bwaatua Ita ao taan raitaeka (Aramwa 37:21–37), ao te Riaona (Aramwa 37:38–47). A kona kaain te kiraati ni wareki kiibu aikai n reiakin baike e taekin Aramwa ibukin bwaai aikai n tatabeua. NI kawai raa ae a kona koroboki aika tabu ni karababai ara ururing? (taraa Aramwa 37:8). Tera ae ti reiakinna man ana taeka Aramwa ibukin te kakabwaia ni karekean koroboki aika tabu inanon maiura n te bong aei?
Tamneite aine ae wareware ni koroboki aika a tabuE reireiniira koroboki aika tabu bwa ti na kangaa n ririmwin te Atua.
“Bwa a riki bwaai aika a korakora man bwaai aika a uarereke man aki kaangaanga.”
-
N reireia kakawakin “bwaai aika uarereke man aki kaangaanga” n ana mwakuri te Atua, e anga Aramwa uoua te katooto: koroboki aika tabu ao te Riaona (taraa Aramwa 37:6–7, 41–42; taraa naba 1 Nibwaai 17:41). Imwin manga rinaoan katooto aikai, tao a kona kaain te kiraati n tibwauai katooto man oin maiuia man bwaai aika uarereke man aki kaangaanga n ana mwakuri te Atua. Ko bae n tangiria ni moantaai n reitaki ma temanna ke uoman kaain te kiraati ao ni butiaa bwa a na uota nakon te kiraati te bwai ni kakairi ae te bwai n reirei ae uarereke ao e a tia ni kariki bwaai aika a bubura inanon maiuia. Ko kona naba n tibwaua ana taeka Beretitenti Dallin H. Oaks inanon “Bwaai n Ibuobuoki Riki Tabeua.” Ni buokiia kaain te kiraati ni kaonota te reirei aei ni bon nakoia, ko kona n titiraki aekan titiraki akana imwina: Bukin tera n tabetai ti kabwaka ni karaoi bwaai aika uarereke man aki kaangaanga? Ti na kangaa ni kaungai nanora ma ara utu n tokanikai iaon te nano aei?
Ana taeka Kristo a kona ni kairiira n te bong teuana ma teuana.
-
Ni kabotaua ana taeka te Atua ma te Riaona e kona ni kaungai nanoia kaain te kiraati bwa a na nanomatoa ao n teimatoa riki ibukin warekan koroboki aika tabu. Ni kaira te kabwarabwara iaon aei, ko na bae ni kaoiia kaain te kiraati bwa a na wareka Aramwa 37:38–47 ni ikatoatoa, n tarai baika ti te arona imarenan te Riaona ao ana taeka te Atua. Ko na bae n anganiia te kakaewenako bwa a na kakaei baika ti te arona inanon kiibu n tatabeua. Ngkanne ko kona ni korea nambwan te kibu n tatabeua iaon te burakibooti ao ni butiia kaain te kiraati bwa a na korei baika ti te arona ake a kunei iraikin taian nambwa. Tera ae taekinaki n te kabotau aei bwa tera ara anga n ara kamatebwai ni koroboki aika tabu?
Tibwauan ara kakoaua ibukin Iesu Kristo e kona ni kakorakoraia naake ti tangiriia.
-
Ana taeka Aramwa nakon natina te mwaane ae Tiburon e karekea te katooto ae tamaroa bwa ti na kangaa ni kakorakoraiia ao ni kaungaiia naake ti tangiriia ni maiuakina te euangkerio. Tao kaain te kiraati a kona ni wareka te mwakoro aei ao n ataia bwa e kangaa Aramwa ni kakorakora Tiburon. Aramwa 38 e uarereke—ko kona naba n iangoia bwa ko na warekia ma kaain te kiraati. Ngkanne a kona kaain te kiraati n tibwauai rongorongo ake a kunea bwa a rangi ni bongana ke e anganiia te iango ibukin kakorakorakiia aia utu ao raoraoia.
Kaungaa te Kamatebwai n te Mweenga
Karaoa are a na mimi kaain te kiraati bwa a na kangaa n reireina temanna ae a tangiria are e a tia ni karaoa te kairua ae korakora? Kabwarabwara bwa a na kunei atatai aika a na rangi ni ibuobuoki n Aramwa 39–42.
Bwaai n Ibuobuoki Riki Tabeua
Te rairaki kang ai aron te bungiaki ae boou.
E reirei Beretitenti Ezra Taft Benson: “Ngkana ti a tia n rinanon te bitaki n nano aei, are e ti kakoroaki bukina rinanon te onimaki iroun Iesu Kristo ao rinanon kamwakuran te Tamnei ae Raoiroi iaora, n aron ae kangaa ti a riki bwa te aomata ae boou. N aron aei, te bitaki kangaa ai aron te bungiaki ae boou. Ngaa mai buakomi a tia ni karekea te taneiai n te bitaki aei. Ko a tia ni katoka te maiu ae bure, n tabetai te bure ae korakora ae kamaraki, ao rinanon kamwakuran raraaan Kristo inanon maiura, ti a manga itiaki. A na akea nanom ni kan manga okiri anuam ake mai imwaina. Boni ngkoe raoi te aomata ae koaua ae boou. Aei raoi ae nanonaki n te bitaki n nano” (“A Mighty Change of Heart,” Ensign, Okitobwa. 1989, 4).
Bwaai aika uarereke man aki kaangaanga.
E reirei Beretitenti DallinH. Oaks:
“I kauringaki mwaakan bwaai aika uarereke man aki kaangaanga n okiokin te tai are I a nooria n riannau n te ingabong aei. … Te tabo n nakonako te timanti ae maten ao e matoatoa [e] tabwenaua. Aei mwiin tabeua korakoran te ewaewaraki mai inano? Tiaki, te tabwenaua aei e riki man karauraun, uarereken rikiraken teuana te waakaa are e kaan ma te aroka. …
Titebo ma mwiin korakoran bwaai aika uarereke man aki kaangaanga n ae okioki are ti reireinaki iai ni koroboki aika tabu ao irouia burabeti aika maiu. Iangoa kamatebwain koroboki aika tabu are ti reireinaki iai ni karinna inanon maiura ni katoa bong. Ke iangoi tataro aika onoti ao tataro ni katorobubua n te utu ake a maiuakinaki ni katoa tai irouia Aomata aika a kakaonimaki. … E ngae ngke a taraa ni uarereke man aki kaangaanga mwakuri aikai, n okiokin te tai iai mwiina ae korakora n tabekakirake n te tamnei ao te rikirake. E riki aei ibukina bwa bwaai aika uarereke man aki kaangaanga a kaoa ana iraorao te Tamnei ae Raoiroi, te Tia Kakoaua are e kaotaira ao ni kairii kawaira nakon te koaua” (“Small and Simple Things,” Ensign ke Riaona, Meei 2018, 90).
Kanakoraoan Ara Anga reirei
Kaoiia taan reiakinaki n reireiia tabeman. Ngkana a kaota aia koaua kaain te kiraati, a na kona n roko ke ni kaungaa temanna kaain te kiraati n te anga are ko aki kona ni karaoia. (Taraa Reirei n ana Kawai te Tia Kamaiu, 30.)