Iesu ao Maria

Te Aine, E Aera Ko Tang? iroun Mark R. Pugh

Turai 27–Aokati 2

Aramwa 39–42

“Te Babaire ni Kakukurei ae Korakora”

N ana reirei Aramwa n Aramwa 39–42 a onrake n reirei aika koaua ao e kamataatai koaua aika kakawaki. N am tai ni kamatebwai ni mwakoro aikai, iangoia bwa a ngaa koaua aika ana rangi ni manena nakoia kaain am kiraati ao tera am anga ni buokiia bwa a na kunei koaua aikai.

Korei Am Namakin

te aikaon ibukin te tibwatibwa

Kaungaa te Tibwatibwa

Ni karekea aia tai kaain te kiraati n tibwaua aia iango ao nonoori iaon Aramwa 39–42, ko konaa ni kaoiia bwa a na rinanoi mwakoro aikai n te tai ae uarereke ao ni kakaai bwaai ake e taekin ke e karaoi Aramwa ae e ringa nanoia.

te aikaon ibukin te anga reirei

Reirei te Reirei

Aramwa 39

Te bure ni wenenibure bon te mwakuri ae e bati n ribaaki imatan te Uea.

• Tera ae ti kona n reiakinna man rongorongon Korianton n te bwai are e rinanona ma te bure ao te rairannano? Tao a konaa kaain te kiraati ni wareka Aramwa 39:1–14, tabeman a na kakaea bwa tera ae e karaoia Korianton ae e kaairua, ao tabeman a na kakaea bwa tera ae e karikia bwa e na karaoa te bure, ao tabeman a na kakaei taeka n reirei are e anganna Aramwa. N aia tai n tibwaua te bwai ae a kunea, a kona naba n tibwauaia bwa ti na kangaa n totokoa karaoan te aeka ni kairua naba anne.

• Ngkana aomata a karaoa te bure ni wenenibure, aki toki ni karekea te namakin ae akea aia kaantaninga ke te bwarannano ao a konaa n namakina ae akea bonganaia. Tera te reirei n Aramwa 39–42 ae e kaungaa nanoia kaain te kiraati n namakina te kaantaninga are e kairi nakon te rairannano? Tibwaakin ana taeka Titita Joy D. Jones inanon “Bwaai n Ibuouoki Riki Tabeua” e kona ni buokiia kaain te kiraati n ataa te kaokoro imarenan te kororaoi ao aron kakawakira imatan te Atua. (Taraa naba Lynn G. Robbins, “Ni Karokoa Itingaun Itiua,” Ensign, ke Riaona, Meei 2018, 21–21.)

• N riki bwa mwakoron am marooro, e na rangi n ibuobuoki ibukiia kaain te kiraati ni maroroakina ana kawai te Uea iaon tuan te itiaki. Kanoan am marooro e na rangi n ibuobuoki ngkana e boboto iaon reirei aika nano riki nakon ae ti korean bwaai ake a na riai ni karaoaki ke ake a na aki riai ni karaoaki. Te katooto, ko konaa ni kaoia kaain te kiraati n katebenakoi reirei are e reiakin Aramwa nakon Korianton n Aramwa 39. Irarikina, a konaa n rinanoa “Te Itiaki man te Wenenibure” inanon Ibukin Kakorakoraia Kairake ma titiraki aikai n am iango: “Ngkana ko na manga taekinii ni kakimototoa te taeka n reirei aio ma teuana te reirei, tao a na tera?” ke “Tera te reirei ae ko kunea ikai are e buokiko ni maiuakina tuan te itiaki?” A konaa naba kaain te kiraati n rinanoa te mwakoro aio n Ibukin Kakorakoraia Kairake, n noora te kakabwaia ni maiuakinan tuan te itiaki ao te rekenikai n aki kawakinan te tua aio. A kangaa reirei aika ni kaokoro ma are e reiakina te aonaaba? A kangaa reirei aikai n roota aron ara iango iaon tuan te itiaki? Ana karekea buokaia kaain am kiraati man warekan ana taeka Titita Wendy Nelson inanon “Bwaai n Ibuobuoki Riki Tabeua” n aia tai ni kaekai titiraki aikai.

• E rangi ni baiti n tabetai kakoauakina bwa ara rinerine aki rotaki iai tabeman—ao bwa ara bure a bon onoti ibukira. Tera ae reiakinna Aramwa nakon Korianton n Motiaea 39: 11-12 ibukin rotakiia tabeman man ana rinerine? Kaoiia kaain te kiraati ni iangoia bwa antai ae e na rotaki n aia rinerine are a karaoi, ae e raoiroi ao e buakaka. A konaa naba n tibwauaia bwa a kangaa aia mwakuri ao aia katooto tabeman n tia ni buokiia bwa a na rinea te eti.

Aramwa 40–42

Ana mwakuri ni kamaiu Iesu Kristo e karika te babaire ni kamaiu bwa e na uaana nakoira.

• Aramwa e reireina Korianton koaua ake ti riai naba n atai, ni ikotaki ma koaua bwa tera bukin maiura aio, te aonaaba n tamnei, te mangauti, ao te motikitaeka. Iangoia n rinea teuana ana reirei Aramwa ao anganiia kaain te kiraati uoua te miniti ni kakaea n Aramwa 40–42 (kaka temanna irouia ke n ikatoatoa) ao korei koaua ni karawatai ake a reke irouia iaon te atuu n iango aio. A kona ngkanne kaain te kiraati n tibwauai koaua i marenaia ke ma kaain te kiraati bwa tera ae a kunea. Ko konaa ni kaokioka te aeka ni waaki aei iaon tabeua atu ni iango ngakana e reke taina. E aera ngkai e rangi ni kakawaki koaua aikai iroun natin Aramwa ae Korianton bwa e na atai?

• Ana kabwarabwara Aramwa iaon aron te maiu imwiin te maiu aio e konaa n ringa aia iango kaain te kiraati ni kakawakin te nako nakon te Tia Kamaiu ao n rairi nanora man ara burei n te maiu aei. Ko konaa ni korea Raoiroi (Ae Raira Nanona) ao Buakaka (Ae Rawa n Raira Nanona) iaon te burakibooti ao kaoiia kaain te kiraati ni kakaea n Aramwa 40:11–26 ao karinanii iaon te burakibooti taeka ke kibu n taeka are e kabonganai Aramwa ni kabwarabwarai aroia te koraki ake ni kurubu aikai bwa aekakira aroia imwiin mateia. A kangaa reirei aikai n anganiira te nano ni kan rairannano? Ibukin ataakin riki te bwai ae riki n te aonaaba n tamnei, taraa 1 Betero 3:18–20; 4:6 and Reirei ao Berita aika Tabu 138:29–37.

• Tera ae e roko n aia iango kaain am kiraati ngkana a ongo te taeka ae “kaokaki” ke “te bwai ae kaokaki”? Kaoiia bwa a na kakaea n Aramwa 41 bwa e kangaa Aramwa ni kabonganai taeka aikai. Tera te bwai ae e nanona iai? Tera te bwai ae e na kaokaki nakoira? E aera ngkai e na ibuobuoki nooran ana babaire Tamara are i Karawa ae te “babaire ibukin bwaai aika kaokaki”? (kibu 2).

• Tabeman man am kiraati tao a na iai aia titiraki naba n aron are e reke n ana iango Korianton–bwa e bon raoiroi ke n riai bwa te Atua ae tatangira e na katuaiia Natina? (taraa Aramwa 42:1). Tao ko kona n titirakiniia kaain te kiraati bwa a na iangoia bwa a na kangaa ni kaeka nakon te titiraki aio ao n ukora kaekakina n Aramwa 42:7–26.

• Ngkana ko taku bwa e na raoiroi, kaain am kiraati a na karekea buokaia man kakaean te kibu n Aramwa 42 ae a na konaa ni kaotia n te korotamnei ae bebete ke te kanikinaa ae kabwarabwaraa bwa e aera ngkai ti kainnanoa ana Mwakuri ni Kamaiu te Tia Kamaiu. Tabeman kaain te kiraati a na tibwaua aia korotamnei, ao nikiraia kaain te kiraati a na kakaea te kibu are e tei ibukina. Ngkanne a na konaa ni marooro bwa tera ae a reiakinna ibukin kakawakin ana anga karea te Tia Kamaiu.

  aine a tataro

  Ti konaa ni karekea te koaua ibukin Iesu Kristo ae ara Tia Kamaiu.

te aikaon ibukin bwaai ni ibuobuoki

Bwaai n Ibuobuoki Riki Tabeua

E kakawaki tamnein temanna.

Titita Joy D. Jones e reirei:

N na taekina ae kainnanoaki n te kaokoro imarenan taeka aika uoua: kakawaki ao kororaoi. A aki titebo. Maiura n Tamnei e Kakawaki nanona n atai kakawakira n aron ataakin kakawakira iroun Tamara are i Karawa, tiaki n aron kakawakira iroun te aonaaba. Kakawakira a baireakii imwaain rokora n te aonaaba aei. ‘Ana tangira te Atua akea tiana ao e teimatoa n aki toki.’

“N te anga teuana, te kororaoi e reke rinanon te ongotaeka. Ngkana ti bure, e karako kakawakira, ma tiaki are ai bon akea bongara! Ti reitinako n rairi nanora ao ni kekeiaki n riki n ai aron Iesu ma kakawakira ae teimatoa. Ngkai e reirei Beretitenti Brigham Young: “Ae karako, te kabanea ni mangori n tamnei iaon te aba … titebo kakawakina ma te aonaaba.’ N aki tabe bwa tao tera, ti bon aki toki ni kakawaki imatan Tamara are i Karawa.” (“Value beyond Measure,” Ensign ke Riaona, Nobembwa. 2017, 14).

Ana taratara te aonaaba iaon te itangitangiri e bon aki boraoi ma ana taratara te Atua.

E taekina kaokorona Titita Wendy Nelson bwa e kangaa te aonaaba n taraa te botaki ni wenenibure—“te wenenibure n te aonaaba”—ma are e atonga bwa “te botaki imarenan te mwaane ao te aine are e katabua te Atua”:

“Te wenenibure n te aonaaba, a taraaki bwaai ni kabane a bon riai. Ma te botaki imarenan te mwaane ao te aine n are e katabuaki, e rangi n tamaroa te tararua ae karaoaki n totokoa te bwai teuana ao bwaai ni kabane—man te taetae nakon te katangitang nakon te mataku n te tamnei—are e kamatauninga te Tamnei, bon oin tamneim, ke tamnein kaainabam.

“Ngkai te wenenibure n te aonaaba bon te kaibabaru ao e kamatea te tangira, te botaki imarenan te mwaane ao te aine n are e katabuaki e karikirakea riki te tangira.

“Te wenenibure n te aonaaba e karinanoia mwaane ao aine ao rabwataia, ngkai te bootaki imarenan te mwaane ao te aine n are e katabuaki e karineia mwaane ao aine ao e anga kakawakin te rabwata bwa teuana te bwaintangira ae korakora n te maiu n rabwata.

“Te wenenibure n te aonaaba, e karekea ana namakin temanna ae e kabonganaaki, e bwainikirinaki, ao n tokina e karikia te maroaa. Ma te botaki imarenan te mwaane ao te aine n ae e katabuaki, te taanga a namakina riki te katiteuanaaki ao te tangira, ae buoka rikirakena ao ataakina.

“Te wenenibure n te aonaaba e urubwai ao ni bon tokina e kamaenakoa te reitaki. Te botaki imarenan te mwaane ao te aine n ae e katabuaki e kakorakora te mare. E boutokaa, e kamaoa, ao e kaitiaka maiuiia taanga ao aia mare. …

“Te wenenibure n te aonaaba e a riki bwa te bwai ae tangiraki karaoakina ibukina bwa e aki kakoroi mwiin taian berita. “Te bootaki imarenan te mwaane ao te aine are e katabua te Atua e rine ao e na reitinako n akea tokina irouia taanga ake a kawakina aia berita” (“Tangira ao Mare” [worldwide devotional, Jan. 8, 2017], broadcasts.ChurchofJesusChrist.org).

Kanakoraoan Ara Anga reirei

Katauraoi Imwain te Tai. “Ngkai ko iangoa aron te reirei n te euangkerio are ko reirei iaona bwa e na kakabwaiaiia kaain am kiraaki, iango ao namakin a na roko rinanon nako maium ni katoa bong—ngkai ko mwananga nako ni mwakuri, karaoi am mwakuri ni mweengam, ke ngkai ko reitaki ma am utu ao raoraom. Tai iangoia ae am katauraoi ni maiun tamneim bwa te bwai ae ko karekea tain karaoana ma bon te bwai ae ko aki toki ni kakaraoia” (Reirei n ana Kawai te Tia Kamaiu” 12).