Ibukin te Kakabwaia n te Inaomata, iraoun Scott M. Snow

Aokati 3–9

Aramwa 43–52

“Teimatoa n te Onimaki iroun Kristo”

Irarikin manga rinanoan waaki ni kakukurei ake a iangoaki ikai, ukoura oin kairam ngkai ko tataromwaaka ni kamatebwaia Aramwa 43–52 ao n iangoia bwa a na kangaa kaain te kiraati ni kunea te reirei are e reiakinaki.

Korei Am Namakin

Kaungaa te Tibwatibwa

Ni kaoiia kaain te kiraati bwa a na tibwauai bwaai ake a reiakin man Aramwa 43–52, ko kona ni butiia bwa a na kangaa ni kaeka temanna are e kangai, “I aki mataata bwa e kangaa aron kabwarabwaraakin te buaka n ana Boki Moomon bwa iai bonganana inanon maiu.”

Reirei te Reirei

Aramwa 43–52

Te buaka n ana Boki Moomon e reireiniira taekan ara buaka ni kaitaraa te buakaka.

• N aia kamatebwai i bon irouia ao n te utu n te wiiki aei, a kona kaain te kiraati ni kamanoia ni kaitaraia Reimwanaite ao aroia aroia Reimwanaite ni kaikoakiia Nibwaite. Ngkana a karaoa aei kaain te kiraati ni mweengaia, kaoiia bwa a na tibwauai bwaai ake a kunei. Ke ko kona n anganiia kaain te kiraati aia tai ni kakaei atatai aikai inanon aia tai kaain te kiraati ni kabonganai koroboki aika tabu n aron ake a kuneaki inanon te kabwarabwara n te wiiki aei inanon Nakomai, Iriirai—Ibukiia Aomata n Tatabemaniia ao Utu. Ngkai a tibwauai bwaai ake a kunei kaain te kiraati, kaungaia bwa a na kabwarabwara bwa ti na kangaa ni iriira aia katooto Nibwaite ni kamanoia ni kaitaraa te buakaka ao ti na kangaa ni kinaa ana kaikoaki Tatan n tamnei iaora.

Aramwa 46:11–22

Ngkana ti ninikoria ni kamanoa ara onimaki, ti kona ni kaungai nanoia tabeman bwa a na kakaonimaki.

• Ko na kangaa ni buokiia kaain te kiraati n iriira ana katooto Aramwa n ninikoriana ni kamanoa aia onimaki n ana euangkerio Iesu Kristo ae kaokaki? A kona kaain te kiraati ni wareka Aramwa 46:11–22 ao ni kinaa te bwai are e karaoia Moronaai ao te bwai are e reiakinna are kaungai nanoia ana aomata bwa a na kakaonimaki riki. Ko kona ni korei bwaai aikai iaon te burakibooti iaan atuun te taeka Ana katooto Moronaai. Ngkanne ko kona ni butiia kaain te kiraati bwa a na iangoa ana mwakuri Moronaai ao ni baireia tera ae ti kona ni karaoia n te bong aei ni katana ara onimaki. Ko kona ni korea aia atatai iaan atuun te taeka Ninikoria ni Kamanoa te Euangkerio n te Bong Aei. Tera koaua ao bwaai aika kakawaki are e reireiniira iai ara burabeti n te tai ae nako ao ti riai n reireia ao ni kamanoa?

• Ko na kangaa ni buokiia kaain te kiraati ni kamwakura are e karaoia Moronaai ma te buraeki n inaomata inanon maiuia? Kaoiia bwa a na wareka Aramwa 46:11–22 ao ni kinai koaua ake e reirei iai Moronaai ni boutoka. Tera koaua ao bwaai aika a kakawaki are a katuruturua taan kairiiri inanon ara tai? (Ko kona ni manga rinanoi tabeua inanon Ibukin Kakorakoraia Kairake, “Te Utu: Te Katanoata nakon te Aonaaba,” ke rongorongo n te maungatabu ae ai tibwa ngkai.) Tera kakaewenako are ti karekea ni kamanoa ara onimaki n te aonaaba n te bong aei? Tera ae ti reiakinna man ana banna ni katooto Moronaai? Anganiia kaain te kiraati aia tai ni karaoa oin aia buraeki n inaomata are e kona ni kauringiia bwa a na ninikoria ni maiu ao ni kamanoa aia onimaki.

  

  Minerva K. Teichert (1888–1976), Kamanoan aia Kaawa Nibwaite, 1935, te oera iaon te mitinaite, 36 x 48 te inti. Brigham Young University Miutiem n te Karaobwai ma Rabakauia Aomata

Aramwa 47

E kariiria ao ni mwamwanaira Tatan teutana imwin teutana.

• A na reke rakaia kaain am kiraati man kamatebwaian Aramwa 47, are e kaotia bwa e kangaa aron ana kewe Amwarakaai n ti te arona ma are e karaoia Tatan ni mwamwanaira. Ko kona ni waaki ni butiia temanna bwa e na kakimototoa n taekina te karaki are e kuneaki n Aramwa 47. N reitia ma ane e nano iai, ko kona ni kaoiia kaain te kiraati bwa a na iangoia ai aongkoa are ngaiia Amwarakaai ao Reaontaai ao karakina te rongorongo. Tera ae e karaoia Amwarakaai are e kauringiira ni bwaai are e karaoi Tatan ni kaririira ao ni mwamwanaira iai? Kaungaia kaain te kiraati bwa a na tarai kiibu aika a onoti ngkai a marooroakina te titiraki. Te taeka inanon “Bwaai n Ibuobuoki Riki Tabeua” iai inanona te katooto riki teuana bwa e kangaa Tatan ni mwamwanaira. Tera ae ti kona n anga imarenara bwa e na buokiira n ataia bwa e kangaa Tatan ni kaririira n te bong aei? Tera ae ti kona ni karaoia ibukin kamanoara?

Aramwa 48:7–17

Ngkai ti kataia ni kakaonimaki n ai aron Moronaai, ti na riki n ai aron te Tia Kamaiu.

• Te kabwarabwara n aron anuan Moronaai e kona ni kaungai nanoia kaain te kiraati n iriira ana katooto. Ko kona ni waaki man kaota tamnein miin Riaai, n aron teuana are n te kabwarabwara n te wiiki aei n Nakomai, Iriirai—Ibukiia Aomata n Tatabemaniia ao Utu. Ngkanne kaoiia kaain te kiraati bwa a na kamatebwaia Aramwa 44:3–4 ao 48:7–13 ao korea iaon te burakibooti taeka ao kibuntaeka are a kabwarabwara aron Moronaai. Kam kona ngkanne ni kaai ni wareka Aramwa 48:17 ao marooroakinna e kangaa anuan Moronaai, n aron are a koreaki ni karinanaki iaon te burakibooti, ni kariaia bwa e na tokanikai iaon ana kairoro Tatan ao n riki n ai aron Iesu Kristo. Ti na kangaa n riki n ai aron Moronaai?

Aramwa 48:7–9; 49:1–9; 50:1–6

Ti kona ni kamanoira ao ara utu ni kaitaraa teuare e buakaka.

• E na reke rakaia kaain te kiraati n ongora imarenaia ni marooroakinna bwa a na kangaa ni kamanoira ao aia utu ni kaitarai ana kamwaamwane ao ana kariiri Tatan. NI kaunga te marooro, kam kona ni kaai ni wareka Aramwa 48:7–9; 49:1–9; ao 50:1–6. Ngkai ti iangoa kainnanora n tamnei ni kaitara te bure, tera ae ti kona n reiakinna man aia konabwai Nibwaite ni kamanoia? Ti na kangaa ni katea ara bwai ni katantan n tamnei ni kamanoira ma ara utu ni kaitara te kairoro n te bure ao te buakaka? Kaungaia kaain te kiraati bwa a na tibwauai iango are a tia ni mwakuri ibukiia. Bukin tera e kakawaki bwa ti na “aki toki ni kakaraoa ara katauraoi”? (Aramwa 50:1).

Kaungaa te Kamatebwai n te Mweenga

Teuana te kawai ni kaungaia kaain te kiraati bwa a na wareka Aramwa 53–63 bon tuangakiia bwa te rongorongo ni mwakoro aikai a kona ni kaungai nanoia ao aia utu bwa a na rangi n ongotaeka riki ao ni karikirakea aia onimaki ae korakora.

Bwaai n Ibuobuoki Riki Tabeua

Mwin butimwaean kariiri aika a uarereke.

N reireia taekan anne “te bure ae matoatoa e rin inanora ngkai ti moan butimwaei kariiri aika a uarereke,” e tibwaua te karaki ae oteaki Beretitenti Spencer W. Kimball:

“[Te] kamero ao te tia bwaibwai … a mwananga rinanon tanon te rereua ngke e a kaoti naba te angibuaka. E waekoa te tia mwananga anne ni katea ana umwanrianna ao n rin inanona, e kaini kunnikai are a riki bwa katanana ni kamanoa man te angibuaka, ae kakamaaku ae moan te korakora. N te koaua ao e mena itinaniku te kamero, ao ngke e kare te ang ae moan te korakora are e a taerieri nanon matana ao bwanganbwangan bwairina n te tano e kunea bwa e aikoa kona ni kaitaraa ao n tokin te tai e a bubuti rinna inanon te umwanrianna.

“‘Akea te mwaawa bon tii ibukiu,’ e taku te tia mwananga.

“‘Ma I tii kona ni karina bwairiu bwa I aonga ni ikeike n akea te tano ae iri?’ e titiraki te kamero.

“‘Eng, tao ko kona ni karaoa anne, e kaeka te tia mwananga, ao e tii kauka teutana te kunnikai are bwain katanana ao e rin bwairin te kamero ae ananau. Ai mweengaraoira ngkai te kamero! Ma n te tai ae waekoa e a rangi ni kua te kamero ni kamarakin te tano inanon matana ao i taningana …:

“‘Te tano ae kataerieri kangaa e ikika aon atuu. I kona n tii karina atuu?’

“Riki, e rinanoa te iango anne te tia mwananga ni kariaia bwa a na akea te urubwai ae e na riki nakoina, bwa e tii kona atuun te kamero ni kaona aon te umwanrianna are e aki ngaia kabongana. Ngaia are e a karina atuuna te kamero ao e manga kukurei riki te man ae tiritiri aei—ma tii inanon te tai ae uarereke.

“‘Tii iterau aika mai imoa,’ e bubuti, ao n tokin te tai e a manga kariaia riki te tia mwananga ao n te tai ae waekoa angan ma waen te kamero ake mai imoa a rin inanon te umwanrianna. N te kabane, te waaki ni bubuti ao ni kariaia ae aekakin anne, bwabwaan te kamero, mwakoron rabwatana ake mai buki ao ni kabane a bane inanon te umwanrianna. Ma ngkai e a rangi n ribwa ibukiia uoman, ao te kamero e toubeka ni kaotinakoa te tia mwananga nakon te ang ao te angibuaka” (Teachings of Presidents of the Church: Spencer W. Kimball [2006], 106–7).

Kanakoraoan Ara Anga Reirei

Weteam e kairaki iroun te Tamnei. “Weteam n anga reirei e roko mairoun te Uea. … Ko a tia ni kamatoaki iaan aia kairiiri naake iai irouia kaain te nakoanibonga; ngaia are, iai kariaiakam nakon te kaotioti ae onoti ae ko kainnanoia bwa ko aonga n tokanikai. Kakabwaia aikai bon am bwai ngkai ko ukoukori, n teimatoa ni kakaonimaki, ao ni kataia n riki ni kororaoi” (Reirei n ana Kawai te Tia Kamaiu, 5).