« ថ្ងៃទី ២០–២៦ ខែ កក្កដា ។ អាលម៉ា ៣៦–៣៨ ៖ ‹ មើលទៅព្រះ ហើយរស់នៅ › » ចូរមកតាមខ្ញុំ—សម្រាប់សាលាថ្ងៃអាទិត្យ ៖ ព្រះគម្ពីរមរមន ឆ្នាំ ២០២០ ( ឆ្នាំ ២០២០ )

« ថ្ងៃទី ២០–២៦ ខែ កក្កដា ។ អាលម៉ា ៣៦–៣៨ » ចូរមកតាមខ្ញុំ—សម្រាប់សាលាថ្ងៃអាទិត្យ ៖ ឆ្នាំ ២០២០

រចនារូបភាពដោយ យ៉ូស្វេ ដេននីស

ថ្ងៃទី ២០–២៦ ខែ កក្កដា

អាលម៉ា ៣៦–៣៨

« មើលទៅព្រះ ហើយរស់នៅ »

នៅពេលអ្នករៀបចំខ្លួនបង្រៀន សូមចងចាំថា សិស្សអាចមានបទពិសោធន៍ដ៏មានន័យជាមួយនឹងអាលម៉ា ៣៦–៣៨ ។ តើអ្នកអាចធ្វើអ្វីខ្លះ ដើម្បីស្ថាបនាបទពិសោធន៍ទាំងនោះ ?

កត់ត្រាចំណាប់អារម្មណ៍របស់អ្នក

អញ្ជើញឲ្យចែកចាយ

វិធីមួយដើម្បីលើកទឹកចិត្តសិស្សឲ្យចែកចាយអ្វីដែលពួកគេកំពុងរៀននៅក្នុងបទគម្ពីរគឺបំបែកសិស្សជាបីក្រុម ហើយចាត់ក្រុមនីមួយៗនូវជំពូកមួយមកពី អាលម៉ា ៣៦–៣៨ ។ សូមអញ្ជើញក្រុមនីមួយៗឲ្យស្វែងរក ហើយចែកចាយខគម្ពីរដ៏បំផុសគំនិតមួយមកពីជំពូករបស់ពួកគេ ។

បង្រៀនគោលលទ្ធិ

អាលម៉ា ៣៦

យើងអាចកើតចេញពីព្រះ នៅពេលយើងមានចិត្តរាបសា ហើយប្រែចិត្ត ។

សិស្សរបស់អ្នកមួយចំនួនអាចងឿងឆ្ងល់ពីហេតុផលដែលពួកគេពុំធ្លាប់មានបទពិសោធន៍នៃការប្រែចិត្តជឿដ៏អស្ចារ្យមួយដូចជាបទពិសោធន៍របស់អាលម៉ាឡើយ ។ វាអាចជួយពួកគេ ប្រសិនបើអ្នកបានចែកចាយអ្វីដែលអែលឌើរ ដេវីឌ អេ បែដណា បានបង្រៀនថា « ចំពោះយើងភាគច្រើន ការប្រែចិត្តជឿគឺជាដំណើរការជាបន្តបន្ទាប់មួយ ហើយពុំមែនជាព្រឹត្តិការណ៍តែម្ដងដែលកើតឡើងពីបទពិសោធន៍ដ៏មានអនុភាព ឬអស្ចារ្យនោះឡើយ » ( « Converted unto the Lord » Ensign ឬ Liahona ខែ វិច្ឆិកា ឆ្នាំ ២០១២ ទំព័រ ១០៧–៨ ) ។ ទោះជារឿងមួយចំនួនអំពីបទពិសោធន៍ប្រែចិត្តជឿរបស់អាលម៉ាចម្លែកក្ដី ក៏បទពិសោធន៍របស់គាត់បង្រៀនគោលការណ៍ដែលយើងទាំងអស់ចាំបាច់ត្រូវអនុវត្តការប្រែចិត្តជាបន្តបន្ទាប់របស់យើងផ្ទាល់ដែរ ។ អ្នកអាចអញ្ជើញសិស្សឲ្យស្រាវជ្រាវ អាលម៉ា ៣៦ ដើម្បីស្វែងរកគោលការណ៍ទាំងនេះ ហើយសរសេរវានៅលើក្ដារខៀន ។ តើមានអ្វីខ្លះទៀតដែលបានជួយយើងឲ្យមានការប្រែចិត្តជឿកាន់តែខ្លាំងចំពោះដំណឹងល្អរបស់ព្រះយេស៊ូវគ្រីស្ទ ?
អាលម៉ាបានប្រើឃ្លា « កើតចេញពីព្រះ »ដើម្បីពិពណ៌នាពីការប្រែចិត្តរបស់លោក ។ ដើម្បីជួយសិស្សឲ្យយល់ពីគំនិតនេះ អ្នកអាចអញ្ជើញពួកគេឲ្យអានខគម្ពីរដូចតទៅនេះរៀងៗខ្លួន ឬជាគូ ដោយរកមើលពីអត្ថន័យនៃការកើតពីព្រះ ៖ យ៉ូហានទី ១ ៤:៧, ម៉ូសាយ ៥:៧, ២៧:២៥–២៦ និង អាលម៉ា ៥:១៤, ២២:១៥ ។ សូមឲ្យសិស្សចែកចាយពីអ្វីដែលពួកគេបានរៀន ។ បន្ទាប់មក ពួកគេអាចស្រាវជ្រាវ អាលម៉ា ៣៦ ដោយរកមើលចម្លើយចំពោះសំណួរនេះ ៖ តើមនុស្សមានអារម្មណ៍ និងសកម្មភាពបែបណានៅពេលពួកគេកើតចេញពីព្រះ ? ដើម្បីជួយសិស្សឲ្យពិចារណាពីរបៀបដែលពួកគេកំពុងកើតចេញពីព្រះ អ្នកអាចចែកចាយសេចក្ដីថ្លែងការណ៍ដោយប្រធាន អ៊ែសរ៉ា ថាហ្វ ប៊ែនសឹន ដែលមាននៅក្នុង « ធនធានបន្ថែមទាំងឡាយ » ។

អាលម៉ា ៣៧

បទគម្ពីរត្រូវបានរក្សាទុក « ប្រយោជន៍ដ៏វាងវៃ »មួយ ។

ប្រហែលការសិក្សាពាក្យសម្ដីរបស់អាលម៉ា នៅពេលលោកផ្ដល់កំណត់ត្រាពិសិដ្ឋទៅកូនប្រុសរបស់លោក ហេលេមិនអាចជួយសិស្សឲ្យចែកចាយពីអារម្មណ៍របស់ពួកគេពីអនុភាពនៃបទគម្ពីរនៅក្នុងជីវិតរបស់ពួកគេ ។ សូមលើកទឹកចិត្តពួកគេឲ្យរំឭក អាលម៉ា ៣៧ ដើម្បីស្វែងរកសារលិខិតដែលអាលម៉ាបានផ្ដល់ដល់ហេលេមិនអំពីបទគម្ពីរ ( ជាពិសេសសូមមើលខទី ១–១៩ និង ៤៣–៤៧ ) ។ តើយើងបង្ហាញថា បទគម្ពីរមានភាពពិសិដ្ឋចំពោះយើងតាមរបៀបណា ? តើយើងដូចជាអាលម៉ាបង្រៀនមនុស្សដែលយើងស្រឡាញ់ឲ្យ « រក្សាវត្ថុអស់ទាំងនេះឲ្យបានពិសិដ្ឋដូចម្តេច ? » ( អាលម៉ា ៣៧:២ ) ។ តើបទគម្ពី « បង្ហាញព្រះចេស្ដារបស់ [ ព្រះ ] »ចំពោះយើងតាមរបៀបណា ? ( អាលម៉ា ៣៧:១៤ ) ។
វិធីមួយដើម្បីរៀនអំពីពរជ័យនៃការមានបទគម្ពីរគឺការសិក្សាអ្វីដែលអាលម៉ាបានថ្លែងនៅក្នុង អាលម៉ា ៣៧ អំពីបញ្ជីពិសិដ្ឋ និងវត្ថុផ្សងទៀតដែលលោកបានផ្ដល់ឲ្យទៅហេលេមិន ។ អ្នកអាចធ្វើបញ្ជីមួយនៅលើក្ដារខៀនអំពីវត្ថុពិសិដ្ឋ ដូចជា ៖ ផ្ទាំងចំណាររបស់នីហ្វៃ និងផ្ទាំងលង្ហិន( អាលម៉ា ៣៧:២–២០ ) ផ្ទាំងចំណារចំនួនម្ភៃបួនសន្លឹករបស់អេធើរ និងប្រដាប់បកប្រែ ( អាលម៉ា ៣៧:២១–៣៧ ) និងលីអាហូណា ( អាលម៉ា ៣៧:៣៨–៤៧ ) ។ សិស្សអាចអានខគម្ពីរទាំងនេះដើម្បីរៀនពីអ្វីដែលអាលម៉ាបានបង្រៀនអំពីវត្ថុទាំងនេះ ។ តើបទគម្ពីរអាចពង្រីកការចងចាំរបស់យើងយ៉ាងដូចម្ដេច ? ( សូមមើល អាលម៉ា ៣៧:៨ ) ។ តើយើងអាចរៀនអ្វីខ្លះមកពីពាក្យសម្ដីរបស់អាលម៉ាអំពីពរជ័យនៃការមានបទគម្ពីរនៅក្នុងជីវិតរបស់យើងសព្វថ្ងៃនេះ ?

បទគម្ពីរបង្រៀនយើងពីរបៀបធ្វើតាមព្រះ ។

អាលម៉ា ៣៧:៦–៧, ៤១–៤២

« តាមរយៈកិច្ចការតូចតាច និងងាយទើបនាំឲ្យកើតកិច្ចការដ៏ធំៗបាន » ។

ដើម្បីបង្រៀនអំពីសារៈសំខាន់នៃ « កិច្ចការតូចតាច និងងាយ » នៅក្នុងកិច្ចការរបស់ព្រះ អាលម៉ាបានផ្ដល់គំរូពីរ ៖ បទគម្ពីរ និងលីអាហូណា ( សូមមើល អាលម៉ា ៣៧:៦–៧, ៤១–៤២ សូមមើលផងដែរ នីហ្វៃទី ១ ១៧:៤១ ) ។ បន្ទាប់ពីរំឭកគំរូទាំងនេះ ប្រហែលជាសិស្សអាចចែកចាយគំរូមកពីជីវិតរបស់ពួកគេផ្ទាល់អំពីកិច្ចការតូចតាច និងងាយនៅក្នុងកិច្ចការបស់ព្រះ ។ អ្នកគួរទាក់ទងទៅសិស្សម្នាក់ ឬពីរនាក់ជាមុន ហើយសុំឲ្យពួកគេយកវត្ថុតូចមួយ ហើយនាំមកកិច្ចការដ៏ធំនៅក្នុងជីវិតរបស់ពួកគេមកថ្នាក់រៀន ។ អ្នកក៏អាចចែកចាយសេចក្ដីថ្លែងការណ៍មកពីប្រធាន ដាល្លិន អេក អូក នៅក្នុង « ធនធានបន្ថែមទាំងឡាយ » ។ ដើម្បីជួយសិស្សឲ្យស្គាល់ពីគោលការណ៍នេះ អ្នកអាចសួរសំណួរដូចតទៅនេះ ៖ ហេតុអ្វីពេលខ្លះយើងពិបាកធ្វើកិច្ចការតូចតាច និងងាយ ? តើយើងអាចបំផុសគំនិតខ្លួនឯង និងក្រុមគ្រួសាររបស់យើងឲ្យយកឈ្នះនិន្នាការនេះយ៉ាងដូចម្ដេច ?

អាលម៉ា ៣៧:៣៨–៤៧

បន្ទូលរបស់ព្រះគ្រីស្ទអាចដឹកនាំយើងជាប្រចាំថ្ងៃ ។

ការប្រៀបធៀបបន្ទូលរបស់ព្រះទៅនឹងលីអាហូណាអាចបំផុសគំនិតសិស្សឲ្យកាន់តែមានភាពឧស្សាហ៍ព្យាយាម ហើយខ្ជាប់ខ្ជួនចំពោះការអានព្រះគម្ពីរ ។ ដើម្បីដឹកនាំការពិភាក្សាមួយអំពីការណ៍នេះ អ្នកអាចអញ្ជើញសិស្សឲ្យអាន អាលម៉ា ៣៧:៣៨–៤៧ ជាមួយដៃគូ ហើយរកមើលភាពស្រដៀងគ្នារវាងលីអាហូណា និងបន្ទូលរបស់ព្រះ ។ អ្នកអាចសំណូមពរឲ្យពួកគេស្វែងរកភាពស្រដៀងគ្នាមួយនៅក្នុងខគម្ពីរនីមួយៗ ។ បន្ទាប់មក អ្នកអាចសរសេរលេខខគម្ពីរនីមួយៗនៅលើក្ដារខៀន ហើយសុំឲ្យសិស្សសរសេរភាពស្រដៀងគ្នាដែលពួកគេបានរកឃើញនៅក្បែរនឹងលេខទាំងនោះ ។ តើការប្រៀបធៀបនេះផ្ដល់យោបល់អ្វីខ្លះអំពីរបៀបដែលយើងគួរចាប់ផ្ដើមការសិក្សាព្រះគម្ពីររបស់យើង ?

អាលម៉ា ៣៨

ការចែកចាយទីបន្ទាល់របស់យើងអំពីព្រះយេស៊ូវគ្រីស្ទអាចពង្រឹងដល់មនុស្សដែលយើងស្រឡាញ់ ។

បន្ទូលរបស់អាលម៉ាទៅកាន់កូនប្រុសរបស់លោក ស៊ិបឡុន ផ្ដល់គំរូដ៏ល្អមួយអំពីរបៀបពង្រឹង ហើយលើកទឹកចិត្តដល់មនុស្សដែលយើងស្រឡាញ់នៅក្នុងការរស់នៅតាមដំណឹងល្អ ។ ប្រហែលជាសិស្សអាចអានជំពូកនេះ ហើយស្គាល់ពីរបៀបដែលអាលម៉ាបានពង្រឹងដល់ស៊ិបឡុន ។អាលម៉ា ៣៨ គឺខ្លី—អ្នកថែមទាំងអាចសម្រេចចិត្តអានវាជាមួយនឹងសិស្សក៏បាន ។ បន្ទាប់មក សិស្សអាចចែកចាយវគ្គបទគម្ពីរដែលពួកគេបានរកឃើញថាមានន័យ ឬផ្ដល់គំនិតដល់ពួកគេដើម្បីពង្រឹងសមាជិកគ្រួសារ និងមិត្តភក្ដិរបស់ពួកគេផ្ទាល់ ។

លើកទឹកចិត្តឲ្យមានការរៀនសូត្រនៅឯគេហដ្ឋាន

តើសិស្សធ្លាប់ងឿងឆ្ងល់ពីរបៀបប្រឹក្សាដល់មនុស្សជាទីស្រឡាញ់ម្នាក់ដែលបានធ្វើកំហុសធ្ងន់ធ្ងរដែរឬទេ ? សូមពន្យល់ថា ពួកគេនឹងរកឃើញការយល់ដឹងដ៏មានប្រយោជន៍នៅក្នុង អាលម៉ា ៣៩–៤២ ។

ធនធានបន្ថែមទាំងឡាយ

ការប្រែចិត្តជឿគឺប្រៀបបាននឹងការកើតជាថ្មី ។

ប្រធាន អ៊ែសរ៉ា ថាហ្វ ប៊ែនសឹន បានបង្រៀនថា « នៅពេលយើងដកពិសោធន៍ការផ្លាស់ប្ដូរដ៏ធំនេះ ដែលបានកើតឡើងតែតាមរយៈសេចក្ដីជំនឿលើព្រះយេស៊ូវគ្រីស្ទ និងដំណើរការនៃព្រះវិញ្ញាណមកលើយើងប៉ុណ្ណោះ នោះវាប្រៀបដូចជាយើងបានក្លាយជាមនុស្សថ្មីម្នាក់ ។ ដូច្នេះហើយ ការផ្លាស់ប្ដូរនោះគឺប្រៀបបាននឹងការកើតជាថ្មី ។ បងប្អូនរាប់ពាន់នាក់ធ្លាប់ដកពិសោធន៍ការផ្លាស់ប្ដូរនេះ ។ បងប្អូនបានបោះបង់ជីវិតនៃអំពើបាបចោល ពេលខ្លះជាអំពើបាបដ៏ធ្ងន់ធ្ងរ ហើយតាមរយៈការអនុវត្តព្រះលោហិតនៃព្រះគ្រីស្ទនៅក្នុងជីវិតរបស់បងប្អូន នោះបងប្អូនបានជ្រះស្អាត ។ បងប្អូនគ្មានបំណងចង់ត្រឡប់ទៅរកជីវិតចាស់របស់បងប្អូនវិញឡើយ ។ បងប្អូនក្លាយជាមនុស្សថ្មីម្នាក់ ។ នេះគឺជាអ្វីដែលមានន័យថា ការផ្លាស់ប្ដូរដួងចិត្តមួយ » ( « A Mighty Change of Heart » Ensign ខែ តុលា ឆ្នាំ ១៩៨៩ ទំព័រ ៤ ) ។

កិច្ចការតូចតាច និងងាយ

ប្រធាន ដាល្លិនអេក អូក បានបង្រៀនថា

« ខ្ញុំត្រូវបានរំឭកអំពីអំណាចនៃកិច្ចការតូចតាច និងងាយ ជាច្រើនដងដោយអ្វីមួយដែលខ្ញុំបានឃើញកាលខ្ញុំដើរនាព្រឹកមួយ ។ … បេតុងនៃចិញ្ចើមផ្លូវដើរដែលក្រាស់ និងរឹងមាំនេះ [ បាន ] ប្រេះបែក ។ តើនេះគឺជាលទ្ធផលនៃទម្ងន់ដ៏ធ្ងន់ និងខ្លាំងក្លាឬ ? មិនមែនទេ ការប្រេះបែកនេះគឺបណ្តាលមកពីឬសមួយនៃដើមឈើនៅក្បែរនោះដែលវាដុះរាលដាលដោយសន្សឹមៗ និងបន្តិចម្តងៗ ។ …

« កិច្ចការតូចតាច និងងាយដែលយើងត្រូវបានបង្រៀននៅក្នុងព្រះគម្ពីរ និងបង្រៀនដោយពួកព្យាការីដែលនៅរស់ក៏មានឥទ្ធិពលខ្លាំងក្លាដូច្នោះផងដែរ ។ សូមពិចារណាអំពីការសិក្សាព្រះគម្ពីរដែលយើងត្រូវបានបង្រៀន ដើម្បីទាញវាចូលក្នុងជីវិតរស់នៅប្រចាំថ្ងៃរបស់យើង ។ ឬពិចារណាអំពីការអធិស្ឋានផ្ទាល់ខ្លួន និងការលុតជង្គង់អធិស្ឋានជាគ្រួសារថា ជាការអនុវត្តទៀងទាត់សម្រាប់ពួកបរិសុទ្ធថ្ងៃចុងក្រោយដែលស្មោះត្រង់ ។ … ទោះបីជាការអនុវត្តទាំងនេះហាក់បីដូចជាតូចតាច និងងាយក្តី ក៏យូរៗទៅវាមានលទ្ធផលក្នុងការលើកស្ទួយ និងរីកចម្រើនខាងវិញ្ញាណដ៏ខ្លាំងក្លាដែរ ។ ការណ៍នេះកើតឡើង ដោយសារកិច្ចការតូចតាច និងងាយទាំងនេះ ដែលយាងអញ្ជើញភាពជាគូកននៃព្រះវិញ្ញាណបរិសុទ្ធ ជាអង្គថ្លែងទីបន្ទាល់ដែលនឹងបភ្លឺគំនិតដល់យើង និងដឹកនាំយើងទៅរកសេចក្តីពិត ( « Small and Simple Things » Ensign ឬ Liahona ខែ ឧសភា ឆ្នាំ ២០១៨ ទំព័រ ៩០ ) ។

ការកែលម្អការបង្រៀនរបស់យើង

អញ្ជើញសិស្សឲ្យបង្រៀនគ្នាទៅវិញទៅមក ។ នៅពេលសិស្សថ្លែងទីបន្ទាល់ ឬចែកចាយការយល់ដឹង នោះពួកគេប្រហែលជាអាចជួយ ឬបំផុសគំនិតគ្នាទៅវិញទៅមកតាមរបៀបដែលអ្នកពុំអាចធ្វើបាន ។ ( សូមមើល ការបង្រៀនតាមរបៀបរបស់ព្រះអង្គសង្គ្រោះ ទំព័រ ៣០ ) ។