Ko hono akoʻi ʻe Sīsū ʻa e kakaí

Ko ha Faiako Koe ʻi he Siasi ʻo Sīsū Kalaisí

Kuo ui koe ʻe he ʻOtuá ke akoʻi ʻEne fānaú ʻi he founga ʻa e Fakamoʻuí. Naʻe vaheʻi koe ki he uiuiʻi ko ʻení ʻaki e mafai ʻo Hono lakanga fakataulaʻeiki māʻoniʻoní. Neongo kapau ʻoku ʻikai ko ha faiako taukei koe, ʻe foaki atu ʻe he Tamai Hēvaní ʻa e ivi tākiekina mo e mālohi ʻo e Laumālie Māʻoniʻoní ʻi hoʻo moʻui taau, lotu maʻu pē, mo hoʻo ako e folofolá (vakai, 2 Nīfai 33:1).

Ko kinautolu kuo fakafalala atu ke mou tokangaʻí, ko ha fānau kinautolu ʻa e Tamai Hēvaní, pea ʻokú Ne ʻafioʻi e meʻa ʻoku nau fie maʻú mo e founga lelei taha ke tokoni ai kiate kinautolú. ʻE tataki koe ʻe he ʻOtuá ʻi he lolotonga hoʻo teuteú pea mo hoʻo akoʻí, ʻo fakafou ʻi he Laumālie Māʻoniʻoní. Te Ne fakahā atu ʻa e meʻa ʻoku totonu ke ke lea ʻaki mo fakahokó (vakai, 2 Nīfai 32:5).

Ko e taumuʻa mahuʻinga ʻo e akoʻi mo e ako ʻo e ongoongoleleí ke liliu ʻa e moʻuí. Ko hoʻo taumuʻa ko e faiako, ke tokoniʻi kinautolu ʻokú ke akoʻí ke nau fai e meʻa kotoa ʻoku nau lavá ke nau ului lahi ange ki he ongoongolelei ʻo Sīsū Kalaisí–ko ha ngāue ia ʻoku ope atu ʻi he taimi kalasí. Fakaafeʻi kinautolu ʻokú ke akoʻí ke nau kau moʻoni ʻi he ako ʻo e ngaahi tefitoʻimoʻoní mo e tokāteline ʻo Sīsū Kalaisí pea mo fakahoko e meʻa ʻoku nau akó. Poupouʻi ange ke nau ʻai ʻenau ako fakafoʻituitui mo fakafāmili mavahe mei he kalasí ko e tefitoʻi maʻuʻanga tokoni ki heʻenau ako ʻa e ongoongoleleí. ʻI heʻenau ngāue ʻi he tui ʻaki ʻenau ako fakafoʻituitui mo fakafāmilí, te nau fakaafeʻi ai e Laumālié ki heʻenau moʻuí, pea ko e Laumālié ne fakahoko ʻa e ului moʻoní. Ko e meʻa kotoa pē ʻokú ke fai ko e faiako, ʻoku totonu ke ke taumuʻa ki he kaveinga toputapu ko ʻení.

Akoʻi pē ʻa e tokāteline ʻo e ongoongolelei ʻo Sīsū Kalaisi kuo fakafoki maí ʻo hangē ko ia ʻoku ʻi he folofolá pea mo e ngaahi lea ʻa e kau palōfita ʻi he ngaahi ʻaho kimui ní. ʻOku fakaafeʻi ʻe he tokāteline haohaoa—ʻoku taʻengatá, mo e moʻoni taʻefeliliuaki naʻe akoʻi ʻe he ʻOtuá mo ʻEne kau tamaioʻeikí—ʻa e Laumālié pea ʻokú ne maʻu e mālohi ke liliu e moʻuí.

Ko e ui ke faiako ko ha falala toputapu, pea ʻoku angamaheni pē ke ongoʻi lōmekina he taimi ʻe niʻihi. Kae manatuʻi naʻe uiuiʻi koe ʻe he Tamai Hēvaní, pea he ʻikai ʻaupito ke Ne liʻaki koe. Ko e ngāue ʻeni ʻa e ʻEikí, pea ʻi hoʻomou ngāue ʻaki “homou lotó, iví, ʻatamaí mo e mālohí kotoa” (TF 4:2), te Ne fakalahi homou iví, ngaahi meʻafoakí, mo e ngaahi talēnití, pea ʻe tāpuekina ʻe hoʻo fua fatongiá e moʻui ʻa kinautolu ʻokú ke akoʻí.