ko ha fāmili ʻoku nau vaʻinga

Ngaahi Fakakaukau ki hono Poupouʻi ʻo e Ako Fakatāutahá mo e Fakafāmilí

Ko ha ngaahi fakakaukau ʻeni ke tokoni atu ʻi hoʻo poupouʻi e kau mēmipa ʻo e kalasí ke nau ako e folofola ʻa e ʻOtuá ʻi ʻapi, fakafoʻituitui mo fakafāmili fakatouʻosi. Manatuʻi ʻoku ʻi ai ha niʻihi ʻi he kalasí ʻoku ʻikai ke nau lava ʻo ako folofola mo honau ngaahi fāmilí (hangē ko ʻení, ʻoku nofo toko taha ha kau mēmipa ʻe niʻihi pe ʻi ha ngaahi fāmili ʻoku ʻikai ke nau kau kotoa ki he Siasí).

• Fakaafeʻi e kau mēmipa ʻo e kalasí ke nau vahevahe ha ngaahi aʻusia ne hoko ʻi heʻenau ako e folofolá ʻi ʻapí. Hangē ko ʻení, te ke lava ʻo kole ange ke nau vahevahe ha veesi naʻe mahuʻinga kiate kinautolu pea mo fakamatalaʻi e ʻuhinga naʻe ʻuhingamālie ai ia kiate kinautolú.

• Kole ki he kau mēmipa ʻo e kalasí ke nau ʻomi ha ngaahi sīpinga ʻo e meʻa ʻoku nau fai ke ʻuhingamālie ange ai ʻa e ako folofola fakatāutahá pe fakafāmilí. (ʻE lava ke maʻu ha ngaahi fakakaukau ʻe niʻihi ʻi he Ngaahi Fakakaukau ki Hono Fakaleleiʻi ʻo e Ako Folofola Fakatāutahá mo e Fakafāmilí” mo e “Ngaahi Fakakaukau ke Fakatupulaki Hoʻomou Ako Folofola Fakafāmilí ʻi he Haʻu, ʻo Muimui ʻIate Aú—Maʻá e Fakafoʻituituí mo e Ngaahi Fāmilí.)

• Fakaafeʻi ʻa e kau mēmipa ʻo e kalasí ke nau vahevahe ʻa e meʻa ne nau fai ki he ngaahi ongo naʻa nau maʻu he lolotonga ʻenau ako fakatāutaha pe fakafāmili e folofolá.

• Fakaʻaongaʻi ha ngaahi miniti siʻi ʻo fakaʻaliʻali ki he kau mēmipa ʻo e kalasí ha niʻihi ʻo e ngaahi maʻuʻanga tokoni ʻoku ʻomi ʻe he Siasí ke tokoni ki he ako ʻe he kāingalotú ʻa e ongoongoleleí, hangē ko e ngaahi tokoni ki he ako folofolá ʻoku maʻu ʻi he scriptures.ChurchofJesusChrist.org; “Ngaahi Talanoa Mei He Folofolá” ʻi he children.ChurchofJesusChrist.org; ngaahi nāunau ki he toʻu tupú ʻi he youth.ChurchofJesusChrist.org; ngaahi tohi lēsoni ʻa e seminelí mo e ʻinisititiutí; mo e ngaahi vitiō, ngaahi hiki tepi mo e ngaahi ʻīmisi ʻoku maʻu ʻi he medialibrary.ChurchofJesusChrist.org. Ko ha lahi ʻo e ngaahi meʻá ni ʻoku toe maʻu pē ʻi he Gospel Library app.

• Fakaʻaongaʻi ha ngaahi miniti siʻi ʻo fakamatalaʻi e founga hono ngāue ʻaki ʻo e Gospel Library app ki hono ako e folofolá; kau ai e founga hono fakaʻilongaʻi e ngaahi vēsí mo hono lekooti ʻo e ngaahi ongó.

• Fakaafeʻi ha mēmipa ʻo e kalasí ʻe taha pe toe tokolahi ange ke nau fakamatalaʻi ʻa e founga ne nau akoʻi ai ha tefitoʻi moʻoni pau ʻo e ongoongoleleí ʻi honau fāmilí.