Ko ha Sīpinga ʻo e Akoʻí

Te ke maʻu ʻi he maʻuʻanga tokoni ko ʻení, ʻa e founga ʻe tolu ko ʻení ʻoku toutou ʻasi ʻi he lēsoní takitaha: fakaafeʻi e feʻinasiʻakí, akoʻi ʻe tokāteliné, mo poupouʻi e ako ʻi ʻapí. ʻI hoʻo faiakó, ʻe lava ke feliliuaki e ngaahi fokotuʻutuʻu ʻo e sīpinga ko ʻení pe faikehekehe hono fakahokohokó. Hangē ko ʻení, fakakaukau ko e feʻinasiʻakí ko ha faingamālie ia ke akoʻi ai e tokāteliné, pea ʻoku totonu ke kau ʻi hono akoʻi ʻo e tokāteliné ha ngaahi fakaafe ke feʻinasiʻaki. Ko e meʻa tatau pē, ko hono poupouʻi ʻo e ako ʻi ʻapí ʻe lava ke hoko ʻi ha fealēleaʻaki ʻa e kalasí. Fakangofua ke fai ha fanga kiʻi liliu fakaenatula ʻi he sīpinga ko ʻení, pea muimui ʻi he ngaahi ueʻi ʻa e Laumālié ke feau ʻe ngaahi fiemaʻu ʻa e kakai ʻokú ke akoʻí.

Fakaafeʻi e Feʻinasiʻakí

Fakaafeʻi e kau mēmipa ʻo e kalasí ke nau vahevahe ha ngaahi ʻilo mo ha ngaahi aʻusia ne nau maʻu ʻi he lolotonga ʻo e uike kimuʻá, ʻi heʻenau ako fakafoʻituitui mo fakafāmili e folofolá pea mo fakahoko e meʻa ne nau akó, ko ha konga ʻo e kalasi kotoa pē. Tokoni ke fakatokangaʻi ʻe he kau mēmipa ʻo e kalasí ʻoku mahuʻinga ʻenau ako fakataautaha mavahe mei he kalasí. ʻOku ʻikai ko e ako pē ʻi he Sāpaté te nau maʻu ai e ului fakafoʻituituí ka ʻi heʻenau ngaahi aʻusia fakaʻahó foki. Ko e taimi ʻoku fefanongoʻaki ai e kau mēmipa ʻo e kalasí ki he ngaahi aʻusiá, ʻoku ngalingali te nau feinga ki ha ngaahi aʻusia tatau ʻanautolu pē.

He ʻikai ke lava ʻo lau ʻe he taha kotoa ʻa e ngaahi vahé ki he lēsoní takitaha, pea naʻa mo kinautolu naʻa nau laú he ʻikai ke nau ongoʻi fiemālie ke vahevahe. Fakapapauʻi ʻoku ongoʻi ʻe he kau mēmipa kotoa ʻo e kalasí ko ha konga mahuʻinga kinautolu ʻo e kalasí, tatau ai pē pe ʻoku ʻi ai pe ʻikai ke ʻi ai haʻanau meʻa ke fakamatalaʻi.

Akoʻi e Tokāteliné

ʻOku totonu ke ke nofotaha mo e kau mēmipa hoʻo kalasí ʻi he tokāteliné—ʻa e ngaahi moʻoni taʻengata ʻo e ongoongoleleí—ʻoku maʻu ʻi he ngaahi potufolofola ʻoku vahe atú. ʻI hoʻomou aleaʻi e tokāteline mei he folofolá, ko e hā ha ngaahi veesi, foʻi lea, aʻusia, fehuʻi mo ha ngaahi maʻuʻanga tokoni kehe te ke ala vahevahe? Te ke fakaʻaongaʻi fēfē nai e ngaahi maʻuʻanga tokoni ko ʻení ke tokoniʻi e kau mēmipa ʻo e kalasí ke nau ʻilo mo mahino kiate kinautolu e ngaahi tefitoʻi moʻoni ʻo e ongoongoleleí? Te ke poupouʻi fēfē e kau mēmipa ʻo e kalasí ke nau lekooti mo ngāueʻi e ngaahi fakakaukau mo e ngaahi ongo ʻoku nau maʻú?

Poupouʻi ʻa e Ako ʻi ʻApí

ʻI he fakaʻosinga ʻo e lēsoní, fakaʻaongaʻi ha kiʻi taimi ke tomuʻa vakaiʻi e fealēleaʻaki ʻo e uike kahaʻú. Fakakaukau ki he founga ke ueʻi fakalaumālie ai e kau mēmipa ʻo e kalasí ke hokohoko atu ʻenau ako fakafoʻituitui mo fakafāmili mei he Tohi ʻa Molomoná ʻi ʻapí.