Ko Hono Fakaʻaongaʻi ʻo e Haʻu, ʻo Muimui ʻIate Au—Maʻá e Lautohi Faka–Sāpaté

Ko e Teuteu ke Faiako ʻi he Lautohi Faka-Sāpaté

ʻOku totonu ke hoko ʻa e ako fakataautaha mo fakafāmili ʻi ʻapí ko e uho ʻo e ako e ongoongoleleí. ʻOku hoko moʻoni ʻeni ʻiate koe mo e kakai ʻokú ke akoʻí. ʻI hoʻo teuteu ke faiakó, kamata ʻaki hano vahevahe hoʻo ngaahi aʻusia ʻi he folofolá. ʻE hoko hoʻo teuteu mahuʻinga tahá ʻi hoʻo fekumi ʻi he folofolá mo hoʻo feinga ke maʻu e tataki fakalaumālie ʻa e Laumālie Māʻoniʻoní.

Ko e Haʻu, ʻo Muimui ʻIate Au—Maʻá e Fakafoʻituituí mo e Ngaahi Fāmilí ko ha konga mahuʻinga ia hoʻo ako fakataautahá pea mo hoʻo teuteu ke faiakó. ʻE tokoni ia ke ke maʻu ha mahino lahi ange ki he ngaahi tefitoʻi moʻoni ʻoku maʻu ʻi he folofolá. Te ne toe ʻai foki ke ke lava ʻo ueʻi mo fakaafeʻi ʻa e kau mēmipa ʻo e kalasí ke nau fakaʻaongaʻi e Haʻu, ʻo Muimui ʻIate Aú—Maʻá e Fakafoʻituituí mo e Ngaahi Fāmilí, ke fakaleleiʻi ʻenau ako folofola fakataautaha mo fakafāmilí (ki ha tokoni ʻi hono fai ʻení, vakai, Ngaahi Fakakaukau ki hono Poupouʻi ʻo e Ako Fakatāutahá mo e Fakafāmilí” ʻi he maʻuʻanga tokoni ko ʻení). Manatuʻi ʻi hoʻo fai ʻení, te ke ongoʻingofua e ngaahi tūkunga ʻoku ʻi ai e kau mēmipa ʻo e kalasí ʻoku ʻikai faipoupoua ʻe honau ngaahi fāmilí ʻa e ako folofola fakafāmili maʻu peé mo e efiafi fakafāmili ʻi ʻapí.

Lolotonga hoʻo teuteú, te ke maʻu ha ngaahi fakakaukau mo ha ngaahi ongo fekauʻaki mo e kakai ʻokú ke akoʻí, founga ʻe tāpuekina ai kinautolu ʻe he ngaahi tefitoʻi moʻoni ʻi he folofolá, mo e founga te ke lava ai ke ueʻi kinautolu ke nau ʻilo e ngaahi tefitoʻi moʻoní ʻi heʻenau ako e folofolá ʻiate kinautolu peé.

Ngaahi Fakakaukau Fakafaiakó

ʻI hoʻo teuteu ke akoʻí, ʻe malava ke ke maʻu ha ueʻi fakalaumālie makehe ʻi haʻo fakaʻaongaʻi e ngaahi fakamatala fakafaiako ʻi he maʻuʻanga tokoni ko ʻení. ʻOua te ke pehē ko e ngaahi fakakaukau ko ʻení ko ha ngaahi fakahinohino fakahokohoko, ka ko ha ngaahi fokotuʻu ke tokoni ke ke maʻu ha ngaahi ueʻi fakalaumālie ʻiate koe pē. ʻOkú ke ʻiloʻi e kau mēmipa hoʻo kalasí, pea te ke maheni lelei ange mo kinautolu ʻi hoʻomou ako fakataha ʻi he kalasí. ʻOku ʻafioʻi foki kinautolu ʻe he ʻEikí, pea te ne fakahā kiate koe ʻa e ngaahi founga lelei taha ke tokoniʻi ai e kau mēmipa ʻo e kalasí ke nau fakatupulaki ʻi he ako ʻo e ongoongolelei ʻoku nau fakahoko ʻi ʻapí.

ʻOku ʻi ai ha ngaahi maʻuʻanga tokoni kehe lahi kiate koe ke ke fakaʻaongaʻi ʻi hoʻo teuteú, kau ai e ngaahi fakakaukau ʻi he Haʻu ʻo, Muimui ʻIate Au—Maʻá e Fakafoʻituituí mo e Ngaahi Fāmilí pea mo e ngaahi makasini ʻa e Siasí. Ke maʻu ha fakamatala lahi ange fekauʻaki mo e ngaahi meʻá ni pea mo ha ngaahi maʻuʻanga tokoni kehe, vakai ki he konga ‘oku ui ko e “Ngaahi Maʻuʻanga Tokoni Kehé” ’i he maʻuʻanga tokoni ko ‘ení.

Ko Ha Ngaahi Meʻa ke Manatuʻi

• Ko ʻapi ʻa e ātakai lelei taha ki hono ako e ongoongoleleí. ʻOku kau ʻi ho fatongia mahuʻinga ko e faiakó, hono poupouʻi, fakalotolahiʻi mo fakatupulaki hono ako e ongoongoleleí ʻi ʻapí.

• ʻE fakaloloto e ului ‘a e kau mēmipa ʻo e kalasí ki he ongoongolelei ʻo Sīsū Kalaisí ʻi he mahino kiate kinautolu e tokāteline moʻoní mo ʻenau moʻui ʻaki iá . Poupouʻi kinautolu ke nau hiki mo ngāueʻi e ngaahi ongo ʻoku nau maʻu mei he Laumālie Māʻoniʻoní.

• ʻOku mahulu atu ʻa e faiako ʻi he fakamatala ʻataʻatā peé, ka ʻoku toe mahulu lahi hake ʻi he tataki pē ha fealēleaʻakí. Ko e konga ho fatongiá ko hono poupouʻi ʻa e faʻahinga ʻoku kau maí, ʻokú ne langaki mo fakavaʻe ʻi he folofolá. ‘Oku totonu ke ke toe vahevahe foki e ngaahi ʻilo fakalaumālie naʻá ke maʻu ʻi hoʻo ako e folofolá.

• ʻOku finangalo e Tamai Hēvaní ke ke tupulaki ko ha faiako. Kuo ne ʻomai ha ngaahi maʻuʻanga tokoni lahi ke tokoni kiate kitautolu, kau ai e ngaahi fakataha alēlea ʻa e faiakó. Te mou lava ʻi he ngaahi fakataha ko ʻení ke fealēleaʻaki mo ha kau faiako kehe fekauʻaki mo ha ngaahi palopalema ʻokú ke fehangahangai mo ia. Te mou lava foki ke aleaʻi mo akoako fakahoko e ngaahi tefitoʻi moʻoni ʻo e faiako faka-Kalaisí.

• ʻOku ako lelei taha e kakaí ʻi he taimi ʻoku nau maʻu ai ha ngaahi faingamālie ke faiako. ʻI ha ngaahi taimi ʻe niʻihi, fakakaukau ke tuku ki ha mēmipa ʻo e kalasí, kau ai ʻa e toʻu tupú, ke nau akoʻi ha konga ʻo e lēsoní. Fakatefito e tuʻutuʻuni ko ʻení ʻi he ngaahi fiemaʻu mo e meʻa ʻoku malava ʻe he kau mēmipa ʻo e kalasí. Kapau te ke fakaafeʻi ha mēmipa ʻo e kalasí ke faiako, ʻai hao taimi ke ke tokoni ai kiate ia ke teuteu kei taimi ʻaki hano fakaʻaongaʻi ʻo e ngaahi fakakaukau ʻoku maʻu ʻi he maʻuʻanga tokoni ko ʻení pea mo e Haʻu, ʻo Muimui ʻIate Au—Maʻá e Fakafoʻituituí mo e Ngaahi Fāmilí. Manatuʻi ko koe ʻokú ke fatongia ʻaki ʻa e meʻa ʻoku akoʻi ʻi he kalasí ʻi hoʻo hoko ko e faiakó.

• ʻOku kau ʻi he maʻuʻanga tokoni ko ʻení ʻa e fakamatala ki he meʻa ʻoku akoʻi ʻi he uike takitaha ʻo e taʻú, tuku kehe ʻa e ongo Sāpate ʻoku fakahoko ai ʻa e konifelenisi lahí. Ko e ngaahi Sāpate ʻoku ʻikai fakahoko ai ʻa e Lautohi Faka-Sāpaté koeʻuhí ko e konifelenisi fakasiteikí pe ko ha toe ʻuhinga kehe, ʻe lava ke kei hoko atu pē hono lau ʻe he ngaahi fāmilí e Tohi ʻa Molomoná ʻi ʻapi ʻo fakatatau mo e taimi-tēpile kuo fokotuʻu atu ʻi he Haʻu, ʻo Muimui ʻIate Aú—Maʻá e Fakafoʻituituí mo e Ngaahi Fāmilí. Koeʻuhí ke pukepuke ʻetau kalasi Lautohi Faka-Sāpaté he taimi-tēpilé, te ke lava ʻo fili ke hiki fakalaka ha lēsoni pe fakatahaʻi ha ongo lēsoni. ʻE lava ke fakahoko kei taimi ʻe he palesiteni ʻo e Lautohi Faka-Sāpaté e ngaahi liliu ko ʻení ki he kau faiako Lautohi Faka-Sāpaté ke taʻofi ha puputuʻu.