Loq’laj K’iche’, xb’aan laj Greg K. Olsen

4–10 enero

Jose Smith—Resilal 1:1–26

“Kiwil jun xaqal li saqen”

Chijultiko’q aawe naq lix kawresinkil aawib’ jwal aajel ru, a’anaq xtzolb’aleb’ li loq’laj hu ut wank jo’ chanru li nakatzol. Li Musiq’ej naru nakatxtenq’a chixnawb’al k’a’ru tat-aatinaq wi’ sa’ li tzoleb’aal.

Tz’iib’a li nakak’oxla

Xkanab’ankileb’ chi wotzok

K’a’ru xe’reek’a li komon sa’ li tzoleb’aal naq yookeb’ chixtzolb’al Jose Smith—Resilal 1:1–26 chiru li xamaan a’in? Maare naru nakak’ut jun xjalam-uuch laj Jose Smith malaj xjalam-uuch li Xb’een K’utb’esink ut taak’e xb’oqb’aleb’ li komon sa’ li tzoleb’aal chixtz’iib’ankil sa’ li pizarron junjunq li na’leb’ xe’xtzol, rik’ineb’ li raqal b’ar wi’ xe’xtaw. Naru ajwi’ neke’aatinak chirix chan ru naq xk’i lix nawom xch’ooleb’ chirix laj Jose Smith ut chirix lix k’anjel naq yookeb’ chi tzolok chirix a’an chiru li xamaan.

Xk’utb’al li tzolʼlebʼ

Jose Smith—Resilal 1:5–18

Wi nokopatz’ok rik’in paab’aal, li Dios tixsumeheb’ li qatij.

• Maare eb’ li komon sa’ li tzoleb’aal te’reek’a li ratawom laj Jose re xsik’b’al li yaal sa’ jun ruchich’och’ b’ar wi’ neke’k’utman naab’al li na’leb’ chi jalinb’il ru. Chan ru naq juntaq’eet li sachok ch’oolej wan sa’ li qakutankil rik’in li kixnumsi chaq a’an? Re xtenq’ankileb’ li komon sa’ li tzoleb’aal chirilb’al chan ru naru naqataw xsumenkileb’ li qapatz’om, naru nakakanab’eb’ chixtz’iib’ankil sa’ li pizarron jalan jalanq chan ru naq eb’ li kristiaan neke’xsik’ li yaal. Chirix a’an naru te’ril ru wi’chik Jose Smith—Resilal 1:5–18 ut te’xtiq ru lix tusulal rik’in li k’a’ru kixb’aanu laj Jose Smith re xtawb’al xsumenkileb’ lix patz’om.

• Li komon sa’ li tzoleb’aal naru te’xwotz chan ru neke’xtaaqe lix b’aanuhom laj Jose Smith sa’ xsik’b’al li yaal ut chan ru naq neke’sumeek xb’aan li Dios. Li raatin li Awa’b’ej Russell M. Nelson natawman sa’ “Xkomon chik li k’anjeleb’aal” naxk’ut junjunq na’leb’ re chan ru naru naqataw li yaal rik’in li Dios.

  

  Li tijok nokoxkanab’ chi aatinak rik’in li Dios.

Jose Smith—Resilal 1: 15–20

Laj Jose Smith kiril li Dios Yuwa’b’ej ut li Jesukristo, li Ralal.

• Li Xb’een K’utb’esink kixk’utb’esi naab’aleb’ li yaal chirix li Dios li neke’xjal ru li neke’xpaab’ naab’al li kristiaan sa’ lix kutankil laj Jose. Eb’ li komon sa’ li tzoleb’aal naru te’ril ru Jose Smith—Resilal 1:15–20 ut te’xk’e reetal k’a’ruhaq xe’xtzol chirix li Dios. K’a’ut naq aajel ru xnawb’aleb’ li yaalalil a’in chirix li Dios?

• Wi ta laj Jose Smith taak’ulunq sa’ li tzoleb’aal, k’a’ raj ru taqapatz’ re chirix li k’a’ru kixnumsi? Li video “Pide a Dios: La Primera Visión de José Smith” (ChurchofJesusChrist.org) naru naxk’e xna’leb’eb’ li komon sa’ li tzoleb’aal chirix li Xb’een K’utb’esink re laj Jose Smith (chi’ilmanq ajwi’ “Xkomon chik li k’anjeleb’aal”). Maare naru te’xtz’il rix chan raj ru te’xtz’aqob’resi jun li ch’ol aatin jo’ a’in: “Sa’ xk’ab’a’ naq li Xb’een K’utb’esink kik’ulman, ninnaw naq …” K’a’ruheb’ li osob’tesihom qak’ulum sa’ li qayu’am sa’ xk’ab’a’ li Xb’een K’utb’esink?

• Re xtz’aqob’resinkil ru li aatinak, eb’ li komon sa’ li tzoleb’aal naru te’ril ru malaj te’xb’icha “Xb’een xtij laj Jose Smith” (Eb’ li B’ich, 15). K’a’ru nokoxtenq’a chixtawb’al ru ut chireek’ankil li b’ich a’in chirix li Xb’een K’utb’esink? Maare junjunqeb’ li komon sa’ li tzoleb’aal naru te’aatinaq chirix chan ru naq xe’wulak chixnawb’al xjuneseb’ rib’ naq laj Jose tz’aqal kiril li Dios Yuwa’b’ej ut li Jesukristo sa’ li loq’laj k’iche’. Malaj ut, naru taak’e xb’oqb’aleb’ li misioneer (malaj junaq kristiaan toje’ xq’aj chaq sa’ li mision) re te’wulaq sa’ li tzoleb’aal ut te’aatinaq chirix chan ru naq li Xb’een K’utb’esink naxtoch’eb’ xyu’am li kristiaan neke’xtzoleb’.

Jose Smith—Resilal 1:21–26

Naru nokowan chi tiik rik’in li naqanaw, us ta ink’a’ nokohe’xk’ulub’a li qas qiitz’in.

• Eb’ li komon sa’ li tzoleb’aal naru te’xk’e reetal li kixk’ul laj Jose Smith naq ki’ok chixseraq’inkil reheb’ jalan chik kristiaan chirix li k’utb’esink kixk’ul (chi’ilmanq Jose Smith—Resilal 1:21–26). Maare naru te’xwotzeb’ li raqal li neke’tenq’an reheb’ naq lix paab’aaleb’ ink’a’ neke’k’ulub’aak xb’aaneb’ li ras riitz’in.

• Wi nakanaweb’ ru junjunqeb’ li komon sa’ li teep xe’xnumsi ch’a’ajkilal xb’aan naq komoneb’ sa’ li Iglees, k’oxla xk’eeb’al xb’oqb’aleb’ chi wulak sa’ li tzoleb’aal chi kawresinb’ileb’ re aatinak chirix chan ru naq xe’wan chi kaw sa’ lix paab’aaleb’. K’a’ru naqatzol rik’in li kixb’aanu laj Jose Smith sa’ Jose Smith—Resilal 1:21–26?

Xkomon chik li k’anjeleb’aal

Taaqe lix b’aanuhom laj Jose.

Li Awa’b’ej Russell M. Nelson kixk’ut:

“Li Profeet aj Jose Smith xkanab’ jun li qab’e choq’ re xtuqub’ankileb’ li qapatz’om. Jo’ chanru li raatin laj Santiago, naq naru taqapatz’ li qana’leb’ rik’in li Dios [chi’ilmanq Santiago 1:5], li ch’ajom aj Jose xk’am chaq lix patz’om toj chiru li Dios. Kixsik’ li k’utb’esinb’il na’leb’, ut li sik’ok kixb’aanu kixte lix k’ojlajik li evangelio anajwan.

“Chi jo’kan ajwi’, k’a’ru tixte choq’ aawe li sik’ok taab’aanu? B’ar wan li na’leb’ li toj maak’a’ aawe? K’a’ru li taawaj chi anchal aach’ool xtawb’al ru? B’aanu li kixb’aanu li Profeet aj Jose. Taw jun li na’ajej b’ar wi’ naru tatxik chi kok’ aj xsa’. Tuulanob’resi aawib’ chiru li Dios. Hoy chixjunil laa week’ahom chiru li Dios. Sik’ ru a’an re aasumenkil ut re xk’ojob’ankil aach’ool” (“Li k’utb’esinb’il na’leb’ choq’ re li Iglees ut choq’ re qayu’am,” Jolomil ch’utub’aj-ib’ re abril 2018).

Li Xb’een K’utb’esink re laj Jose Smith.

Re rilb’al ru jun xch’olob’ankil li Xb’een K’utb’esink li isinb’il chaq sa’ k’iila paay ru xseraq’ihom laj Jose Smith, chi’ilmanq Santos, 1:14–16.

Xchaab’ilob’resinkil li qak’utum

Sik’ laa musiq’ankil aajunes. Maawileb’ li tusleb’ aatin a’in jo’ li na’leb’ tento taataaqe naq tatk’utuq. Oksiheb’ b’an re xk’oxlankil xkomon na’leb’ ut re xk’ulb’al aamusiq’ankil naq yooqat chi k’oxlak chirix li tzol’leb’ li neke’tawman sa’eb’ li loq’laj hu ut li rajomeb’ ru li kristiaan nakatzoleb’.