Xq’ehil li q’olok sa’ Francia, xb’aan laj James Taylor Harwood

18–24 enero

Tzol’leb’ ut Sumwank 3–5

“Lin k’anjel taaxik chi uub’ej”

Wi nakatzol Tzol’leb’ ut Sumwank 3–5 naq maji’ nakawileb’ li na’leb’ re li tusleb’ aatin a’in, naru nakak’ul xb’eresihom li Santil Musiq’ej. Li tusleb’ aatin re li xamaan a’in sa’ Kim, Taaqehin—Choq’ reheb’ li komon ut li junkab’al naru nakatxtenq’a chixtawb’al ru li k’a’ru yoo chaq chi k’ulmank, li ke’chal wi’ chaq li k’utb’esinb’il na’leb’ tz’iib’anb’ileb’ sa’eb’ li tasal a’in.

Tz’iib’a li nakak’oxla

Xkanab’ankileb’ chi wotzok

K’e junjunq k’asal reheb’ li komon sa’ li tzoleb’aal re naq te’ril wi’chik ruheb’ li raqal reheb’ li loq’laj hu xe’ril chaq ru sa’ kab’l ut te’xtaw jun li wan xyaalal choq’ reheb’. Chirix a’an kanab’eb’ chixwotz’bal rik’in junaq chik li kristiaan sa’ li tzoleb’aal k’a’ru xe’xtzol.

Xk’utb’al li tzolʼlebʼ

Tzol’leb’ ut Sumwank 3:1–15

Tento taqakanab’ qib’ sa’ ruq’ li Dios sa’ xna’aj xxuwankil ru li winq.

• Jo’ laj Jose Smith, chiqajunilo wan k’a’ru naqanumsi b’ar wi’ naqeek’a naq minb’il qu xb’aaneb’ jalan chik kristiaan chixb’aanunkil k’a’ruhaq naqanaw naq moko us ta. K’a’ruheb’ li yaal neke’qatzol sa’ Tzol’leb’ ut Sumwank 3:1–15 li naru nokohe’xtenq’a chi wank chi tiik chiru li Dios sa’eb’ li hoonal a’an?

• Laj Jose Smith tento naq kiq’use’ xb’aan naq kixxuwa li winq mas wi’chik chiru li Dios, a’ut tento ajwi’ naq kiwaklesiik xch’ool. Kanab’eb’ li komon sa’ li tzoleb’aal chixsik’b’al sa’ li tasal 3 chan ru naq li Qaawa’ kixtij ut kixwaklesi xch’ool laj Jose. Qayehaq, naru te’xtz’iib’a sa’ li pizarron jun xtusulaleb’ li ch’ol aatin wankeb’ sa’ li raqal 1–15 li wankeb’ wi’ lix ch’iilahom li Qaawa’ ut eb’ li ch’ol wan wi’ li aatin li kixwaklesi wi’ xch’ool re naq tixjal xk’a’uxl ut taawanq raj chi tiik. K’a’ru naxk’ut chiqu lix numsihom laj Jose chirix chan ru naq li Kolonel nokoxtenq’a chixq’axb’aleb’ ru li qasachik?

Tzol’leb’ ut Sumwank 4

Li Qaawa’ naxpatz’ qe naq took’anjelaq chiru a’an chi anchal qach’ool.

• Eb’ lix chaab’ilaleb’ lix moos li Qaawa’ neke’yeeman sa’ Tzol’leb’ ut Sumwank 4:5–6 a’aneb’ ajwi’ xchaab’ilal li Jesukristo. Re xtenq’ankileb’ li komon sa’ li tzoleb’aal chixtawb’al xkomon xna’leb’, naru taak’e xb’oqb’aleb’ chixsik’b’al ru jun reheb’ li chaab’ilal ut te’xsik’ k’a’ru naraj naxye malaj xkomoneb’ chik li raqal reheb’ li loq’laj hu li neke’tenq’ank reheb’ chixtawb’al ru chi us li chaab’ilal a’an (chi’ilmanq, jo’ eetalil, li raatin li Hermana Elaine S. Dalton sa “Xkomon chik li k’anjeleb’aal”). Naru taapatz’ reheb’ junjunq li kristiaan naq te’xwotz li k’a’ru xe’xtaw. Naru ajwi’ te’xwotz k’a’ut naq li chaab’ilal xe’xsik’ ru aajel ru re k’anjelak sa’ lix awa’b’ejihom li Dios. Chan ru naru naqachaab’ilob’resiheb’ chi us li chaab’ilaleb’ a’an? (chi’ilmanq li raqal 7).

• Tzol’leb’ ut Sumwank 4 kik’ehe’ choq’ re laj Jose Smith, yuwa’b’ej, li kiraj xnawb’al chan ru naru natenq’an sa’ lix k’anjel li Qaawa’. Li tasal a’in naru ajwi’ nak’anjelak choq’ re anihaq qe laa’o li wan ratawom chi k’anjelak chiru li Qaawa’. Jun na’leb’ chirix chan ru xtzolb’al li tasal a’in, a’an naq eb’ li komon sa’ li tzoleb’aal naru te’xjunaji rib’ sa’ kok’ ch’uut ut te’xtz’iib’a jun xch’olob’ankil xk’anjeleb’ lix moos li Dios, rik’in roksinkil li tasal 4 jo’ eetalil. Chan ru naq jalaneb’ li chaab’ilal a’an rik’ineb’ li re jalan chi trab’aaj? K’a’ut naq aajeleb’ ru li chaab’ilal a’an re xb’aanunkil lix k’anjel li Dios? Li raatin li Elder David A. Bednar li natawman sa’ “Xkomon chik li k’anjeleb’aal” naru naxtenq’aheb’ li komon sa’ li tzoleb’aal chixtawb’al ru lix aajelil ru xk’iiresinkileb’ li chaab’ilal a’an.

Tzol’leb’ ut Sumwank 5

Li nawom ch’oolej chirix li yaal nachal choq’ reheb’ li ani tuulaneb’ ut aj paab’aneleb’.

• Wi eb’ li perel ch’iich’ oor te’k’utmanq raj re naq te’ril li ruchich’och’, ma te’q’unb’esiiq raj xch’ool chixjunileb’ chirix lix yaalalil lix Hu laj Mormon? K’a’ut naq hehe’ malaj k’a’ut naq ink’a’? (chi’ilmanq Tzol’leb’ ut Sumwank 5:7). Maare te’ruuq raj li komon sa’ li tzoleb’aal chixtz’ilb’al rix li tasal 5 re xsik’b’aleb’ li na’leb’ li naru neke’tenq’ank reheb’ chixsumenkil anihaq li tixpatz’ reetalil naq lix hu laj Mormon tz’aqal yaal. K’a’ru kixk’ut li Qaawa’ chiru laj Jose Smith ut laj Martin Harris li naru nokoxtenq’a chixtawb’al jun xnawom qach’ool chirix xyaalalil li evangelio?

  

  Laj Martin Harris, xb’aan laj Lewis A. Ramsey

Xkomon chik li k’anjeleb’aal

Li saq ruhil na’leb’ naraj naxye kawilal.

Li Hermana Elaine S. Dalton kixk’e xch’olob’ankil li saq ruhil na’leb’: “Li saq ruhil na’leb’ a’an jun aatin ink’a’ mas naqab’i sa’ qayanq anajwan, a’b’an nachal chaq sa’ li aatin Latin virtus li naraj naxye kawilal. Eb’ li ixq ut eb’ li winq saqeb’ ru xna’leb’ wankeb’ xk’ulub’ejil ut xkawilaleb’. Eb’ a’an kaweb’ xch’ool xb’aan naq k’ulub’ejeb’ re te’xk’ul ut te’b’eresiiq xb’aan li Santil Musiq’ej” (“El regreso a la virtud”, Liahona, noviembre 2008, 79).

Wulak chi wank jo’ jun misioneer.

Li Elder David A. Bednar kixye: “Li b’e re wulak jo’ misioneer moko naraj ta ru naq jun li saaj winq taaxik sa’ li eskweel rik’in xsaqi kamiis ut xkorb’aat [malaj naq li saaj ixq tixk’am lix vestiiy] rajlal kutan malaj naq tixtaaqe lix tusulal ru wank jo’ misioneer jo’ lix hooril li wark malaj xhooril li wakliik. … A’b’an naru naxnimob’resi laa wajom re k’anjelak chiru li Dios [chi’ilmanq Tzol’leb’ ut Sumwank 4:3] ut naru nakatikib’ k’oxlak jo’ neke’k’oxlak li misioneer, naru nakawil ruheb’ li hu neke’ril ru li misioneer, naru nakattijok jo’ neke’tijok li misioneer, ut naru nakaweek’a li neke’reek’a li misioneer. Naru nakat-el chiru li ink’a’ us re li ruchich’och’ li nanajtob’resink re li Santil Musiq’ej, ut naru nakanimob’resi xkawilal aach’ool rik’in xk’eeb’aleb’ reetal li musiq’ejil hasb’ ut xk’ulub’ankileb’ a’an” (“Llegar a ser misioneros”, Liahona, noviembre 2005, 46).

Xchaab’ilob’resinkil li qak’utum

Oksiheb’ li patz’om neke’k’amok chi aatinak. Eb’ li patz’om naab’al xsumenkil neke’raj naxb’oqeb’ li komon chi sumenk jo’ chanru neke’xk’oxla, neke’reek’a, ut li neke’xnumsi a’an. Qayehaq, naru nakapatz’, “Chan ru nekek’e reetal naq li Dios yoo cheraatinankil?” (Chi’ilmanq Li k’utuk jo’ li Kolonel, 33).