A’an kinixb’oq rik’in ink’ab’a’, xb’aan laj Michael Malm

11–17 enero

Tzol’leb’ ut Sumwank 2; Jose Smith—Resilal 1:27–65

“Lix ch’ooleb’ li alal k’ajolb’ej te’sutq’iiq rik’ineb’ lix yuwa’ ”

Naq maji’ nakawileb’ li na’leb’ sa’ li tusleb’ aatin a’in, tzol Tzol’leb’ ut Sumwank 2 ut Jose Smith—Resilal 1:27–65, ut tz’iib’a li musiq’ejil na’leb’ nakak’ul.

Tz’iib’a li nakak’oxla

Xkanab’ankileb’ chi wotzok

Re xwaklesinkil xch’ooleb’ li komon sa’ li tzoleb’aal chixwotzb’al li neke’xk’oxla ut li k’a’ru xe’xnumsi naq xe’xtzoleb’ li raqal a’in sa’eb’ li loq’laj hu, naru nakapatz’ reheb’ naq te’xwotz junaq raqal li xk’ehok reheb’ chi k’oxlak jo’ ink’a’ neke’xb’aanu junelik. K’a’ru xwulak chiruheb’ sa’ li raqal a’an?

Xk’utb’al li tzolʼlebʼ

Jose Smith—Resilal 1:27–65

Laj Jose Smith kib’oqe’ xb’aan li Dios re naq tixk’e chi uxmank lix k’anjel.

• Ma taatenq’aaq raj laa tzoleb’aal rik’in rilb’al wi’chik ru li seraq’ natawman sa’ Jose Smith—Resilal 1:27–65? Naru taakanab’ junaq li komon re li tzoleb’aal chixk’osb’al ru, malaj ut eb’ li komon sa’ li tzoleb’aal naru te’xwotz li seraq’ chirib’ileb’ rib’ sa’ ka’kab’il malaj sa’ kok’ ch’uut. Waklesi xch’ooleb’ chixseraq’inkil chixjunil li najultiko’ reheb’. Chan ru naq li seraq’ a’in naxkawob’resi lix nawom qach’ool chirix lix choxahil b’oqb’il k’anjel laj Jose Smith? K’a’ru li na’leb’ naqatzol sa’ li seraq’ a’in chirix chan ru naq li Dios naxb’aanu lix k’anjel?

• K’oxla xk’utb’aleb’ k’a’aq re ru malaj jalam-uuch li wankeb’ rilom rik’in li k’anjel kib’oqe’ laj Jose Smith chixb’aanunkil, jo’ jun lix Hu laj Mormon malaj xjalam-uuch jun li santil ochoch. Eb’ li komon sa’ li tzoleb’aal naru te’xsik’ junjunq raqal sa’ Jose Smith—Resilal 1:33–42 li neke’aatinak chirix lix k’anjel li Profeet. Chan ru naq juntaq’eet li k’anjel kixk’e li Dios re laj Jose Smith rik’in li naxk’e qe laa’o? K’a’ru neke’xk’ut chiqu li yo’yookil profeet chirix li k’anjel a’an?

Tzol’leb’ ut Sumwank 2

Laj Elias li profeet kik’ulun re xk’eeb’al chi sutq’iik li qach’ool rik’ineb’ li qaxe’ qatoon.

• Ma taatenq’aaq raj li tzoleb’aal xb’aan li aatinak chirix ani laj Elias ut chirix li wankilal re tz’apok sa’ junajil li kixk’ojob’ wi’chik? Eb’ li komon sa’ li tzoleb’aal naru te’ril ru resil laj Elias sa’ li K’utul Raqal reheb’ li Loq’laj Hu malaj naru te’ril junaq seraq’ chirix lix yu’am (chi’ilmanq 1 Reyes 17–18). K’a’ru naxtz’aqob’resi li esil a’in chirix li naqataw ru sa’ Tzol’leb’ ut Sumwank 2? Naru ajwi’ tat-aatinaq chirix k’a’ru naraj naxye xtz’apb’al k’a’ruhaq. Maare naru taawoksiheb’ junjunq k’a’aq re ru, jo’ jun li laat re li tzakemq, jun li boolx re k’uulank, malaj jun li juch’ li naxk’e xwankil jun li hu. Chan ru naq eb’ li k’a’aq re ru a’in naru nokohe’xtenq’a chixtawb’al ru k’a’ru naraj naxye xtz’apb’aleb’ li junkab’al sa’ junajil? Chan ru naq li wankilal a’an natenq’an chixtz’aqob’resinkil ru li rajom xyo’ob’tesinkil li ruchich’och’? (chi’ilmanq Tzol’leb’ ut Sumwank 138:47–48 ut li raatin li Awa’b’ej Rusell M. Nelson sa’ “Xkomon chik li k’anjeleb’aal”). Re xtenq’ankileb’ li komon sa’ li tzoleb’aal chirilb’al chan ru naq kitz’aqlok ru li profeetil aatin natawman sa’ Tzol’leb’ ut Sumwank 2, naru tex’aatinaq chirix Tzol’leb’ ut Sumwank 110:13–16.

• Maare li tzolok chirix “li k’a’ru yeechi’inb’il reheb’ li yuwa’b’ej” (Tzol’leb’ ut Sumwank 2:2) naru naxtenq’aheb’ li komon nakatzoleb’ chixtawb’al ru lix wankilal li tijonelil kitaqlaak chaq chixk’ojob’ankil wi’chik laj Elias. Aniheb’ “li yuwa’b’ej”? (chi’ilmanq Tzol’leb’ ut Sumwank 27:9–10). K’a’ru li yeechi’ihom kixk’e li Qaawa’ re laj Abraham, laj Isaac, ut laj Jakob? (chi’ilmanq Genesis 17:1–8; 22:16–18; 26:1–5, 24; 28:11–15; Abraham 2:8–11). K’a’ru naraj naxye “rawb’aleb’ ” li yeechi’ihom a’an sa’ li qaam? Chan ru naq lix b’aanunkil a’an nokoxtenq’a chixsutq’isinkil li qaam rik’ineb’ li qaxe’ qatoon?

Santil Ochoch re Palmyra Nueva York

• Re xwaklesinkil xch’ooleb’ li komon re li tzoleb’aal chixsutq’isinkil li raameb’ rik’ineb’ lix xe’ xtooneb’, naru nakak’e xb’oqb’aleb’ junjunq reheb’ a’an naq te’xjolomi li aatinak chirix li na’leb’ a’an. K’oxla xk’eeb’al xb’oqb’al li consultor re li santil ochoch ut li resilal li junkab’al sa’ li teep. Re xtikib’ankil, naru taawil ru Tzol’leb’ ut Sumwank 2:2–3 ut taak’e xb’oqb’aleb’ li jolominel re li ch’uut re te’xwotz lix numsihomeb’ b’ar wi’ ke’sutq’isiik li raam rik’ineb’ lix xe’ xtooneb’. K’a’ru kik’ulman sa’ lix yu’ameb’ li ki’ajsin re li rajomeb’ re sik’ok chirix li resilal li junkab’al? K’a’ru li na’leb’ naru te’xk’e re xtenq’ankileb’ xkomoneb’ li komon sa’ li tzoleb’aal re naq te’tz’aqonq sa’ li k’anjel re li resilal li junkab’al ut li k’anjel sa’ li santil ochoch? Li raatin li Awa’b’ej Dallin H. Oaks natawman sa’ “Xkomon chik li k’anjeleb’aal” ut eb’ li video “Las bendiciones prometidas de la historia familiar” ut “Si ponemos a Dios primero” (ChurchofJesusChrist.org) naru ajwi’ neke’tenq’an chixwaklesinkil xch’ooleb’ li komon sa’ li tzoleb’aal. Jo’kan ajwi’, naru taak’e xb’oqb’aleb’ li komon chi ok sa’ FamilySearch.org re xsik’b’aleb’ xna’leb’.

Xkomon chik li k’anjeleb’aal

Li rajb’al li yo’ob’tesink.

Li Awa’b’ej Russell M. Nelson kixk’ut:

“Li junelik yu’am, li k’eeb’il chi uxmank sa’ xk’ab’a’ lix tojb’al rix li maak, a’an tz’aqal xtaqenaqil ajom li yo’ob’tesink. Re xch’olob’ankil li aatin a’an chi junpak’al chik xyaalalil, naru taqaye naq wi ta eb’ li junkab’al ink’a’ te’tz’ape’q sa’ junajil sa’eb’ li santil ochoch, chixjunil li ruchich’och’ taasachmanq raj chi junajwa.

“Li rajomeb’ li yo’ob’tesink, li t’ane’k ut lix tojb’al rix li maak neke’xjayali rib’ sa’eb’ li santil k’anjel neke’b’aanuman sa’eb’ li santil ochoch re Lix Iglees li Jesukristo reheb’ laj Santil Paab’anel sa’ Roso’jikeb’ li Kutan” (“La Expiación,” Liahona, enero 1997, 39). Chi’ilmanq ajwi’ Moises 1:39.

Chiqajunil naru naqab’aanu k’a’ruhaq.

Li Awa’b’ej Dallin H. Oaks kixk’ut: “Sa’ li k’anjel re xkolb’aleb’ li kamenaq jwal naab’al li k’anjel tento te’b’aanumanq. … Tento taqak’e reetal naq ink’a’ taqamin ru anihaq chixb’aanunkil chixjunil, taqawaklesi b’an xch’ool chixjunil chixb’aanunkil k’a’ruhaq” (“Con prudencia y orden”, Liahona, diciembre 1989, 20).

Xchaab’ilob’resinkil li qak’utum

Kanab’eb’ chi tz’aqonk li ani ink’a’ xe’tzolok sa’eb’ li loq’laj hu sa’ kab’l. K’e reetal naq chixjunileb’ li komon sa’ li tzoleb’aal sa te’wanq re tz’aqonk sa’ li aatinak, jo’eb’ ajwi’ li ani ink’a’ xe’tzolok sa’ kab’l.