« ថ្ងៃទី ៤–១០ ខែ មករា ។ យ៉ូសែប ស្ម៊ីធ—ប្រវត្តិ ១:១–២៦ ៖ ‹ ខ្ញុំបានឃើញបង្គោលពន្លឺមួយ › » ចូរមកតាមខ្ញុំ—សម្រាប់សាលាថ្ងៃអាទិត្យ ៖ គោលលទ្ធិ និង សេចក្តីសញ្ញា ២០២១ ( ២០២០ )

« ថ្ងៃទី ៤–១០ ខែ មករា ។ យ៉ូសែប ស្ម៊ីធ—ប្រវត្តិ ១:១–២៦ » ចូរមកតាមខ្ញុំ—សម្រាប់សាលាថ្ងៃអាទិត្យ ៖ គោលលទ្ធិ និង សេចក្តីសញ្ញា ២០២១

ព្រៃពិសិដ្ឋ ដោយ ហ្គ្រេក ខេ អុលសិន

ថ្ងៃទី ៤–១០ ខែ មករា

យ៉ូសែប ស្ម៊ីធ—ប្រវត្តិ ១:១–២៦

« ខ្ញុំបានឃើញបង្គោលពន្លឺមួយ »

សូមចងចាំថា ការរៀបចំដ៏សំខាន់បំផុតរបស់អ្នកនឹងផ្ដោតលើការសិក្សាបទគម្ពីរ និងការរស់នៅតាមអ្វីដែលអ្នករៀន ។ ព្រះវិញ្ញាណអាចជួយអ្នកដឹងពីអ្វីដែលអ្នកត្រូវផ្ដោតនៅក្នុងថ្នាក់ ។

កត់ត្រាចំណាប់អារម្មណ៍របស់អ្នក

អញ្ជើញឲ្យចែកចាយ

តើសិស្សទទួលបានការយល់ដឹងអ្វីខ្លះ នៅពេលពួកគេសិក្សា យ៉ូសែប ស្ម៊ីធ—ប្រវត្តិ ១:១–២៦ សប្ដាហ៍នេះ ? ប្រហែលជាអ្នកអាចដាក់បង្ហាញរូបភាពយ៉ូសែប ស្ម៊ីធ ឬការនិមិត្តដំបូង ហើយអញ្ជើញសិស្សឲ្យសរសេរនៅលើក្ដារខៀនពីការយល់ដឹងមួយចំនួនចេញពីការសិក្សារបស់ពួកគេ រួមជាមួយនឹងខគម្ពីរដែលពួកគេបានរកឃើញ ។ ពួកគេក៏អាចចែកចាយពីរបៀបដែលទីបន្ទាល់របស់ពួកគេអំពីយ៉ូសែប ស្ម៊ីធ និងបេសកកម្មរបស់លោកបានកើនឡើង នៅពេលពួកគេបានរៀនអំពីលោកនៅសប្ដាហ៍នេះ ។

បង្រៀនគោលលទ្ធិ

យ៉ូសែប ស្ម៊ីធ—ប្រវត្តិ ១:៥-១៨

ប្រសិនបើយើងសូមដោយសេចក្ដីជំនឿ ព្រះនឹងឆ្លើយតបចំពោះយើង ។

សិស្សរបស់អ្នកប្រហែលជាអាចភ្ជាប់ទៅនឹងបំណងប្រាថ្នារបស់យ៉ូសែបដើម្បីស្វែងរកសេចក្ដីពិតក្នុងពិភពលោកមួយដែលមានគំនិតភាន់ច្រឡំជាច្រើនត្រូវបានបង្រៀន ។ តើការភាន់ច្រឡំនៅក្នុងជំនាន់របស់យើងស្រដៀងគ្នានឹងអ្វីដែលលោកបានជួបប្រទះយ៉ាងដូចម្ដេច ? ដើម្បីជួយសិស្សឲ្យមើលឃើញពីរបៀបដែលយើងអាចស្វែងរកចម្លើយចំពោះសំណួររបស់យើង អ្នកអាចអញ្ជើញពួកគេឲ្យសរសេរនៅលើក្ដារខៀនពីវិធីខុសៗគ្នាដែលមនុស្សស្វែងរកសេចក្ដីពិត ។ បន្ទាប់មក ពួកគេអាចរំឭក យ៉ូសែប ស្ម៊ីធ—ប្រវត្តិ ១:៥-១៨ ហើយបន្ថែមវាទៅក្នុងបញ្ជីពីអ្វីដែលយ៉ូសែប ស្ម៊ីធបានធ្វើដើម្បីស្វែងរកចម្លើយចំពោះសំណួររបស់លោក ។
សិស្សអាចចែកចាយពីរបៀបដែលពួកគេបានធ្វើតាមគំរូរបស់យ៉ូសែប ស្ម៊ីធនៅក្នុងការស្រាវជ្រាវរបស់ពួកគេដើម្បីរកសេចក្ដីពិត និងរបៀបដែលព្រះបានឆ្លើយតបដល់ពួកគេ ។ សេចក្ដីថ្លែងការណ៍ប្រធាន រ័សុល អិម ណិលសុន នៅក្នុង « ធនធានបន្ថែមទាំងឡាយ » ណែនាំពីវិធីមួយចំនួនដែលយើងអាចស្វែងរកសេចក្ដីពិតមកពីព្រះ ។

ការអធិស្ឋានអនុញ្ញាតឲ្យយើងសន្ទនានឹងព្រះ

យ៉ូសែប ស្ម៊ីធ—ប្រវត្តិ ១:១៥–២០

យ៉ូសែប ស្ម៊ីធ បានឃើញព្រះជាព្រះវរបិតា និងព្រះរាជបុត្រារបស់ទ្រង់ ព្រះយេស៊ូវគ្រីស្ទ ។

ការនិមិត្តដំបូងបានបើកសម្ដែងសេចក្ដីពិតមួយចំនួនអំពីព្រះ ដែលផ្ទុយពីអ្វីដែលមនុស្សជាច្រើននៅជំនាន់របស់យ៉ូសែបបានជឿ ។ សិស្សអាចអាន យ៉ូសែប ស្ម៊ីធ—ប្រវត្តិ ១:១៥–២០ ហើយស្គាល់អ្វីមួយដែលពួកគេរៀនអំពីព្រះ ។ ហេតុអ្វីបានជាវាសំខាន់ដើម្បីដឹងសេចក្ដីពិតទាំងនេះអំពីទ្រង់ ?
ប្រសិនបើយ៉ូសែប ស៊្មីធបានមកកាន់ថ្នាក់របស់យើង តើយើងនឹងសួរអ្វីខ្លះដល់លោកអំពីបទពិសោធន៍របស់លោក ? ប្រហែលជាពួកគេអាចពិចារណាពីរបៀបដែលពួកគេនឹងបំពេញប្រយោគមួយដូចតទៅនេះ ៖ « ដោយសារការនិមិត្តដំបូងបានកើតឡើង ខ្ញុំដឹងថា … » តើពរជ័យអ្វីខ្លះកើតមានក្នុងជីវិតរបស់យើងដោយសារតែការនិមិត្តដំបូង ?

6:40
ដើម្បីបន្ថែមទៅលើការពិភាក្សារបស់អ្នក សិស្សអាចអាន ឬច្រៀងបទ « ការអធិស្ឋានដំបូងរបស់យ៉ូសែប ស្ម៊ីធ » ( ទំនុកតម្កើង ល.រ. ១៥ ) ។ តើទំនុកតម្កើងនេះជួយយើងឲ្យយល់ ហើយទទួលអារម្មណ៍អ្វីខ្លះពីការនិមិត្តដំបូង ? ប្រហែលជាសិស្សមួយចំនួនអាចចែកចាយពីរបៀបដែលពួកគេបានដឹងដោយខ្លួនឯងថា យ៉ូសែប ពិតជាបានឃើញព្រះជាព្រះវរបិតា និងព្រះយេស៊ូវគ្រីស្ទនៅក្នុងព្រៃពិសិដ្ឋមែន ។ ឬអ្នកអាចអញ្ជើញអ្នកផ្សព្វផ្សាយសាសនាពេញម៉ោង ( ឬអ្នកទើបត្រឡប់មកពីបេសកកម្មវិញ ) ឲ្យមកកាន់ថ្នាក់ ហើយនិយាយអំពីរបៀបដែលការនិមិត្តដំបូងបានជះឥទ្ធិពលដល់ជីវិតមនុស្សដែលពួកគេបានបង្រៀន ។

យ៉ូសែប ស៊្មីធ—ប្រវត្តិ ១:២១-២៦

យើងអាចបន្តស្មោះត្រង់ចំពោះអ្វីដែលយើងដឹង ទោះជាមនុស្សដទៃបដិសេធយើងក្ដី ។

សិស្សប្រហែលជាអាចស្គាល់រឿងមួយចំនួនដែលយ៉ូសែប ស្ម៊ីធបានដកពិសោធន៍ នៅពេលលោកបានចាប់ផ្ដើមប្រាប់មនុស្សផ្សេងទៀតអំពីការនិមិត្តរបស់លោក ( សូមមើល យ៉ូសែប ស៊្មីធ—ប្រវត្តិ ១:២១-២៦ ) ។ ប្រហែលជាពួកគេអាចចែកចាយបទគម្ពីរដែលបំផុសគំនិតពួកគេ នៅពេលមនុស្សដទៃបំពានដល់ជំនឿរបស់ពួកគេ ។
ប្រសិនបើអ្នកស្គាល់សមាជិកវួដដែលបានដកពិសោធន៍នូវការជំទាស់ដោយសារតែពួកគេជាសមាជិកសាសនាចក្រ សូមពិចារណាសុំឲ្យពួកគេមកកាន់ថ្នាក់ដោយរៀបចំខ្លួនចែកចាយពីរបៀបដែលពួកគេរក្សាសេចក្ដីជំនឿរបស់ពួកគេឲ្យរឹងមាំ ។ តើយើងរៀនអ្វីខ្លះមកពីគំរូរបស់យ៉ូសែប ស្ម៊ីធ នៅក្នុង យ៉ូសែប ស៊្មីធ—ប្រវត្តិ ១:២១-២៦ ?

ធនធានបន្ថែមទាំងឡាយ

ធ្វើតាមគំរូរបស់យ៉ូសែប

ប្រធាន រ័សុល អិម ណិលសុន បានបង្រៀនថា

« ព្យាការី យ៉ូសែប ស៊្មីធ បានដាក់គន្លងមួយឲ្យយើងធ្វើតាមនៅក្នុងការឆ្លើយនឹងសំណួររបស់យើង ។ ដោយបាននាំទៅរកការសន្យារបស់យ៉ាកុបដែលថា បើយើងខ្វះប្រាជ្ញាមានតែសូមដល់ព្រះ[ សូមមើល យ៉ាកុប ១:៥ ] នោះក្មេងប្រុសយ៉ូសែបបានទូលសួរសំណួររបស់លោកដោយផ្ទាល់ទៅព្រះវរបិតាសួគ៌ ។ លោកបានស្វែងរកវិវរណៈផ្ទាល់ខ្លួន ហើយការស្វែងរករបស់លោកបានបើកនូវគ្រាកាន់កាប់ត្រួតត្រាចុងក្រោយនេះ ។

« ដូចគ្នានេះដែរ តើការស្វែងរករបស់បងប្អូននឹងបើកបង្ហាញអ្វីខ្លះដល់បងប្អូន ? តើបងប្អូនខ្វះប្រាជ្ញាអ្វីខ្លះ ? តើអ្វីទៅដែលបងប្អូនមានអារម្មណ៍ថា ជាសេចក្ដីត្រូវការបន្ទាន់មួយដើម្បីដឹង ឬយល់ ? សូមធ្វើតាមគំរូរបស់ព្យាការីយ៉ូសែប ។ សូមស្វែងរកកន្លែងស្ងប់ស្ងាត់មួយ ជាកន្លែងដែលបងប្អូនអាចទៅជាទៀងទាត់ ។ សូមធ្វើចិត្តរាបសានៅចំពោះព្រះ ។ សូមបង្ហើរដួងចិត្តរបស់បងប្អូនទៅរកព្រះវរបិតាសួគ៌ ។ សូមងាកទៅរកទ្រង់ដើម្បីទទួលបានចម្លើយ និងការលួងលោមចិត្ត » ( « Revelation for the Church, Revelation for Our Lives » Ensign ឬ Liahona ខែ ឧសភា ឆ្នាំ ២០១៨ ទំព័រ ៩៥ ) ។

ការនិមិត្តដំបូងរបស់យ៉ូសែប ស្ម៊ីធ

ដើម្បីអានសេចក្ដីរៀបរាប់មួយអំពីការនិមិត្តដំបូង ដែលបានលើកឡើងពីដំណើររឿងមួយចំនួនរបស់យ៉ូសែប ស្ម៊ីធ សូមមើល ពួកបរិសុទ្ធ, , ១:១៤-១៦ ។

ការកែលម្អការបង្រៀនរបស់យើង

ស្វែងរកការបំផុសគំនិតផ្ទាល់ខ្លួនរបស់អ្នក ។ សូមកុំចាត់ទុកគម្រោងមេរៀនទាំងនេះថាជាការណែនាំដែលអ្នកត្រូវតែធ្វើតាម កាលអ្នកបង្រៀនឲ្យសោះ ។ ផ្ទុយទៅវិញ ចូរប្រើវាដើម្បីបង្កើតគំនិត ហើយជំរុញការបំផុសគំនិត នៅពេលអ្នកពិចារណាពីគោលលទ្ធិនៅក្នុងបទគម្ពីរ និងតម្រូវការរបស់សិស្សអ្នក ។