8–14 febrero

Tzol’leb’ ut Sumwank 12–13; Jose Smith—Resilal 1:66–75

“Sa’ eeb’een laa’ex, ex wech moosil”

Jo’ naq li Santil Musiq’ej kixkutanob’resi xk’a’uxl laj Jose Smith ut laj Oliver Cowery chirixeb’ li loq’laj hu, a’an naru chamusiq’ankil naq yooqat chixtzolb’al Tzol’leb’ ut Sumwank 12–13 ut Jose Smith—Resilal 1:66–75 rik’in tijok.

Tz’iib’a li nakak’oxla

Xkanab’ankileb’ chi wotzok

Jun na’leb’ re xtikib’ankil li wotzok na’leb’ a’an xpatz’b’al reheb’ li komon sa’ li tzoleb’aal chan ru neke’xtzoleb’ li loq’laj hu. K’a’ru xe’xb’aanu re xtawb’al xna’leb’eb’ sa’eb’ li loq’laj hu chiru li xamaan a’in?

Xk’utb’al li tzolʼlebʼ

Tzolʼlebʼ ut Sumwank 13

Li Tijonelil re Aaron kik’ojob’aak wi’chik xb’aan laj Jwan aj Kubsihom Ha’.

• Jun na’leb’ re aatinak chirixeb’ li yaal neke’tawman sa’ Tzol’leb’ ut Sumwank 13 a’an naq eb’ li komon sa’ li tzoleb’aal te’aatinaq chirix chan ru naq li tasal a’in naru naxtenq’aheb’ li saaj chixtawb’al ru chi us li Tijonelil re Aaron. K’a’ru naxk’ut li tasal 13 chirix li Tijonelil re Aaron li tento te’xtaw ru li saaj winq ut eb’ li saaj ixq? Re xk’eeb’aleb’ xhoonal chixjunil chi tz’aqonk, naru taakanab’eb’ li komon sa’ li tzoleb’aal chi aatinak chirix li patz’om a’in sa’ ka’kab’il ut chirix a’an te’xwotz li k’a’ru xe’xtzol sa’ li tzoleb’aal.

• Sa’ li tusleb’ aatin re li xamaan a’in sa’ Kim, Taaqehin—Choq’ reheb’ li komon ut li junkab’al wankeb’ li k’anjeleb’aal naru neke’tenq’an chixch’olob’ankileb’ junjunq li ch’ol aatin wankeb’ sa’ Tzol’leb’ ut Sumwank 13. Naru taapatz’ reheb’ li komon naq te’xwotz k’a’ru xe’xtzol rik’in roksinkileb’ li k’anjeleb’aal a’in. Re xtikib’ankil li aatinak chirixeb’ li laaw neke’yeeman sa’ li tasal a’in, naru taak’ut jun ch’uut li laaw ut taakanab’eb’ li komon sa’ li tzoleb’aal chi aatinak chirix k’a’ru naru naqab’aanu rik’ineb’ li laaw. Lix ch’olob’ahom li Hermana Ruth ut li Elder Dale G. Renlund li natawman sa’ “Xkomon chik li k’anjeleb’aal” naru ajwi’ natenq’an. K’a’ru li osob’tesihom naqak’ul rik’ineb’ lix laawil li Tijonelil re Aaron? Chan raj ru naq jalanaq li qayu’am wi ta maak’a’eb’ li osob’tesihom a’an?

• Jun xcha’al xchaq’alil ru li evangelio k’ojob’anb’il wi’chik a’an naq nokoxk’e chi tz’aqonk sa’ li k’anjel ke’xb’aanu chaq li winq ut eb’ li ixq sa’eb’ li loq’laj hu: xwaklesinkil li rawa’b’ejihom li Dios sa’ li ruchich’och’. A’an nokoxk’e chi wulak jo’ “ech moosil” rik’ineb’ a’an. K’a’ru naraj naxye wank choq’ ech moosil sa’ lix k’anjel li Qaawa’? Eb’ li raqal sa’ Mateo 3:13–17; Lukas 1:13–17; 3:2–20 naru te’xtenq’aheb’ li komon sa’ li tzoleb’aal chixtawb’al ru chi us li k’anjel kixb’aanu laj Jwan aj Kub’sihom Ha’.

  

  Laj Jose Smith naxkub’si xha’ laj Oliver Cowdery, xb’aan laj Del Parson

Jose Smith—Resilal 1:66–75

Eb’ li k’ojob’anb’il k’anjel neke’xk’e qokik sa’ lix wankilal li Dios.

• Re xk’eeb’aleb’ xhoonal li komon sa’ li tzoleb’aal re te’xwotz xnawom xch’ooleb’ chirib’ileb’ rib’ chirixeb’ li osob’tesihom neke’chal sa’ xk’ulb’aleb’ li k’ojob’anb’il k’anjel re li tijonelil, naru nakakanab’eb’ chirilb’al ru Jose Smith–Resilal 1:66–75, jo’ ajwi’ li raqalil re li raqal 71, re xsik’b’aleb’ li osob’tesihom ke’xk’ul laj Jose ut laj Oliver chirix lix kub’iha’eb’ ut lix k’ojob’ankileb’ sa’ li tijonelil. Chan ru naq eb’ li k’ojob’anb’il k’anjel neke’xk’e qamusiq’ejil wankilal? Chirix a’an eb’ li komon sa’ li tzoleb’aal naru te’xwotz lix numsihomeb’ b’ar wi’ xe’reek’a lix wankil li Dios li nachal chirix xk’ulb’aleb’ li k’ojob’anb’il k’anjel, jo’ li kub’iha’, li loq’laj wa’ak, malaj eb’ li k’ojob’anb’il k’anjel re li santil ochoch. Naru ajwi’ taak’ut li video “Las bendiciones del sacerdocio” (ChurchofJesusChrist.org) jo’ xkomon li aatinak.

• Lix yiib’ankil jun xtusulaleb’ li osob’tesihom neke’chal xb’aaneb’ li k’ojob’anb’il k’anjel re li tijonelil naru naxtenq’aheb’ li komon sa’ li tzoleb’aal. Qayehaq, naru nakatz’iib’aheb’ sa’ li pizarron li aatin K’ojob’anb’il k’anjel ut Osob’tesihom. Eb’ li komon sa’ li tzoleb’aal naru neke’xtz’il rixeb’ li raqal sa’eb’ li loq’laj hu jo’eb’ a’in re xnujob’resinkil li tusulal: Jwan 14:26; Hechos 2:38; Tzol’leb’ ut Sumwank 84:19–22; 131:1–4; Jose Smith–Resilal 1:73–74. Naru ajwi’ te’xk’e xkomoneb’ chik li osob’tesihom neke’xk’ul a’an sa’ xk’ab’a’eb’ li k’ojob’anb’il k’anjel a’an. Maare naru te’xwotz xnumsihomeb’ b’ar wi’ reek’ahomeb’ naq eb’ li k’ojob’anb’il k’anjel xe’xk’ul kixk’am chaq lix wankil li Kolonel sa’ xyu’ameb’.

Xkomon chik li k’anjeleb’aal

K’a’ruheb’ lix laawil li tijonelil?

Li Elder Dale G. Renlund ut li rixaqil, xRuth, ke’xch’olob’ a’in chirixeb’ lix laawil li tijonelil.

“Li aatin xlaawil li tijonelil na’oksiman chi wiib’ ru. Li xb’een a’an li k’ulub’ejil malaj li osob’tesihom k’eeb’il reheb’ chixjunileb’ li neke’k’uluk re li Tijonelil re Aaron malaj re Melkisedek. … Qayehaq, eb’ li neke’k’amok re li Tijonelil re Aaron neke’xk’ul xlaawil lix k’anjeleb’ li anjel, jo’ ajwi’ xlaawil li evangelio re kawresink-ib’ re li jalb’a-k’a’uxlej ut li kub’iha’ chi sub’b’il re risinkil li maak (chi’ilmanq Tzol’leb’ ut Sumwank 13:1; 84:26–27). Eb’ li neke’k’amok re li Tijonelil re Melkisedek neke’xk’ul xlaawileb’ li muqmuukil na’leb’ re li awa’b’ejihom, li laaw re li nawom chirix li Dios, ut eb’ li laaw reheb’ chixjunil li musiq’ejil osob’tesihom sa’ li Iglees (chi’ilmanq Tzol’leb’ ut Sumwank 84:19; 107:18). …

“Li xkab’ chan ru na’oksiman li aatin xlaawil li tijonelil a’an re aatinak chirix li jolomink. Eb’ laj jolominel sa’ li tijonelil neke’xk’ul xkomoneb’ chik li laaw re li tijonelil, ut a’an li k’ulub’ejil re xb’eresinkil junaq xcha’al li Iglees malaj junaq ch’uut. Chi jo’ka’in, lix laawil li tijonelil a’an li wankilal re b’eresink, jolomink, ut awa’b’ejink sa’ li Iglees” (The Melchizedek Priesthood: Understanding the Doctrine, Living the Principles, [2018], 26).

Xchaab’ilob’resinkil li qak’utum

Ye xnawom aach’ool chi kok’ aj xsa’. “Wi yal taaye chi anchal aach’ool lix nawom aach’ool chirix li musiq’ejil yaal, naru taawanq xnimal xwankil rik’ineb’ li ani tzolb’ileb’ aab’aan. … Ink’a’ na’ajman ru naq ch’ina-usaq malaj nimaq ru” (Li k’utuk jo’ li Kolonel, 11). K’oxla xwotzb’al lix nawom aach’ool chirix li Tijonelil re Aaron naq yooqex chi aatinak chirix Tzol’leb’ ut Sumwank 13.