Reetalil li hu tz’iib’anb’il chi uq’ej re lix Hu laj Mormon.

1–7 febrero

Tzol’leb’ ut Sumwank 10–11

“Re taaruuq tat-elq jo’ aj q’axonel-u”

K’a’ru li na’leb’ xak’ul naq yookat chixtzolb’al Tzol’leb’ ut Sumwank 10–11? K’a’ru li na’leb’ xe’chal sa’ laa k’a’uxl chirix li rajomeb’ ru li kristiaan nakatzoleb’?

Tz’iib’a li nakak’oxla

Xkanab’ankileb’ chi wotzok

Re xk’eeb’aleb’ xhoonal li komon sa’ li tzoleb’aal chixwotzb’al li xe’xtzol sa’eb’ li loq’laj hu sa’ junesal ut jo’ junkab’al, naru nakatz’iib’a sa’ li pizarron Tzol’leb’ ut Sumwank 10 ut Tzol’leb’ ut Sumwank 11. Junjunqeb’ li komon sa’ li tzoleb’aal naru neke’xtz’iib’a, a’ yaal b’ar re li wiib’ chi tasal, li rajlil junaq raqal b’ar wi’ xe’xtaw jun li na’leb’ aajel ru. Sik’ ru junjunqeb’ li raqal ut kanab’eb’ li komon sa’ li tzoleb’aal chixwotzb’aleb’ li yaal xe’xtaw aran.

Xk’utb’al li tzolʼlebʼ

Tzol’leb’ ut Sumwank 10:1–33

Laj Satanas naraj xsachb’esinkil lix k’anjel li Dios.

• Tzol’leb’ ut Sumwank 10 naru naxtenq’aheb’ li komon sa’ li tzoleb’aal chixk’eeb’al reetal ut chixq’axb’al ru lix yalb’al xq’e laj Satanas chixsachb’esinkil lix paab’aaleb’. Re xk’eeb’al chi nawmank k’a’ru yoo chi k’ulmank naq kik’ule’ li tasal a’in, naru taakanab’ junaq li komon sa’ li tzoleb’aal chixwotzb’al li seraq’ chirix naq laj Martin Harris kixsach li 116 perel re lix jaltesinkil ru lix Hu laj Mormon (chi’ilmanq lix jolomil li tasal Tzol’leb’ ut Sumwank 3 ut Santos, 1:50–53). Eb’ li komon sa’ li tzoleb’aal naru te’xtz’il rix Tzol’leb’ ut Sumwank 10:1–33 re xsik’b’al lix k’uub’anb’il na’leb’ laj Satanas rik’ineb’ li perel sachenaqeb’. K’a’ru naqatzol sa’eb’ li raqal a’an chirix chan ru nak’anjelak laj Satanas ut k’a’ut naq naxb’aanu li k’a’aq re ru a’an? (chi’ilmanq ajwi’ li raqal 63). Chan ru nak’anjelak chi jo’kan sa’eb’ li kutan a’in? Chan ru nokoxtenq’a li Qaawa’ chixq’axb’al ru laj Satanas sa’ li qayu’am?

Tzol’leb’ ut Sumwank 10:34–52

“Nim wi’chik xchaab’ilal xna’leb’ [li Qaawa’] chiru lix seeb’al xb’alaq’ laj tza.”

• Rajlal sut naq taqeek’a xrahil qach’ool xb’aaneb’ li qamaak, naru naqataw qoyb’enihom sa’ xnawb’al chan ru naq li Qaawa’ kixtuqub’ ru li maak ke’xb’aanu laj Jose Smith ut laj Martin Harris naq ink’a’ ke’ab’in ut ke’xsach li 116 perel re lix jaltesinkil ru lix Hu laj Mormon. K’oxla chan ru naru taatenq’aheb’ li komon sa’ li tzoleb’aal chixtawb’al royb’enihomeb’ sa’ li seraq’ a’in. Qayehaq, naru taakanab’eb’ chixwotzb’al k’a’ruhaq xe’xtzol chirix li Qaawa’ sa’ Tzol’leb’ ut Sumwank 10:34–52 (chi’ilmanq ajwi’ Tzol’leb’ ut Sumwank 3:1–3). Eb’ li komon sa’ li tzoleb’aal naru te’xwotz chan ru rilomeb’ naq “Nim wi’chik xchaab’ilal xna’leb’ [li Qaawa’] chiru lix seeb’al xb’alaq’ laj tza” (Tzol’leb’ ut Sumwank 10:43). Chan ru naq li nawom a’an naxkawob’resi li qapaab’aal chirix a’an?

  

  Laj Mormon naxk’oseb’ ru li perel ch’iich’ oor, xb’aan laj Tom Lovell

Tzolʼlebʼ ut Sumwank 11

Wi nokopatz’ok re li Dios, took’uluq.

• Li tusleb’ aatin re li xamaan a’in sa’ Kim, Taaqehin—Choq’ reheb’ li komon ut li junkab’al nokoxb’oq chirilb’al ru Tzol’leb’ ut Sumwank 11 chanchan ta wi’ naq li tasal a’an tz’iib’anb’il choq’ qe laa’o. Eb’ li komon sa’ li tzoleb’aal maare te’raj xwotzb’al k’a’ruhaq tz’aqal chaab’il choq’ reheb’ sa’ li tasal. K’a’ru neke’xk’oxla xb’aanunkil re xk’anjelankil li xe’xtzol?

• Jun na’leb’ re xtikib’ankil aatinak chirix Tzol’leb’ ut Sumwank 11 a’an xkanab’ankileb’ li komon sa’ li tzoleb’aal chixtawb’al jun na’leb’ sa’ li tasal ut chirix a’an te’xtz’iib’a jun patz’om chirix a’an. Naru te’roksi li patz’om jo’eb’ a’in: “K’a’ru naraj naxye jilok rik’in li Kristo chi anchal qach’ool?” (raqal 19) malaj “Chan ru naqataw li raatin li Dios?” (raqal 21). Eb’ li komon sa’ li tzoleb’aal naru te’xtz’iib’a lix patz’omeb’ chiru junaq ch’ina hu ut te’xnumsi sa’ chixjunil li tzoleb’aal re naq chixjunileb’ te’xtz’iib’a lix na’leb’eb’ ut maare te’xsumeheb’ lix patz’om li komon. (Naru natenq’an naq taajach ru li tzoleb’aal sa’ kok’ ch’uut). Chirix a’an eb’ li komon sa’ li tzoleb’aal naru te’xwotz junjunq xk’a’uxleb’ li xe’tz’iib’ak chirix lix patz’om.

Tzol’leb’ ut Sumwank 11:8–26

Li Dios tixk’e qe lix Musiq’ naq taqakawresi qib’ jo’ naraj a’an.

• Ma te’tenq’aaq raj li komon sa’ li tzoleb’aal rik’in aatinak chirix chan ru xk’eeb’al reetal naq neke’xk’ul sa’ junesal li k’utb’esinb’il na’leb’? Wi jo’kan, naru taatikib’ aatinak rik’in xk’eeb’aleb’ xb’oqb’al chixk’oxlankil naq xe’patz’e’ re xtz’iib’ankil junjunqaq li yaalil na’leb’ chirix chan ru xk’ulb’al li k’utb’esinb’il na’leb’ re junesal. K’a’ raj ru li na’leb’ sa’ Tzol’leb’ ut Sumwank 11:8–26 te’roksi raj? Qayehaq, k’a’ raj ru te’xtz’iib’a chirix xkawresinkil qib’ re xk’ulb’al qab’eresinkil sa’ li qayu’am ut xk’ulb’al xsumenkileb’ li qapatz’om? K’a’ raj ru te’xye chirix chan ru xk’eeb’al reetal xsumenkileb’ li qapatz’om naq neke’chal? Kanab’eb’ li komon sa’ li tzoleb’aal chi k’oxlak chirix chan ru te’xk’anjela li xe’xtzol naq yooqeb’ chixyalb’al xq’e chixsik’b’al li k’utb’esinb’il na’leb’ re junesal.

  Jo’ xkomon li ch’ina k’anjel a’in, naru taawotz li raatin li Hermana Julie B. Beck, li kiwan choq’ Awa’b’ej re li Komonil re Tenq’ank: “Li wank chi k’ulub’ej chixk’ulb’al ut chixyu’aminkil li k’utb’esinb’il na’leb’ a’an li seeb’al jwal aajel ru li naru natawman sa’ li yu’am a’in” (“… y sobre las siervas derramaré mi Espíritu en aquellos días,” Liahona, mayo 2010, 11).

Xchaab’ilob’resinkil li qak’utum

Tenq’aheb’ li wankeb’ xch’a’ajkilal. K’a’ru naru taab’aanu naq nakawil anihaq li ink’a’ natz’aqon sa’ li tzoleb’aal? Wan naq a’an ka’ajwi’ naraj naq taak’eemanq chi tz’aqonk. K’oxla xkanab’ankil li kristiaan a’an chi tz’aqonk sa’ junaq tzolok chalel. Wi sa’ xtiklajik moko naxb’aanu ta, toj k’ut ajwi’ laa rahom ut laa wajom choq’ re. (Chi’ilmanq Li k’utuk jo’ li Kolonel, 8–9.)