15–21 febrero

Tzolʼlebʼ ut Sumwank 14–17

“Xaqliik jo’ aj yehol nawom”

K’oxla li tzol’leb ut li kik’ulman tz’iib’anb’il resil sa’ Tzolʼlebʼ ut Sumwank 14–17. Chan ru naru taawaklesi xch’ooleb’ li kristiaan nakatzoleb’ re “xaqliik jo’ aj yehol nawom chirix li k’a’aq re ru a’in”? (Tzolʼlebʼ ut Sumwank 14:8).

Tz’iib’a li nakak’oxla

Xkanab’ankileb’ chi wotzok

K’a’ru kiwan xyaalal choq’ reheb’ li komon sa’ li tzoleb’aal naq xe’xtzoleb’ li loq’laj hu sa’ junesal ut jo’ junkab’al? Maare naru taakanab’eb’ li komon sa’ li tzoleb’aal chixwotzb’al jun na’leb’ chirix tz’aqonk sa’ lix k’anjel li Qaawa’ sa’ li junjunq tasal re Tzolʼlebʼ ut Sumwank 14–17.

Xk’utb’al li tzolʼlebʼ

Tzol’leb’ ut Sumwank 14–16

Li Qaawa’ naxk’e qab’oqb’al chi tz’aqonk sa’ lix k’anjel.

• K’a’ru neke’xnaw li komon sa’ li tzoleb’aal chirix li junkab’al Whitmer? (chi’ilmanq Santos, 1:68–69). Naru nak’anjelak choq’ reheb’ xyiib’ankil jun xtusulal junjunq li esil chirixeb’ li junkab’al Whitmer sa’ li pizarron. Chan ru naq nokohe’xtenq’a li esil a’an chixtawb’al ru li na’leb’ naxk’e li Qaawa’ reheb’ li junkab’al Whitmer sa’eb’ li tasal 14–16? Qayehaq, k’a’ut naq li Qaawa’ kixjuntaq’eeta lix k’anjel rik’in li q’olok sa’ li pim?

• Re xkanab’ankileb’ li komon chixwotzb’aleb’ lix k’oxlahom chirix chan ru tz’aqonk sa’ lix k’anjel li Qaawa’, naru taatz’iib’aheb’ li raqal a’in sa’ li pizarron: Tzolʼlebʼ ut Sumwank 14:1; 14:2–4; 14:5, 8; 14:6–7; 14:9–11; 15:6. Eb’ li komon sa’ li tzoleb’aal naru te’ril ru jun reheb’ li raqal a’an reheb’ li loq’laj hu sa’ ka’kab’il ut te’aatinaq chirix li xe’xtzol chirix lix k’anjel li Qaawa’. Junjunq reheb’ li ch’uut naru te’xwotz sa’ li tzoleb’aal li xe’xtzol.

• Kanab’eb’ li komon sa’ li tzoleb’aal chixwotzb’al xnumsihomeb’ b’ar wi’ ke’xtenq’a li ras riitz’in chi nach’ok rik’in li Kolonel, jo’ ajwi’ naq wankeb’ chaq sa’ li mision, malaj naq yookeb’ chixb’aanunkil li k’anjel re ilok komon. Chan ru naq neke’ril xtz’aqob’resinkil li raatin li Qaawa’ sa’ xyu’ameb’ li wan sa’ Tzolʼlebʼ ut Sumwank 15:6 ut 16:6? K’a’ru naqatzol sa’eb’ li tasal a’in li naru tooxtenq’a chixwotzb’al li evangelio?

  

  Xjalam-uucheb’ aj trab’aaj sa’ xch’och’el li trigo xb’aan laj Greg Newbold

Tzolʼlebʼ ut Sumwank 17

Naru nokowan chi tiik sa’ li k’a’ru naqanaw, us ta naq eb’ li qas qiitz’in nokohe’xtz’eqtaana.

• K’a’ut naq li Qaawa’ kixk’eheb’ aj yehol nawom chirix lix Hu laj Mormon? Eb’ li komon sa’ li tzoleb’aal naru te’xwotz li na’leb’ li xk’ulun sa’ xk’a’uxleb’ naq xe’ril ru Tzolʼlebʼ ut Sumwank 17. Te’xtaw xkomon xna’leb’eb’ sa’eb’ li raqal reheb’ li loq’laj hu yeeb’ileb’ sa’ xjolomil li tasal 17 malaj sa’ “Lix Ch’olob’ahomeb’ li Oxib’ chi aj Yehol Nawom,” li natawman sa’ xtiklajik lix Hu laj Mormon. Chan ru naq lix ch’olob’ahomeb’ li oxib’ chi aj yehol nawom naxnimob’resi lix nawom qach’ool chirix lix Hu laj Mormon?

• Us ta ink’a’ qilomeb’ ru li anjel chi moko qach’e’om li perel ch’iich’ oor, toj naru naqach’olob’ xyaalal lix Hu laj Mormon. K’a’ru xe’xtaw li komon sa’ li tzoleb’aal sa’ li tasal 17 (jo’ ajwi’ sa’ xjolomil li tasal) li neke’reek’a naq nak’anjelak choq’ reheb’? Wi ani tixpatz’ raj k’a’ut naq naqapaab’ naq tz’aqal yaal lix Hu laj Mormon, k’a’ raj ru taqaye re? Maare eb’ li komon sa’ li tzoleb’aal naru te’xtz’iib’a junaq xsumenkil ut naru taakanab’ junjunq reheb’ a’an chixwotzb’al li xe’xtz’iib’a. Li raatin li Awa’b’ej Ezra Taft Benson li natawman sa’ “Xkomon chik li k’anjeleb’aal” naru naxwaklesi xch’ooleb’ chixwotzb’al lix nawom xch’ooleb’ chirix lix Hu laj Mormon rik’ineb’ li ras riitz’in.

• Naru nak’anjelak re musiq’ank naq jun li komon sa’ li tzoleb’aal tixwotz lix numsihomeb’ xkomoneb’ laj yehol nawom chirix li perel ch’iich’ oor (chi’ilmanq “Lix Ch’olob’ahomeb’ li Waqxaqib’ chi aj Yehol Nawom” sa’ lix Hu laj Mormon ut lix numsihom xMary Whitmer sa’ Santos, 1:70–71). K’a’ru naqatzol rik’in lix numsihomeb’ laj yehol nawom a’an?

• Naru nakawotz xcha’al li video “Un día para las eternidades” (ChurchofJesusChrist.org) jo’ xkomon li aatinak chirixeb’ laj yehol nawom chirix lix Hu laj Mormon (li raqal na’aatinak chirixeb’ li oxib’ chi aj yehol nawom sa’ li video natikla sa’ li k’asal 15:00).

Xkomon chik li k’anjeleb’aal

Xwotzb’al xnawom qach’ool chirix lix Hu laj Mormon.

Li Awa’b’ej Ezra Taft Benson kixk’e li b’oqom a’in choq’ reheb’ li komon re li Iglees sa’ 1988:

“Lix Hu laj Mormon a’an li k’anjeleb’aal kixk’e chaq li Dios re “xmesunkil li ruchich’och’ chanchan rik’in b’uut’iha’, re xch’utub’ankileb’ chaq li sik’b’ileb’ ru xb’aan.” (Moises 7:62.) Aajel ru naq li loq’laj hu a’in taawanq xnimal xna’aj, sa’ lix jultikankil li evangelio jo’ ajwi’ sa’ li qak’utum ut sa’ li k’anjel re jultikank.

“… Sa’eb’ li kutan a’in re li internet ut re li puktesink aatin chi isinb’il chiru hu, li Dios tixpatz’ qamertoomil wi ink’a’ naqak’e chi nawe’k lix Hu laj Mormon chi nim ru.

“Wan qik’in lix Hu laj Mormon, wankeb’ li komon, wankeb’ li misioneer, wankeb’ li k’anjeleb’aal, ut li ruchich’och’ wan rajom ru. Li hoonal a’an anajwan!

“Ex inraarookil was wiitz’in, toj b’ab’ay ajwi’ lix wankil lix Hu laj Mormon naqil, lix choxahil k’anjel li toj taab’aanumanq, ut lix nimal ru chan ru taajek’imanq” (Enseñanzas de los Presidentes de la Iglesia: Ezra Taft Benson [2014], 143–144).

Xchaab’ilob’resinkil li qak’utum

Oksiheb’ li patz’om li neke’b’oqok chi ch’olob’ank. Jun musiq’anb’il patz’om naru nak’anjelak jo’ jun nimla b’oqom choq’ re li Musiq’ej. Qayehaq, naq nakat-aatinak chirix Tzolʼlebʼ ut Sumwank 14:9 naru nakawoksi junaq patz’om jo’ a’in: “Chan ru naq xexwulak chixnawb’al naq li Jesukristo a’an “jun saqen li ink’a’ naru chi muqe’k sa’ li aak’ab’ ”?” (Chi’ilmanq Li k’utuk jo’ li Kolonel, 32.)