Li xb’een tzol, xb’aan laj James Taylor Harwood

17–23 mayo

Tzol’leb’ ut Sumwank 51–57

“Jun mertoom xaqxo xch’ool, ut tiik, ut chaab’il xna’leb’ ”

Wan naq li musiq’ejil na’leb’ chirix li k’a’ru tento taak’utmanq naru nawulak sa’ xtz’ilb’aleb’ rix li loq’laj hu rik’in junaq komon sa’ laa junkab’al malaj junaq aawamiiw.

Tz’iib’a li nakak’oxla

Xkanab’ankileb’ chi wotzok

Naru taawotz li raatin li Elder Quentin L. Cook: “Li woyb’enihom a’an naq chiqajunilo taqak’e reetal sa’ junjunqal ut jo’ junkab’al, li mertoomil teneb’anb’il sa’ qab’een ut li tento taqaq’axtesi wi’ resil” (“La mayordomía: Una responsabilidad sagrada,” Liahona, noviembre 2009, 94). Chirix a’an, naru taapatz’ reheb’ li komon k’a’ru xe’xtzol sa’eb’ li tasal 51–57 chirixeb’ lix mertoomil.

Xk’utb’al li tzolʼlebʼ

Tzolʼlebʼ ut Sumwank 51:9, 15–20

Li Qaawa’ naraj naq laa’aqo mertoom xaqxo qach’ool, tiik, ut chaab’il qana’leb’.

• Chan ru taatenq’aheb’ li komon chixk’oxlankil chan ru neke’roksi li raatin li Qaawa’ wan sa’ li tasal 51? Naru taatz’iib’a chiru li pizarron K’a’ru teneb’anb’il sa’ inb’een xb’aan li Qaawa’? ut taakanab’eb’ li komon chixtz’iib’ankileb’ xsumehom (chi’ilmanq “Xkomon chik li k’anjeleb’aal” re xtawb’al xkomoneb’ li na’leb’). Chirix a’an naru te’ril ruheb’ li raqal 9, 15–20 re xsik’b’aleb’ raqal li neke’xk’ut chan ru chaab’ilo’k jo’ mertoon rik’ineb’ li k’a’aq re ru xe’xtz’iib’a. Malaj ut, naru ajwi’ te’xjayali rib’eb’ rik’ineb’ li aatin “xaqxo xch’ool,” “tiik,” ut “chaab’il xna’leb’,” sa’ li raqal 19, re te’aatinaq chirix chan ru naq jun reheb’ li aatin a’an naru nokoxb’eresi chixtz’aqob’resinkil ru li qamertoomil. Wi na’ajman ru, ilomaq ru sa’ komonil lix ch’olob’ankil li aatin “Mertoom, mertoomil” sa’ li K’utul Raqal reheb’ li Loq’laj Hu.

Li komon li ke’xyu’ami li chaq’rab’ re li q’axtesink-ib’ ke’xk’e chixjunil li k’a’ru wan reheb’ re li Iglees.

Tzol’leb’ ut Sumwank 52:10; 53–3; 55:1–3

Li maatan re li Santil Musiq’ej nak’ulman rik’in li k’ehok uq’ej sa’ jolomej.

• Wankeb’ naab’al li raqal sa’eb’ li k’utb’esinb’il na’leb’ a’in li neke’aatinak chirix xk’ulb’al li maatan re li Santil Musiq’ej rik’in li k’ehok uq’ej sa’ jolomej. Wi usaq raj choq’ reheb’ li komon aatinak chirix li na’leb’ a’in, naru taapatz’ reheb’ k’a’ru xe’xtzol sa’ Tzol’leb’ ut Sumwank 52:10; 53:3; 55:1–3 chirix li maatan re li Santil Musiq’ej. Re xtawb’al xkomon li esil chirix li na’leb’ a’in, chi’ilmanq Hechos 8:14–17; 19:1–6. Eb’ li komon maare te’ruuq chi aatinak chirix lix numsihomeb’ naq xe’xk’ul li maatan re li Santil Musiq’ej, malaj chirix li k’a’ru naru te’xb’aanu re naq toj yooqeb’ chixk’ulb’al xb’eresinkileb’ sa’ lix yu’ameb’.

Tzol’leb’ ut Sumwank 52:9–11, 22–27

Naru naqawotz li evangelio a’ yaal b’ar wanko.

• Naq li Qaawa’ kixtaqlaheb’ naab’al laj jolominel sa’ li Iglees aran Missouri, kixye reheb’ naq te’roksi li hoonal sa’ lix b’eenikeb’ re “te’jultikanq aatin chire li b’e” (raqal 25–27). Rilb’al ru Tzol’leb’ ut Sumwank 52:9–11, 22–27 naru natenq’an re aatinak chirix chan ru naru naqawotz li evangelio “chire li b’e,” chiru chixjunil li qayu’am. Eb’ li komon naru te’aatinaq chirix k’a’ru neke’xb’aanu re naq xwotzb’al li evangelio a’anaq xcha’alil lix yu’ameb’.

Tzol’leb’ ut Sumwank 52:14–19

Li Dios xk’ehom chaq jun k’utb’il eetalil re risinkil qib’ chiru li b’alaq’iik.

• Re aatinak chirix li eetalil kixk’utb’esi li Qaawa’ li natawman sa’ Tzol’leb’ ut Sumwank 52:14–19, naru taak’eheb’ reetalil jalan chik li k’utb’il eetalil li maare nawb’ileb’ ru xb’aaneb’ li komon, jo’ li k’utb’il eetalil re xyiib’ankileb’ k’a’aq re ru malaj li k’utb’il eetalil re chan ru li wank. Maare eb’ li komon te’xk’e ajwi’ junjunq li k’utb’il eetalil. K’a’ut naq jwal aajeleb’ ru li k’utb’il eetalil a’an? Chan ru naru naqoksi li k’utb’il eetalil nak’eeman sa’eb’ li raqal 14–19 re xk’eeb’al reetal li b’alaq’iik naqataw sa’ li ruchich’och’ a’in?

Tzolʼlebʼ ut Sumwank 54

Naru ninsik’ li Qaawa’ naq nikinixrahob’tesi li k’a’ru neke’xb’aanu li was wiitz’in.

• Naab’al qe laa’o ak xqak’ul xrahil qach’ool xb’aan naq jun kristiaan ink’a’ kixb’aanu lix yeechi’ihom. A’an li ke’xk’ul laj santil paab’anel aj Colesville, Nueva York, li ke’royb’eni xk’ojob’ankileb’ rib’ sa’ xch’och’ laj Leman Copley, aran Ohio. Re xtzolb’al a’an, eb’ li komon naru neke’ril ru xjolomil li tasal 54 (chi’ilmanq ajwi’ Santos, 1:129–131; “Un ‘obispo de mi iglesia’,” Revelaciones en contexto, 78–79). Maare naru te’xk’oxla naq kiwan jun ramiiweb’ sa’ xyanqeb’ laj santil paab’anel aj Colesville ut te’xsik’ junaq na’leb’ sa’ li tasal 54 re te’xwotz rik’in li ramiiweb’. Malaj ut naru te’ril ru li k’utb’esinb’il na’leb’ re te’xsik’ k’a’ruhaq li naru naxtenq’a anihaq li naraho’ xch’ool xb’aan li k’a’ru naxsik’ ru xb’aanunkil junaq chik kristiaan. (Maare nakawaj xjultikankil li yeechi’ihom natawman sa’ li raqal 6 choq’ reheb’ li ani neke’xpaab’ lix taqlahom).

• Sa’ Tzol’leb’ ut Sumwank 54:10 wankeb’ naab’al li ch’ol aatin li naru te’wanq xyaalal choq’ reheb’ li komon, jo’ “aj kuyunelaqex sa’ xnumsinkil li rahilal,” “eb’ li moko ke’xb’ay ta rib’ chinsik’b’al,” ut “te’xtaw xhilob’aal li raameb’.” Eb’ li komon naru te’xsik’ ru jun reheb’ li ch’ol aatin re’ te’xtz’il rix ut re te’xtzol, rik’in roksinkileb’ li ch’olob’anel aatin malaj jalaneb’ chik k’anjeleb’aal, re xtzolb’aleb’ li raqal sa’eb’ li loq’laj hu li wan rilomeb’. Chirix a’an naru te’xwotz lix na’leb’eb’.

Xkomon chik li k’anjeleb’aal

Eb’ li qamertoomil.

Li Awa’b’ej Spencer W. Kimball kixch’olob’: “Sa’ li Iglees, jun mertoomil a’an jun loq’laj musiq’ejil malaj ruchich’och’il teneb’ahom li tento taaq’axtesimanq wi’ resil. Xb’aan naq chixjunil li k’a’aq re ru re li Qaawa’, laa’o mertoomo sa’ xb’een li qatib’el, li qak’a’uxl, li qajunkab’al, ut li k’a’ru wan qe. (Chi’ilmanq Tzol’leb’ ut Sumwank 104:11–15). Jun tiik aj mertoom a’an li naxk’anjela chi tiik li taqlank, narileb’ lix komoneb’, ut narileb’ li neb’a’ ut li wan rajom ru” (chi’ilmanq “Los Servicios de Bienestar: El Evangelio en acción,” Liahona, febrero re 1978, 111).

Xchaab’ilob’resinkil li qak’utum

Tenq’aheb’ laj tzolom chixtenq’ankil rib’ chirib’ileb’ rib’. Yoob’ jun sutam sa’ li tzoleb’aal b’ar wi’ li ani te’tzoloq te’xtenq’a rib’ ut te’xwaklesi xch’ool chirib’ileb’ rib’. K’e xb’oqb’aleb’ chixwotzb’al xna’leb’eb’ li tixchaab’ilob’resi li tzolok neke’xb’aanu xjuneseb’ ut jo’ junkab’al. (Chi’ilmanq Li k’utuk jo’ li Kolonel, 36.)