26 abril–2 mayo

Tzolʼlebʼ ut Sumwank 45

“Li k’a’ru yeechi’inb’il … taatz’aqloq ru”

Naq yooqat chixtzolb’al Tzol’leb’ ut Sumwank 45, k’oxla b’ar wankeb’ li raqal, li raatineb’ laj jolominel sa’ li Iglees, li numsihom, li patz’om, ut xkomon chik li na’leb’ li naru nakawoksi re xk’utb’al li tzol’leb’. Naq nakatk’utuk, k’e xb’oqb’aleb’ li komon sa’ li tzoleb’aal chixtz’iib’ankil li na’leb’ nachal sa’ xk’a’uxleb’ ut chixyiib’ankil junaq k’uub’anb’il na’leb’ re te’xb’aanu li neke’xtzol.

Tz’iib’a li nakak’oxla

Xkanab’ankileb’ chi wotzok

Eb’ li komon naru te’xtz’iib’a chiru jun setel li hu rajlil junaq raqal re Tzol’leb’ ut Sumwank 45 li xwaklesi xch’ooleb’. Chirix a’an naru nakapatz’eb’ li kok’ hu reheb’, taasik’eb’ ru junjunqaq, ut taakanab’eb’ li komon xe’tz’iib’an re chixyaab’asinkileb’ li raqal, ut te’xye k’a’ut naq xe’xsik’ ru a’an. Waklesi xch’ooleb’ xkomoneb’ li kristiaan naq te’xwotz ajwi’ xk’a’uxleb’.

Xk’utb’al li tzolʼlebʼ

Tzol’leb’ ut Sumwank 45:1–5

Li Jesukristo a’an aj Aatinanel chiqix chiru li Yuwa’b’ej.

• Ma naru junaq li komon tixch’olob’ k’a’ru naxb’aanu junaq aj aatinanel? Naru te’aatinaq sa’ komonil chirix k’a’ru xk’anjel jun “aj aatinanel” sa’eb’ li raqal a’in. Chirix xtawb’al ru li aatin, eb’ li komon sa’ li tzoleb’aal naru te’ril ru Tzol’leb’ ut Sumwank 45:3–5 sa’ ka’kab’il. Naru te’xwotz chirib’ileb’ rib’ jun li aatin malaj ch’ol aatin wan sa’eb’ li raqal a’an li natenq’ank reheb’ chixtawb’al ru xk’anjel li Jesukristo jo’ aj Aatinanel chiru li qaYuwa’. (Chi’ilmanq ajwi’ 2 Nefi 2:8–9; Mosiah 15:7–9; Moroni 7:27–28; Tzol’leb’ ut Sumwank 29:5; 62:1). Naru taapatz’ reheb’ li komon naq te’xwotz li reek’ahomeb’ chirix li Kolonel jo’ aj Aatinanel chirixeb’.

Tzol’leb’ ut Sumwank 45:11–75

Ink’a’ na’ajman naq tooxuwaq xb’aan li xkab’ xk’ulunik li Qaawa’.

• Chan ru naru nakatenq’aheb’ li komon chirilb’aleb’ li ninqi q’usum jo’eb’ ajwi’ li yeechi’ihom neke’tawman sa’ li tasal 45? Qayehaq, naru taatz’iib’a chiru li pizarron eb’ li jolomil aatin Profeetil aatin ut Osob’tesihom yeechi’inb’ileb’, re naq eb’ li komon te’xtz’iib’a rub’eleb’ a’an li k’utum neke’tawman sa’ Tzol’leb’ ut Sumwank 45:11–75. K’a’ut naq li Qaawa’ naraj naq taqanaw ru li k’a’aq re ru a’in chi rub’elaj? K’a’ru naru naqab’aanu re xk’ulb’aleb’ li osob’tesihom yeechi’inb’ileb’?

• Eb’ li komon maare naru te’xwotz xna’leb’eb’ chirib’ileb’ rib’ chirix li wank chi kaweb’ xch’ool ut chi oyb’enink naq naqanumsi li ch’a’ajkilal yeeb’il naq taak’ulmanq sa’eb’ li qakutan (jo’ li neke’yeeman sa’ Tzol’leb’ ut Sumwank 45:11–75). Re xtenq’ankileb’ li komon chiroyb’eninkil li xkab’ xk’ulunik li Qaawa’ rik’in paab’aal sa’ xna’aj li xiwak, naru teeril li video “Los corazones de los hombres están desfalleciendo” (ChurchofJesusChrist.org). Chan ru naq neke’laj xch’ooleb’ li kristiaan sa’eb’ li qakutan? (chi’ilmanq li raqal 26). K’a’ru li na’leb’ kixk’e li Awa’b’ej Nelson sa’ li video re qatenq’ankil chixnumsinkil li xiwxiw rik’in tuqtuukilal?

Tzol’leb’ ut Sumwank 45:31–32

“Xaqlinqex sa’eb’ li na’ajej sant,” ut mex’eek’asiiq.

• Eb’ li komon maare te’raj xwotzb’al junjunqeb’ xna’leb’ chirix chan ru neke’xyal xq’e chi wank sa’eb’ li na’ajej sant, jo’ kixye li Qaawa’ sa’ Tzol’leb’ ut Sumwank 45:31–32. Chan ru naqayoob’eb’ li na’ajej sant sa’ li qayu’am? Li aatin natawman sa’ “Xkomon chik li k’anjeleb’aal” ut li video “Permaneced en lugares santos – Florece donde te encuentres” (ChurchofJesusChrist.org) naru te’xk’e eena’leb’ re aatinak.

  

  Li jaljookil ru aatin chirixeb’ li lajeeb’ chi tuq’ixq, xb’aan laj Dan Burr

Xkomon chik li k’anjeleb’aal

“Xaqlinqex sa’eb’ li na’ajej sant”

Li Hermana Ann M. Dibb, li kiwan choq’ komon sa’ li Jolomil Awa’b’ejil reheb’ li Saaj Ixq, kixk’ut naq li na’leb’ re wank sa’eb’ li na’ajej sant ut ink’a’ eek’asiik “naxch’olob’ chan ru naru naqak’ul xkolb’al qix, kawilal, ut tuqtuukilal sa’eb’ li ch’a’ajkil hoonal.” Chirix xyeeb’al naq sa’ xyanqeb’ li na’ajej sant wankeb’ li santil ochoch, eb’ li kapiiy, ut eb’ li ochoch, kixye naq “li junjunq naru naxtaw xkomoneb’ chik li na’ajej.” Kixye ajwi’:

“Maare taqak’oxla li aatin na’ajej jo’ jun sutam malaj junaq na’ajej sa’ li reetalil li ch’och’. A’b’anan, jun na’ajej naru ajwi’ naq a’anaq jun wanjik, k’oxlahom, malaj k’a’uxleb’aal. A’an naraj naxye naq eb’ li na’ajej sant naru ajwi’ naq a’anaqeb’ li hoonal—hoonal b’ar wi’ naq li Santil Musiq’ej naxch’olob’ xyaalal k’a’ruhaq chiqu, hoonal b’ar wi’ naqeek’a lix rahom li qaChoxahil Yuwa’, malaj b’ar wi’ naqak’ul xsumenkileb’ li qapatz’om. Jo’kan ajwi’, nink’oxla naq rajlal sut naq nekek’ut xkawil eech’ool chixkolb’al rix li k’a’ru us, sa’eb’ li hoonal naq maa’ani chik nab’aanunk re, nekeyoob’ jun na’ajej sant” (“Sus lugares santos,” Liahona, mayo 2013, 115).

Xchaab’ilob’resinkil li qak’utum

Chatwanq jo’ jun yo’yookil xch’olob’ahom li yaal. Naq nakayu’ami li tzol’leb’ nakak’ut, taawanq xkawil aach’ool re xyeeb’al xnawom aach’ool naq yaal a’an. Li Santil Musiq’ej tixk’ojob’ xyaalal lix nawom aach’ool sa’ raameb’ li komon sa’ laa tzoleb’aal. K’oxlaheb’ li na’leb’ taak’ut chiru li xamaan a’in ut chiruheb’ li xamaan chalkeb’ re. Chan ru naru nakayu’amiheb’ chi tz’aqal chik? (Chi’ilmanq Li k’utuk jo’ li Kolonel, 13–14.)