10–16 mayo

Tzol’leb’ ut Sumwank 49–50

“Li k’a’ru re li Dios a’an saqen”

Re “xjultikankil li aatin re li yaal rik’in laj K’ojob’anel Ch’oolej” (Tzol’leb’ ut Sumwank 50:17), sik’ li choxahil musiq’ahom naq nakatz’il rix Tzol’leb’ ut Sumwank 49–50. Chirix a’an k’e aach’ool chixk’ulb’al lix b’eresihom li Dios naq yookat chi k’utuk.

Tz’iib’a li nakak’oxla

Xkanab’ankileb’ chi wotzok

Naq eb’ li komon te’xwotz li na’leb’ xe’xk’ul naq yookeb’ chaq chixtzolb’aleb’ li loq’laj hu, naru ajwi’ te’aatinaq chirix chan ru naq xe’xk’uleb’ li na’leb’ a’an. Naru taapatz’ reheb’ li komon naq te’xwotz chirib’ileb’ rib’ jalan jalanq xk’a’uxleb’ chirix junaq raqal re Tzol’leb’ ut Sumwank 49–50, ut te’aatinaq chirix k’a’ru xk’amok reheb’ li na’leb’ a’an.

Xk’utb’al li tzolʼlebʼ

Tzol’leb’ ut Sumwank 49; 50:1–36

Eb’ li yaal re li evangelio naru nikine’xtenq’a chixk’eeb’aleb’ reetal li b’alaq’ aj k’utum.

• Li tasal 49 kik’eeman re xch’olob’ankil li tz’aqal tzol’leb’, li kixchaab’ilob’resi li yookeb’ chaq xchik’utb’al li kristiaan (chi’ilmanq li tusleb’ aatin re li xamaan a’in sa’ Kim, Taaqehin—Choq’ reheb’ li komon ut li junkab’al re rilb’aleb’ junjunq li esil). Re xtenq’ankileb’ li komon chixtz’ilb’al rix li tasal a’in, naru taak’eheb’ sa’ ch’uut ut taak’e reheb’ junjunq tzol’leb’ li te’aatinaq wi’ (jo’ tz’iib’anb’il sa’ xjolomil li tasal 49). Eb’ li ch’uut naru te’aatinaq chirixeb’ li patz’om a’in: K’a’ruheb’ li yaal kixk’ut li Qaawa’ chirix li na’leb’ a’in sa’ li tasal 49? K’a’ru neke’xpaab’ li kristiaan chirix li na’leb’ a’an sa’eb’ li kutan a’in? K’a’ruheb’ chik li yaal xk’ut li Qaawa’ chirix a’an rik’ineb’ li qaprofeet sa’ roso’jikeb’ li kutan a’in? K’eheb’ xhoonal li komon re te’xwotz xb’antioxihomeb’ chirix li yaal k’utb’esinb’ileb’ sa’eb’ li qakutan.

• Jo’eb’ li xb’eenil sa’ Kirtland li “ink’a’ ke’xtaw ru lix k’utb’esihomeb’ li jalanq paay chi musiq’ej” (xjolomil Tzol’leb’ ut Sumwank 50), wan naq naqapatz’ qib’ ma rik’in li Musiq’ej nachal li k’a’ru naqeek’a malaj naqil malaj rik’in junaq chik k’a’aq re ru. K’a’ru naqatzol sa’ Tzol’leb’ ut Sumwank 50:1–36 li nokoxtenq’a chixk’eeb’al reetal lix toch’om li Musiq’ej? Naru taakanab’eb’ li komon chixsik’b’aleb’ ru junjunq li raqal re te’rileb’ ru, ut chirix a’an kanab’eb’ chixwotzb’al li te’xtaw.

Tzol’leb’ ut Sumwank 49:15–17

Lix sumlajik li winq rik’in li ixq aajel ru sa’ lix k’uub’anb’il na’leb li Dios.

• Xb’aan naq li sumlaak tz’aqal aajel ru sa’ lix k’uub’anb’il na’leb’ li qaChoxahil Yuwa’, laj Satanas naraj xjalb’al ru li na’leb’ chirix a’an. Eb’ li komon naru neke’tenq’aak xb’aan xtz’iib’ankileb’ li na’leb’ kixk’utb’esi li Qaawa’ chirix li sumlaak chiru li pizarron. Qayehaq, k’a’ruheb’ li na’leb’ neke’qatzol chirix li sumlaak sa’ Tzol’leb’ ut Sumwank 49:15–17? Junjunqeb’ chik li raqal reheb’ li loq’laj hu li naru neke’oksiman a’aneb’ Genesis 2:20–24; 1 Korintios 11:11; malaj junjunqeb’ chik neke’tawman sa’ “Sumlaak” sa’ li K’utul Raqal reheb’ li Loq’laj Hu). Eb’ li komon naru ajwi’ neke’xtaweb’ li na’leb’ sa’ “Li Junkab’al: Jun Jek’inb’il Aatin choq’ re li Ruchich’och’.” Rik’in li k’a’ru naqatzol sa’eb’ li hu a’an, k’a’ut naq lix sumlajik jun li winq rik’in li ixq aajel ru sa’ lix k’uub’anb’il na’leb’ li Dios? (chi’ilmanq “Xkomon chik li k’anjeleb’aal”).

  

  Li sumlaak wan wiʼ jun winq rikʼin jun ixq, kʼojobʼanbʼil xbʼaan li Dios.

Tzolʼlebʼ ut Sumwank 50:13–22

Li nak’utuk ut li natzolok neke’waklesiik li raam sa’ komonil xb’aan li Musiq’ej.

• Li na’leb’ kixk’e li Qaawa’ chirix xjultikankil ut xk’ulb’al li yaal naru naxk’e eehoonal re aatinak chirix aak’anjel jo’ aj k’utunel ut xk’anjeleb’ li komon sa’ xchaab’ilob’resinkil li tzolok chirix li evangelio. Naru taakanab’eb’ li komon chirilb’al ru Tzol’leb’ ut Sumwank 50:13–22 sa’ ka’kab’il, ut te’aatinaq chirix lix k’anjel li Musiq’ej, eb’ laj k’utunel, ut eb’ li neke’tzolok. Junjunq reheb’ li sumal naru te’xwotz sa’ li tzoleb’aal li xe’xtzol. B’ar wan reheb’ junjunq “chi jalan chik chan ru” naqayal wi’ xk’utb’al malaj xtzolb’al li evangelio? (raqal 17). Chan ru naru naqachaab’ilob’resi xk’ulb’al li aatin rik’in li Musiq’ej? K’a’ru li nokomusiq’aak chixb’aanunkil sa’ kab’l ut sa’ li iglees re xk’utb’al ut xtzolb’al li evangelio chi chaab’il chik?

Xkomon chik li k’anjeleb’aal

Li sumlaak tz’aqal aajel ru sa’ lix k’uub’anb’il na’leb’ li qaChoxahil Yuwa’.

Li Elder David A. Bednar kixch’olob’ k’a’ut naq li sumlaak tz’aqal aajel ru sa’ lix k’uub’anb’il na’leb’ li Dios chirix li kolb’a-ib’:

“Chi k’eeb’il chaq sa’ choxa, k’ojob’anb’il naq eb’ li winq ut eb’ li ixq te’chaab’ilo’q sa’ junajil toj sa’ li tz’aqalil e-u ut sa’ xtz’aqalil li loq’alil. Xb’aan lix jalanileb’ ut lix wankilaleb’, li winq ut li ixq neke’wan sa’ sumal chi jalan jalanq xk’a’uxleb’ ut xnumsihomeb’. Li winq ut li ixq neke’xtenq’a rib’ chi jalan jalanq xna’leb’eb’, a’ut chi juntaq’eet xwankil lix na’leb’eb’, re wank sa’ junajil, jo’ chanru ink’a’ chik naru natawman sa’ junesal. Li winq naxtz’aqob’resi ut naxtiikob’resi ru li ixq, ut li ixq naxtz’aqob’resi ut naxtiikob’resi ru li winq, naq neke’tzolok, naq neke’xkawob’resi rib’, ut naq neke’rosob’tesi rib’ chirib’ileb’ rib’. …

“Li ochoch b’ar wi’ wan jun b’eelomej ut jun ixaqilb’ej tiikeb’ ut nujenaqeb’ rik’in rahom, a’an li na’ajej b’ar wi’ naru neke’k’iresiman li kok’al sa’ rahok ut tiikilal, ut b’ar wi’ naru natz’aqob’resiman ru li k’a’ru aajel ru sa’ musiq’ej choq’ reheb’ li alalb’ej. Jo’ naq lix jalanil xna’leb’eb’ li winq ut li ixq neke’tenq’an choq’ re li chaab’il wank sa’ li sumlaak, eb’ lix jalanil xna’leb’eb’ tz’aqal aajeleb’ ajwi’ ru re xk’iresinkileb’, rilb’aleb’, ut xtzolb’aleb’ li alalb’ej” (“El matrimonio es esencial para Su plan eterno,” Liahona, junio 2006, 51–52).

Xchaab’ilob’resinkil li qak’utum

B’eresi li musiq’anb’il aatinak. Li junjunq wan k’a’ru naru naxye, a’ut wan naq moko wan ta xhoonal. Jo’ tixye aawe li Musiq’ej, sik’ chan ru naru nakak’eheb’ chi tz’aqonk lix k’ihaleb’ li komon sa’ li tzoleb’aal chixwotzb’al lix na’leb’eb’ ut lix k’oxlahomeb’.