Krishti dhe i Riu Pasanik, nga Heinrich Hoffman

19–25 Korrik

Doktrina e Besëlidhje 81–83

Atje Ku “Shumë … Është Dhënë, Shumë … Kërkohet”

Mbani mend që anëtarët e klasës suaj po përjetojnë përvoja shpirtërore ndërsa studiojnë shkrimet e shenjta në shtëpi. Me lutje merreni parasysh se si ju mund t’i nxitni që të tregojnë përvojat e tyre për ta lartësuar njëri‑tjetrin.

Shënojini Mbresat Tuaja

Ftojini të Tregojnë

Ftojini anëtarët e klasës të zgjedhin një frazë nga secili prej seksioneve vijuese që do të përbënte një titull të mirë për atë seksion: Doktrina e Besëlidhje 81, 82 dhe 83. Përse i zgjodhën këta tituj?

Jepeni Mësim Doktrinën

Doktrina e Besëlidhje 81:5; 82:18–19

Secili prej nesh duhet të kërkojë “interesin e të afërmit” të vet.

• Përvijimi i mësimit të kësaj jave tek Eja, Më Ndiq – Për Individët dhe Familjet sugjeron pyetje për të përsiatur rreth vargut te Doktrina e Besëlidhje 81:5. Këto gjithashtu mund të përdoren si pyetje të mira për diskutim në klasën tuaj. Gjithashtu merrni parasysh të tregoni një përvojë vetjake kur u ndiet “[i] dobët” në ndonjë mënyrë dhe shërbimi i dikujt ju lartësoi ose forcoi. Anëtarët e klasës mund të kenë vetë përvoja të ngjashme për të treguar. Ju gjithashtu mund të shikoni materialin filmik “Works of God” [“Veprat e Perëndisë”] (ChurchofJesusChrist.org) që t’i frymëzoni anëtarët e klasës për t’i shërbyer njëri‑tjetrit. Ju mund të lexoni edhe thënien e Presidentit M. Rasëll Ballard te pjesa “Burime Shtesë”.

• Merreni parasysh t’u kërkoni anëtarëve të klasës të studiojnë vargjet te Doktrina e Besëlidhje 82:18–19, duke kërkuar parimet që i ndihmojnë të kuptojnë qëllimet dhe bekimet e shërbimit ndaj të tjerëve. Më pas lërini të tregojnë atë që mësojnë. Ju gjithashtu mund të shfaqni materialin filmik “Teachings of Thomas S. Monson: Rescuing Those in Need” [“Mësimet e Tomas S. Monsonit: Shpëtimi i Njerëzve në Nevojë”] (ChurchofJesusChrist.org). Si janë anëtarët e lagjes së Peshkopit Monson shembuj të asaj që jepet mësim te vargjet 18–19?

Doktrina e Besëlidhje 82:8–10

“Unë, Zoti, lidhem kur ju bëni çfarë ju them.”

• Për t’i ndihmuar anëtarët e klasës që ta kuptojnë marrëdhënien ndërmjet bindjes sonë të vullnetshme dhe bekimeve të premtuara nga Perëndia, ju mund të lexoni te Doktrina e Besëlidhje 1:37–38; 82:10; 130:20–21 së bashku ose në grupe të vogla. Çfarë na mësojnë këto shkrime të shenjta rreth Zotit? Ndoshta anëtarët e klasës mund të renditin fjalët që e përshkruajnë karakterin e Tij, nisur nga këto vargje.

• Pasi të lexojnë vargun 10, anëtarët e klasës mund të flasin rreth asaj që Zoti na ka premtuar dhe mënyrës se si Zoti i ka mbajtur premtimet e Tij. Historia e treguar nga Motra Virxhinia H. Pirs që gjendet te pjesa “Burime Shtesë” mund t’i ndihmojë anëtarët e klasës të kuptojnë se Zoti na bekon në përputhje me vetë urtësinë e Tij, jo gjithmonë në mënyrën që e duam apo e presim.

• Çfarë mësojmë nga Doktrina e Besëlidhje 82:8–10 rreth arsyes përse Ati Qiellor na jep urdhërime? Ndoshta anëtarët e klasës mund të gjejnë ide në këto vargje që t’i përdorin për të ndihmuar një mik/e ose një fëmijë që mendon se urdhërimet janë kufizuese (shikoni edhe materialin filmik “Blessed and Happy Are Those Who Keep the Commandments of God” [“Të Bekuar dhe të Lumtur Janë Ata që i Zbatojnë Urdhërimet e Perëndisë”] ChurchofJesusChrist.org). Ose ata mund të tregojnë përvoja që u kanë mësuar t’i shohin urdhërimet si bekime.

Burime Shtesë

Feja e pastër.

Presidenti M. Rasëll Ballard dha mësim:

“Në dishepullimin tonë ne kemi shumë kërkesa, shqetësime dhe detyra. Gjithsesi, disa veprimtari duhet të jenë gjithmonë në thelbin e anëtarësisë sonë në Kishë. ‘Prandaj’, urdhëroi Zoti, ‘ji besnik; qëndro në detyrën që të kam caktuar; ndihmo të dobëtit, ngri duart që varen poshtë dhe forco gjunjët e këputur’ [Doktrina e Besëlidhje 81:5; theksimi i shtuar].

Kjo është Kisha në veprim! Kjo është feja e pastër! Ky është ungjilli në kuptimin e tij të vërtetë kur ne ndihmojmë, ngremë dhe forcojmë ata që kanë nevoja shpirtërore dhe materiale! Bërja e kësaj gjëje na kërkon që t’i vizitojmë dhe t’i ndihmojmë ata [shih Jakob (Bibël) 1:27], që dëshmitë e tyre për besimin tek Ati Qiellor, Jezu Krishti dhe Shlyerja e Tij të nguliten në mënyrë të palëkundshme në zemrat e tyre” (“Dhurata të Çmuara nga Perëndia”, Ensign ose Liahona, maj 2018, f. 11).

Zoti na bekon sipas vetë mënyrave të Tij të mrekullueshme.

Motra Virxhinia H. Pirs, ish‑anëtare e Presidencës së Përgjithshme të Të Rejave, tregoi rreth një gruaje e cila shqetësohej për fëmijët e saj që ishin larguar nga ungjilli. Ajo caktoi një synim ambicioz që ta shtonte frekuentimin në tempull dhe u ndie e sigurt se Zoti do ta nderonte këtë sakrificë domethënëse duke i ndryshuar zemrat e fëmijëve të saj. Gruaja raportoi:

“Pas dhjetë vitesh frekuentimi të shtuar të tempullit dhe lutjeje të vazhdueshme, më vjen keq të them se zgjedhjet e fëmijëve të mi nuk kanë ndryshuar. …

Por unë kam ndryshuar. Unë jam një grua e ndryshme. … Kam hequr dorë nga kufizimet që kam vendosur për kohën time dhe jam në gjendje të kem besim të madh te Zoti. … Pritshmëritë e mia kanë ndryshuar. Në vend që të pres që të ndryshojnë fëmijët e mi, unë pres për këto mëshira të dhembshura, të shpeshta dhe jam plot mirënjohje për to. … Zoti vepron në mënyra të mahnitshme dhe unë vërtet jam e mbushur me paqen që ia tejkalon çdo zgjuarsie” (në “Prayer: A Small and Simple Thing”, At the Pulpit [2017], f. 288–289).

Përmirësimi i Mësimdhënies Sonë

Ftojeni rininë të jetë pjesë e mësimit tuaj. Jepini rinisë mundësi për t’i dhënë mësim njëri‑tjetrit. Dëgjimi i dëshmive ose përvojave të njëri‑tjetrit mund të jetë shumë ndikues. Sipas nevojës, ndihmojini të rinjtë dhe të rejat që të përgatiten të japin mësim dhe tregojuni atyre se çfarë do të thotë të japin mësim sipas mënyrës së Shpëtimtarit (shih Mësimdhënia sipas Mënyrës së Shpëtimtarit, f. 27–28).