2–8 agosto

Tzolʼlebʼ ut Sumwank 85–87

“Xaqlinqex sa’eb’ li na’ajej sant”

Maak’oxla naq tento taawoksi chixjunil li raqal—chi moko li tasal—re li Tzol’leb’ ut Sumwank sa’ li Dominkil Tzoleb’aal. Kanab’ li Musiq’ej chixk’amb’al aab’e ut chak’e reetal k’a’ru te’xye li komon naq aajel ru choq’ re lix yu’ameb’.

Tz’iib’a li nakak’oxla

Xkanab’ankileb’ chi wotzok

Eb’ li komon naru te’xsik’ sa’ Tzol’leb’ ut Sumwank 85–87 junaq aatin malaj ch’ol aatin li te’xk’oxla naq aajel ru choq’ reheb’ (maare junaq li ak juch’b’il sa’eb’ lix loq’laj hu). Kanab’eb’ chixtz’iib’ankil li aatin malaj ch’ol aatin a’an chiru li pizarron, ut te’xsik’ ru junjunq re te’aatinaq chirix.

Xk’utb’al li tzolʼlebʼ

Tzol’leb’ ut Sumwank 85:6

Li Musiq’ej na’aatinak rik’in jun “ch’ina xyaab’ kuxej li q’un na’aatinak.”

• Sa’ Tzol’leb’ ut Sumwank 85:6, li profeet aj Jose Smith kixch’olob’ chan ru naq ki’aatinaak xb’aan li Musiq’ej. K’a’ru naqatzol chirix li Santil Musiq’ej sa’ li raqal a’an? Naru taakanab’eb’ li komon chixjultikankileb’ hoonal b’ar wi’ ke’aatinaak xb’aan li Musiq’ej—chan raj ru te’xch’olob’ li numsihom a’an? Naru nakataweb’ xkomon lix ch’olob’ankil sa’eb’ li raqal a’in reheb’ li loq’laj hu: Lukas 24:32; Mosiah 5:2; Alma 32:28; Helaman 5:30; Tzol’leb’ ut Sumwank 6:22–23; 11:12–13.

• Ma nachal sa’ laa k’a’uxl junaq ch’ina k’anjel re xk’utb’al malaj xk’utb’esinkil lix ch’ina yaab’ xkux li Musiq’ej li q’un na’aatinak? Maare naru taapatz’ re anihaq naq tixtoch’ junaq li loq’laj son sa’ xyaalal naq eb’ li komon te’ok sa’ li tzoleb’aal. Eb’ li komon naru te’aatinaq chirix k’a’ru xe’reek’a xb’aan li son ut chirix xch’a’ajkil raj rab’inkil wi ta wan li choqink aran. A’an naru naxtikib’ junaq aatinak chirix li choqink sa’ li qayu’am li naxram chiqu rab’inkil li ch’ina xyaab’ kuxej li q’un na’aatinak. Eb’ li komon naru te’xye li k’a’ru neke’xb’aanu re xk’eeb’aleb’ xch’ool chirab’inkil li Musiq’ej—wankeb’ junjunaq li na’leb’ sa’ “Xkomon chik li k’anjeleb’aal.”

Tzol’leb’ ut Sumwank 86:1–7

Neke’ch’utub’aman li tiikeb’ sa’ roso’jikeb’ li kutan.

• Li ch’ina k’anjel a’in naru naxtenq’aheb’ li komon chixtawb’al ru li eetalil sa’ li jaljookil ru aatin chirix li trigo ut li yib’ aj pim: Tz’iib’aheb’ ch’ol aatin re li jaljookil ru aatin jo’ eetalil (qayehaq, “aj awinel re li iyaj,” “li yib’ aj pim naxlatz’ob’resi li trigo,” “lix xaq yoo chi moqk,” ut “xch’utub’ankil li trigo” [raqal 2–4, 7]) ut tz’iib’a ajwi’ li k’a’ru naraj naxye (qayehaq, “eb’ li apostol,” “li q’etok paab’aal,” “li k’ojob’ank wi’chik,” ut “xjultikankil li evangelio”) chiruheb’ kok’ setel hu ut k’eheb’ chiru li pizarron. Chirix a’an, eb’ li komon naru te’xtenq’a rib’ chixk’ulinkileb’ li eetalil rik’in li k’a’ru naraj neke’xye, a’ yaal li neke’xtzol sa’ Tzol’leb’ ut Sumwank 86:1–7 (naru ajwi’ neke’ril ru Mateo 13:37–43). K’a’ut naq aajel ru naq li Qaawa’ naxk’e chaq li k’utb’esinb’il na’leb’ a’in “eere laa’ex inmoos”? (raqal 1). K’a’ru li na’leb’ naqataw chirix li qak’anjel chiru li Qaawa’? (chi’ilmanq ajwi’ li raqal 11).

Tzol’leb’ ut Sumwank 87:2, 6, 8

Li tuqtuukilal natawman sa’eb’ “li na’ajej sant.”

Li santil ochoch a’an jun na’ajej sant b’ar wi’ naru naqeek’a lix rahom li Dios.

• Re xtenq’ankileb’ li komon chixtawb’al ru lix aajelil ru “xaqliik sa’eb’ li na’ajej sant,” naru taak’e xb’oqb’aleb’ chixyeeb’al junjunqeb’ li ch’a’ajkilal naqataw sa’ roso’jikeb’ li kutan. Naru neke’xtaw junjunq li eetalil sa’ Tzol’leb’ ut Sumwank 87:2, 6. Naru ajwi’ tex’aatinaq chirix chan ru naq lix b’oqom li Qaawa’ sa’ li raqal 8 naru natenq’an sa’eb’ li cha’ajkilal a’an. Naru neke’k’anjelak li patz’om a’in:

  K’a’ru wan xyaalal sa’ li aatin “xaqliik” sa’ li raqal a’an?

  K’a’ru nasanto’ wi’ junaq na’ajej?

  K’a’ru naru na’eek’asink re anihaq sa’ jun na’ajej sant?

  Chan ru naru naqak’e reetal naq ink’a’ too’eek’asiiq?

• Eb’ li komon maare te’raj xwotzb’al chirib’ileb’ rib’ junjunqeb’ reetalileb’ “na’ajej sant” ut k’a’ru nasantob’resink reheb’ (naru nakaye naq jun na’ajej sant moko ka’ajwi’ ta a’an xjayalil junaq na’ajej). Naru teetaw xkomon eena’leb’ sa’ li video “Permaneced en lugares santos” (ChurchofJesusChrist.org). Naq yooqeb’ chi aatinak chirix a’an, waklesi xch’ooleb’ chixyeeb’al k’a’ut naq eb’ li na’ajej a’an santeb’ choq’ reheb’. Chan ru naq eb’ li na’ajej a’an nokohe’xtenq’a chixtawb’al tuqtuukilal sa’ xyanq li xiwxiw sa’ roso’jikeb’ li kutan?

Xkomon chik li kʼanjelebʼaal

Sik’omaq “jun hoonal tuqtu ut ch’anch’o rajlal kutan.”

Li Hermana Vicky F. Matsumori, li kiwan choq’ aj tenq’ aj k’ehol na’leb’ sa’ li Jolomil Awa’b’ejil re li Tzoleb’aal reheb’ li Kok’al kixye li na’leb’ a’in: “Xb’aan naq li Musiq’ej junelik nayeeman naq a’an jun ch’ina xyaab’ kuxej li q’un na’aatinak, … aajel ru naq te’qataw li ch’anch’ookil hoonal sa’ li qayu’am. Li Qaawa’ naxye qe: “Kanab’omaq yalok, chenawaq naq laa’in Dios” [Salmos 46:10]. Wi naqasik’ junaq hoonal tuqtu ut ch’anch’o rajlal kutan b’ar wi’ ink’a’ yooq chi choqink li kaxmu, li ulul ch’iich’, li videojuegos, malaj xkomoneb’ chik li kok’ ch’iich’, naqak’e xhoonal li ch’ina xyaab’ kuxej li q’un na’aatinak chixk’eeb’al qe li k’utb’esinb’il na’leb’ ut chixk’eeb’al qaki’il b’eresinkil, qatuqtuukilal, ut xk’ojob’ankil qach’ool” (“Ayudar a los demás a reconocer los susurros del Espíritu,” Liahona, noviembre 2009, 11).

Xchaab’ilob’resinkil li qak’utum

Kawresi aawib’ rik’in xk’oxlankilebʼ li kristiaan. “Naq yookat chixkawresinkil aawib’, k’uub’ aana’leb’ a’ yaal jo’ li nakataw ru chirixeb’ li ani tzolb’ileb’ aab’aan. … Eb’ laj k’utunel li neke’k’utuk jo’ li Kristo moko ka’aj ta wi’ neke’xk’oxla chan ru te’k’utuq; k’eek’ookeb’ b’an xch’ool chixtenq’ankileb’ li komon chixkab’lankil lix paab’aal chirix li Jesukristo” (Li kʼutuk joʼ li Kolonel, 7).